AMUYEGHE MASO
Nongwa Yafiki Indyali Sikubayabanisya Fiyo Abandu?—Ngimba Ibaibolo Likuyoba Isyafiki?
Indyali sipangisye abandu bosa pakisu kyapasi ukuyabikana. Ilipoti limo ilya Pew Research Center ili lyabombiwe mu 2022 mfisu ifyakukindanakindana 19, lyayobile ukuti “abandu 65 pabandu 100 balibosa, bikwitikisya ukuti indyali sikupangisya abandu aba bikukonga ifipani ifyakukindanakindana ukuleka ukukolelana.”
Ngimba muketile nkighaba kyinu ukuti abandu bayabikene fiyo panongwa yakukindana pafyandyali. Nongwa yafiki fili bo ulu? Ngimba yilipo injila yakumasyila indamyo isi? Keta isi Ibaibolo likuyoba.
Ifindu ifi fikupangisya abandu ukuyabikana
Ibaibolo lyayobile ngani ukuti nkabalilo aka kikumanyiwa ukuti “mmasiku ghakubumalikisyo,” abandu bisakunangisyagha utuyilo utu tukupangisya ukuti kuye kwakutamya ukukolelana.
“Mmasiku ghakubumalikisyo potwisakwisagha utubalilo utupalapala. Namanga abandu bisakwiyighanagha bene, . . . basitakwighomola.”—2 Timoti 3:1-3.
Nalinga abandu bikughelaghela ukuti amaboma ghendesyeghe kanunu ifindu, loli isi sitikubombiwa. Abandu aba bikuya kukighaba kyakususya kukuya kukafu fiyo ukubombela pampene imbombo ni boma ukuti bamasye indamyo. Yonongwa yake ifi fikubombiwa lino, fyo ifi Ibaibolo lyayobile kale kunyuma.
“Abandu bamo bikukubilwa pasi pabulaghili bwabo.”—Undumbilili 8:9.
Loli Ibaibolo likuyoba muno indamyo isi sibaghile ukumalila. Likuyoba isya boma ili likulongosiwa numundu yumo, ili lisakumasya indamyo isi abandu bikwaghana nasyo.
Undongosi unnunu uyu ikupasikisya isya bandu
Ibaibolo likulingania isya ndongosi unnunu uyu isakumasya indamyo isi, uyu yo Yesu Kristu. Yesu ali namaka, ubulaghili kangi ikulonda fiyo ukuti abandu baye bakukolelana nabalutengano.
“Nkabalilo kake ubugholofu bulefukeghe itolo, lope nulutengano luyeghe lwingi.”—Salimo 72:7.
“Fyosa ifikolo fya bandu fimbombeleghe yuyo.”—Salimo 72:11.
Yesu yo ndongosi unnunu panongwa yakuti ikubinong’onela abandu kangi ikulonda fiyo ukubatula abandu, fiyofiyo abandu aba bikubabombela ifindu ifisita bugholofu.
“Namanga yo yuyo isakumpokagha untolwe apa linga ikukolela kumyake, na yu ndondo uyu akaya nuntuli nayumo. Isakubapakisyagha abaywelufu na bolondo, yo yuyo isakubupokagha ubumi bwa balondo. Isakubabanga ku bandu balusyobo na baghasi.”—Salimo 72:12-14.
Amumanye nyingi isyakufwana nu Bunyafyale bwa Kyala, iboma lyakumwanya ili undongosi wake yo Yesu. Amumanyile isi mubaghile ukubomba ukuti musayiwe namuno mubaghile ukubutulila Ubunyafyale ubu.
Ketelela ividiyo iyakuti, Kasi Ufumu wa Chiuta Ni Vichi?
enga inkhani iyakuti, “Ufumu wa Chiuta Ni Boma Lambura Vimbundi.”