AMUYEGHE MASO
Ikisu Kikonangika—Ngimba Ibaibolo Likuyobapo Isyafiki?
Mu lipoti ili lyasokile pa 4 Epulelo, 2022 ilyakuyoba isyakuchenja kwa kabalilo, António Guterres, uyu yo ndembi wakabughatila ka United Nations ayobile ukuti: “Abandu bikubomba ifindu ifi fikupangisya ukuti akabalilo kachenjeghe mwanakalinga fiyo. Utwaya utukulumba tukwisula fiyo na misi agha ghikuteka. Kukokya fiyo. Kukubombiwa umbelo wamaka fiyo. Mmalo mingi amisi ghatikwaghiwa. Uluko lwingi ulwafyakumela ni finyamana fyandile ukumalika. Tutikuyoba itolo isi, loli linga ifisu fitikubombapo nasimo, isi syo sikuya pakubombiwa ukufwana na isi abasayansi bikuyoba.”
Inyuzipepala yimo yayobile ukuti: “Abasayansi bikuyoba ukuti mfyinja ifi fikwisa, pabupipi amalo ghosa aghakusungilako ifindu fya kipeliwa 423 agha ku United States, ghisakonangiwa panongwa ya kuchenja kwa kabalilo fiyofiyo ukokya. Ifindu fimo bo umoto nu kuteka kwa misi, ukusungunuka kwa misi agha ghakomile, ukwisula fiyo kwa misi gha munyanja nu kokya fiyo, fyo ifi fikuya pakubombiwa kangi fifwene ni findu ifyakutilisya ifi tukubelenga mu Baibolo.”—“Flooding Chaos in Yellowstone, a Sign of Crises to Come,” The New York Times, June 15, 2022.
Ngimba indamyo yakonangika kwa kipeliwa yibaghile ukumalika? Linga yibaghile ukumalika, yonani abaghile ukuyimasya? Keta isi Ibaibolo likuyoba.
Ibaibolo lyayobile ngani isyakonangika kwa kipeliwa
Ibaibolo likuyoba ukuti Kyala ikuya “pakubapyuta aba bikukipyuta ikisu.” (Ubusetuli 11:18) Ivesi lya mu Baibolo ili likutumanyisya ifindu fitatu:
1. Ifyakubombiwa fya bandu fikuya pakonanga ikisu.
2. Ukonangika kwa kisu kukuya pakumalika.
3. Kyala yo uyu ikuya pakumasya indamyo yakonangika kwa kipeliwa komma abandu.
Ikisu kisakuya kyakufighililiwa
Ibaibolo likuyoba ukuti ‘ikisu kyo kikuyagha bo mumo kyayilile.’ (Undumbilili 1:4) Abandu bikuya pakwikalamo kwa bwila na bwila.
“Abagholofu bo bisakukikabagha ikisu, kangi bisakwitughalagha mumo bwila na bwila.”—Salimo 37:29.
Ikisu kisakuya kangi kinunu.
“Ulungalangala lwisakusekelagha, nubulenge bwisakubalagha nkisu ikyumu.”—Yesaya 35:1.