Abandu bingi bikupasya nifyakubombiwa fya bandu ifi fikonanga ikisu kyapasi kangi na fyosa ifi filimo. Ukufwana na ifi abakalyoto bamo bafyaghile bo bikufufuza, ifi abandu bikubomba pakabalilo aka, fikubika pangozi ubumi bwa findu fingi kangi ifyabumi fimo fisyele panandi ukumalika.

 Ngimba abandu bikuya pakukindilila ukonanga ikisu? Pamo bikuya pakuchenja nukwanda ukubomba ifindu ifi fikuleka ukonanga ikipeliwa?

 Abakalyoto bingi bali nulusubilo losa ukuti abandu babaghile ukufighilila ikisu nukuleka ukubomba ifindu ifi fibaghile ukonanga ikipeliwa. Abandu abangi aba bope bikufufuza bikususya ifundo iyi kangi abene bikuti, pikulondiwa ukuchenja ifindu fingi pakabalilo kamokene ukuti abandu baleke ukonanga ikisu. Ifindu ifi fikulondiwa ukuchenja fikongelelapo:

•   Ukuchenja muno abandu bikubombela pakupwelelela ikisu, imipiki, amalo agha ghalimo amisi mingi fiyo, na ba sumbi.

•   Ukupanga injila isingi isya bulimi kangi ninjila isingi isyakupangila amagesi.

•   Ukuchenja injila isyakupangila ifyakulya kangi muno abandu babaghile ukufyaghila ifyakulya nukulya fiyo ifyakulya ifyakumela kangi bachepesyeko ukulya inyama ni niswi. Ifi fikuya pakutula ukuti balyeghe panandi nukuleka ukonanga fiyo ifyakulya.

•   Ukwitikisya ifundo iyakuti, ukuti umundu aye nu bumi ubununu fitikweghela ubwingi bwa katundu uyu ali nawe.

 Ngimba umwe mukwinong’ona isyafiki? Ngimba sibaghile ukubombiwa ukuti amaboma, aba mabizinesi nu mundu aliwesa pamwene ukuti bakolelane kimokyene pa nkhani iyi? Pamo mukuketa ukuti fikabaghila ukubombiwa panongwa yakuti abandu bapafu, bikwiyinong’onela bene kangi bakaya nafyo nimbombo ifya muno ifindu fikuya pakuyila nkyeni?—2 Timoti 3:1-5.

 Ibaibolo likutusimikisyila ukuti ku nkyeni uku ifindu fikuya pakuya kanunu nkisu. Likulingania inongwa iyi abandu pabene bakabaghila ukufwanisya ukukipoka ikisu, kangi likuyoba mwakupilikiwa kanunu ifindu ifi fikulondiwa ukuchenja naloli. Likuyoba kangi muno fisakwendela ukuti ifindu fichenje.

 Inongwa iyi abandu pabene bakabaghila ikukipoka ikisu. Yehova a Kyala apelile ikisu kyapasi, kangi abapele abandu ubudindo bwa kukipwelelela. (Ubwandilo 1:28; 2:15) Abene bayagha pakufwanisya imbombo iyi Umpeli wabo abapele linga balitikisye ukuti abalongosyeghe nukupilikila indaghilo syake. (Isya Mbupingamu 20:24) Mmalo mwake, abene bakanile ukumpilikila Yehova nukusala ukuti bilongosyeghe bene. (Undumbilili 7:29) Abandu pabene bakabaghila ukukipwelelela ikisu, kangi ifindu finandi itolo ifi fikughelaghela ukuti bakipoke ikisu fitikutula nakamo.—Isya Mbupingamu 21:30; Yeremiya 10:23.

 Ukuchenja uku kukulondiwa. Kyala ikulonda ukuti abandu bangonangagha ikisu. (Ubusetuli 11:18) Umwene atikuya pakughachenja amaboma gha bandu agha ghikonanga ikisu, loli ikuya pakughasosyapo. (Ubusetuli 21:1) Pakifukwa iki, Yehova ikuti: “Keta, fyosa nikufipela fipya.”—Ubusetuli 21:5.

 Isi sisakubombiwa ukuti ifindu fichenje. Yehova isakusosyapo amaboma ghosa agha bandu nu kubikapo iboma lyake ilyakumwanya ili likukoleliwa ukuti Ubunyafyale bwa Kyala. Iboma ili, Yesu Kristu yo isakuya ndaghili wake, kangi lisakulaghila pa kisu kyosa.—Danieli 2:44; Matai 6:10.

 Ubunyafyale bwa Kyala bukwisa pakubamanyisya abandu ukuti bendeleghe ifundo syabugholofu isya Kyala. Linga abandu bisakummanya kanunu Umpeli wabo nu kukonga indaghilo syake, kwisakuya kupepe ukuti basikale kanunu kisita konanga ikipeliwa. (Yesaya 11:9) Ibaibolo likulingania muno iboma lya Kyala lisakubatulila abandu ukuti bikaleghe ubumi ubununu kisita ukonanga ikisu. Iboma ili likwisa kubomba ifindu ifi:

•   Ukubapa abandu bosa ifyakulya ifyakufwana.—Salimo 72:16.

•   Ukughomokesyapo ifindu ifi fyonangike pa kisu.—Yesaya 35:1, 2, 6, 7.

•   Ukuketesya ukuti abandu ni finyamana fikwikala kanunu.—Yesaya 11:6-8; Hoseya 2:18.

•   Ukusosyapo ingozi syakipeliwa.—Marko 4:37-41.

 Musimanye ukuti Ubunyafyale bwa Kyala bukuya pakutwala ifindu ifi mwalululu. Ukuti mumanye nyingi, belenga inkhani ya mutu wakuti “Ngimba Ubunyafyale bwa Kyala Bukuya Pakwanda Ndili Ukulaghila Ikisu Kyapasi?”