Ngimba Abandu Babaghile Ukufwana pa Nkhani Yakuya ni Kyuma?
Mfisu fingi, abandu bingi bikupanga ifibonesyelo mmisebo panongwa yakuti bikuketa ukuti pa nkhani ya kyuma batikufwana na binabo. Indamyo isi syabalile fiyo panongwa ya mbungo ya COVID-19 iyi yapangisye abandu bingi ukuleka ukuya balusekelo panongwa yakukanisiwa ukubomba ifindu fimo, ukuleka ukuya ni ndalama, ifyakulya ni findu ifingi, kangi ukutoliwa ukwambilila ubutuli ubwakulondiwa ubwa ku kipatala isi syapangisye ukuti paye ukukindana ukunywamu pakati pa abakabi na balondo.
Ngimba indamyo ya fya kyuma iyi yikupangisya ukuti abandu batamiweghe fiyo yikwisa kumalika? Ena. Ibaibolo likulingania isi Kyala ikuya pakubomba ukuti amasye indamyo isi tukwaghana nasyo.
Indamyo ya fya kyuma iyi Kyala isakuyimasya
Indamyo: Abandu batoliwe ukubika iboma ili libaghile ukuntula umundu aliwesa ukuya nifyakulondiwa pa bumi.
Muno indamyo iyi yisakumalikila: Kyala isakusosyapo amaboma gha bandu nu kubikapo iboma lyake, ili likukoleliwa ukuti Ubunyafyale bwa Kyala. Ubunyafyale ubu bwisakulaghilagha ikisu kyosa kyapasi ukufuma kumwanya.—Danieli 2:44; Matai 6:10.
Ifyakukongapo fyake: Panongwa yakuti Ubunyafyale bwa Kyala bwisakulaghilagha pa kisu, bwisakufwanisya ukumpa umundu aliwesa ifyakulondiwa pa bumi bwake. Abandu batisakutamiwagha nu bulondo pamo ukwiyaya ukuti bikuya pakutamiwagha. (Salimo 9:7-9, 18) Mmalo mwake, bisakuyagha balusekelo na isi bikubomba kangi abene na ba mumbumba yabo bisakwikutisiwagha ni fyakukongapo ifya mbombo iyi babombile. Ibaibolo lifingile ukuti: “Abandu bisakuyengagha inyumba nukwitughala mumo, atisakwitughalamo yumo uyungi. Bisakubyalagha amafilu kangi nukwikyela nubwalwa bwa seke syake, atisakunwagha umundu uyungi.”—Yesaya 65:21, 22.
Indamyo: Abandu bakabaghila ukwepuka ku ndamyo isi sibaghile ukubapangisya ukuti batamiweghe pamo ifindu ifi fibaghile ukupangisya ukuti baleke ukuya nifyakulondiwa pa bumi.
Muno indamyo iyi yisakumalikila: Ukwendela mu Bunyafyale bwake, Kyala isakusosyapo kilikyosa iki kikupangisya ukuti abandu batileghe kangi bangafighililiwagha.
Ifyakukongapo fyake: Linga Ubunyafyale bwa Kyala bwandile ukulaghila, abandu batisakwaghanagha kangi ni ndamyo isi sikubapangisya ukuti abene pamo imbumba syabo sileke ukuya nifyakulondiwa pa bumi. Mwakifwanikisyo, kutisakuyako ubwite, injala, pamo imbungo isyakwambukila. (Salimo 46:9; 72:16; Yesaya 33:24) Kyala ikuti: “Abandu bangu bisakutengana itolo abasita kupasyako nakandu kamo, tope nutwaya twabo twisakuyagha yonjolo itolo nukutengana.”—Yesaya 32:18.
Indamyo: Utubalilo twingi abandu bikwiyinong’onela bene kangi bikubanyoza abinabo.
Muno indamyo iyi yisakumalikila: Abandu aba bisakwingila mu Bunyafyale bwa Kyala, bisakumanyilagha muno babaghile ukunangisyila ulughano ku binabo ukukinda muno biyighanile bene.—Matai 22:37-39.
Ifyakukongapo fyake: Linga Ubunyafyale bwa Kyala bwandile ukulaghila, aliwesa isakunkongagha Kyala pa nkhani yakunangisya ulughano, ulu “lutikulonda tu twake twene.” (1 Bakorinti 13:4, 5) Ibaibolo likuyoba ukuti: “Nkyamba kyangu ikikemo mutisakuyamo nakimo ikya kukifulasya ikinine pamo ukukighogha namanga bo mumo amisi ghikwisulila munyanja, mo mumo kyope nikisu kisakwisulilagha nu bumanyi bwa Yehova a Kyala.”—Yesaya 11:9.
Ibaibolo likulingania ukuti tuli mmasiku aghakubumalikisyo gha kisu ikibibi iki kangi mwalululu Kyala isakufwanisya isi afingile isyakusosyapo indamyo isi sikwisa panongwa ya bulondo. b (Salimo 12:5) Loli pakabalilo aka, ifundo sya mu Baibolo sibaghile ukubatula ukuti mwifimbilisyeghe indamyo isi sikwisa panongwa ya bulondo. Mwakifwanikisyo, keta inkhani iyakuti “Isi Mubaghile Ukubomba Ukuti Mwikaleghe Ubumi Ubusita Kulonda Fingi” kangi iyakuti “Tikwenera Kuwona Ndalama Mwakwenelera.”
a Yehova yo ngamu ya Kyala ukufwana namuno Ibaibolo likuyobela.—Salimo 83:18 NWT.
b Ukuti mumanye inongwa iyi mukulondiwa ukulisubila Ibaibolo, keta inkhani iyakuti “Baibolo Ni Buku Ilo Muli Unenesko.”