Ngimba Katangale uyu Amaboma Ghikubomba Isakumalika?
Katangale uyu ikubombiwa na balaghili ba kisu yo ndamyo ya pa kisu kyosa kyapasi kangi isi sikutwala indamyo nyingi. a Mwakifwanikisyo, pakabalilo ka mbungo ya COVID-19, abakulumba bafisu ifyakukindanakindana bayagha ninongwa panongwa iyakuya bakabi mwakwegha indalama isi abandu babikagha ukuti situle abandu pakabalilo ka mbungo. Panongwa yakatangale abandu batoliwagha ukubwagha ubutuli bwa ku kipatala ubu balondiwagha, isi syapangisye abandu bingi ukuti batamiwe nu kufwa.
David Cameron uyu ali nkulumba wa kisu kya ku United Kingdom, ayobile ukuti: “Katangale ndamyo nywamu fiyo iyi yikusofania abandu kangi ifisu fyosa fili pa ndamyo. Isi sikunangisya ukuti ifisu fyosa fili na bandu aba bikwandisya katangale.
Loli, tubaghile ukuya nulusubilo ukuti mwalululu katangale uyu ikubombiwa pa kisu ikuya pakumalika. Nongwa yafiki? Keta isi Ibaibolo lyayobile isyakufwana na isi Kyala isakubomba.
Nongwa yafiki tukumanya ukuti Kyala isakubombapo simo ukuti amasye katangale
Ibaibolo likuyoba amasyu gha Kyala aghakuti: “Yehova ikuyoba ikuti, Une mbughanile ubulongi bwa mbugholofu, kangi nkubengile ukubangalila abandu, nububombambibi bosa.” b (Yesaya 61:8) Linga abandu bikutamiwa nifyakubombiwa fya bandu abangi, Kyala ikumanya fyosa. (Isya Mbupingamu 14:31) Umwene afingile ukuti: “Papo bikumpupa undondo, kangi yope mfweye (undondo) ikwilumbusya lilino po ndi pakusumuka nikumbikagha mbuyo ubununu ubu ikubunyoywa.”—Salimo 12:5.
Ngimba Kyala isakubomba isyafiki? Mmalo mwakughachenja amabunyafyale agha ghalipo, umwene isakulibikapo iboma lyake ilyakumwanya ili likukoleliwa ukuti “Ubunyafyale bwa Kyala.” (Marko 1:14, 15; Matai 6:10) Ibaibolo likuti: “Kyala isakubwimika ubunyafyale ubu butisa kumalikamo siku, nayumo atisa kubutolamo, ubunyafyale bububu ubwene bo bwisakubupalaghania ubunyafyale bosa bula, kangi bwisakuyangako bwila na bwila.” (Danieli 2:44) Ukwendela munjila iyi, Kyala isakusosyapo indamyo isi tukwaghana nasyo lino.
Iboma ili Katangale Atisakuyako
Ngimba tukumanya bulebule ukuti Ubunyafyale bwa Kyala butisakumalika? Keta ifyakukongapo ifi.
1. Amaka. Ubunyafyale ubu bukwambilila amaka ukufuma kwa Kyala umwene maka ghosa.—Ubusetuli 11:15.
Nongwa yafiki kwakulondiwa fiyo ukuti ifindu fichenje: Ukuti ghabombe imbombo syabo, amaboma gha bandu ghikusubila indalama sya bandu isi bikubapa. Isi sikwandisya katangale nu buhiyi. Loli Ubunyafyale ubu bukutuliwa na Kyala umwene maka ghosa, akabalilo kosa bwisakubapa abandu kilikyosa iki bikulondiwa.—Salimo 145:16.
2. Undaghili. Kyala asalile Yesu Kristu ukuti yo uyu asalaghileghe Mbunyafyale ubu.—Danieli 7:13, 14.
Nongwa yafiki kwakulondiwa fiyo ukuti ifindu fichenje: Nalinga umundu yumo abaghile ukulaghila kanunu, abandu babaghile ukumpangisya ukuti abombe ifindu ifibibi. (Undumbilili 7:20) Mwakukindana na isi, Yesu anangisye ukuti umwene akabaghila ukwandisya katangale. (Matai 4:8-11) Kangi akabalilo kosa umwene ikunangisya ulughano lwanaloli ku bandu nu kubapwelelela.—Salimo 72:12-14.
3. Indaghilo. Indaghilo sya Bunyafyale bwa Kyala syanaloli, sikutwala ulusekelo ku bosa aba bikupilikila.—Salimo 19:7, 8.
Nongwa yafiki kwakulondiwa fiyo ukuti ifindu fichenje: Indaghilo sya bandu utubalilo twingi sikuya syakutamya. Isi sikwandisya katangale. Loli indaghilo sya Kyala syanaloli kangi syakutula. (Yesaya 48:17, 18) Kangi indaghilo isi sitikututula ukuti tunganeghe fiyo Yehova na bandu. (Matai 22:37, 39) Bwanaloli ukuti Kyala abaghile ukuketa kilikyosa iki kili mundumbula ya bandu kangi abaghile ukuketesya ukuti indaghilo sikubomba kanunu imbombo.—Yeremiya 17:10.
Tukubasuma ukuti amumanyile nyingi isya lufingo lwa mu Baibolo ulwakufwana na nkyeni muno katangale atisakuyamo.
Belenga inkhani iyakuti “Ufumu wa Chiuta Ni Boma Lambura Vimbundi” ukuti mumanye ififukwa fitatu ifi Ubunyafyale bwa Kyala butisakuya bwa katangale.
Ketelela ividiyo iyakuti, Ngimba Ubunyafyale bwa Kyala Findu Fiki? ukuti mumanye nyingi isyakufwana ni boma lya Kyala na isi lisakubomba pa kisu kyapasi.
Amughele ukumanyila Ibaibolo kisita ukulipila ukuti mukete muno mubaghile ukusayiwa na isi Ibaibolo lifingile.
a Idikishonale yimo yikuti ilisyu ilyakuti, “katangale” likusanusya ukubombela kabibi amaka agha abandu abangi bikubapa ukuti bapinduleghe bene.
b Yehova yo ngamu yeneko ya Kyala. (Salimo 83:18 NWT) Keta inkhani iyakuti “Kasi Yehova Ni Njani?”