Mu mwesi wa July 2022, ifisu fingi fyabikile ilipoti lyakuti kwandile ukupya fiyo ukukinda kunyuma kosa uku:

•   “Ikisu kya China kibikile ilipoti ilyakuti pabupipi amatawuni 70 ghikuya pakwaghana nindamyo yakupya fiyo.”—July 25, 2022, CNN Wire Service.

•   “Umoto ughu ghukwanda ukwaka wene mmatengele ku Europe ghutamisye fiyo panongwa yakupya fiyo uku kukukindilila ukubombiwa.”—July 17, 2022, The Guardian.

•   “Pasabata iyi yamalikagha, amatawuni mingi ku United States kwapile fiyo kangi indamyo iyi yapalamasisye nifighaba ifya mumbali mwa sumbi kubusokelo isuba na kufighaba fyakwitongo na kubwingililo isuba.”—July 24, 2022, The New York Times.

 Ngimba syosa isi sikusanusya isyafiki? Ngimba kwisakuya kwakutamya abandu ukwikala pa kisu iki? Ngimba Ibaibolo likuyobapo isyafiki?

 Ena. Ukupya fiyo kwa kisu kyosa kukufwanisya isi Ibaibolo lyayobile ngani ukuti fisakubombiwagha nkabalilo aka. Mwakifwanikisyo, Yesu ayobile ngani ukuti twisakuketagha “imbela lutende,” pamo “ifindu ifyakihesya ni fyakutilisya.” (Luka 21:11. Ukupya fiyo kwa kisu kukupangisya ukuti abandu bingi bande ukutila ukuti ifi abandu bikubomba fikuya pakonanga ikisu.

 Hayi. Kyala akipelile ikisu ukuti abandu bikalengemo kwa bwila na bwila. (Salimo 115:16; Undumbilili 1:4) Kyala atikuya pakumwitikisya umundu aliwesa ukuti onange ikisu iki, mmalo mwake ikuya “pakubapyuta aba bikukipyuta ikisu.”—Ubusetuli 11:18.

 Keta amabusololi mabili agha ghikunangisya isi Kyala afingile:

•   “Ulungalangala lwisakusekelagha, nubulenge bwisakubalagha nkisu ikyumu.” (Yesaya 35:1) Kyala atikuya pakwitikisya ukuti ikisu iki kiye ndungalala ulu nakimo kikabaghila ukwikalamo. Umwene ikuya pakutendekesya fyosa ifi fyonangike.

•   “Yo uwe kukipakisya ikisu, kangi kukipelela ukubotola.” (Salimo 65:9) Kyala ikuya pakukisaya ikisu kangi kisakuya paladaiso.

 Ukuti mumanye nyingi isyakufwana namuno ukuchenja kwa kabalilo kukufwanisyila ubusololi bwa mu Baibolo, belenga inkhani iyakuti “Isi Ibaibolo Likuyoba pa Nkhani ya Kuchenja kwa Kabalilo na isi Sikuya Pakubombiwa Nkyeni.”

 Ukuti mumanye nyingi isyakufwana na isi Ibaibolo lifingile isyakutendekesiwa kangi kwa kisu, belenga inkhani iyakuti “Ngimba Yonani Ikuya Pakukipoka Ikisu?”