Muyeghe Nabamanyani Komma Ukuya Mwibene—Ngimba Ibaibolo Libaghile Ukututula Bulebule?
Mu 2023, abafyakipatala bayobile ukuti ukuleka ukuya nabakwangala nabo ndamyo nywamu fiyo iyi yikulondiwa ukubombapo simo. Ngimba Indamyo iyi yibaghile ukumalika?
“Linga tukwipilika ukuti tuli twibene tukaya nabamanyani, tubaghile ukonanga ubumi bwitu kangi tukabaghila ukuya balusekelo.” Loli filipo ifi tubaghile ukubomba. Ngimba tubaghile ukubomba isyafiki? “Tubaghile ukwanda ukubomba ifindu ifinandinandi ukuti tukasyeghe ubumanyani bwitu nabangi.” a Dr. Vivek Murthy, U.S. surgeon general.
Tutikwipilika ukuti tuli twibene pene linga tukaya nabakwangala nabo. Bamo bikwipilika ukuti bakaya nabakwangala nabo nalinga bali pagulu lya bandu. Nalinga filipo fimo ifi fibaghile ukutupangisya ukuti twipilikeghe ukuti tuli twibene, loli Ibaibolo libaghile ukututula. Lili nubulongosi ubu bubaghile ukututula ukuti tukasye ubumanyani bwitu nabangi kangi ukuti tuleke ukwipilika ukuti tuli twibene.
Ubulongosi bwa mu Baibolo ubu bubaghile ukututula
Ukuyobesania kanunu. Isi sikongelelapo komma ukuyoba itolo kubinako muno kwipilikila loli ukubapilikisya abinako muno bikwipilikila. Linga tukubanangisya abinitu ukuti tubaghanile, tukuya pakukasya ubumanyani bwitu nabene.
Ifundo ya mu Baibolo: “Umundu wesa angatwinong’onagha tu twake twene, loli na tutwa banine.”—Bafilipi 2:4.
Muyeghe nabamanyani bingi. Muyeghe nubwighane bwakuya nabamanyani abakukindanakindana abakusi pamo abanandi ukukinda umwe pamo abandu aba bafumile mfikolo na mfisu ifingi.
Ifundo ya mu Baibolo: “Amutwighulileghe indumbula syinu.”—2 Bakorinti 6:13.
Ukuti mumanye nyingi isyamuno tubaghile ukukasyila ubumanyani bwitu nabangi, belenga inkhani iyakuti “Kupeza Anzathu Omwe Timalakalaka.”
a Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.