Mu lipoti lya Juni 2022, pulezidenti wa World Bank Group ayobile ukuti: “Untengo wa findu ghukukwela mwanakalinga fiyo kangi abandu bakaya nindalama syakufwana isyakulila ifindu.”

 Akabughatila ka International Monetary Fund kayobile ukuti, “Untengo wa mafuta gha galimoto ni fyakulya ghukwelile fiyo, kangi isi sibapalamasisye fiyo abandu aba bali mfisu ifilondo.”

 Ibaibolo likututula ukupilikisya inongwa iyi tukwaghana nindamyo ya kyuma, likutupa ubulongosi ubwamuno tubaghile ukwifimbilisyila kangi likutupa ulusubilo ulununu ulwamuno indamyo iyi yikuya pakumalikila.

•   Ibaibolo likuyoba ukuti akabalilo aka tukwikala gho “masiku ghakubumalikisyo.”—2 Timoti 3:1.

•   Yesu ayobile ukuti “imbela lutende,” pamo ifindu ifyakutilisya fikuya pakubombiwagha nkabalilo aka. (Luka 21:11) Abandu bikutila linga ifindu fikukwela untengo. Bikwiyaya muno ubumi bwabo bukuya pakuyila nkyeni kangi namuno bikuya pakubapwelelela aba mumbumba yabo.

•   Ibuku lya Ubusetuli lyayobile ngani ukuti mmasiku ghitu agha ifyakulya fisakukwela untengo. “Ndinkupilika ukuti isyu nkati. . . . likuyoba ukuti, ‘Imbepe ya ngano pamo imbepe itatu sya malesi sifwene nuntengo wa isiku limo.’”—Ubusetuli 6:6.

 Ukuti mumanye nyingi isya “mmasiku ghakubumalikisyo” kangi nu busololi bwa mu buku lya Ubusetuli, ketelela ividiyo iyakuti Ikisu Kichenjile Fiyo Ukwanda Itolo mu 1914 kangi belenga inkhani iyakuti “Kasi Ŵanalume Ŵanayi Awo Ŵakwera pa Mahachi Mbanjani?”

•   “Abandu bisakuyengagha inyumba nukwitughala mumo, atisakwitughalamo yumo uyungi. Bisakubyalagha amafilu kangi nukwikyela nubwalwa bwa seke syake, atisakunwagha umundu uyungi.”—Yesaya 65:21, 22.

•   “Ukuti imboto ya fyakulya yiyeghe nyingi nkisu, filefukeghe itolo pa fyamba.”—Salimo 72:16.

•   Yehova ikuti, “Papo bikumpupa undondo, kangi yope nu mfweye ikwilumbusya, lilino po ndi pakusumuka, nikumbika mbuyo ubununu.”—Salimo 12:5. a

 Mwalululu Kyala ikuya pakumasya indamyo isi tukwaghana nasyo, komma nkisu kimokyene itolo, loli pa kisu kyosa kyapasi. Ukuti mukete muno ikuya pakubombela isi, belenga inkhani iyakuti “Ngimba Abandu Babaghile Ukufwana pa Nkhani Yakuya ni Kyuma?”

 Nalinga po pakabalilo aka, Ibaibolo libaghile ukubatula muno mubaghile ukubombela nindamyo yakukwela untengo wa findu. Ngimba libaghile ukubatula bulebule? Lili nu bulongosi ubwamuno mubaghile ukubombela mwamahala nindalama syinu. (Isya Mbupingamu 23:4, 5; Undumbilili 7:12) Ukuti mumanye nyingi, belenga inkhani iyakuti “Mupwelelerenge Ndalama na Vinthu Ivyo Muli Navyo” na “Isi Mubaghile Ukubomba Ukuti Mwikaleghe Ubumi Ubusita Kulonda Fingi.”