Ikyinja kilikyosa kukubombiwa utusenyenda twingi fiyo. Nalinga twingi tukuya tunandinandi, loli tumo tukonanga fiyo katundu, tukwandisya indamyo isyakukindanakindana, kangi tumo tukughogha abandu. Utubalilo tumo tukwandisya tsunami uyu ikupalamasya fiyo ifighaba fya mumbali mwa sumbi nu kughogha abandu bingi aba mfighaba ifi. Ngimba Ibaibolo lyayobile ngani isya tusenyenda utu?

Isi sili mu nkhani iyi

•  Ngimba Ibaibolo lyayobile ngani ukuti kwisakuya utusenyenda?

•  Ngimba utusenyenda utu tukubombiwa lino tukufwanisya ubusololi bwa mu Baibolo?

•  Ngimba ubusololi bwa mu Baibolo ubwakuyoba isya tusenyenda bukutupalamasya bulebule?

•  Ubutungulu pa nkhani ya busololi bwa mu Baibolo nu tusenyenda

 Yesu ayobile isya tusenyenda mu busololi ubu bulembiwe mu Baibolo. Tubaghile ukubelenga isi Yesu ayobile mu mabuku matatu agha mu Baibolo ukuti:

 “Ikikolo kisakukisambukilagha ikikolo ikinine, bope nubunyafyale bwisakubusambukilagha ubunyafyale ubunine, yisakuyako injala nu tusenyenda mbuyombuyo.”—Matai 24:7.

 “Ikikolo kisakukisambukilagha ikikolo ikinine, bope nubunyafyale bwisakubusambukilagha ubunyafyale ubunine, twisakuyangako nu tusenyenda utu na utu, ninjala yope yisakuwagha.”—Marko 13:8.

 “Twisakuyangako utusenyenda utukulumba mbuyo bu bwingi, ninjala, nimbungo imbela filalilali.”—Luka 21:11.

 Yesu ayobile ngani ukuti kwisakuya “utusenyenda utukulumba” “mbuyombuyo” kangi pakabalilo kakako kwisakuyagha ubwite, injala nimbungo isyakwambukila. Linga ifindu fyosa ifi fikubombiwa, fisakuya fimanyikilo fyakuti tukwikala nkabalilo ka “kubumalikisyo bwa kisu” pamo ukuti “mmasiku ghakubumalikisyo.” (Matai 24:3; 2 Timoti 3:1) Linga tukuketa kanunu ubusololi bwa mu Baibolo, tukuketa ukuti “amasiku ghakubumalikisyo” ghalyandile mu 1914 kangi ghakali ghikukindilila mpaka lino.

 Ena. Ubusololi bwa Yesu ukongelelapo na isi ayobile pa nkhani ya tusenyenda, bukukolelana fiyo na isi sikubombiwa amasiku agha. Ukwanda itolo mu 1914, pabombiwe utusenyenda utwakukinda 1,950 kangi abandu abakukinda 2 miliyoni bafwile. a Keta ififwanikisyo finandi itolo ifi.

 2004—Indian Ocean. Akasenyeda kamaka akakufwana 9.1 kalyandisye tsunami uyu apalamasisye ifisu fingi kangi abandu pabupipi 225,000 bafwile.

 2008—China. Akasenyenda kamaka akakufwana 7.9 kalyonangile utwaya na matawuni, kangi kwapilikiwe ukuti abandu 90,000 baghoghiwe. Abangi 375,000 bafulele, kangi abandu amamiliyoni mingi bakali namalo aghakwikala.

 2010—Haiti. Akasenyenda kamaka akakufwana 7.0 kangi utusenyenda utungi utunandinandi, twaghoghile abandu abakukinda 300,000 kangi abandu abakukinda 1 miliyoni bakali namalo aghakwikala.

 2011—Japan. Akasenyenda kamaka akakufwana 9.0 aka kalyandisye tsunami, kaghoghile abandu pabupipi 18,500 nu kupangisya abandu bingi ukuleka ukuya namalo aghakwikala. Amashini aghakupanga amagesi mwakubombela imbombo nyukiliya ku Fukushima ghabwaghaywike, kangi isi syapangisye ukuti paye ingozi inywamu fiyo. Bo pakindile itolo ifyinja 10, abandu pabupipi 40,000 batoliwagha ukughomokela ku nyumba syabo isi syali pabupipi na mashini agha panongwa yakutila ukufulala.

 Ubusololi ubwa mu Baibolo ubwakuyoba isya tusenyenda bukututula ukumanya ifi fikuya pakubombiwa mwalululu pa nkyeni apa. Yesu atile: ‘Linga mukusibona sisisi po mwisemumanyeghe ukuti ubunyafyale bwa Kyala buseghelile.’—Luka 21:31.

 Ibaibolo likulingania ukuti Ubunyafyale bwa Kyala boma lyanaloli lyakumwanya ili Mwalafyale wake yo Yesu Kristu. Ubunyafyale ubu bo ubu Yesu abamanyisyagha aba bikunkonga ukuti babusumeghe.—Matai 6:10.

 Linga Ubunyafyale bwa Kyala bwandile ukulaghila pa kisu kyapasi, Kyala isakumasya ingozi syakipeliwa syosa, ukongelelapo nu tusenyenda ukuti tuleke ukubafulasya abandu. (Yesaya 32:18) Ikindu ikyakulondiwa fiyo kyo kyakuti, umwene isakubasubisya bosa aba bapalamasiwe nu tusenyenda utu tukubombiwa amasiku agha. (Yesaya 65:17; Ubusetuli 21:3, 4) Ukuti mumanye nyingi, belenga inkhani iyakuti “Kasi Ufumu wa Chiuta Uzamuchita Vichi?”