Yesu ababulile abamanyili bake ukuti: “mwisakuyagha baketi bangu . . . ukwakufika kuno kimalikile ikisu.” (Imbombo sya Batumiwa 1:8) Amasiku agha, Abaketi ba Yehova bikwiyipa fiyo ukufwanisya ululaghilo ulu. Loli ifighaba fimo ifya pa kisu iki, ukongelelapo ifighaba fimo ifinywamu ifi baliko abandu bingi, bakali bakambilila amasyu amanunu. Kangi mfisu fimo baliko Abaketi banandi fiyo. (Matai 9:37, 38) Ngimba tukubomba isyafiki ukuti tubafumukisye abandu bingi?

 Ukuti tupilikile isi Yesu atulaghile, Ikomiti ya Bubombeli iya Kabughatila Kakulongosya iya Baketi ba Yehova yikubatuma abamishonale kufighaba kuno kukulondiwa ubutuli pa kisu kyosa. Pakabalilo aka, balipo abamishonale 3,090 pa kisu kyosa. * Bingi mwa bamishonale aba babukile ku sukulu iyi yikumanyisya isya Baibolo, bo Isukulu iya Bafumusi ba Bunyafyale. Abamishonale bikwiyipa ukuleka akaya kabo nu kubuka ku fisu ifingi. Panongwa yakwiyipa, ukumanyisiwa kangi amaluso ghabo, abamishonale abasubiliwa aba bikutula ukufumusya amasyu amanunu kangi bikunangisya ikifwanikisyo ikinunu ku bamanyili abapya.

 Pa ofesi yiliyosa, Ofesi Yakuketesya Ababombi ba ku Filudi iyi yili pasi pa Dipatimenti ya Bubombeli yikubomba pampene ni Komiti ya pa Ofesi ukuti babapasikisyeghe abamishonale, bo ifindu ifi bikulondiwa, inyumba, ikipatala ni ndalama isi bikubapako ukuti bulileko ifyakulondiwa fyabo ifya isiku ni siku. Nkyinja kya bubombeli ikya 2020, Abaketi ba Yehova babombile amadola 27 miliyoni agha ku America ukubapasikisya abamishonale. Ndagha fiyo panongwa yabutuli ubu, bukutula ukuti abamishonale biyipeghe fiyo pambombo yabo nu fikasya ifipanga.

 Ngimba abamishonale batulile bulebule pambombo yakufumusya? Unkamu Frank Madsen uyu ikubombela mu Komiti ya Ofesi ku Malawi, ikuti: “Ubukifu na maluso gha bamishonale ghatulile fiyo ifipanga ukwanda kangi ukufumusya mfighaba ifi fyatamyagha ukufumusyako, bo kuno siliko inyumba isi sili ni mipanda na kuno bikuyoba injobelo isingi isyakihesya. Ukwiyula kwabo ukumanyila injobelo nu kusimanya inyiho sya kuno baliko syakukasya fiyo kangi bikubatula abakilumyana ukwinong’onelapo isya kwanda ububombeli bwa kabalilo kosa. Tukunndaghisya fiyo Yehova panongwa ya mbombo iyi abamishonale aba bikubomba.”

 Unkamu yumo uwa mu Komiti ya Ofesi nkisu kimo ikuti: “Abamishonale kifwanikisyo kinunu iki kikunangisya ukuti ababombi ba Yehova pa kisu kyosa bikukolelana. Nalinga abandu aba bakaya Baketi ba Yehova bikuketa ukuti tukukolelana nalinga tufumile mfikolo ifyakukindanakindana. Isi tukumanyila ukufuma mu Baibolo syo isi sikututula ukuti tuye pabukamu bwa pa kisu kyosa.”

 Ngimba abamishonale bikubatula bulebule abafumusi mfipanga? Unkamu Paulo uwa ku Timor-Leste, ikundaghisya fiyo imbumba yimo ya bamishonale iyi yatumisiwe ku kipanga kyabo, umwene ikuti: “Ikighaba kyitu kikupya fiyo. Nalinga ukuti abamishonale aba bafumile ku malo amatalalano, loli abene batikulonda ukuti ukupya uku kubatolesye ukufumusya. Akabalilo kosa nulubunju bikuyapo palukomano lwa kwitendekesya ukwingila mubufumusi. Utubalilo twingi ngubaketa bikughomokelako ku aba bikumanyila nabo pamusi, apa ulumu lukubala fiyo, kangi bikwingila mubufumusi namayolo. Babatulile abandu bingi ukumanyila ubwanaloli, ukongelapo une. Panongwa yakwiyipa nu kwiyula uku bikubomba pakumbombela Yehova, bikubakasya abakamu na balumbu nkipanga ukumbombela Kyala nindumbula yosa.”

 Ketti uyu yo mpayiniya wakabalilo kosa ku Malawi, ikukumbukila muno imbumba yimo ya bamishonale yabatulile pambumba yabo: “Pakabalilo aka abamishonale batumisiwe nkipanga kyitu, nali nimwene une nali Nketi m’mbumba yitu. Abamishonale aba balindulile fiyo, kangi bali bamanyani bitu fiyo. Ikifwanikisyo kyabo kyabatulile fiyo abanangu ukuketa ukuti ukumbombela Yehova kukumpangisya umundu ukuya walusekelo kangi wakwikutisiwa nifindu ifi ali nafyo. Ngubandaghisya fiyo abamishonale aba panongwa yakubakasya abanangu abalindwana batatu ukuti bande ubupayiniya bwa kabalilo kosa kangi pakabalilo aka undume wangu andile ukufika pangomano.”

 Ngimba abamishonale aba bikupasikiwa bulebule? Bikupasikisiwa nifyabube ifi fikubikiwa pambombo yitu iya pa kisu kyosa ukwendela munjila isi tukubombela pa donate.pr418.com. Tukubandaghisya fiyo panongwa ya fyabupe ifi mukubika.