Umwesi ghulighosa tukulonda ukuketelela amapulogilamu na mavidiyo agha ghikusoka pa JW Broadcasting. Loli abakamu bitu bingi aba ku Africa bakaya nulusako ulwakuketelela amapulogilamu agha pa Intaneti. Nongwa yafiki?

 Mfighaba fingi ku Africa Intaneti yikayako. Kangi kuno yikwaghiwa, yitikuya yamaka kangi yikwelile fiyo untengo. Mwakifwanikisyo, uwakwendela idela ku Madagascar apangile dawunilodi ipulogilamu ya JW Broadcasting iya mwesi ghumo ku malo ghamo kuno yiliko Intaneti. Alipile indalama isyakufwana amadola 16, isi ndalama nyingi fiyo ukukinda isi abandu bamo bikusyagha pasabata yumoywene. *

 Nalinga silipo indamyo syosa isi, loli pakabalilo aka abandu amamiliyoni mingi ku Africa babaghile ukuketelela JW Broadcasting kisita Intaneti. Ngimba babaghile ukuketelela bulebule?

 Ukwanda itolo mu 2017, JW Broadcasting yikubikiwa pa chanelo ya satellite pa TV ukuti aba bikwikala ku sub-Sahara Africa baye nulusako lwa kuketelela. Ichanelo iyi yikaya yakulipila, kangi yikuboneka kwa maawala 24, kwa sabata yosa, munjobelo 16.

 Ukuti sibombiwe isi, Abaketi ba Yehova bikulipila ukuti amapulogilamu ghabo ghabonekeghe pa chanelo iyi. Ichanelo ya pa satellite iyi bikubombela imbombo yikuboneka mfisu pabupipi 35 ifya ku sub-Sahara Africa. Bikulipila indalama isyakukinda amadola 12,000 pa mwesi. Akabalilo na kabalilo, bikulipila ichanelo iyingi indalama isyakongelela ukuti banangisye amapulogilamu agha ghikubombiwa akabalilo kakako. Isi sikutula ukuti abandu bingi baketelele ingomano sya kighaba pamo amapulogilamu aghapadela linga ku ofesi kwisile unhesya uyu afumile ku ofesi yitu inywamu.

 Abandu bingi, ukongelelapo aba bakaya Baketi, bikuketelela ichanelo ya JW pa satellite bali pakaya pabo. Loli abakamu bitu bingi bakabaghila ukufwanisya ukula ifindu ifi fikulondiwa ukuti baketeleleghe ichanelo iyi pa satellite. Ukuti batuliwe, Inyumba sya Bunyafyale isyakukinda 3,670 sipeliwe ubutuli bwa findu ifi fikulondiwa ukuti abakamu na balumbu baketeleleghe ichanelo iyi iya JW Broadcasting ku Nyumba sya Bunyafyale uko. Ifibombelo ifi pampene ni tilansipoti fikufwana amadola pabupipi 70 linga Panyumba ya Bunyafyale yilipo TV pamo iprojector. Linga ifibombelo ifi fikayapo, fyosa ifyakulondiwa fikufwana pabupipi amadola 530.

 Abakamu na balumbu bitu bikundaghisya fiyo panongwa ya chanelo iyi. Unkulumba yumo ku Cameroon ikuti: “Sifwene itolo ukuti tuli ndungalangala kangi twambilile amana.” Unkamu Odebode uwa ku Nigeria, ikuti: “Ukuya mbumba tukuketelela ichanelo iyi katatu pasabata. Abanangu bikuhoboka fiyo ukuketelela ichanelo iyi. Utubalilo tumo bikusuma ukuti twighule ichanelo ya JW.” Rose uyu yope wa ku Nigeria, ikuti: “Ndi walusekelo fiyo ukuti ichanelo ya JW pa satellite yingile m’malo mwa machanelo gha nkhani agha nalighanile ukuketelela. Linga ngetelile inkhani, napalamasiwagha fiyo na isi ngatelile kangi Bp yakwelagha. Loli lino ichanelo ya JW Broadcasting yakukasya fiyo kangi indumbula yangu yikuya m’malo linga nguketelela. Iyi yo chanelo ya pandumbula yangu. Kyabupe kyapadela fiyo ikyakufuma kwa Yehova.”

 Uwakwendela idela yumo ku Mozambique ayobile ukuti nkighaba kyake, Inyumba sya Bunyafyale sili na ifi fikulondiwa ukuti abakamu baketeleleghe ichanelo iyi. Abakamu ba mfipanga ifi bikufika pakabalilo akanunu, awala limolyene pamo ukukinda bo akabalilo kakali akangomano ukuti baketelele JW Broadcasting ukwendela pa satellite.

 Palukomano lwa mfisu ulwa mu 2019 ku Johannesburg, South Africa, babombile ichanelo iyi ukuti banangisye inkhani inywamu, ukongelelapo inkhani isi syayobiwe nu nkamu wa Nkabughatila Kakulongosya, ku fighaba fimo 9. Sphumelele, uyu wa mu Dipatimenti ya Broadcasting ku ofesi ya ku South Africa, ikuti: “Pabwandilo twanangisyagha inkhani ukwendela pa Intaneti. Loli ukuti fyende kanunu palondiwagha Intaneti yamaka kangi indalama syakulila amabandulo gha Intaneti. Ichanelo ya JW pa satellite yikaya yakulipilila kangi yili kanunu fiyo.”

 Ifyabupe fyinu ifi mukubika fikutula pambombo ya pa kisu kyosa, fikutula ukuti abakamu na balumbu bitu bingi ku Africa baketeleleghe ichanelo ya JW Broadcasting ukwendela pa satellite. Tukubandaghisya fiyo panongwa ya fyabupe ifi mukubika ukwendela munjila isyakukindanakindana isi sili pa donate.pr418.com.