Panongwa yakuti abandu amasauzandi mingi bikosiwa ikyinja kilikyosa, tukulondiwa kangi ukongelela amalo aghakwiputilapo. Ukuti isi sibombiwe, Idipatimenti ya Fyakuyenga pa kisu kyosa yapangile imbatiko yakuyenga pamo ukutendekesya amalo aghakwiputilapo aghakukinda 2,700 mu kyinja ikya bubombeli ikya 2020. *

 Kyakitima ukuti imbatiko iyi yasofanisiwe ni mbungo ya COVID-19. Ukuti tubafighilile abakamu na balumbu bitu kangi ukuti tupilikile indaghilo isi amaboma ghabikile, Ikomiti Yakufumusya iya Kabughatila Kakulongosya yimisye tasi imbombo nyingi isyakuyenga isi syabombiwagha pa kisu kyosa. Nalinga syali bo ulu, mu kyinja kya bubombeli ikya 2020, twayengile kangi ukutendekesya amalo aghakwiputilapo aghakukinda 1,700 bo imbungo yikali ukwanda. Ukongelela apa, imbombo inywamu isyakuyenga nu kutendekesya amaofesi isyakukinda 100 syamalisiwe. Keta muno imbombo sibili isi syamalisiwe muno sikubatulila abakamu na balumbu bitu.

 Ofesi ya ku Cameroon. Ofesi ya iyolo iyi yili ku Douala yali nandi fiyo kangi yalondiwagha ukuti yibe nywamu. Ikomiti Yakupanga amabuku yalinong’wine isyakutendekesya ofesi iyi, loli palondiwagha indalama nyingi ukukinda isi sibaghile ukwaghiwa linga babaghile ukulisya. Balinong’wine kangi isyakuyenga itolo ofesi iyingi pamo ukula itolo iyi yiyengiwe kale nu kuyitedekesya, loli fyosa ifi fyatoliwe.

 Pakabalilo aka fyosa ifi fyabombiwagha, abakamu bapilike ukuti kululu kwa Douala, iboma likulonda ukupanga unsebo kubupipi na malo ghitu ghamo agha tukupangilako ingomano. Isi syapangisye ukuti ku malo agha kuyeko amagesi na misi. Isi syo isi ofesi yalondagha ukuti fiyeko. Polelo Abankabughatila Kakulongosya balitikisye ukuti imbombo iyakuyenga ofesi imbya yandeko pa kighaba kimo ikya malo ghitu aghalukomano.

 Abaketi kangi na bandu aba bakaya Baketi babombelagha pampene imbombo iyakuyenga iyi, kangi isi syatulile ukuti tuleke ukumala akabalilo kangi ukonanga indalama nyingi. Imbombo iyi yikamalile indalama nyingi. Abakamu aba bikubombela pa Beteli, basamile ku ofesi imbya iyi bo imbungo ya COVID-19 yikali ukwanda.

 Pakabalilo aka abakamu wa ku ofesi ya ku Cameroon bali na malo amanunu fiyo aghakwikala kangi aghakubombela imbombo, kangi bikuketa ukuti ofesi iyi kyabupe kyakufuma kwa Yehova. Imbumba yimo yatile, “Tukulonda ukumbombela Yehova nindumbula yosa ukuti tunangisye ukuti tukundaghisya naloli ikyabupe iki.”

 Ofesi Yakusanusya Amabuku iya Tojolabal, ku Mexico. Kwa fyinja fingi, aba bikusanusya amabuku ghitu mu Kitojolabal babombelagha imbombo yabo ku ofesi ya Central America, iyi yili pabupipi ni tawuni inywamu ku Mexico. Loli Ikitojolabal kikuyobiwa fiyo ku Altamirano na ku Las Margaritas, ifighaba ifi fili pabulendo bwa makilomita pabupipi 1,000 ukufuma ku ofesi. Isi sikupangisya ukuti kuye kwakutamya ukuti aba bikubomba imbombo iyakusanusya bamanye muno abandu bikuyobela injobelo iyi. Ofesi yope yatamiwagha ukuti babaghe abakamu na balumbu aba mfighaba ifya pabupipi ukuti batulepo pambombo iyakusanusya kangi ukujambula amavidiyo ni findu ifingi munjobelo ya Kitojolabal.

 Isi syapangisye ukuti Ikomiti Iyakulemba iya Kabughatila Kakulongosya yinong’one isyakusamisya abakamu na balumbu aba bikusanusya ukuti babuke ku kighaba iki abandu bikuyoba injobelo ya Kitojolabal. Ukuti isi sibombiwe, ofesi yaketile ukuti kununu itolo ukula inyumba nu kuyitendekesya. Ukubomba isi kwali kununu ukukinda ukuyenga ofesi pamo ukupanga lenti amaofesi.

 Yumo mwa aba bikusanusya alingenie muno isi syatulile, atile: “Mu fyinja 10 ifi mbombile imbombo iyakusanusya pa ofesi, ngaghanapo ni mbumba iyi yikuyoba injobelo yangu mfighaba ifya pabupipi. Lino ofesi yitu yili ku kighaba iki abandu bikuyoba Ikitojolabal. Ngwaghana na bandu aba bikuyoba Ikitojolabal isiku lililyosa. Isi sindulile ukuti ngamanye amasyu mingi kangi ukuti nsanusyeghe ifindu ifyakupilikiwa kanunu.”

 Linga fibaghile ukwenda kanunu, mu kyinja kyabubombeli ikya 2021, tukulonda ukubomba imbombo isyakuyenga nu kutendekesya amaofesi aghakusanusyilako amabuku aghakufwana 75 na malo agha tukubombelako isukulu iyakumayisya Ibaibolo. Imbombo iyi yisakukindilila ukubombiwa ku maofesi 8 ukongelelapo ofesi imbya iya ku Ramapo, New York, kangi ukusamisya amaofesi agha ku Argentina na ku Italy. Padela pa isi, pikulondiwa ukuyengiwa Inyumba sya Bunyafyale isyakukinda 1,000, amalo aghakubombelapo ingomano aghakukinda 6,000 ghikulondiwa ukutendekesiwa kangi Inyumba sya Bunyafyale 4,000 isi sikulondiwa ukutendekesiwa.

 Ngimba indalama syakuyengela kangi isyakutendekesyela fyosa ifi sikufuma kughu? Unkamu Lázaro González, uyu ikubombela mu Komiti ya Ofesi ku Central America, alyamwile ilalusyo ili apa alinganie imbombo iyakutendekesya Ofesi Iyakusanusyilako Amabuku iya ku Tojolabal. “Mu kighaba kya ofesi yitu, tukaya ni findu fingi. Polelo kisita ubutuli ubwakufuma ku bakamu bitu, tukabaghile ukufwanisya ukuyenga ofesi iyakusanusyilako amabuku. Ifyabupe ifi abakamu bikubika pa kisu kyosa fyo ifi fikututula ukuti tufwanisye ukubasamisya aba bikubomba imbombo iyakusanusya ukuti bise mfighaba ifi abandu bikuyoba injobelo yabo. Tukubandaghisya fiyo abakamu bitu pa kisu kyosa panongwa ya butuli ubu bikubika.” Naloli, imbombo syosa isyakuyenga isi sikubombiwa panongwa ya fyabupe ifi mukubika ukuti fitule pambombo iya pa kisu kyosa, kangi fingi mwa fyabupe ifi fikubikiwa ukwendela pa donate.pr418.com.