Inyimbo kyabupe kyakuhobosya fiyo kyakufuma kwa Yehova. Sikututula ukuti twinong’oneghe kanunu, ukuchenja muno tukwipilikila nu kututula ukuti tuyeghe balusekelo. Mo muno sikuyila inyimbo sya mu JW Broadcasting. Bwanaloli ukuti inyimbo isi sikututula fiyo: sikututula ukuti tusegheleleghe pabupipi na Yehova.

 Ukufuma mu 2014, inyimbo isyakukinda 70 sisokile pa JW Broadcasting kangi lino simo mwa nyimbo isi sili munjobelo isyakukinda 500. Loli mubaghile ukwilalusya ukuti, ‘Ngimba yo nani uyu ikwimba inyimbo isi, kangi ngimba bikubomba bulebule ukuti basosye inyimbo?’

 Inyimbo sya pa JW Broadcasting bikupanga bo bakamu na balumbu aba bikuketesya isya nyimbo mu Dipatimenti iya Mavidiyo (Audio/Video Services), iyi Ikomiti Yakumanyisya ya Kabughatila Kakulongosya yikuketesya. Abakamu na balumbu abakufwana 13 bikutula pakwandisya inyimbo, ukuketa muno inyimbo sibaghile ukuyila, ukulemba imbatiko yake ni fingi ifi fikulondiwa. Mwakongelelapo, Ikomiti Yakumanyisya yibitikisye abakamu bamo abakwiyipa ukuti bope batulengepo pambombo iyi. Abakamu na balumbu aba bikupanga inyimbo, bikuketa muno inyimbo isi babaghile ukwimbila, kangi abangi bikwimba. Abakamu na balumbu aba bikubombela amaluso ghabo komma ukulonda ukuti bamanyiwe panongwa ya mbombo iyi bikubomba.

 Ngimba findu fiki fikubombiwa linga bikupanga inyimbo? Ikyakwanda, Ikomiti Iyakumanyisya yikusala Ilemba ilya mu Baibolo apa ifundo inywamu yikuya pakufumapo, na muno abandu babaghile ukwipilikila linga bikupilikisya ulwimbo ulo. Ukufuma apo abakamu na balumbu aba bikupanga ulwimbo nu kulemba amasyu ghake. Bikujambula iyi bapangile ukuti bakete muno yikupilikiwa. Ukufuma apo Ikomiti Yakumanyisya yikupilikisya inyimbo iyi yijamabuliwe nu kuyobapo apa yikulondiwa ukutendekesiwa. Ukufuma apo aba bikuketesya isya nyimbo bikuchenja ifindu fimo nu kujambula akabumalilo. Inyimbo isi sikujambuliwa mu malo aghakukindanakindana, ku ma ofesi ghitu pamo ku nyumba sya bandu.

 Ukuti bapange nu kujambula inyimbo isi, abakamu bikubombela amapulogilamu aghakukindanakindana agha pakompyuta. Kangi pikulondiwa ifyakwimbila, bo ifyakuchunila ukuti inyimbo yiyeghe yakuhobosya, amasipika na mayikilofoni. Imayikolofoni yimoyene yibaghile ukuliwa pandalama isyakufwana amadola 100 mpaka 1,000 agha ku America. Nkyinja kya 2020, indalama isyakufwana amadola 116,000 isya ku America twalyulile ifibombelo ifyakwimbila inyimbo.

 Ngimba tukubomba bulebule ukuti tubombele kanunu ifyabupe ifi abakamu na balumbu bikubika? M’malo mwakuya na bakamu na balumbu bingi pa Beteli aba bikuketesya isya nyimbo, tukubombela abakamu na balumbu aba bikwiyipa aba bali ntwaya twabo. Kangi m’malo mwakuti abakamu bingi biseghe pakujambula inyimbo, abakamu bikubombela ipulogilamu ya pa kompyuta iyi yikuya nifibombelo fingi ifyakwimbila inyimbo

 Abakamu na balumbu bighanile fiyo ukupilikisya inyimbo sya pa JW Broadcasting isi. Tara uyu ikwikala ku Germany, atile: “Inyimbo isi sikundula ukuti indumbula yangu yiyeghe m’malo linga nandile ukwiyaya. Linga ngupilikisya inyimbo isi munjobelo yangu sikufwana itolo ukuti Yehova anhagile.” Unkamu yumo uyu ikwikala ku Kazakhstan uyu ingamu yake yo Dmitry atile: “Nguhoboka fiyo ukupilikisya inyimbo isi panongwa yakuti umundu akabaghila ukutamiwa aminong’ono bo muno fikuyila linga ikupilikisya inyimbo sya kisu isi sitikukolelana ni fundo sya mu Baibolo. Kangi inyimbo isi sikundula ukuti ngasyeghe ubumanyani bwangu na Yehova.”

 Delia, wa ku South Africa, ikulingania muno ikwipilikila panongwa ya nyimbo isi, umwene atile: “Inyimbo sikundula ukuti ngasyeghe ulwitiko lwangu. Akabalilo kosa linga ndi nikitima pamo naghene ni ndamyo yimo, ngupilikisya inyimbo iyi yikufwana ni ndamyo yangu. Kangi utubalilo twingi ichuni ya nyimbo yikundula ukuti nipilikeghe kanunu!”

 Abandu bamo basighanile fiyo inyimbo isya pa JW Broadcasting. Lerato wa ku South Africa, atile: “Inyimbo bo iyakuti ‘Dziko Latsopano Lili Pafupi’ niyakuti ‘Charu Chiphya Icho Chizenge’ sikumbangisya ukuti niketeghe bo ndi nkabalilo aka ngumwambilila mama wangu ikusyuka ku bafwe. Linga akabalilo kosa ngupilikisya inyimbo isi, sikuboneka ukuti mama wangu ikubopela kwa une ukuti anhage.”

 Ulwimbo lumo ulwa mu JW Broadcasting lwalintulile fiyo uwakilumyana yumo wa ku Sri Lanka. Umwene atile: “Ummanyisi wangu uyu amanyisyagha sayansi alinjobile fiyo pa maso pa binangu panongwa yakuti ndi yumo wa Baketi ba Yehova. Natilile fiyo kangi ngayobilepo nasimo. Bo ngomwikeko ku sukulu, mama wangu alingasisye ukuti mbilikisye inyimbo iya mutu wakuti ‘Muziphunzira Kuti Mukhale Olimba.’ Ulwimbo ulu lwalindulile ukumanya ubununu bwa kufufuza nu kughagha amaansala ghake. Isiku ilyakukongapo, nayobesenie nu m’manyisi wangu. Umwene apilikisye fiyo kumyangu kangi ayobile ukuti lino nsimenye isi Abaketi ba Yehova bikusubila. Ngundaghisya fiyo igulu lya Yehova panongwa nyimbo isyakukasya isi likutupa.”

 Ngimba indalama isi bikubombela imbombo pakupangila inyimbo sikufuma kughu? Ifi fyabupe ifi abakamu na balumbu bikubika ukuti fitule pambombo ya pa kisu kyosa, kangi abandu bingi bikubika ukwendela pa donate.pr418.com. Tukubandaghisya fiyo panongwa ya ndumbula yinu iyakupa.