Abaketi ba Yehova bikubatula abandu mfyisu ifyakukinda 200. Loli mfyisu ifi, pabupipi ifyisu 35 fyo ifi fikwambilila ifyabupe ifyakufwana ukufuma nkisu kyabo, ukuti babombele imbombo ukulipilila ifindu ifyakulondiwa. Ngimba ifyisu ifingi ifi fikabaghila ukufwanisya ukulipila ifyakulondiwa, fikutuliwa bulebule?

 Akabughatila Kakulongosya aka Baketi ba Yehova kikuketesya isi Abaketi ba Yehova pa kisu kyosa bikulondiwa ukuti bamwiputeghe Yehova kangi ukufumusya amasyu amanunu. Akabughatila aka kikuketa indalama isi sikulondiwa kangi muno sibaghile ukubombela imbombo kanunu. Linga ofesi yambilile indalama nyingi ukukinda isi sikulondiwa, yikubika indalama isyakongelela isi ku fyisu ifingi ifi fikulondiwa ubutuli. Imbatiko iyi yikufwana itolo na isi Abakristu ba nkabalilo kakunyuma babombagha. Abene babatulagha abinabo “ukuti kuyepo ukufwana.” (2 Bakorinti 8:14) Abakristu aba bababombelagha imbombo ifyakongelela ifi bali nafyo ukuti babatule aba bali nifinandi.

 Ngimba abakamu aba bambilile ubutuli ukufuma ku maofesi aghangi bikwipilika bulebule? Mwakifwanikisyo, ku Tanzania, pabupipi hafu ya bandu aba nkisu iki bikusyagha indalama nandi fiyo pisiku, polelo indalama isi abakamu balyambilile syatulile ukuti batendekesye kangi Inyumba ya Bunyafyale iya kipanga kya Mafinga. Ikipanga iki kyalembeli ukuti: “Ukufuma itolo apa twatendekisye Inyumba yitu ya Bunyafyale, ikibelengelo kya aba balisile palukomano kikongelela fiyo. Tukundaghisya fiyo igulu lya Yehova kangi abakamu pa kisu kyosa panongwa ya ndumbula yabo iyakupa, palino tuli na malo amanunu aghakwiputilapo.”

 Abakamu bitu bamo aba ku Sri Lanka balyaghene ni ndamyo ya njala panongwa ya mbungo ya COVID-19. Imara Fernando nu mwanake, Enosh, bo bamo aba balyaghene ni ndamyo iyi. Loli panongwa ya butuli ubwakufuma ku fyisu ifingi, bope batuliwe. Abene balembile ikhadi ili ghalimo amasyu aghakuti: “Tukubandaghisya fiyo abakamu aba batunangisye ulughano ntubalilo utwakutamya utu. Tuli balusekelo fiyo ukuti tuli munyumba iyi, kangi tukukindilila ukwiputa ukuti Yehova akindilile ukubatula abakamu bitu mu masiku aghakubumalikisyo agha.”

 Abakamu na balumbu bitu bikulonda fiyo ukubayilako abinabo ifi bali nafyo, sikaya nimbombo ukuti bikwikala kughu. Mwakifwanikisyo, Enosh asungagha indalama mu kabokosi aka apangile ukuti yope asitule imbumba isi sikulondiwa ubutuli. Guadalupe Álvarez yope ikunangisya indumbula yakufwana itolo. Umwene ikwikala nkighaba kimo ku Mexico, kuno abandu banandi itolo bo aba bikwambilila indalama nyingi. Nalinga sili bo ulu, ikubika isi abaghile ukufwanisya. Umwene alembile ukuti: “Ngundaghisya fiyo Yehova panongwa ya bununu bwake kangi ulughano ulu ikunnangisya. Nsimenye ukuti ifyabupe fyangu fikuya pakongana ni fyabinangu kangi fikuya pakubatula abakamu aba bikulondiwa ubutuli.”

 Abakamu ku maofesi agha ghikutumisya indalama ku fighaba ifi fikulondiwa ubutuli bope bikuhoboka fiyo ukubomba bo ulu. Anthony Carvalho, uyu ikubombela mu Komiti ya Ofesi ya ku Brazil atile: “Kwa fyinja fingi, twalondiwagha ubutuli bwa ndalama ukufuma ku fyisu ifingi ukuti imbombo yende kanunu nkisu kyitu. Panongwa ya butuli ubu, ifindu fyalyandile ukwenda kanunu. Pakabalilo aka ifindu fichenjile kangi nanuswe tuli nulusako lwakubatula abangi. Abakamu kuno ku Brazil bikuketa muno imbombo ya kufumusya yikwendela pa kisu kyosa ukuti bamanye isi babaghile ukubomba ukuti batulepo.”

 Ngimba Abaketi ba Yehova babaghile ukubomba bulebule ukuti babatule abakamu na balumbu abinabo aba bikulondiwa ubutuli? Batikulondiwa ukutuma itolo indalama ku maofesi agha ghikulondiwa ubutuli, loli bikulondiwa ukubika ifyabupe fyabo ku mbombo yitu iya pa kisu kyosa. Mubaghile ukubika ifyabupe fyinu mu bokosi lya ku kipanga ili lembiwe ukuti, “Imbombo ya pa Kisu Kyosa” pamo ukwendela pa donate.pr418.com. Tukundaghisya fiyo ifyabupe fyosa ifi mubaghile ukubika.