Amaboma mingi pa kisu kyosa ikyapasi ghatikwitikisya mwanakalinga ukuti abandu bingi babunganeghe pampene. Kangi amaboma agha ghabikile ululaghilo ulwakuti abandu bikaleghe pabutalipabutali na banine. Abaketi ba Yehova babikilepo fiyo indumbula ukupilikila isi amaboma ghayobile, loli bikukindilila ukumwiputa Yehova mwakukolelana. Ukuti bafwanisye ukubomba isi, ifipanga fimo fikubomba ingomano pa vidiyokofelensi kangi bikubombela amapulogilamu ghamo agha pa kompyuta, bo Zoom.

 Ukuti akabalilo kosa tubombeghe ingomano kangi ukuti paye ukufighililiwa mwakufwana, Akabughatila Kakulongosya kitikisye ukuti indalama simo isi tukubika ukuya fyabupe, bulile amaakaunti gha Zoom ukuti ifipanga fimo fibombeleghe imbombo. Ifi fitulile fiyo ifipanga fimo ifi fikayagha pakufwanisya ukulipila indalama isyakufwana amadola $15-$20 pamo ukukinda apa ukuti fibombe ingomano ukwendela pa pulogilamu iyi. Utubalilo twingi ifipanga ifi fyabombelagha imbombo amapulogilamu aghangi aghabulele agha ghikwitikisya itolo abandu banandi itolo ukulumikisya kangi ghatikufighililiwa fiyo. Loli lino ifindu fili kanunu fiyo panongwa yakuti ifipanga fyosa ifi fili na maakaunti gha Zoom agha igulu lyulile, fitikutamiwa pa nkhani yakufighilila kangi abandu bingi bikulumikisya ku ngomano isi. Lino ifipanga ifyakukinda 65,000 mfyisu ifyakukinda 170, fikubombela imbombo amaakaunti agha.

 Ikipanga kya Kairagi ku Manado, North Sulawesi, Indonesia, kyalekile ukubombela imbombo ipulogilamu iyabulele nukwanda ukubombela imbombo akaunti ya Zoom iyi igulu lyulile. Unkamu Hadi Santoso ikulingania ikuti: “Nalinga abakamu na balumbu aba bakafimanya kanunu ifindu fya tekinoloje ifi, bope bikuhoboka fiyo ningomano panongwa yakuti lino batikulondiwa ukwingila kingikingi itolo ukuti babombe kanunu ingomano.”

 Oeste Lester Jijón, Jr., uyu nkulumba mu kipanga kya Guayacanes Oeste ku Guayaquil, Ecuador, ikuti: “Panongwa yakuti abakamu na balumbu bingi balondo, fyayagha pakuya fyakutamya ukuti ifipanga fimo fifwanisye ukula ilayisensi ya akaunti ya Zoom iyi yikutula ukuti ikipanga kyosa kilumikisyeghe ku ngomano. Lino tukundaghisya fiyo isi igulu libombile pakula akaunti ya Zoom iyi yikutula ukuti abandu bingi balumikisyeghe ku ngomano. Kangi lino tubaghile ukubakolelala abinitu ukuti balumikisye kisita kupasya ukuti tubaghile ukufika pabumalilo bwa kibelengelo ikyakubikiwa.”

 Johnson Mwanza, uyu nkulumba nkipanga kya Ngwerere North ku Lusaka, Zambia, alembile ukuti: “Kingi abakamu na balumbu bingi bighanile ukuyoba ukuti, ‘imbatiko ya gulu iyakuti tuye na akaunti ya Zoom yitutulile ukuti twipilikeghe ukuti tuli pabupipi fiyo na bakamu na balumbu bitu, kangi ukuti Yehova atughanile nu kutupasikisya.’”

 Amaakaunti agha ghikuliwa ni ndalama isi sikusungiwa pambombo yakutula linga kubombiwe ingozi. Indalama isi sikufuma pa fyabupe ifi fikubikiwa ukuti fitule pambombo ya pa kisu kyosa. Ifyabupe fingi fikubikiwa ukwendela pa donate.pr418.com. Tukubandaghisya fiyo panongwa ya fyabupe ifi mukubika. Ifyabupe ifi kangi fikutula fiyo pambombo yakutula linga kubombiwe ingozi isi sikubombiwa pa kisu kyosa.—2 Bakorinti 8:14.