Amavidiyo agha tukuketelela palukomano lwa kighaba ghikutufika pandumbula kangi ghikututula ukuti tupilikisyeghe kanunu isi Ibaibolo likumanyisya. Ulukomano lwa Kighaba ulwa 2020 ulwakuti, ‘Amusekeleghe Bwila Itolo’! luli na mavidiyo 114. Ikibelengelo iki kikongelelapo amavidiyo gha nkhani 43 isi abakamu ba Nkabughatila Kakulongosya na aba bikutula mu makomiti aghakukindanakindana bayobile. Ngimba mwilalusisyepo ukuti, findu fiki fikubombiwa pakupanga amavidiyo agha, kangi sikwingila indalama silinga?

 Abakamu pabupipi 900 abakufuma mfyisu ifyakukindanakindana, baliyipile pakutendekesya ipulogilamu iya lukomano ulu. Bosa pampene bamalile amaawala pabupipi 100,000 kangi ifyinja ifyakukinda fibili ukuti batendekesye ipulogilamu iyi. Akabalilo aka kikongelelapo amaawala 70,000 agha bamalile pakujambula ividiyo ya maminiti 76 iya Nehemiya iyakuti: “Namanga Ubwikyele Ubu Ikubapa yu Yehova Gho Maka Ghinu.”

 Ukuyoba ubwanaloli, sikulondiwa indalama nyingi ukuti tubape ifyakulondiwa pa bumi aba bikwiyipa ukutulapo pambombo iyi, kangi ukuti tubape ifindu ifyakubombela ifyakutula ukuti imbombo iyi yende kanunu.

 “Jared Gossman, uyu ikubombela mu Dipatimenti ya Mavidiyo atile: “Ikomiti Yakumanyisya iya Kabughatila Kakulongosya yikuhoboka fiyo linga mu mavidiyo mukuya abandu aba nyiho kangi aba bikufuma mfighaba ifyakukindanakindana. Isi sikutula ukuti amavidiyo ghitu ghanangisyeghe ubukamu bwitu ubwa pa kisu kyosa. Ukuti tufwanisye isi, amatimu 24 agha ghali mfyisu 11 ghabombile imbombo iyi mwakukolelana. Ukuti tupange amavidiyo agha pikulondiwa indalama nyingi, ukupanga amapulani, nu kubomba imbombo mwakukolelana.”

 Ukuti tupange amavidiyo ghitu ghamo, tukulondiwa ifindu fimo kangi amalo aghapadela. Mwakifwanikisyo, amalo agha twajambulileko ividiyo ya Nehemiya iya: “Namanga Ubwikyele Ubu Ikubapa yu Yehova Gho Maka Ghinu” ghayengiwe nkati mwa malo agha tukujambulilako amavidiyo ku Mt. Ebo, kubupipi na Patterson, New York, U.S.A. Ukuti tubombele imbombo kanunu ifyabupe ifi abakamu bikubika, kangi ukuti tujambule ividiyo iyi yikunangisya muno amalo na bandu ba iyolo babonekelagha, abakamu bapangile ilinga ili lyabonekagha bo muno ilinga lya iyolo ilya ku Yerusalemu lyabonekelagha. Ifindu ifi bapangile, kilikyosa kyali na mafelemu gha matabwa agha ghali matali amamita 6 kangi bafipentile ukuti fibonekeghe bo imato ili bayengile amabwe. Ifindu ifi fyali fyakuti babaghile ukupimba ukuti bafibike pamalo aghakukindanakindana agha bajambulilangako ividiyo iyi. Ifi fyatulile ukuti baleke ukutamiwa ukulonda amalo mingimingi itolo aghakujambulilako ividiyo iyi. Nalinga syali bo ulu, palondiwagha indalama pabupipi $100,000 (U.S.) ukuti tuyenge amalo agha kujambulilako ividiyo inywamu iyi.. *

 Ukumanya ifindu ifi kukututula ukuti tundaghisye fiyo ipulogilamu ya lukomano lwa kighaba ulwa kyinja iki. Tukusubila ukuti ifindu fyosa ifi fyabombiwe pakwitendekesya ipulogilamu iya lukomano ulu, fikuya pakutula ukuti abandu bingi pa kisu kyosa bampaleghe Yehova. Tukubandaghisya fiyo panongwa ya fyabupe ifi mukubika ukuti fitule pambombo ya kufumusya pa kisu kyosa ikya pasi ukwendela pa donate.pr418.com ni njila isingi.