Mu Julayi na Ogasiti 2020, kisakuya kakwanda ukuti pa kisu kyosa kyapasi, twesa tusaketelele ipulogilamu yimoyene iya lukomano lwa kighaba. Ukuti ifi fibombiwe, inkhani sya palukomano sisanusiwe nu kujambuliwa munjobelo isyakukinda 500. Imbombo iyi yalondiwagha ukubombiwa ikyinja kimokyene pamo ukukinda. Loli panongwa ya mbungo iyi yiwile iya kolonavayilasi, abakamu na balumbu aba bikusanusya babombile imbombo iyi mu myesi pabupipi 4.

 Aba bikuketesya imbombo iyakusanusya kangi aba bikuketesya ifyakula katundu ku Ofesi Inywamu iya Baketi ba Yehova pa kisu kyosa batulilepo pambombo inywamu iyi. Aba bikuketesya imbombo iyakusanusya basimenye ukuti abakamu na balumbu aba bikubomba imbombo iyi, bikuya pakulondiwa ifyakubombela imbombo fingi bo mayikolofoni ukuti bafwanisye ukubomba kanunu imbombo iyi. Aba bikuketesya ifyakula katundu batendekisye isyakula ama mayikolofoni 1,000 nu kughatumisya mu fighaba ifyakukindanakindana 200.

 Ukuti baleke ukonanga indalama, aba bikula katundu balyulile ama mayikolofoni mingi nu kughatumisya pakabalilo kamokene, ukufuma apo baghayabile nu kughatumisya ku aba bikusanusya pa kisu kyosa. Panongwa yakuti balyulile ama mayikolofoni mingi pakabalilo kamokene, imayikolofoni yiliyosa pa aveleji bulagha $170 U.S., ukongelelapo utengo wakutumisyila. Ughu wali ntengo nnunu fiyo linga tukufwanikisya nu kula mayikolofoni yiliyosa payene.

 Aba bikuketesya ifyakula katundu balyulile ama mayikolofoni agha nu kutumisya m’myesi ya Epulelo na Meyi 2020. Aka kali kabalilo aka amabizinesi mingi ghatikwenda kanunu panongwa ya mbungo. Ukufika kubumalilo bwa Meyi, amaofesi kuno bikusanusyilako amabuku balyambilile katundu uyu.

 “Jay Swinney, uyu ikuketelela Idipatimenti Yakula Katundu ku Ofesi Yitu Inywamu ayobile ukuti, “Kwalipo ukukolelana pakati pa madipatimenti aghakukindanakindana agha pa Beteli na agha tulangako katundu uwakuti atutule pambombo iyi. Twafwanisye ukubomba imbombo iyi mwanakalinga fiyo kangi twalyulile pa ntengo unnunu fiyo ukuti tubatule abakamu na balumbu. Syali bo ulu panongwa yakuti mbepo mwikemo wa Yehova atutulile fiyo.”

 Nicholas Ahladis, uyu ikubombela ku Dipatimenti Yakusanusya ikuti: “Abakamu na balumbu aba bikusanusya kangi batikusokapo pakaya panongwa ya mbungo, bikukasiwa fiyo ukwambilila katundu uyu. Nalinga bali kwa bene bikufwanisya ukubombela pampene imbombo na binabo, bikusanusya nu kujambula inkhani isya palukomano, amadilama ni nyimbo munjobelo isyakukinda 500.”

 Iki kyo kimo iki kyabombiwe pambombo yakutendekesya ulukomano lwa kyinja kya 2020 ulwakuti ‘Amusekeleghe Itolo Bwila’! Ifyabupe fyinu ifi mukubika ukwendela pa donate.pr418.com ni njila isingi fyo ifi fyatulile fiyo ukuti katundu uliwe.