“Ingasya ya Ndindilili ya Juni 1, 1912 yayobile ukuti: Abandu bingi aba bikubelenga amabuku ghitu, babaghile ukuti babamenye abandu bingi aba batikuketa. Bope babaghile ukuya na mabuku agha babaghile ukubelenga kanunu . . . . Amabuku gha bandu aba batikuketa ghikupulintiwa mumalemba gha bandu aba batikuketa ukuti bope babelengeghe.” Ingasya ya Ndindilili yayobile kangi ukuti: “Abandu bingi aba batikuketa bikundaghisya fiyo ukupilika amasyu aghakuti pa kisu kyapasi pisakuya ulusayo ulununu.

 Pakabalilo aka amasyu agha ghalembiwagha, ifisu ifyakukindanakindana ifi fyayobagha ikizungu fyali ninjila isyakukindana isyakubalembela amasyu abandu aba batikuketa pamo ukuti braille. Pakabalilo aka Abaketi ba Yehova bali nagho kale amabuku agha ghikulingania ubwanaloli bwa mu Baibolo agha ghabaghile ukubatula abandu aba batikuketa pamo ukuti braille. Kangi pakabalilo aka tukali tuli nagho. Lino tukupanga amabuku gha bandu aba batikuketa pamo ukuti braille munjobelo isyakukinda 50. Ngimba tukubomba bulebule?

 Ikindu kyakwanda iki kikubombiwa ko kuchenja amalemba ukuti ghaye mmalemba gha braille. Michaeli milleni uyu ikubombela mudipatimenti yakuketesya ifyakulemba ku Patterson, New York ayobile ukuti; “Ukwanda iyolo twabombelagha ipulogilamu yapakompyuta ukuchenja amalemba kuti ghaye mmalemba gha braille, loli ipulongilamu iyi yikakolagha ukubombela imbombo injobelo syosa isi twalondagha. “Lino tukubombela imbombo Watchtower Translation System, iyi yikututula ukuchenja amalemba gha munjobelo nyingi isi sikuyobiwa pa kisu kyapasi ukuya malemba gha bandu aba batikuketa. Ngusubila ukuti yikayako ipulongilamu yakufwana na iyi.”

 Amasyu agha ghali mu buku lya braille pikuya kangi amasyu agha ghikulingania ifithuzi ifi fili mu buku. Mwakifwanikisyo ikithuzi iki kili pakikope kya buku ilyakuti Amuhobokeghe nu Bumi kwa Bwila na Bwila bakilingenie munjila iyi: “Undumyana ikwenda munjila iyi mumbali mwake muli ifyakumela ifinunu, nindananda kangi nifyamba. Jamshed uyu ntuli wakipanga kangi mpayiniya uyu atikuketa ayobile ukuti, “Amasyu agha ghikulingania ifithuzi ghakulondiwa fiyo kumyangu.

 Linga amalemba baghachenjile ukuya masyu gha braille, bikutuma amafayelo ku ofesi ukuti bakaghapange ukuya mabuku gha braille. Linga ghafikile bikwegha amalemba agha bikulemba nu kughabika pamapepala agha ghatikudoboka pamo ukulepuka linga bikupanga amabuku. Linga bamalile bikwegha amapeji ghosa nukughabika pampene nu kupanga ibuku, pabumalikisyo bikughatuma ku fipanga pampene na mabuku aghangi pamo ukughatuma ku positi ofesi linga bikwambililila amabuku gha aba batikuketa kisita kulipila. Pamo amaofesi ghabaghile ukubombela imbombo injila iyingi iyakubatumila abakamu na balumbu aba batikuketa ukuti baghaghe amabuku aghakulondiwa agha ukuti baghabombeleghe imbombo pangomano sya kipanga.

 Imbombo yosa iyi yikulondiwa akabalilo nindalama. Mwakifwanikisyo, ofesi yitu yakupulintila amabuku iya ku Wallkill, New York, akabalilo aka bikumalila pakupanga ama Baibolo 50,000 agha tukubombela imbombo yikufwana itolo nakabalilo aka bikupangila ama Baibolo mabili agha braille. Pali amavoluyumu 25 mu Baibolo lyakizungu ilya braille, kangi ifindu ifi fikulondiwa ukuti tupange amavoluyumu agha fikwelile fiyo untengo ukufika pa 123 ukukinda ifi fikulondiwa ukuti tupange itolo Ibaibolo ili twesa tukubombela imbombo. * Ukuti tupange ifikope fya mavoluyumu 25 pikulondiwa indalama pabupipi amadola 150 agha ku America.

 Ngimba aba bikutulapo ukupanga amabuku gha braille bikwipilika bulebule linga bikubomba imbombo iyi? Nadia uyu ikubombela ububombeli ku ofesi ya South Africa ikuti: “Abakamu na Balumbu bitu aba batikuketa pamo aba bikutamiwa ukuketa, ubumi bwakutamya fiyo kumyabo, Yonongwa yake nguketa ukuti lusayo lunywamu fiyo ukupanga ikindu iki kibaghile ukubatula. Ubu buketi bwakuti Yehova abaghanile fiyo.”

 Bule linga umundu uyu atikuketa akamanya ukubelenga amasyu gha braille? Ifyinja finandi itolo ifi fikindile, twasosisye akabuku akakuti Learn to Read aka kali na masyu gha braille na masyu agha ghalembiwe. Kapangiwe munjila yakuti umundu uyu ikuketa na uyu atikuketa bosa babombeleghe imbombo. Akabuku aka kali namalo agha umundu uyu atikuketa abaghile ukulembapo amasyu gha braille. Uyu ikumanyila braille ikubombela imbombo ifibombelo fya bandu aba bitikuketa ukuti apange mwene amasyu ghalighosa aghakufwana na braille. Linga akabalilo kosa ikubomba bo ulu, fikuntula uyu ikumanyila ukuti akabalilo kosa akumbukileghe amasyu gha braille kangi fikuntula ukuti amanyeghe isi amasyu agha ghikusanusya linga aghapalamasisye itolo.

 Ngimba abakamu na balumbu aba batikuketa bikupindula bulebule na mabuku agha? Ernst uyu ikwikala ku Haiti, abukagha kungomano sya kipanga, loli akali ni buku lililyosa ilya braille. Umwene asubilagha itolo ukusunga ifindu mundumbula ukuti akayobe inkhani ya mu sukulu nukwamulapo pangomano. Umwene ikuti: “Pakabalilo aka ngwimika ikiboko kyangu nukwamulapo pangomano kabalilo kalikosa. Ukuyoba ubwanaloli ngwipilika ukuti nili pampene na bakamu na balumbu. Twesa tukwambilila ifyakulya fya mwambepo ifyakufwana.

 “Jan wa ku Austria uyu atikuketa kangi nkulumba ikupangisya Ingasya ya Ndindilili nu Kumanyila Ibaibolo kwa Pakipanga ayobile ukuti, amabuku ghitu ghikupilikiwa kanunu ukukinda amabuku aghangi agha braille agha mbelengilemo. Mwakifwanikisyo, amapeji ghali namanambala, kupepe ukughagha amasyu ghapasi kangi amabuku ghitu ghali na masyu agha ghikulingania ifithuzi.

 Seon-ok mpayiniya ku South Korea, atikuketa kangi atikupilika. Kunyuma uku umwene asubilagha itolo injobelo yamaboko iyi bakolanagha itolo pangomano, loli lino ikufwanisya ukubelenga mwene Ibaibolo lya braille. Umwene ikuti: “Amabuku aghangi agha braille ghikutamya fiyo ukubelenga panongwa yakuti utumadoti tumo tutikuyapo, imizele yitikulembiwa kanunu, amapepala ghake ghamo ghatikuya kanunu.” Ayobile kangi ukuti. “Loli Abaketi ba Yehova bikubombela imbombo amapepala amanunu kangi utumadoti tukuya tunywamu, ifi fikupangisya ukuti kuye kupepe ukubelenga.” Kangi ayobile ukuti: “Kunyuma uku namanyilagha amabuku agha ghikuyoba isya Baibolo nu butuli bwa bandu abangi. Loli lino mbaghile ukubelenga amabuku agha panimwene. Nguhoboka fiyo ukuketa ukuti ngufwanisya nimwene ukwitendekesya ingomano nukweghapo ikighaba pa ifi tukumanyila. Ngubelenga amabuku ghitu ghosa agha ghali mu braille. Amabuku agha ‘nisibile nagho fiyo’ kangi ngabaghila ukwikala kisita kughabelenga.”

 Bo muno ghayilile amabuku ghitu ghosa, amabuku ghitu agha braille ghope ghali na masyu agha: “Ibuku ili likaya lyakulisya. Imbombo yake ko kumanyisya abandu Ibaibolo. Ukuti imbombo iyi yende kanunu abandu bikutulapo nifyabupe.” Tukundaghisya fiyo panongwa yakutulapo ni fyabupe finu mwakubombela imbombo injila isi sili pa donate.pr418.com. Panongwa yandumbula yinu yakupa, ifyabupe finu fikutula ukuti tuyeghe nifyakulya fyamwambepo ku bandu bosa, ukongelelapo abandu aba batikuketa.