Yakobu amenye ukuti Yehova ikulonda ukuti twiyipeghe fiyo pakumwiputa, nalinga ukuti pakabalilo kala Kyala akabapele ululaghilo lwakuti bangiputagha abakyala abangi. (Kus 20:3-5) Lelo bo Yehova ambulile ukuti aghomokile ku Beteli, Yakobu ababulile bosa aba alinabo ukuti basosyemo mmyabo abakyala abangi. Yakobu asosisyemo abakyala bosa aba abandu bafwalagha bo indebelebe na fimo ifi bafwalagha mmaboko.

Lino pope tubaghile ukumwiputa Yehova mwakwiyipa, ngimba tubaghile ukubomba bulebule? Tubaghile ukuleka ukuya nifindu ifi fikukolelana nififwani kangi ni findu fya mizimu. Ifi fibaghile ukongelelapo ukuleka ifindu fyosa ifi fikukolelana ni fyabulosi kangi nukusala kanunu ifi tukupilikisya. Mwakifwanikisyo, tubaghile ukwilalusya ukuti: ‘Ngimba nguhoboka na mabuku pamo amavidiyo agha ghikunangisya ifya mizimu? Ngimba ifi ngupilikisya fikuyoba isya bulosi, ukughuna pamo ifindu fimo ifibibi?’ Tukulondiwa ukwepukako ku findu fyosa ifi Yehova afibengile.​—Sa 97:10.

KETELELA IVIDIYO IYAKUTI “MUNSUSYEGHE UMOHESI,” UKUFUMA APO MWAMULE AMALALUSYO AGHAKUKONGAPO AGHA:

• Ngimba Palesa alyaghene nindamyo siliku pabumi bwake?

• Nongwa yafiki kwakulondiwa ukusuma ubutuli ku bakulumba ba kipanga pa nkhani ya fya mizimu?

• Ngimba findu fiki ifi aba bikulonda ukuti Yehova abafighilileghe bikulondiwa ukufileka?

• Ngimba Palesa abombile isyafiki pandamyo iyi ali nayo?

• Ngimba njila siliku isi sibaghile ukubatula ukumalana ni findu fya mizimu?