INKHANI IYAKUMANYILA 7
Mubumanyeghe Ubudindo Bwa Aba Bikulongosya Nkipanga
“Kristu yo ntu wakipanga, kangi yo mpoki wakipanga iki gho mbili wake.”—EF. 5:23.
ULWIMBO 137 Ŵanakazi Ŵakugomezgeka, Ŵadumbu Ŵachikhristu
ISI TUKUYA PAKUMANYILA *
1. Ngimba kifukwa kimo kiliku iki ababombi ba Yehova bikukolelana?
TUKUHOBOKA ukuya mumbumba ya Yehova. Nongwa yafiki imbumba yitu yikukolelana fiyo kangi yalutengano? Panongwa yakuti aliwesa ikubomba ifindu ifinunu ukuti abaghindikeghe aba Yehova abapele ubudindo. Tukukolelana fiyo panongwa yakuti tubamenye kanunu aba Kyala ababikile pabudindo.
2. Ngimba tukuya pakuyobesania amalalusyo ghaliku mu nkhani iyi?
2 Mu nkhani iyi tukuya pakuyobesania isya bandu aba bapeliwe ubudindo nkipanga. Tukuya pakwamula kangi amalalusyo aghakukongapo agha: Ngimba abalumbu bali ni mbombo yiliku? Ngimba syabwanaloli ukuti unkamu aliwesa mutu wa mulumbu aliwesa? Ngimba ubudindo bwa bakulumba bakipanga bufwene itolo nubudindo ubu umutu wa mbumba ghuli nabo pa nkasi wake nabanake? Ikyakwanda isagha tuyobesanie muno tukulondiwa ukubaketa abalumbu.
NGIMBA TUKULONDIWA UKUBAKETA BULEBULE ABALUMBU?
3. Ngimba findu fiki ifi fibaghile ukututula ukuti tubandaghisyeghe abalumbu bitu pambombo iyi bikubomba?
3 Tukubandaghisya abalumbu bitu aba bikwiyula fiyo pakuyitula imbumba yabo, pakufumusya amasyu amanunu nukubatula abangi nkipanga. Ukuti tubandaghisyeghe fiyo tukulondiwa ukubaketa bo muno Yehova na Yesu bikubaketela. Tubaghile ukumanyila kangi kuntumiwa Pauli namuno ababombelagha ifindu abakikulu.
4. Ngimba Ibaibolo likunangisya bulebule ukuti Yehova ikubaketa abakikulu na banyambala ukuya bakulondiwa fiyo?
4 Ibaibolo likunangisya ukuti Yehova ikubaketa abakikulu na banyambala ukuya bakulondiwa fiyo. Mwakifwanikisyo, sikunangisya ukuti nkabalilo ka Bakristu babwandilo, Yehova abapele mbepo wake mwikemo abakikulu na banyambala nukubapa amaka ukuti babombeghe ifyakuswighisya bo ukuyoba injobelo isyakukindanakindana. (Imbo. 2:1-4, 15-18) Bosa bikupakiwa nambepo mwikemo kangi bisakulaghilagha na Kristu kumwanya. (Gal. 3:26-29) Abakikulu na banyambala bingi bisakwambilila ikyabupe ikyakwisakwikala kwa bwila na bwila pa kisu. (Ubuset. 7:9, 10, 13-15) Kangi abanyambala na bakikulu bapeliwe imbombo iyakufumusya amasyu amanunu. (Mat. 28:19, 20) Mwakifwanikisyo, ibuku lya Imbombo Sya Batumiwa likuyoba ukuti umulumbu yumo uyu ingamu yake yo Prisila, pampene nundume wake Akwila, balindingenie kanunu ubwanaloli Apolo uyu ali mundu ummanyili fiyo.—Imbo. 18:24-26.
5. Ngimba ilemba lya Luka 10:38, 39, 42 likunangisya bulebule ukuti Yesu abaghindikagha abakikulu?
5 Yesu abaghindikagha fiyo abakikulu. Umwene akakongagha inyiho sya Bafarisai aba babaketagha abakikulu ukuya bapasi kangi bakayobesaniagha nabo pakilundilo kya bandu nukuyoba nabo isya Mmalemba. M’malo mwake, Yesu ababulagha na bakikulu ifundo isyakulondiwa isya M’malemba. * (Belenga Luka 10: 38, 39, 42.) Kangi abitikisyagha abakikulu ukuti bafumusyeghe nawe. (Luka 8:1-3) Yesu abapele ulusako abakikulu ukuti bababule abatumiwa ukuti asyukile.—Yoh. 20:16-18.
6. Ngimba untumiwa Pauli abaghindikagha bulebule abakikulu?
6 Untumiwa Pauli alinkumbwisye Timoti ukuti abaghindikeghe abakikulu. Pauli alimbulile Timoti ukuti abaghindikeghe ‘abakikulu abakulumba ukuya bamama bake’ kangi abaketeghe abalindwana abakusi kumyake ukuya ‘balumbu bake.’ (1 Tim. 5:1, 2) Pauli abombile nyingi ukuti antule Timoti ukukula mwambepo. Kangi alinsimikisyile ukuti mama wake na mbuya wake bo aba batalile ukummanyisya Timoti “amalemba amikemo.” (2 Tim. 1:5; 3:14, 15) Pauli ayobile ingamu sya balumbu bo ikubaponia mu kalata wake uwakubuka ku Baroma. Pauli aketagha isi abalumbu babombagha kangi abandaghisyagha.—Rom. 16:1-4, 6, 12; Filip. 4:3.
7. Ngimba lino tukuya pakuyobesania amalalusyo ghaliku?
7 Amapalagilafu ghapamwanya ghatikunangisya ukuti abalumbu bapasi ku bakamu. Abalumbu bikutula fiyo nkipanga kangi abakulumba bikusubila ubutuli bwabo ukuti nkipanga muye ulutengano nukukolelana. Loli tukulondiwa ukwamula amalalusyo ghamo. Mwakifwanikisyo: Nongwa yafiki Yehova ikulonda ukuti umulumbu afwaleghe ikindu kimo ku mutu pa fyakubombiwa fimo? Panongwa yakuti abakamu bene bo aba bikwimikiwa ukuya bakulumba pamo batuli, ngimba isi sikusanusya ukuti unkamu aliwesa mutu wa mulumbu aliwesa nkipanga?
NGIMBA UNKAMU ALIWESA MUTU WA MULUMBU ALIWESA?
8. Ukufwana na Baefesi 5:23, ngimba unkamu aliwesa mutu wa mulumbu aliwesa? Lingania.
8 Ngimba unkamu aliwesa mutu wa mulumbu aliwesa nkipanga? Ansala yo wakuti hayi. (Belenga Baefesi 5:23.) Mu mbumba, unnyambala yo ali nubudindo pa nkasi wake. Uwakilumyana uyu osiwe akaya mutu wa mama wake. (Ef. 6:1, 2) Kangi nkipanga, abakulumba bamo bo bali nubudindo pa bakamu na balumbu. (1 Tes. 5:12; Hib. 13:17) Abakikulu aba bakaya pabweghi kangi batikwikala nabapapi babo bikukindilila ukubaghindika abapapi babo na bakulumba bakipanga. Loli mwakufwana itolo na bakamu nkipanga, bope bali numutu ghumowene uyu yo Yesu.
Aba bakaya pabweghi kangi batikwikala na bapapi babo bali pasi pabudindo bwa Yesu (Keta ipalagilafu 8)
9. Nongwa yafiki utubalilo tumo abalumbu bikulondiwa ukufwala ikindu kimo ku mutu?
9 Bwanaloli ukuti Yehova abasalile abanyambala ukuti balongosyeghe pakumanyisya nkipanga kangi umwene akabapa ubudindo ubu abakikulu. (1 Tim. 2:12) Nongwa yafiki? Inongwa yake yifwene itolo na iyi Yehova alinsalile Yesu ukuya mutu wa nnyambala ukuti mumbumba yake muye ulubatiko ulununu. Pafifukwa fimo umulumbu abaghile ukubomba isi unkamu ikubomba loli ikulondiwa ukufwala ikindu kimo ku mutu. * (1 Kor. 11:4-7) Yehova ikubapa ubulongosi ubu abalumbu. Isi sitikusanusya ukuti abene bapasi loli ukuti banangisyeghe ukuti bikukonga ifundo syake. Bo tukwinong’onela isi, isagha twamule ilalusyo ilyakuti: Ngimba imitu ya mbumba na bakulumba bali nubudindo buliku?
UBUDINDO BWA MITU YA MBUMBA NA BAKULUMBA
10. Nongwa yafiki utubalilo tumo unkulumba abaghile ukubapa indaghilo abakamu na balumbu?
10 Abakulumba banganile Kristu kangi basighanile “ing’osi” isi Yehova na Yesu babapele ukuti basipasikisyeghe. (Yoh. 21:15-17) Panongwa yakuti unkulumba ikusipasikisya ing’osi nkipanga, abaghile ukwanda ukwinong’ona ukuti yo tata wa aliwesa nkipanga. Abaghile ukwanda ukwinong’ona ukuti linga aliwesa uyu mutu wa mbumba ikubika indaghilo ukuti ayifighilile imbumba yake, unkulumba yope abaghile ukubika indaghilo isi sibaghile ukusifighilila ing’osi sya Kyala. Kangi abakamu na balumbu bamo babaghile ukubasuma abakulumba ukuti babatule ukusala kanunu ifindu. Loli ngimba abakulumba nkipanga nimitu ya mbumba bali nubudindo ubwakufwana itolo?
Abakulumba bikubapasikisya abakamu na balumbu nkipanga. Yehova abapele ubudindo ubwakuketesya ukuti ikipanga kyelu (Keta amapalagilafu 11-12)
11. Ngimba ubudindo bwa mitu ya mbumba bufwene bulebule nubudindo bwa bakulumba?
11 Untumiwa Pauli anangisye ukuti kulipo ukufwana pakati pakuya mutu wa mbumba nukuya nubudindo nkipanga. (1 Tim. 3:4, 5) Mwakifwanikisyo, Yehova ikulonda ukuti abamumbumba bapilikileghe umutu wa mbumba. (Kol. 3:20) Kangi ikulonda ukuti abakamu na balumbu babapilikileghe abakulumba. Yehova ikughulila ukuti imitu ya mbumba nabakulumba ba kipanga bikuya pakubapasikisya aba bikubalongosya kangi babanangisyeghe ulughano. Mwakufwana itolo nimitu ya mbumba iminunu, abakulumba bope bikulondiwa ukubatula abakamu na balumbu linga baghene nindamyo. (Yak. 2:15-17) Mwakongelelapo, Yehova ikulonda ukuti abakulumba nimitu ya mbumba babatuleghe abangi ukupilikila indaghilo syake. Kangi ikubasoka ukuti ‘bangakisyagha pali isi silembiwe’ mu Baibolo.—1 Kor. 4:6.
Imitu ya mbumba yipeliwe ubudindo na Yehova ukuti yilongosyeghe imbumba syabo. Bo akali ukusala ifyakubomba, aliwesa uyu mutu wa mbumba uwalughano ikuyobesania tasi nunkasi wake (Keta ipalagilafu 13)
12-13. Ukufwana na Baroma 7:2, ngimba ubudindo bwa mitu ya mbumba bukindene bulebule nu bwa bakulumba?
12 Loli kulipo kangi ukukindana pakati pa ubudindo bwa nkulumba nubwa mutu wa mbumba. Mwakifwanikisyo, Yehova abasalile abakulumba ukuti babombeghe bo balongi kangi abapele ubudindo ubwakubepusya nkipanga abandu aba batikulapa ukufuma pasi pandumbula.—1 Kor. 5:11-13.
13 Loli Yehova ayipele imitu ya mbumba ubudindo bumo abu abakulumba bakapeliwa. Mwakifwanikisyo, aghupele umutu wa mbumba ubudindo ubwakubika indaghilo ku mbumba yake nukuketesya ukuti abamumbumba yake bikukonga indaghilo isi. (Belenga Baroma 7:2.) Mwakifwanikisyo, aliwesa uyu mutu wa mbumba ali nubwabuke ubwakuyoba akabalilo aka abanake bikulondiwa ukufika pakaya pakilo. Kangi ali nubudindo ubwakubafunda abanake linga batikupilikila ululaghilo ulu. (Ef. 6:1) Bwanaloli ukuti, aliwesa uyu mutu wa mbumba uyu ali nulughano, ikuyobesania tasi nunkasi wake bo akali ukubika indaghilo pakaya panongwa yakuti bosa “mbili ghumowene.” *—Mat. 19:6.
MUNGINDIKEGHE KRISTU PAKUYA MUTU WAKIPANGA
Yesu, pakuya pasi pabulaghili bwa Yehova, ikubika ubulongosi ku kipanga kya Bukristu (Keta ipalagilafu 14)
14. (a) Ukufwana na isi sili pa Marko 10:45, nongwa yafiki syakupilikiwa ukuti Yehova alinsalile Yesu ukuya mutu wa kipanga? (b) Ngimba Abankabughatila Kakulongosya bali nubudindo buliku? (Keta ibokosi ilyakuti “ Ubudindo Ubwa Bankabughatila Kakulongosya.”)
14 Ukwendela mwikemo, Yehova alimulile aliwesa nkipanga uyu ikunangisya ulwitiko mwa Yesu. (Belenga Marko 10:45; Imbo. 20:28; 1 Kor. 15:21, 22) Yonongwa yake syakupilikiwa ukuti alinsalile Yesu uyu abikile ubumi bwake ukuya ikemo, ukuti aye mutu wakipanga. Pakuya mutu, Yesu ali nubudindo ubwakubika indaghilo isi abandu, abamumbumba nikipanga kyosa bikulondiwa ukukonga. Kangi umwene ikuketesya ukuti tukupilikila indaghilo isi. (Gal. 6:2) Loli Yesu ikubomba nyingi ukukinda itolo ukubika indaghilo. Umwene ikutupasikisya kangi anganile aliwesa.—Ef. 5:29.
15-16. Ngimba tukumanyilako isyafiki ku isi umulumbu Marley nunkamu Benjamin bayobile?
15 Abalumbu bikunangisya ukuti bikungindika Kristu mwakukonga ubulongosi ubu abapele abanyambala aba bikubalongosya. Abalumbu bingi bikukolelana na isi umulumbu Marley uyu ikwikala ku United States ayobile, umwene ikuti: “Ngubomba ikighaba kyangu pakuya nkikulu wa pabweghi kangi Nkristu pakubaghindika aba Yehova abimike nkipanga. Kangi ngulondiwa ukukindilila ukwiyipa ukuti mbughindikeghe ubudindo ubu Yehova ampele undume wangu na bakulumba. Undume wangu na bakamu nkipanga bikungindika kangi bikundaghisya fiyo pa isi ngubomba.”
16 Abakamu bikunangisya ukuti bikupilikila ubudindo mwakubaghindika nukubandaghisya abalumbu. Benjamin, unkamu uyu ikwikala ku England, ikuti: “Mmanyile nyingi ukufuma ku fundo isi abalumbu bikwamula pangomano namuno bikwiyipa pakufumusya nukumanyisya kanunu mubufumusi. Nguketa ukuti imbombo iyi bikubomba yakulondiwa fiyo.”
17. Nongwa yafiki tukulondiwa ukubaghindika aba Yehova abapele ubudindo?
17 Linga abanyambala, abakikulu, imitu ya mbumba na bakulumba bikubapilikila nukubaghindika aba Yehova abapele ubudindo, nkipanga mukuya ulutengano. Kangi ikyakulondiwa fiyo, tukumpala Tata witu wakumwanya, Yehova.—Sal. 150:6.
ULWIMBO 123 Kujilambika ku Ndondomeko ya Chiuta
^ ipal.5 Ngimba Yehova abapele imbombo yiliku abalumbu nkipanga? Ngimba unkamu aliwesa mutu wa mulumbu aliwesa? Ngimba ubudindo bwa bakulumba bakipanga bufwene itolo nubudindo bwa mitu ya mbumba? Mu nkhani iyi, tukuya pakuyobesania amalalusyo agha nififwanikisyo ifi fili Mmasyu gha Kyala.
^ ipal.5 Keta ipalagilafu 6 mu nkhani iyakuti “Tubatuleghe Abakikulu aba Bikwiyipa Pambombo ya Kyala,” mu Ingasya ya Ndindilili ya Seputembala 2020.
^ ipal.9 Keta ibokosi ilyakuti “ Ngimba po Pakabalilo Kaliku aka Umulumbu Ikulondiwa Ukufwala Ikindu Kimo ku Mutu?”
^ ipal.13 Ukuti mumanye uyu abaghile ukusala kuno imbumba yinu yikulonda ukuti yibunganeghe, keta amapalagilafu 17-19 mu nkhani iyakuti “Tughindikeghe Isi Abangi Bikubomba Nkipanga,” mu Ingasya ya Ndindilili iya Ogasiti 2020.
^ ipal.59 Ukuti mumanye nyingi isyakufwana ni nkhani iyi, keta ibuku ilya mu Chitumbuka ilyakuti “Munjisungilire mu Chitemwa cha Chiuta,” peji 209-212.
^ ipal.64 Ukuti mumanye nyingi isyakufwana nu budindo bwa Bankabughatila Kakulongosya, keta inkhani mu Ingasya ya Ndindilili iya Chitumbuka iya July 15, 2013, peji 20-25.
