ABALINDWANA babili bendagha pampene pa malo gha bizinesi ku Baguio nkaya ka Philippines. Abene bakabwene akashelefu loli bakabukilepo. Helen umulumbu uyu alimile pabupipi na kashelefu amwemwetile bo ababwene. Abalindwana aba bakindilile ubulendo bwabo loli bahobwike fiyo bo Helen amwemwetile.

Ukufuma apo, bo bakwelile ibasi bikughomokela kumyabo, bakibwene ikikwangwani iki balembilepo ukuti JW.ORG pa Nyumba ya Bunyafyale. Abene bakumbwike ukuti baghabwene amalembo agha pa kashelefu. Bosa balikile ibasi nukubuka ku Nyumba ya Bunyafyale. Bo bafikile, baketile imbatiko ya ngomano isya fipanga ifyakukindanakindana iyi yabikiwe pa geti ya Nyumba ya Bunyafyale.

Abalindwana babili aba bafikile akakwanda pangomano isya kipanga kimo. Bo bikwingila mu Nyumba ya Bunyafyale baswighile fiyo bo bambwene Helen. Mwanakalinga balinkumbwike ukuti yo uyu amwemwetile. Helen ikuti, “Bo baseghelile kumyangu nukumbonia, nanyomwike fiyo. Napasyagha fiyo panongwa yakuti ninong’onagha ukuti lumo nonangile simo.” Loli abalindwana aba balindingenie Helen ukuti balimbwene pa kashelefu.

Abalindwana aba bakasiwe fiyo ningomano kangi balipilike kanunu bo abakamu na balumbu babanangisye ulughano. Bo bababwene bamo bikutendekesya mu Nyumba ya Bunyafyale panyuma pangomano, bope batulilepo. Yumo mwa balindwana aba asokileko ku Philippines loli umwinake andile ukubuka ku ngomano kangi ikumanyila Ibaibolo. Syosa isi syabombiwe panongwa yakumwemwetela.