Nongwa yafiki Yesu bo akali ukufwa ayobile amasyu gha Davidi agha ghali pa Salimo 22:1?

Ghamo mwa masyu agha Yesu ayobile bo asyele panandi ukufwa ghalembiwe pilemba lya Matai 27:46 agha ghikuti: “We Kyala wangu, Kyala wangu, undekile fiki?” Apa Yesu ayobagha amasyu agha afwanisye ubusololi ubu ayobile Davidi pilemba lya Salimo 22:1. (Mar. 15:34) Mukaya momumo ukuti Yesu ayobile amasyu agha ghikwaghiwa pilemba ili panongwa yakuti alinkalalile Yehova pamo ukuti ulwitiko lwake lukali lwamaka. Yesu apilikisye inongwa iyi alondiwagha ukufwa kangi yope syo isi alondagha ukubomba. (Mat. 16:21; 20:28) Umwene asimenye ukuti pakabalilo aka ikuya pakufwa, Yehova atikuya “pakumfighilila.” (Jobu 1:10) Yehova alekile ukumfighilila Yesu umwene alondagha ukuti anangisye ubusubiliwa bwake kumyake nalinga ukuti alyaghene ni ndamyo nu kufwa.—Mar. 14:35, 36.

Po nongwa yafiki Yesu ayobile amasyu agha ghikwaghiwa pilemba ili? Nalinga ukuti tukamanya inongwa iyi ayobile amasyu agha loli tukuya pakuyobesania fimo mwafifukwa ifi abaghile ukuti ayobile isi. *

Ngimba apa Yesu ayobagha amasyu agha ghikwaghiwa pilemba ili, asanusyagha ukuti Yehova atikuya pakumfighilila pakabalilo aka ikuya pakufwa? Yesu alondiwagha ukubika ikitabulilo  kisita butuli bwa Yehova. Umwene ali mundu kangi alondiwagha ukufwa ukuti “abunoghelesyeghe ubufwe panongwa ya bandu bosa.”—Hib. 2:9.

Ngimba apa Yesu ayobagha amasyu amanandi itolo ukufuma mu salimo ili, alondagha ukuti abandu binong’onele fiyo isya buku lya salimo? Nkabalilo ka Yesu Abayuda bingi basungagha pandumbula amasyu agha ghikwaghiwa mu buku lya salimo. Linga bapilike ivesi limolyene itolo ukufuma mu buku lya salimo abene bakumbukilagha amavesi ghosa agha mu buku lya salimo. Linga syo isi Yesu alondagha ko kuti abombile isi panongwa yakuti alondagha ukuti abamanyili bake bakumbukile isya busololi ubu bulembiwe mu buku lya salimo ubu bukuyoba isya bufwe bwake. (Sal. 22:7, 8, 15, 16, 18, 24) Kangi amavesi ghakubumalikisyo ghikunjoba Yehova ukuya Mwalafyale wa kisu kyosa kyapasi.—Sal. 22:27-31.

Ngimba apa Yesu akolile amasyu gha Davidi agha, asanusyagha ukuti umwene akaya ninongwa? Bo Yesu akali ukufwa alondiwagha ukulongiwa inongwa iyi balintungulupile ukuti ikuntuka Kyala. (Mat. 26:65, 66) Inongwa yake bayilongile mwanakalinga pakilo kangi bakayilongile mbwanaloli. (Mat. 26:59; Mar. 14:56-59) Apa Yesu alalusyagha ilalusyo ilyakuti “We Kyala wangu, We Kyala wangu, undekile fiki?” asanusyagha ukuti umwene akabombapo nasimo isi sikulondiwa ukuti afwe pamo ukuti aghoghiwe.

Ngimba pakabalilo aka Yesu ayobile amasyu gha Davidi undembi wa buku lya salimo abakumbusyagha kangi abandu ukuti nalinga ukuti Davidi atamiwagha sikasanusyagha ukuti umwene akanhobosyagha Yehova? Pakabalilo aka Davidi alalusyagha ilalusyo ili, akasanusyagha ukuti alekile ukunsubila Yehova. Bo alalusisye ilalusyo ili umwene ayobile ukuti ikunsubila fiyo Yehova kangi ikusubila ukuti ikuya pakubafighilila abandu bake. Kangi Yehova akindilile ukunsaya. (Sal. 22:23, 24, 27) Mwakufwana itolo, nalinga ukuti Yesu, “unnya Davidi,” atamiwe fiyo bo ali pampiki uwakutamiliwapo, sikasanusyagha ukuti Yehova akahobokagha nawe.—Mat. 21:9.

Ngimba apa Yesu ayobagha amasyu agha anangisyagha ukuti ikulonda ukuti Yehova antule ukunangisya ubusubiliwa? Yehova akalondagha ukuti Umwanake atamiwe nu kufwa. Isi syali syakulondiwa bo Adamu na Eva bansambukile Yehova. Yesu akalyonangile nasimo loli alondiwagha ukutamiwa nukufwa ukuti amasye inkhani iyi Setano alyandisye nukubika ubumi bwake ukuti atabule ikindu iki umundu ataghile. (Mar. 8:31; 1 Pet. 2:21-24) Isi syabombiwe pakabalilo aka Yehova alekile ukumfighilila Yesu akakwanda pa bumi bwake.

Ngimba Yesu alondagha ukubatula abamanyili bake ukuti binong’oneleghe inongwa iyi Yehova alitikisye ukuti afwe munjila iyi? * Panongwa yakuti Yesu afwile pampiki uwakutamiliwapo asimenye ukuti bingi bikuya pakupalamasiwa. (1 Kor. 1:23) Linga abamanyili bake bikwinong’onelapo inongwa iyi afwilile, bikumanya ukulondiwa kwa bufwe bwake. (Gal. 3:13, 14) Bikuya pakumanya ukuti umwene Mpoki kangi akaya ntulanongwa.

Nalinga ukuti tutikumanya inongwa iyi Yesu akolile amasyu agha loli umwene asimenye ukuti ukufwa kwake pampiki uwakutamiliwapo bwali bwighane bwa Yehova. Akabalilo akanandi itolo ukufuma apa Yesu ayobile amasyu agha, umwene akindilile ukuyoba ukuti: “Simalike” (Yoh. 19:30; Luka 22:37) Bwanaloli ukuti Yehova alekile ukumfighilila Yesu pakabalilo akanandi itolo loli isi syatulile ukuti Yesu afwanisye ukubomba ububombeli ubu umwene alisile pakubomba pa kisu kyapasi. Syatulile kangi ukuti Yesu afwanisye syosa isi syalembiwe “mu ndaghilo sya Mose, na malemba gha basololi kangi na munyimbo sya Israeli.”—Luka 24:44.