INKHANI YAKULINGANIA ISYA BUMI BWA MUNDU
“Lino Mbughanile Fiyo Ubufumusi”
NAKULILE nkaya ka Balclutha kululu pa lusungo lwa New Zealand. Pakuya mwana nalinganile fiyo Yehova kangi nahobokagha pakuya Nketi. Nahobokagha fiyo ukubuka kungomano kangi kukipanga ghali gho malo agha niketagha ukuti mfighililiwe. Nalinga ukuti nali wasoni loli nahobokagha fiyo ukufumusya sabata aliwesa. Ngatilagha ukubafumukisyila aba namanyilagha nabo isukulu na bangi. Nahobokagha fiyo ukuya yumo wa Baketi ba Yehova kangi bo ndi ni fyinja 11, naliyipile kwa Kyala nu kosiwa.
NALEKILE UKUYA WALUSEKELO
Syakitima ukuti bo ndi ni fyinja 13 nalekile ukuya pa bumanyani ubwamaka na Yehova. Abinangu ba ku sukulu babonekagha ukuti bali nubwabuke fiyo kangi nanine nalondagha ukuya nubwabuke bo ubu. Naketagha ukuti indaghilo sya bapapi nifundo sya Bukristu syali ngafu fiyo ukusikonga kangi naketagha ukuti ukumwiputa Yehova kwakukatasya fiyo. Nalinga ukuti utubalilo tosa nasubilagha ukuti Yehova aliko loli naketagha ukuti ngaya nawe pabupipi.
Loli utubalilo tumo ningilagha mubufumusi. Linga ngubuka mubufumusi ngitendekesyagha, yonongwa yake natamiwagha fiyo ukwanda ukuyobesania na bandu. Ifyakukongapo fyake, ngali na mabulendo aghakughomokelako pamo abamanyili ba Baibolo. Isi syapangisye ukuti ningahobokagha kangi nubufumusi. Nilalusyagha nimwene ukuti, ‘Nongwa yafiki umundu ikukindilila ukufumusya sabata aliwesa numwesi ghulighosa?’
Bo ndi ni fyinja 17, nalondagha ukuti niyimile panimwene. Napangenie ifikwama fyangu nukusokapo pakaya nukubuka ku Australia. Abapapi bangu basulumenie fiyo bo babwene ukuti ngusokapo. Abene bapasyagha fiyo loli binong’onagha ukuti ngwakukindilila ukumbombela Yehova.
Bo ndi ku Australia, ngiyipagha fiyo ukumbombela Yehova. Nalyandile ukuleka ukufika pangomano. Nabaghile abinangu abakilumyana aba bope bahobokagha bo une ukubuka kungomano isi twapangagha pakilo. Loli panyuma pangomano, twabukagha pakunwa ubwalwa nukwakuvina kumalo aghafyakusangalusya. Linga ngukumbukila ubumi bwangu bwakunyuma, nguketa ukuti nali mbwanaloli kangi nali nkisu loli ngahobokagha napanandi.
IKINDU IKYAKULONDIWA IKI NGAKIGHULILAGHA
Bo ifyinja fibili fikindilepo, nalyaghene nu mulumbu uyu akasimenye ukuti isi abombile syalimbangisye ukuti ngumbukileghe isya bumi bwangu bwakunyuma. Nikalagha na balumbu 5 aba bakali pabweghi. Isiku limo twalinkolile uwakwendela idela nunkasi wake Tamara ukuti basikale kunyumba yitu kwa sabata yumoywene. Bo undume wake ali bize ukubomba ifindu ifya kukipanga, Tamara alyandile ukwangala nanuswe twe balindwana kangi twesa tulinkuseka. Nahobwike fiyo na isi. Ali mundu wamahala kangi amenye ukwangala na bangi. Naswighile fiyo ukuketa ukuti umundu uyu ikumbombela Yehova ikuhoboka kangi ukwangala na bangi.
Tamara abonekagha walusekelo fiyo. Umwene abughanile fiyo ubwanaloli nubufumusi. Ali walusekelo fiyo ukumbombela Yehova loli une ngali walusekelo panongwa yakuti ngambombelagha. Akayilo kake akanunu kangi nulusekelo ulu alinalo fyalimbangisye ukuti njenje fiyo pa bumi bwangu. Ikifwanikisyo kyake, kyalimbangisye ukwinong’onela ifundo iyakulondiwa fiyo iyakuti: Yehova ikulonda ukuti twesa tumbombeleghe “mubwikyele tukoleleghe mwalusekelo.”—Sal. 100:2.
NALYANDILE UKUBUGHANA KANGI UBUFUMUSI
Nalondagha ukuya walusekelo bo Tamara loli ukuti niye nulusekelo ulu, nalondiwagha ukuchenja fiyo pa bumi bwangu. Ngachenjile mwanakalinga loli panandinapanandi nalyandile ukuchenja ifindu fiyo. Nalyandile ukwitendekesya ingomano kangi utubalilo tumo nabombagha ubupayiniya ubwakabalilo. Isi syalindulile ukuti ningayagha nubogha fiyo kangi nali nulusubilo losa. Panongwa yakuti nabombelagha fiyo Ibaibolo linga ndi mubufumusi, isi syambangisyagha ukuti nhobokeghe fiyo nubufumusi. Yonongwa yake umwesi ghulighosa nabombagha ubupayiniya ubwakabalilo.
Nalyandile ukubagha abamanyani aba fyinja ifyakukindanakindana aba babughanile fiyo ubwanaloli kangi bahobokagha ukumbombela Yehova. Ikifwanikisyo kyabo ikinunu kyalindulile ukuti ninong’oneleghe ikindu iki kyali kyakulondiwa fiyo pa bumi bwangu nukwanda ukubelenga Ibaibolo isiku lililyosa. Nalyandile ukuhoboka fiyo nubufumusi kangi mwanakalinga nalyandile ubupayiniya ubwakabalilo kosa. Bo ifyinja fikindilepo, nalyandile ukuhoboka kangi nayagha mwabuke fiyo linga ndi ku ngomano.
NALIMWAGHILE UMWINANGU UWAKWIYIPA UYU YOPE ALI MPAYINIYA
Bo ikyinja kikindilepo nalyaghene na Alex uyu ali wakisa, nsubiliwa kangi alinganile Yehova nubufumusi. Umwene ali ntuli nkipanga kangi abombile ubupayiniya kwa fyinja 6. Kangi akabalilo kamo Alex abombileko ububombeli ku Malawi kuno kwalondiwagha ubutuli bwingi. Bo ali ku Malawi ayagha nakabalilo akakwangala na bamishonale aba bannangisyagha ikifwanikisyo ikinunu kangi bankasyagha ukuti akindilileghe ukubika ifindu ifya Bunyafyale pamalo aghakwanda pa bumi bwake.
Mu 2003, Une na Alex twalyeghene kangi ukufuma pakabalilo aka, twakindilile ukubomba ubupayiniya bwakabalilo kosa. Tumanyile ifimanyilo fingi ifyakulondiwa kangi Yehova atusayile munjila nyingi.
YEHOVA ATUSAYILE FIYO
Tukufumusya mu tawuni ya Gleno ku Timor-Leste
Mu 2009, batubulile ukuti tukabombeghe ubumishonale ku Timor-Leste ku katawuni akanandi aka kali pa lusungo ulwa Indonesia. Twaswighile fiyo, twahobwike kangi twali nubogha akabalilo kamokene. Bo imyesi 5 yikindilepo, twafikile mu tawuni inywamu iya Dili.
Ukusama uku kwapangisye ukuti ifindu fingi fichenje fiyo pa bumi bwitu. Twalondiwagha ukwisibila inyiho imbya, injobelo, ifyakulya namalo aghakwikala. Utubalilo tumo linga tuli mubufumusi, twaghanagha na bandu aba bali balondo fiyo aba bakamanyile fiyo isukulu kangi aba banyoziwagha. Abandu bingi batamiwagha fiyo naminong’ono panongwa ya bwite kangi nifindu ifyankhaza. *
Ubufumusi bwali bwakuhobosya fiyo. Mwakifwanikisyo, akabalilo kamo nalyaghene nu ndindwana uwa fyinja 13 uyu asulumenie fiyo uyu ingamu yake ali yo Maria. * Mama wake afwile ifyinja finandi ifi fikindilepo kangi tata wake akaghanagha nawe kabilikabili. Mwakufwana itolo na bana aba bali nifyinja bo fyake, Maria akamenye isi alondiwagha ukubomba pa bumi bwake. Ngukumbuka isiku limo alilile fiyo bo ikumbula muno ikwipilikila. Loli ngapilikagha isi ayobagha panongwa yakuti nakali ukuyimanya kanunu injobelo yake. Naliputile kwa Yehova nalinsumile ukuti andule ukuti nunkasye. Ukufuma apo, nalyandile ukumbelengela amalemba aghakukasya. Bo ifyinja finandi fikindilepo itolo naketile muno ubwanaloli bwachenjile akayilo ka Maria namuno abonekelagha pa bumi bwake. Umwene alyosiwe kangi lino ikumanyila na bandu Ibaibolo. Lino Maria ali nimbumba inywamu iya mwambepo kangi ikwipilika ukuti aghaniwe fiyo.
Yehova ikusaya fiyo imbombo iyakufumusya ku Timor-Leste. Nalinga ukuti abafumusi bamo balyosiwe kwa fyinja 10 itolo ifi fikindilepo, bamo bapayiniya, batuli nkipanga kangi bakulumba bakipanga. Bamo bikutula pa ofesi iyakusanusya amabuku agha munjobelo isya nkaya aka. Sikunhobosya fiyo linga ngubaketa bikwimba pangomano, bikunangisya ukuti balusekelo kangi bikukindilila ukukula mwambepo.
Ndi na Alex, tukubuka kukighaba ikingi ukwakuyabila utumapepala utwakubakolela abandu ku nifwa ya Yesu
NGALINONG’ONILEPO ISYA BUMI UBWAKUHOBOSYA BO UBU
Ububombeli bwitu ku Timor-Leste bwali bwakutamya fiyo ukukinda namuno twikalilagha ku Australia loli bwali bumi bwakuhobosya fiyo. Utubalilo tumo twakwelagha na bandu mukabasi akanandi aka bapimbilagha iniswi inyumano nifibwayila fyamaseke ghamani ifi babukagha nafyo ku musika. Amasiku ghamo twamanyilagha na bandu Ibaibolo mu kanyumba aka kapyagha fiyo kangi aka pasi pake pali pabibi fiyo, inguku syabopagha paliposa. Loli nalinga ukuti twaghanagha ni ndamyo loli utubalilo twingi nayobagha ukuti, ‘Ubu bo bumi ubununu.’
Tuli pabulendo ubwakubuka kukighaba iki batutumileko
Linga ngwinong’onela isya kunyuma kundaghisya fiyo abapapi bangu panongwa yakuti baghelaghelagha ukumanyisya injila sya Yehova nukundula ukuti ngasye kangi ubumanyani bwangu na Yehova. Isi syalimbonekile sikukolelana na isi sili pa Isya Mbupingamu 22:6. Mama na Tata bikuhoboka fiyo linga bikumbona une na Alex tukumbombela Yehova. Ukufuma mu 2016, twabombagha ububombeli ubwakwendela idela nkighaba kya ofesi iyi yali ku Australia.
Ngubanangisya abana ba ku Timorese ividiyo ya Kalebi na Sofiya
Ndikusubila ukuti kunyuma ngahobokagha nimbombo iyakufumusya. Loli lino mbughanile fiyo ubufumusi. Lino nsyaghenie ukuti kisita kwinong’onela isi nabombile pa bumi bwangu, ulusekelo ulwanaloli lukwisa pene linga tukumbombela Kyala nindumbula yosa. Bwanaloli ukuti ifyinja 18 ifi nambombelagha Yehova pampene na Alex, fyali fyinja fyakuhobosya fiyo pa bumi bwangu. Lino ngupilikisya kanunu ubwanaloli ubu uwamasalimo Davidi alimbulile Yehova. Umwene atile: “Basekeleghe loli aba bikubopela kumyako; kangi bimbeghe inyimbo sya lusekelo bwila itolo. . . . Kangi bosa aba bayighanile ingamu yako bikyeleghe myako.”—Sal. 5:11.
Syakuhobosya fiyo ukumanyila Ibaibolo na bandu abakwiyisya bo aba
