1. Ngimba Yehova ikuketa isyafiki mu bandu bake?

YEHOVA KYALA “ikwikyela mbandu bake.” (Sal. 149:4) Isi sikutupangisya ukuya balusekelo fiyo. Yehova ikuketa utuyilo twitu utununu; ikuketa muno tubaghile ukuyila bandu banunu kangi ikututula ukuti tuseghelele ku myake. Linga tukukindilila ukuya basubiliwa kumyake, ikuya pakukindilila ukuya nanuswe pabumanyani kwa bwila na bwila.—Yoh. 6:44.

2. Nongwa yafiki bamo kukuya kukafu ukusubila ukuti Yehova abaghanile?

² Bamo babaghile ukuyoba ukuti, ‘Nsimmenye ukuti Yehova abaghanile abandu bake bo gulu loli ngimba mbaghile ukusubila bulebule ukuti Yehova anganile panimwene?’ Ngimba findu fiki ifi fibaghile ukumpangisya umundu yumo ukulalusya ilalusyo bo ili? Oksana * atamiwagha fiyo bo mwana. Umwene atile: “Nali walusekelo fiyo bo nosiwe kangi bo nandile ubupayiniya. Loli bo ifyinja 15 fikindilepo, nalyandile ukwinong’onela ifindu ifibibi ifi nalyaghene nafyo bo ndi mwana. Nalyandile ukwinong’ona ukuti Yehova ikungeta ukuti ngaya wakulondiwa kangi ndikulondiwa ulughano lwake.” Yua, umulumbu umpayiniya uyu yope alyaghene ni ndamyo nyingi bo mwana, atile: “Naliyipile nindumbula yosa kwa Yehova panongwa yakuti nalondagha ukunhobosya. Loli nalyandile ukusubila ukuti akabaghila ukungana.”

3. Ngimba tukuya pakumanyila isyafiki mu nkhani iyi?

³ Mwakufwana itolo na balumbu babili aba tubayobile, munganile Yehova ukufuma pasi pandumbula loli mubaghile ukukayikila linga umwene abaghanile. Nongwa yafiki mukulondiwa ukuya nulusubilo  ukuti umwene ikubapasikisya naloli? Kangi ngimba findu fiki ifi fibaghile ukubatula linga mukwinong’ona ukuti Yehova akabaghana? Isagha tuyobesanie amaansala gha malalusyo agha.

4. Nongwa yafiki kubibi fiyo ukukayikila ukuti Yehova atughanile?

⁴ Linga tuli nulusubilo losa ukuti Yehova atughanile, tukuya pakumbombela nindumbula yosa nalinga ukuti tukwaghana ni ndamyo. Loli linga tukukayikila ukuti Kyala ikutupasikisya, “tutikuya pakuya namaka.” (Mbu. 24:10) Kangi linga tuwile amaka nukuleka ukuya nulusubilo ukuti Kyala atughanile, tutikuya pakufwanisya ukukana ingelo sya Setano.—Ef. 6:16.

5. Ngimba findu fiki ifi fibombiwe ku bakamu na balumbu bamo aba bikukayikila ukuti Kyala abaghanile?

⁵ Abakamu na balumbu bamo bandile ukwinong’ona ukuti Yehova akabaghana kangi atikubapasikisya. Isi sikupangisya ukuti ulwitiko lwabo lungayagha lwamaka. James uyu nkulumba wakipanga atile: “Nalinga ukuti nabombagha ububombeli pa Beteli kangi nahobokagha ukufumusya munjobelo iya kipanga ikingi loli nakayikilagha linga Yehova ahobokagha na isi nambombelagha. Utubalilo tumo nakayikilagha linga Yehova apilikisyagha inyiputo syangu.” Eva, uyu yope ikubomba ubupayiniya bwa padela atile: “Nguketa ukuti ukukayikila ukuti Yehova atughanile kubibi fiyo panongwa yakuti sikupalamasya ububombeli ubu tukumbombela. Tukuleka ukumbombela ifindu fingi Kyala nukuleka ukuya balusekelo pakumbombela.” Michael, uyu mpayiniya wakabalilo kangi nkulumba wakipanga atile: “Linga mukusubila ukuti Kyala atikubapasikisya, mukuya pakusokako kumyake.”

6. Ngimba tukulondiwa ukubomba isyafiki linga twandile ukwinong’ona ukuti Kyala akatughana?

⁶ Ifyakubombiwa bo ifi fibaghile ukonanga fiyo ulwitiko lwitu linga twandile ukwinong’ona ukuti Yehova akatughana. Loli ngimba tukulondiwa ukubomba isyafiki linga twandile ukwinong’ona ukuti Yehova akatughana? Mwanakalinga tukulondiwa ukuleka ukwinong’ona bo ulu. Tunsume Yehova ukuti atutule “ukusosyamo aminong’ono amabibi” nukubikamo ‘ulutengano lwa Kyala ulu lukusyubatila indumbula syitu ninyinong’ono syitu.’ (Sal. 139:23; Filip. 4:6, 7) Kangi tukumbukeghe ukuti tukaya twibene twe tuli naminong’ono bo agha. Abakamu na balumbu bamo bope bikutamiwa naminong’ono amabibi. Kangi ababombi ba Yehova aba kunyuma bope balondiwagha ukulimbana naminong’ono bo agha. Inong’onela isi tubaghile ukumanyilako ku ntumiwa Pauli.

7. Ngimba ndamyo siliku isi Pauli alyaghene nasyo?

⁷ Ngimba utubalilo tumo mukuketa ukuti muli nubudindo ubunywamu ubu kubaghile ukuya kukafu ukubufwanisya? Linga mo siyilile, mubaghile ukupilikisya isi Pauli alyaghene nasyo. Umwene abapasikisyagha fiyo abakamu na balumbu komma aba kukipanga kimokyene loli “ku fipanga fyosa.” (2 Kor. 11:23-28) Ngimba mukutamiwa nububine ubu bukubapangisya ukuti mungayagha balusekelo? Pauli aghanagha ni ndamyo iyi yali bo “umwifwa uwamumbili” ughu wampangisyagha ukuti atamiweghe kangi umwene alondagha ukuti ghusokemo. (2 Kor. 12:7-10) Ngimba utubalilo tumo mukuwa amaka panongwa yabusitabugholofu bwinu? Momuno yope Pauli ipilikilagha utubalilo tumo. Umwene iketagha ukuya “mundu untolwe” panongwa yakuti alwanagha nubutulanongwa bwake.—Rom. 7:21-24.

8. Ngimba findu fiki ifi fyalintulile Pauli ukwifimbilisya ku ndamyo?

⁸ Nalinga ukuti Pauli alyaghene ni ndamyo syosa isi, loli umwene akindilile ukumbombela Yehova. Ngimba findu fiki ifi fyalimpele amaka? Nalinga ukuti abumenye ubusitabugholofu bwake loli akindilile ukuya nulwitiko lwamaka mu kitabulilo kya Yesu. Kangi alumenye kanunu ulufingo lwa Yesu ulwakuti, “aliwesa uyu ali nulwitiko mwa Yesu isakubwagha. . . ubumi bwa bwila.” (Yoh. 3:16; Rom. 6:23) Pauli ali yumo mwa bandu aba banangisyagha ulwitiko mu kitabulilo kya Yesu. Kangi ali nulusubilo losa ukuti Yehova ikulonda fiyo ukubahobokela abandu ukongelelapo na bosa aba batulile ubutulanongwa ubunywamu linga balapile ukufuma pasi pandumbula.—Sal. 86:5.

9. Ngimba tukumanyilako isyafiki ku masyu gha Pauli agha ghali pa Bagalatia 2:20?

⁹ Pauli ali nulwitiko ukuti Kyala anganile fiyo panongwa yakuti asimenye ukuti alintumile umwanake ukuti asamfwile. (Belenga Bagalatia 2:20.) Amukete amasyu aghakukasya agha ghali kubumalilo bwa vesi ili. Pauli atile: “Umwana wa Kyala . . . alinganile une nukubika ubumi bwake panongwa yangu.” Pauli akinong’onagha ukuti mundu mbibi fiyo nukuti Kyala akabaghila ukungana. Nukwanda ukwinong’ona ukuti ‘Yehova abaghanile bene abakamu na balumbu bangu loli umwene akabaghila ukungana.’ Umwene abakumbwisye Abakristu ba ku Roma ukuti: “Bo tukali tuli batulanongwa, Kristu atufwilile.” (Rom. 5:8) Ulughano lwa Kyala, lukaya numpaka.

10. Ngimba tukumanyilapo isyafiki pa Baroma 8:38, 39?

¹⁰ Belenga Baroma 8:38, 39. Pauli asimenye muno ulughano lwa Kyala luyilile lwamaka. Umwene alembile atile, kakayapo “aka kabaghile ukutupaghula ku lughano lwa Kyala.” Pauli asimenye  muno Yehova anangisyile ubololo ku Baisraeli. Kangi asimenye muno Yehova annangisyilagha ikisa. Yonongwa yake m’masyu aghangi, tubaghile ukuyoba ukuti Pauli atighi, ‘Panongwa yakuti Yehova alintumile umwanake ukuti asamfwile, ngabaghila ukukayikila ukuti anganile’—Rom. 8:32.

11. Nalinga ukuti Pauli atulile ubutulanongwa ubunywamu bo ubu bukuyobiwa pa 1 Timoti 1:12-15, nongwa yafiki umwene ali nulusubilo ukuti Kyala alinganile ?

¹¹ Belenga 1 Timoti 1:12-15. Pauli abaghile ukuti atamiwagha fiyo linga ikwinong’onela ifindu ifibibi ifi abombile kunyuma bo akali ukuya Nkristu. Yonongwa yake sikaya syakuswighisya bo ikwiyoba mwene ukuti untulanongwa “untasi.” Bo akali ukumanyila ubwanaloli, Pauli abafwimagha Abakristu ntwaya twingi, bamo ababikagha mu jele kangi itikisyagha ukuti Abakristu bamo baghoghiwe. (Imbo. 26:10, 11) Ngimba mubaghile ukwinong’onela muno Pauli abaghile ukwipilikila ukwaghana nu Nkristu uwakilumyana uyu lumo abapapi bake baghoghiwe panongwa yake? Pauli iyipagha inongwa pambibi isi abombile loli umwene asimenye ukuti akabaghile kuchenja ifi fyabombiwe kunyuma. Umwene asubilagha ukuti Yesu alimfwilile kangi alembile ukuti: “Mwipyana lya Kyala ndi bo mumo njilile.” (1 Kor. 15:3, 10) Ngimba tukumanyilako isyafiki? Mwitikisyeghe ukuti Kristu abafwilile kangi abatulile ukuti muye pabumanyani ubwamaka fiyo na Yehova. (Imbo. 3:19) Ikindu ikyakulondiwa fiyo kwa Kyala syo isi tukubomba lino na nkyeni, komma imbibi isi twabombile kunyuma kali twali yumo wa Baketi ba Yehova pakabalilo ako pamo hayi.—Yes. 1:18.

12. Ngimba amasyu agha ghali pa 1 Yohani 3:19, 20 ghabaghile ukututula bulebule linga tukwiketa ukuti tukaya bakulondiwa pamo ukuti tukaghaniwa?

¹² Linga mukwinong’ona ukuti Yesu afwile panongwa ya mbibi syinu, mubaghile ukwinong’ona ukuti, ndikulondiwa ukwambilila ikyabupe ikyakulondiwa fiyo iki.’ Nongwa yafiki mubaghile  ukwinong’ona bo ulu? Indumbula yitu yibaghile ukutusyoba nukwanda ukwinong’ona ukuti tukaya bakulondiwa kangi tukabaghila ukughaniwa. (Belenga 1 Yohani 3:19, 20.) Linga twandile ukwinong’ona ububibi tukulondiwa ukukumbuka ukuti “Kyala yo nkulumba ukusikinda indumbula syitu.” Ulughano ulwa Tata witu wakumwanya nuluhobokelo lwake fyamaka fiyo ukukinda aminong’ono amabibi agha tubaghile ukuya nagho mundumbula syitu. Tukulondiwa ukuya nulusubilo losa ukuti Yehova, atughanile fiyo. Ukuti tubombe isi, akabalilo kosa tukulondiwa ukubelenga Amasyu ghake, ukwiputa kumyake nukuya nakabalilo akakwangala nababombi bake abasubiliwa. Nongwa yafiki ukubomba isi kwakulondiwa?

13. Ngimba ukumanyila Amasyu gha Kyala kubaghile ukututula bulebule? (Keta ibokosi ilyakuti “ Muno Amasyu gha Kyala Ghabatulile.”)

¹³ Mubelengeghe Amasyu gha Kyala isiku lililyosa, kangi mukuya pakutumanya utuyilo utununu utwa Yehova. Mukuya pakuketa muno abaghanile. Linga isiku lililyosa mukwinong’onela isi mukubelenga mu Baibolo, sikuya pakubatula ukuti mwinong’oneghe kanunu, “nukugholosya ifindu ifi fili” muminong’ono ghinu. (2 Tim. 3:16) Kevin uyu nkulumba wakipanga kangi atamiwagha fiyo naminong’ono aghakuti akaya wakulondiwa atile: “Ukubelenga Salimo 103 nukwinong’onelapo kwalindulile ukuti ndeke ukuya naminong’ono amabibi nukwanda ukuketa ukuti Yehova ikunyinong’onela fiyo.” Eva, uyu tunjobile pabwandilo atile: “Kubumalilo bwa isiku nguya nakabalilo akakwinong’onela ifindu ifyakulondiwa fiyo kwa Yehova. Isi sikundula ukuti niye nulutengano ulwa mundumbula kangi ngasye ulwitiko lwangu.”

14. Ngimba ulwiputo lubaghile ukututula bulebule?

¹⁴ Mwiputeghe kisita kuleka. (1 Tes. 5:17) Linga mukulonda ukuya pa bumanyani nu mundu yumo mukulondiwa ukuyobesania nawe utubalilo tosa nukumbula muno mukwipilikila. Momuno siyilile nu bumanyani bwitu na Yehova. Linga tukumbula aminong’ono ghitu namuno tukwipilikila ndwiputo, tukunangisya ukuti tuli nulusubilo myake kangi tukumanya ukuti atughanile. (Sal. 94:17-19; 1 Yoh. 5:14, 15) Yua, uyu tunjobile pabwandilo atile: “Linga ngwiputa ngughelaghela ukuyoba nyingi ukukinda itolo isi naghene nasyo pisiku ili. Ngumbula Yehova syosa isi ngwinong’ona kangi namuno ngwipilikila. Lino ngetile ukuti Yehova akindene na bwana wa pakampani. Kangi yo Tata uyu abaghanile fiyo abanake.”—Keta ibokosi ilyakuti “ Ngimba Mubelengilemo?”

15. Ngimba Yehova ikunangisya bulebule ukuti ikutwinong’onela?

¹⁵ Mwangaleghe na bamanyani abasubiliwa; abene kyabupe kyakufuma kwa Yehova. (Yak. 1:17) Tata witu wakumwanya ikunangisya ukuti ikutwinong’onela mwakutupa abakamu na balumbu nkipanga aba “bikutunangisya ulughano  bwila.” (Mbu. 17:17) Mwakalata wake uwakubuka ku Bakristu ba ku Kolosi, Pauli ayobile isya Bakristu bamo aba balintulile kangi abayobile ukuti “balipelile ukuya basubisi.” (Kolos. 4:10, 11) Kangi yope Kristu Yesu andaghisyagha ubutuli ubwakufuma ku bamanyani bake, abandumi na bandu.—Luka 22:28, 43.

16. Ngimba abamanyani abasubiliwa babaghile ukututula bulebule ukuti tuseghelele kwa Yehova?

¹⁶ Ngimba mukusayiwa nikyabupe ikyakufuma kwa Yehova ikyakuya nabamanyani abasubiliwa? Linga tukumbula indamyo syitu umwinitu unkusi mwambepo, sitikunangisya ukuti tukaya nulwitiko lwamaka; m’malo mwake tukulonda ukuti tufighililiwe. Inong’onela isi James uyu tunjobile pabwandilo ayobile. Umwene atile: “Ukuya pabumanyani ubununu na Bakristu abakusi mwambepo kundulile fiyo. Linga nandile ukuya naminong’ono amabibi abamanyani abakulondiwa aba bikumbilikisya mbololo kangi bikumbula ukuti banganile. Linga babombile isi, ngusyaghania ukuti Yehova anganile kangi ikumbasikisya.” Kwakulondiwa fiyo ukuya pabumanyani ubwamaka na bakamu na balumbu bitu.

17-18. Ngimba tukulondiwa ukupilikisya kwa nani kangi nongwa yafiki?

¹⁷ Setano ikulonda ukuti tuwe amaka pakubomba inunu. Umwene ikulonda ukuti tusubileghe ukuti Yehova akatughana kangi ukuti tukaya bakulondiwa ukuti atupoke. Loli ukufwana namuno tumanyilile ubu bukaya bwanaloli.

¹⁸ Yehova abaghanile fiyo. Muli bakulondiwa fiyo mmaso ghake. Linga mukumpilikila mukuya “pakukindilila ukuya ndughano lwake” kwa bwila na bwila bo muno Yesu abombile. (Yoh. 15:10) Yonongwa yake mutikulondiwa ukunsubila Setano pamo indumbula yinu linga mwandile ukwinong’ona ukuti Yehova akabaghana. M’malo mwake mupilikisyeghe kwa Yehova uyu ikuketa inunu mumundu aliwesa. Muye nulusubilo losa ukuti umwene “ikubaketa abandu bake bosa ukuya bakulondiwa,” ukongelapo umwe.