INKHANI IYAKUMANYILA 4
Nongwa Yafiki Tukukumbukila Inifwa ya Yesu?
“Mubombeghe bunobuno ukungumbukilamo une.”—LUKA 22:19.
ULWIMBO 20 Mukapeleka Mwana Winu Wakuzirwa
ISI TUKUYA PAKUMANYILA *
1-2. (a) Ngimba po pakabalilo kaliku aka tukukumbukila unkamu witu uyu afwile? (b) Ngimba Yesu alyandisye ifindu fiki ikilo ikyakuti kilabo ikuya pakufwa?
KISITA kwinong’onela akabalilo aka abakamu bitu bafwile loli tukukindilila ukubakumbukila. Fiyofiyo tukukumbukila isiku ili bafwile.
2 Ikyinja kilikyosa, pa kisu kyosa tukubungana ukuti tukumbukile inifwa ya mundu uyu tunganile fiyo, Yesu Kristu. (1 Pet. 1:8) Tukubungana pampene ukuti tukumbukile umundu uyu abikile ubumi bwake ukuya kitabulilo ukuti atupoke ku mbibi syitu ni nifwa. (Mat. 20:28) Kangi Yesu alondagha ukuti abafundiwa bake bope bakumbukileghe inifwa yake. Ikilo ikyakuti kilabo ikuya pakufwa, Yesu alyandisye ifyakulya ifya namayolo nukubabula ukuti: “Bo mubombeghe bunobuno ukungumbukilamo une.”—Luka 22:19.
3. Ngimba tukuya pakuyobesania isyafiki mu nkhani iyi?
3 Abandu banandi itolo aba bikukumbukila inifwa ya Kristu bali nulusubilo ulwakubuka kumwanya. Loli abandu bingi aba bali nulusubilo ulwakwisa kwikala pa kisu kyapasi bope bikwaghiwapo pakyakubombiwa iki. Mu nkhani iyi tukuya pakuyobesania inongwa iyi amagulu ghosa mabili agha ghikwiyipa fiyo pakukumbukila inifwa ya Yesu ikyinja kilikyosa. Tukuya pakuyobesania kangi ulusayo ulu tukulwagha linga tukwaghiwapo pakukumbukila inifwa ya Yesu. Isagha twande ukuyobesania ififukwa fimo ifi abapakiwa bikukumbukila inifwa ya Yesu.
NONGWA YAFIKI ABAPAKIWA BIKUKUMBUKILA INIFWA YA YESU?
4. Nongwa yafiki abapakiwa bikulya ikisyesye nukunwa ikinwelo pakukumbukila inifwa ya Yesu?
4 Ikyinja kilikyosa, abapakiwa aba bikwaghiwapo pakukumbukila inifwa ya Yesu bikulya ikisyesye nukunwa ikinwelo. Nongwa yafiki abene bikundaghisya linga bikulya ikisyesye nukunwa ikinwelo? Ukuti tumwaghe ansala, isagha twinong’onele isi syabombiwe ikilo ikyabumalilo ikya bumi bwa Yesu ubwa pa kisu. Bo babombile Ikyaka kya Pasa, Yesu alyandisye ikyakubombiwa iki kikukoleliwa ukuti Ifyakulya fya Namayolo Ifya Mwalafyale. Umwene abapele ikisyesye nukunwa ikinwelo abafundiwa bake abasubiliwa 11 nukubabula ukuti balye nu kunwa. Yesu ayobile isya lwitikano ulupya nu lwitikano lwa Bunyafyale. * (Luka 22:19, 20, 28-30) Ulwitikano ulu lwapangisye ukuti abafundiwa na bandu banandi itolo basaye banyafyale kangi baputi kumwanya. (Ubuset. 5:10; 14:1) Bene abapakiwa aba bakali bali pa kisu * aba bali mu nyitikano ibili isi, bo aba bikulya ikisyesye nukunwa ikinwelo pakukumbukila inifwa ya Yesu.
5. Ngimba abapakiwa bikumanya isyafiki isyakufwana nulusubilo ulu bapeliwe?
5 Ikifukwa ikingi iki abapakiwa bikwiyipa pakukumbukila inifwa ya Yesu kyo kyakuti: Sikubapa ulusako ulwakuti binong’oneleghe isya lusubilo lwabo. Yehova abapele ulusubilo ulununu fiyo ulu bisakuhobokagha nalo nu bumi ubusitakufwa kumwanya ukuti bakabombeghe pampene na Yesu Kristu kangi na Bakristu 144,000. Ukukinda fyosa abene bisakuyagha pamaso pa Yehova Kyala. (1 Kor. 15:51-53; 1 Yoh. 3:2) Abapakiwa bikumanya ukuti basaliwe ukuti bakahobokeghe nulusako ulwakubuka kumwanya. Loli ukuti basaliwe ukubuka kumwanya, abene bikulondiwa ukukindilila ukuya basubiliwa mpaka pa bufwe bwabo. (2 Tim. 4:7, 8) Abapakiwa bikuya balusekelo fiyo linga bikwinong’onela isya lusubilo lwabo ulwa kumwanya. (Titi 2:13) Bule pakuyoba isya ba “ng’osi isingi”? (Yoh. 10:16) Ngimba fifukwa fimo filiku ifi abene bikukumbukila inifwa ya Yesu?
NONGWA YAFIKI ABANG’OSI ISINGI BIKUKUMBUKILA INIFWA YA YESU?
6. Nongwa yafiki abang’osi isingi bikukumbukila inifwa ya Yesu ikyinja kilikyosa?
6 Abang’osi isingi bope bikwaghiwapo pakukumbukila inifwa ya Yesu, nalinga ukuti batikulya ikisyesye nukunwa ikinwelo loli bikukindilila ukuhoboka ukwaghiwapo. Mu 1938, bosa aba bali nulusubilo ulwakwisa kwikala pa kisu kyapasi bo bali bakwanda ukwaghiwapo pakukumbukila inifwa ya Yesu. Ingasya ya Ndindilili iya Kizungu iya March 1, 1938, yatile: “Kikuya pakwisa akabalilo akanunu aka abang’osi isingi bingi bikuya pakwaghiwapo pakukumbukila inifwa ya Yesu nu kuketa isi sikubombiwa. . . . Kali kabalilo kakuhobosya fiyo ku myabo.” Mwakufwana itolo na bahesya aba babakolile ukuti bakaghiwepo nukuhoboka pabukwati, abang’osi isingi bope bikuhoboka ukwaghiwapo pakukumbukila inifwa ya Yesu.
7. Nongwa yafiki abang’osi isingi bikupilikisya fiyo ku nkhani iya kukumbukila inifwa ya Yesu?
7 Abang’osi isingi, bope bikwinong’onela isya lusubilo lwabo. Abene bikupilikisya fiyo ku nkhani iya kukumbukila inifwa ya Yesu, iyi yikulingania fiyo isi Yesu na ba 144,000 bisakubabombela abandu abagholofu pakabalilo ka fyinja 1000 ifya bulaghili bwa Kristu. Pasi pabulaghili bwa Mwalafyale Yesu, bosa aba isakulaghilagha nabo kumwanya bisakubatula abandu ukuya bagholofu. Syakuhobosya fiyo ku bandu bingi aba bikwaghiwapo pakukumbukila inifwa ya Yesu linga bikwinong’onela ulufingo ulwa mu Baibolo ulu lukufwanisiwa bo ulu lukwaghiwa pa Yesaya 35:5, 6; 65:21-23; na pa Ubusetuli 21:3, 4. Mwakwinong’onela isyakufwana na bene kangi na baghaniwa babo isyakwisa kwikala nkisu ikipya, bikukasya fiyo ulusubilo lwabo ulwa nkyeni nu kukindilila ukumbombela Yehova.—Mat. 24:13; Gal. 6:9.
8. Ngimba kifukwa kiliku ikingi iki abang’osi isingi bikukumbukila inifwa ya Yesu?
8 Inong’onela kangi ikifukwa ikingi iki abang’osi isingi bikukumbukila inifwa ya Yesu. Abene bikulonda ukunangisya ulughano lwabo nukubatula abapakiwa. Amasyu gha Kyala ghayobile ngani ukuti abapakiwa na bang’osi isingi bisakubombelagha pampene. Bulebule? Isagha tuyobesanie ififwanikisyo finandi itolo.
9. Ngimba ubusololi ubu buli pa Zekariya 8:23 bukunangisya isyafiki isyakufwana na muno abang’osi isingi bikubombela ifindu na bapakiwa?
9 Belenga Zekariya 8:23. Ubusololi ubu bukulingania kanunu fiyo muno abang’osi isingi bikwipilikila isyakufwana na bakamu na balumbu babo abapakiwa. Amasyu aghakuti “Umuyuda” na ghakuti “nanuwe” ghikuyoba isya gulu limolyene ilya bapakiwa aba bakali bali nubumi pa kisu kyapasi. (Rom. 2:28, 29) “Abandu abahesya kalongo abakufuma mu njobelo isya luko losa” bikwimila abang’osi isingi. Abene “bisakughukola unselekesye”—nukuya pampene na bapakiwa pakwiputa kwa bwanaloli. Yonongwa yake ikilo ikya kukumbukila inifwa ya Yesu, abang’osi isingi bikuya pampene na bapakiwa mwakwaghiwapo pakyakubombiwa iki.
10. Ngimba Yehova abombile isyafiki ukuti afwanisye ubusololi ubu buli pa Ezekieli 37:15-19, 24, 25?
10 Belenga Ezekieli 37:15-19, 24, 25. Yehova afwanisye ubusololi ubu mwakubatula abapakiwa na bang’osi isingi ukuti babombeghe pampene mwakukolelana. Ubusololi ubu bukuyoba isya ngili ibili. Aba bali nulusubilo ulwakubuka kumwanya bali bo ingili ya “Yuda” kangi aba bali nulusubilo ulwakwisa kwikala pa kisu kyapasi bali bo ingili ya “Efraimu.” * Yehova ikughabungania amagulu mabili agha ukuti ghaye “ngili yimoyene.” Isi sikusanusya ukuti abene bikukolelana ukubombela pampene pasi pa bulaghili bwa Mwalafyale yumoywene, Kristu Yesu. Ikyinja kilikyosa, abapakiwa na bang’osi isingi bikukumbukila inifwa ya Yesu, komma pakuya magulu mabili agha ghapaghukene, loli ukuya “ntimo ghumowene” pasi pa “ntimi yumoywene.”—Yoh. 10:16.
11. Ngimba “ing’osi” isi sikuyobiwa pa Matai 25:31-36, 40 sikubatula bulebule abakamu ba Kristu abapakiwa?
11 Belenga Matai 25:31-36, 40. “Ing’osi” isi Yesu asiyobile sikwimila abandu abagholofu nkabalilo kabumalikisyo aka aba bali nulusubilo ulwakwisa kwikala pa kisu kyapasi, aba bo bang’osi isingi. Abene bikwiyipa ukubatula abakamu ba Kristu abapakiwa ukuti bafwanisye ubudindo bwabo pambombo iyakumanyisya nukupanga abafundiwa pa kisu kyosa.—Mat. 24:14; 28:19, 20.
12-13. Ngimba njila simo siliku isi abang’osi isingi bikunangisya ukuti bikubatula abakamu ba Kristu abapakiwa?
12 Ikyinja kilikyosa bo abasabata aba kukumbukila inifwa ya Yesu bakali ukufika, abang’osi isingi bikubatula abakamu ba Kristu abapakiwa mwakwiyipa pambombo iyakufumusya pa kisu kyosa nukubakolela abandu ukuti basaghiwepo pakukumbukila inifwa ya Yesu. (Keta ibokosi ilyakuti “Ngimba Mukwitendekesya Ukukumbukila Inifwa ya Yesu?”) Kangi abene bikutulapo mwakupanga imbatiko ukuti ukukumbukila inifwa ya Yesu kusabombiwe nkipanga kilikyosa pa kisu kyapasi, nalinga ukuti mfipanga fingi mutikwaghiwa abandu aba bikulya ikisyesye nukunwa ikinwelo. Abang’osi isingi bikwiyipa ukubatula abakamu ba Kristu abapakiwa mu njila nyingi. Abang’osi isingi bikumanya ukuti Yesu ikuketa isi bikubomba mwakubatula abakamu abapakiwa, abene bikufwana itolo bikumbombela Yesu.—Mat. 25:37-40.
13 Ngimba fifukwa fimo filiku ifi twesa tukulondiwa ukwaghiwapo pakukumbukila inifwa ya Yesu kisita kwinong’onela isya lusubilo ulu tuli nalo?
NONGWA YAFIKI TWESA TUKWAGHIWAPO PAKUKUMBUKILA INIFWA YA YESU?
14. Ngimba Yehova na Yesu banangisye bulebule ulughano ulunywamu fiyo ku myitu?
14 Tukundaghisya fiyo ulughano ulu Yehova na Yesu batunangisye. Yehova atunangisye ulughano lwake mu njila nyingi. Loli injila inywamu ukukinda syosa iyi atunangisye ulughano lwake ko kuntuma umwanake unganiwa ukuti asatamiwe nu kutufwila. (Yoh. 3:16) Tusimenye ukuti Yesu yope anangisye ulughano ulunywamu fiyo mwakwiyipa ukubika ubumi bwake panongwa yitu. (Yoh. 15:13) Tukabaghila ukungomokesya Yehova na Yesu ulughano ulu batunangisye. Loli tubaghile ukunangisya ukuti tukundaghisya ukufwana na muno tukubombela ifindu pa bumi bwitu. (Kolos. 3:15) Kangi tukwaghiwapo pakukumbukila inifwa ya Yesu panongwa yakuti tukulonda ukwinong’onela isya lughano ulu batunangisye namuno nanuswe tubaghile ukunangisyila ulughano lwitu ku myabo.
15. Nongwa yafiki abapakiwa na bang’osi isingi bosa bikundaghisya ikyabupe kya kitabulilo?
15 Tukundaghisya fiyo ikyabupe kya kitabulilo: (Mat. 20:28) Abapakiwa bikundaghisya ikitabulilo iki kikubapangisya ukuti ulusubilo lwabo lufwanisiwe. Panongwa ya lwitiko lwabo ulu bali nalo mu ikemo lya Kristu, Yehova ikubaketa ukuya bagholofu kangi banake. (Rom. 5:1; 8:15-17, 23) Abang’osi isingi bope bikundaghisya fiyo ikitabulilo. Panongwa ya lwitiko lwabo ulu bali nalo mu ikemo lya Kristu, abene bikunangisya utuyilo utununu pa maso pa Kyala, bikwiyipa ukumbombela kangi bali nulusubilo ulwa kwisakupona “pabutolwe ubukulumba.” (Ubuset. 7:13-15) Injila yimo iyi abapakiwa na bang’osi isingi bikunangisya ukundaghisya ikitabulilo ko kwaghiwapo pakukumbukila inifwa ya Yesu ikyinja kilikyosa.
16. Ngimba kifukwa kiliku ikingi iki tukukumbukila inifwa ya Yesu?
16 Ikifukwa ikingi iki tukukumbukila inifwa ya Yesu, kyo kyakuti tukulonda ukumpilikila Yesu. Kisita kwinong’onela ulusubilo ulwa nkyeni ulu tuli nalo, tukupilikila ululaghilo ulu Yesu alyandisye ulwakuti: “Mubombeghe bunobuno ukungumbukilamo une.”—1 Kor. 11:23, 24.
TWESA TUKUSAYIWA LINGA TUKWAGHIWAPO
17. Ngimba ukukumbukila inifwa ya Yesu kukututula bulebule ukuseghelela kwa Yehova?
17 Tukuseghelela kwa Yehova. (Yak. 4:8) Bo muno tumanyilile, ukukumbukila inifwa ya Yesu kukutupa ulusako ulwakwinong’onela isya lusubilo ulu Yehova atupele kangi nukwinong’onelapo isya lughano ulunywamu ulu atunangisye. (Yere. 29:11; 1 Yoh. 4:8-10) Linga tukwinong’onela isya lusubilo lwitu ulwa nkyeni nulughano ulwa Kyala ulusita kumalika, ulughano lwitu lukuya lwamaka fiyo kwa Yehova kangi tukukasya ubumanyani bwitu numwene.—Rom. 8:38, 39.
18. Ngimba ukwinong’onela ikifwanikisyo kya Yesu kukutukasya ukubomba isyafiki?
18 Tukukasiwa ukunkonga Yesu. (1 Pet. 2:21) Bo tuli pipi ukukumbukila inifwa ya Yesu, tukubelenga inkhani isya mu Baibolo isyakuyoba isya sabata uwabumalilo uwa bumi bwa Yesu bo ali pa kisu, isya bufwe bwake nu kusyuka kwake. Ukufuma apo, namayolo pakabalilo ka kukumbukila inifwa yake, inkhani isi sikutukumbusya isya lughano lwa Yesu ku myitu. (Ef. 5:2; 1 Yoh. 3:16) Linga tukubelenga isya kifwanikisyo kya kwiyipa kwa Yesu nu kwinong’onelapo, tukukasiwa “ukwenda bo mumo endelagha umwene.”—1 Yoh. 2:6.
19. Ngimba tubaghile ukukindilila bulebule ukuya ndughano lwa Kyala?
19 Tukukindilila ukuya ndughano lwa Kyala. (Yuda 20, 21) Tukukindilila ukuya ndughano lwa Kyala linga tukubomba syosa isi tubaghile ukufwanisya mwakumpilikila umwene, ukuyikemesya ingamu yake nukuyihobosya indumbula yake. (Mbu. 27:11; Mat. 6:9; 1 Yoh. 5:3) Ukukumbukila inifwa ya Yesu, kukututula ukuti tukindilileghe ukunhobosya Yehova, ‘Nukukindilila ukuya ndughano lwake kwa bwila na bwila.’
20. Ngimba fifukwa filiku ifinunu ifi tuli nafyo ifya kukumbukila inifwa ya Yesu?
20 Kali ulusubilo lwitu lwakwisa kubuka kumwanya pamo ukwikala pa kisu kyapasi, twesa tuli nififukwa ifinunu ifya kukumbukila inifwa ya Yesu. Ikyinja kilikyosa tukubungana pampene pisiku ili, tukukumbukila inifwa ya mundu uyu tunganile fiyo, Yesu Kristu. Ukukinda fyosa, tukukumbukila ulughano ulunywamu ulu Yehova atunangisye mwakutupa umwanake ukuya kitabulilo. Ikyinja iki, ukukumbukila inifwa ya Yesu kukwisa pakubombiwa namayolo pa Kihano, Epulelo 15, 2022. Tunganile fiyo Yehova nu mwanake, yonongwa yake pakabalilo kakukumbukila inifwa ya Yesu, kikayapo ikindu ikyakulondiwa fiyo ku myitu ukukinda ukwaghiwapo.
ULWIMBO 16 Lumbani Ya Chifukwa cha Mwana Wake Wakuphakazgika
^ Kali ulusubilo lwitu lwakwisakubuka kumwanya pamo lwakwisakwikala mu paladayiso pa kisu kyapasi, twesa tukughulila ukwisakwaghiwapo pakukumbukila inifwa ya Yesu uku kukubombiwa ikyinja kilikyosa. Mu nkhani iyi tukuya pakumanyila ififukwa fya mu Baibolo ifi tukukumbukila inifwa ya Yesu nu lusayo ulu tukulwagha linga tukubomba isi.
^ Ukuti mumanye nyingi isyakufwana nu lwitikano ulupya nu lwitikano lwa Bunyafyale, keta inkhani iyakuti “Muzamuŵa ‘Ufumu wa Ŵapristi’” mu Ingasya ya Ndindilili iya Chitumbuka iya Okutobala 15, 2014, peji 15-17.
^ ISI AMASYU GHAMO GHIKULINGANIA: Amasyu aghakuti Abapakiwa aba bakali bali pa kisu ghikuyoba isya Bakristu abapakiwa aba bali nu bumi pa kisu.
^ Ukuti mumanye nyingi isyakufwana nubusololi ubwakuyoba isya ngili ibili isi siyobiwe pa Ezekieli chaputala 37, keta “Mafumbo Ghakufumira Ku Ŵaŵazgi” mu Ingasya ya Ndindilili iya Chitumbuka iya Julayi 2016
