Inkhani iyi yikwaghiwa pa Ukukumbusya Indaghilo 22:25-27 yikunangisya ukuti umundu uyu ayagha ninongwa. Ululaghilo ulu lwanangisyagha ukuti undindwana uyu bankolile pamaka akaya ninongwa. Keta inkhani iyi.

Amavesi aghakukongapo ghikuyoba isya mundu uyu ikulowa nundindwana unsingiliwa “nkaya.” Linga abombile isi umwene ayagha ninongwa panongwa yakuti undindwana unsingiliwa afwanagha itolo ali pabweghi. Bule pakuyoba isya ndindwana? “Linga akutile,” abangi babaghile ukuti bapilikagha kangi abene bampokagha. Loli linga akakuta, yope ayagha ninongwa iyakubomba ifyabulowe, yonongwa yake bosa balongiwagha.—Kukumbu. 22:23, 24.

Indaghilo syayobagha kangi ikyakubombiwa ikyakukindana: “Linga umundu ikwenda ndukubo aghanile nundindwana unsingiliwa, lelo ikunkola itolo pamaka ikulowa nawe, panongwa iyi unnyambala mwene isakughoghiwagha. Mungisakumbombelagha simo undindwana, papo akaya ninongwa ingulumba iya kumpelela ukughoghiwa, namanga inongwa iyi yifwene itolo ni ya mundu uyu ikunnyomokesya itolo umwinake ikwenda nukungogha. Buno mwali mo ndukubo muno alimwaghile undindwana yula, aghelile ukukuta ukuti bampoke, loli akabonike nayumo uwakwisa kukumpoka.”—Kukumbu. 22:25-27.

Isi syapangisyagha ukuti abalongi bansubile fiyo undindwana. Munjila yiliku? Syabonekagha ukuti umwene “akutile” loli akalipo nayumo uwakumpoka.” Yonongwa yake umwene akayagha ninongwa iyakubomba ifyabulowe. Loli umundu yula ayagha ninongwa iya “kunkola itolo pamaka nukulowa nawe,” undindwana unsingiliwa.

Nalinga ukuti indaghilo syayobagha fiyo isyakuti undindwana akayagha ninongwa, loli inkhani iyi yikulingania kanunu inongwa iyi umundu ayagha nayo linga ankolile undindwana pamaka nukulowa nawe. Tuli nulusubilo losa ukuti abalongi “bafufuzagha kanunu inkhani yosa” nukusala ifyakubomba ifi fyakolelanagha nubulongosi ubu Kyala abapagha akabalilo kosa.—Kukumbu. 13:14; 17:4; Kuso. 20:14.