“Mundaghisyeghe Pakilikyosa”
NGIMBA mukwiketa pabumi bwinu ukuti mukundaghisya? Aliwesa ikulondiwa ukwilalusya ilalusyo ili. Ibaibolo lyayobile ngani ukuti, abandu bingi bisakuya “basitakuwa ulupi.” (2 Tim. 3:2) Lumo mwaghenemo nabandu aba bikulonda ukuti abangi bababombeleghe pamo ukubapa ifindu fimo. Sikuboneka ukuti abene batikulonda ukuti bandaghisyeghe pa ifi bikwambilila. Mubaghile ukuketa ukuti kukaya kununu ukubomba ifindu bo muno abandu aba bikubombela.
Mwakukindana na isi, ababombi ba Yehova bikukasiwa ukuti: ‘Baweghe ulupi.’ Kangi ‘ntundu tosa baweghe ulupi.’ (Kolos. 3:15; 1 Tes. 5:18) Syakulondiwa fiyo kumyitu ukuti tundaghisyeghe. Filipo ififukwa fingi ifi tukulondiwa ukubomba bo isi.
UKUNDAGHISYA KUKUTUTULA UKUTI TWIPILIKEGHE KANUNU
Ikifukwa kimo iki tukulondiwa ukuti tundaghisyeghe kyo kyakuti ukubomba isi kubaghile ukututula ukuti tuyeghe naminong’ono amanunu. Linga umundu yumo ikundaghisya ikunangisya ukuti ikwipilika kanunu, kangi uyu bikunndaghisya yope ikwipilika kanunu fiyo. Nongwa yafiki ukundaghisya kwakulondiwa fiyo? Inong’onela, ikifwanikisyo iki: Linga muketile ukuti bamo bikulonda ukubabombela ifindu fimo, ngimba isi sikabaghila ukubapangisya ukuti mwinong’oneghe ukuti muli bakulondiwa? Linga mukwinong’onela isi bikulonda ukubabombela sibaghile ukubapangisya ukuti mwipilikeghe kanunu. Mubaghile ukukumbukila isi syabombiwe kwa Ruti. Boazi alinnangisye ikisa mwakuntula Ruti. Kisita kukayika, isi syalimpangisye Ruti ukuti ahoboke fiyo nukuketa ukuti umundu yumo ampasikisyagha.—Ruti 2:10-13.
Kwakulondiwa fiyo ukuti mundaghisyeghe kwa Kyala. Kisita kukayika, lumo mwinong’onilepo isya fyakulya ifyamwambepo nifyabupe ifingi ifi Yehova abapele kangi ikukindilila ukubatula. (Kukumbu. 8:17, 18; Imbo. 14:17) Ukuti mumpe Kyala ifindu ifinunu, mukulondiwa ukuya nakabalilo akakwinong’onelapo isya lusayo ulu Yehova abapele pabumi bwinu. Linga mukwinong’onelapo ifindu ifi Umpeli winu abapele kubaghile ukubapangisya ukuti mundaghisyeghe ukufumila pasi pandumbula nukuketa muno abaghanile.—1 Yoh. 4:9.
Ukwinong’onela isya findu ifi Yehova ikutupa kangi nulusayo ulu tukulwagha; sikutupangisya ukuti tundaghisyeghe ubununu bwa Yehova. (Sal. 100:4, 5) Sikuboneka ukuti linga “tukubandaghisya abangi sikupangisya ukuti bahobokeghe fiyo.”
UKUNDAGHISYA KUKUKUSYA UBUMANYANI BWITU
Ikifukwa ikingi iki ukundaghisya kwakulondiwa fiyo kyo kyakuti, kukupangisya ukuti ubumanyani buye bwamaka. Twesa tukulonda ukuti batundaghisyeghe. Linga akabalilo kosa mukunndaghisya umundu yumo panongwa ya isi ababombile, mukuya pakuya pabumanyani ubununu fiyo. (Rom. 16:3, 4) Mwakongelelapo, abandu aba bikundaghisya bikubatula abangi. Abene bikuketa linga abangi bikubanangisya ikisa kangi isi sikubapangisya ukuti bipilikeghe kanunu pabumi bwabo. Naloli ukutula abangi kukutwala ulusekelo. Isi sifwene itolo na isi Yesu ayobile, atile: “Nukupa nukwambilila, kukusayiwa ku kupa.”—Imbo. 20:35.
Robert Emmons, unkulumba wa pa Yunivesite iya ku California, atile: “Ukuti tundaghisyeghe tukulondiwa ukumanya ukuti tukusubilana panongwa yakuti utubalilo tumo tukupa kangi utubalilo utungi tukwambilila.” Ukuti tukindilile ukuya nubumi nukuya balusekelo tukulondiwa ukubasubila abangi munjila isyakukindanakindana. Mwakifwanikisyo, abandu bamo babaghile ukutupa ifyakulya pamo ukututula linga twaghene nindamyo. (1 Kor. 12:21) Umundu uwakundaghisya akabalilo kosa ikundaghisya pa ifi abangi bambombile. Ukufwana na isi, ngimba mukuya pakunangisya akayilo akakundaghisya pa ifi abangi bababombile?
UKUNDAGHISYA KANGI UKUKETA MUNO IFINDU FIYILILE PABUMI BWINU
Ikifukwa ikingi iki mukulondiwa ukuti mundaghisyeghe kyo kyakuti sibaghile ukubatula ukuti muyeghe naminong’ono amanunu akabalilo kosa. Linga mukuketa mwamahala ifindu pabumi bwinu sikuya pakubatula ukuti muyeghe naminong’ono amanunu. Isi sikuya pakubatula ukuti mwinong’oneleghe fiyo ifindu ifinunu nukuleka ukwinonong’onela ifindu ifibibi. Kangi sikuya pakubapangisya ukuti munginong’onelagha fiyo isya ndamyo isi mukwaghana nasyo. Linga mukukindilila ukundaghisya, mukuya pakukindilila ukuketa ifindu ifinunu, kangi isi sikuya pakubapangisya ukuti mundaghisyeghe fiyo. Linga muli nindumbula iyakundaghisya sikuya pakubatula ukubomba isi untumiwa Pauli ayobile ukuti: ‘Amusekeleghe mwa Mwalafyale bwila itolo.’—Filip. 4:4.
Ukundaghisya kubaghile ukubatula kangi ukuti mungayagha naminong’ono amabibi. Ngimba kupepe ukundaghisya nukunangisya ubufi, ikitima pamo ubukalale pakabalilo kamokene? Abandu aba bikundaghisya bope babaghile ukwipilika ukuti bakaya nifindu fingi ifyakumbili. Loli abene bikuhoboka nukundaghisya na ifi bali nafyo pabumi bwabo kangi batikumalila akabalilo kabo ukulonda ukuya nifindu fingi ifyakumbili.—Filip. 4:12.
MWINONG’ONELEGHE IFINDU IFINUNU IFI KYALA ABAPELE!
Pakuya Bakristu mubaghile ukuketa ukuti Setano ikulonda ukuti mungahobokagha kangi muyeghe nikitima nukuwa amaka panongwa ya ndamyo isi mukwaghana nasyo m’masiku ghakubumalikisyo agha. Umwene ikulonda ukuti muyeghe nakayilo akabibi, kangi mwilumbusyeghe pabumi bwinu. Linga mukubomba bo isi, kubaghile ukuya kukafu fiyo kumyinu ukuti abandu babapilikisye mubufumusi. Ukuyoba ubwanaloli, ukundaghisya kukukolelana nuluseke lwa mbepo, ukongelelapo ulusekelo nifindu ifinunu ifi Kyala abapele mwakusubila isi afingile.—Gal. 5:22, 23.
Pakuya yumo wa babombi ba Yehova, mubaghile ukukolelana fiyo na isi siyobiwe munkhani iyi isyakufwana nukundaghisya. Loli mubaghile ukuketa ukuti akabalilo kosa kukaya kupepe ukundaghisya nukuya naminong’ono amanunu. Nalinga mo siyilile, mungitikisyagha ukuti isi sibawisye amaka. Mubaghile ukukusya akayilo akanunu fiyo akakundaghisya aka. Bulebule? Muyeghe nakabalilo isiku lililyosa akakwinong’onela ifi fibombiwe pabumi bwinu ifi fibaghile ukubapangisya ukuti mundaghisyeghe. Linga mukukindilila ukubomba bo isi, mukuya pakukindilila ukukusya akayilo akakundaghisya. Isi sibaghile ukubapangisya ukuti muye nulusekelo, ukukinda abandu aba bikwinong’onela fiyo isya ndamyo isi bikwaghana nasyo pabumi bwabo. Inong’onela ifindu ifinunu ifi Kyala nabandu bamo bababombile ifi fikubahobosya fiyo. Mubaghile ukulemba ifindu fibili pamo fitatu ifi fyabapangisye ukuti mwipilike kanunu.
Abandu bamo aba bikufufuza batile, “ukubandaghisya abangi akabalilo kosa sikupangisya ukuti ubongo bwitu bubombeghe kanunu imbombo, panongwa yakuti tukwipilika kanunu fiyo.” Umundu uyu ikundaghisya ikuya walusekelo. Inong’onela ifindu fyosa ifinunu ifi mwambilile pabumi bwinu, muhobokeghe nafyo kangi mundaghisyeghe akabalilo kosa! M’malo mwakufiketa ifindu ifi ukuti fikaya nimbombo, “muweghe ulupi kwa Yehova buno umwene yo nnunu.” Momumo, “ntundu tosa muweghe ulupi.”—1 Sya. 16:34; 1 Tes. 5:18.