Hayi, pakayapo napamo mu Baibolo pamo mu nkhani isyambukulu apa pikunangisya ukuti Abakristu bosiwagha m’malo mwa bafwe.

Muno ivesi ili balisanwisye mu Mabaibolo mingi fikubapangisya abandu bamo ukwinong’ona ukuti ukosiwa m’malo mwa bafwe kwabombiwagha nkabalilo ka Abakristu bakunyuma. Mwakifwanikisyo, Amabaibolo ghamo ghikuti: “Linga ukusyuka kukayako, ngimba aba bikosiwa mmalo mwa bafwe bisakubomba isyafiki?”—New International Version.

Ummanyili yumo wa Baibolo uyu ingamu yake yo Dr.  Gregory Lockwood atile, bukayapo ubuketi mu Baibolo pamo mu nkhani isyambukulu apa pikunangisya ukuti umundu yumo alyosiwe m’malo mwa bafwe. Ummanyili uyungi uwa Baibolo Pulofesa Gordon D. Fee yope akolelene nifundo iyi. Umwene alembile ukuti: “Kikayamo ikifwanikisyo mu Baibolo pamo mu nkhani isyambukulu ikyakuyoba isya losyo ulu. Lukayobiwamo mu Lwitikano Ulupya kangi bukayapo ubuketi ubwakuti Abakristu ba kunyuma babombagha isi pamo ukuti itchalichi limo lyalyandisye isi bo abatumiwa bafwile.”

Ibaibolo likuyoba ukuti abamanyili ba Yesu babuliwe ukuti “mukabapeleghe bafundiwa abandu ifikolo fyosa, mukabokesyeghe . . . , nukubamanyisya ukukonga syosa isi” mbalaghile umwe. (Mat. 28:19, 20) Bo umundu akali ukuya mfundiwa wa Yesu alondiwagha ukumanyila, ukusubila nukumpilikila Yehova nu Mwanake. Umundu uyu afwile kangi ali kwipumba akabaghila ukubomba isi pamo ukuti Unkristu ambombele isi.—Ndumbi. 9:5, 10; Yoh. 4:1; 1 Kor. 1:14-16

Loli ngimba Pauli asanusyagha isyafiki?

Abakristu bamo ba ku Korinti bayobagha ukuti abandu aba bafwile batisakusyuka. (1 Kor. 15:12) Pauli ababulile ukuti aminong’ono agha mabibi. Bulebule? Umwene alingenie ukuti akabalilo kosa atilagha ukufwa loli ali nulusubilo ukuti linga afwile isakusyukila kumwanya mwakufwana itolo na Yesu.—1 Kor. 15:30-32, 42-44.

Abakorinti balondiwagha ukumanya ukuti pakuya Bakristu bapakiwa, syasanusyagha ukuti balondiwagha ukwaghana nindamyo nukufwa bo bakali ukusyuka. Panongwa yakuti “balyosiwe mwa Kristu Yesu,” kokuti “balyosiwe kangi mbufwe bwake.” (Rom. 6:3) Isi sikusanusya ukuti, mwakufwana itolo na Yesu bope balondiwagha ukwaghana nindamyo nukufwa ukuti basasyukile kumwanya.

Bo ifyinja fibili fikindilepo ukufuma apa Yesu alyosiwe mmisi, umwene ababulile abatumiwa bake babili ukuti: “Ulosyo ulu nikosiwa lo nanumwe mwisakosiwagha.” (Mar. 10:38, 39) Apa Yesu asanusyagha ukuti ikuya pakukindilila ukuya nsubiliwa kwa Kyala mpaka inifwa yake. Pauli alembile ukuti, abapakiwa “bikukubilwa nawe ukuti bope bisebimikiweghe lumo nawe.” (Rom. 8:16, 17; 2 Kor. 4:17) Yonongwa yake bope balondiwagha ukufwa tasi ukuti basasyukile kumwanya.

Amasyu gha Pauli ghabaghile ukuyobiwa ukuti: “Kali po bisakutubuleghe aba bikosiwa mbuyo bwa bafwe? Linga abafwe batikusyukamo siku, po fiki bamo bikosiwa mbuyo bwabo?”