Untumiwa Pauli alindembile unkulumba umwinake Timoti ukuti: “Syo nikukusisimikisya nkyeni mwa Kyala, na mwa Kristu Yesu, na mbandumi abasaliwa, ukuti usikongeghe sisisi kisitakusitumulila ngani, usibombeghe sisisi kisitakubasalila abandu mbundu bwabo.”—1 Tim. 5:21.

Ikyakwanda, tuyobesanie aba babaghile ukwimila abandumi aba. Bwanaloli ukuti bakaya ba 144,000. Pakabalilo aka Pauli andembelagha kalata Timoti, ukusyuka kwa Bakristu abapakiwa ukubuka kumwanya kwakali ukwanda. Abafundiwa nabapakiwa abangi bakali ukuti baye fipeliwa fya mwambepo, yonongwa yake “abandumi abasaliwa” aba bakabaghila ukuya bafundiwa pamo bapakiwa.—1 Kor. 15:​50-54; 1 Tes. 4:​13-17; 1 Yoh. 3:2.

Kangi “abandumi abasaliwa” bakabaghila ukwimila abandumi aba bakapilikile nkabalilo ka Mwelesyo. Abandumi aba bali ku kighaba kya Setano nukwipela ukuya mbepo inyali, isi Yesu asisusyagha. (Bwa. 6:2; Luka 8:​30, 31; 2 Pet. 2:4) Nkyeni, bisakupinyiwa mbwina bwa ngisi kwa fyinja 1,000 ukufuma apo bisakupyutiwa pampene na Mohesi.—Yuda 6; Ubuset. 20:​1-3, 10.

“Abandumi abasaliwa” aba Pauli abayobagha ukuti bali bandumi bakumwanya aba bantulagha “Kyala na Kristu Yesu,” kangi bosa bikuyobiwa mu vesi lilili.

Abandumi abasubiliwa balipo amasauzandi mingi. (Hib. 12:​22, 23) Tutikulondiwa ukwinong’ona ukuti uwandumi aliwesa ikubomba ububombeli ubwakufwana itolo kwa kabalilo kamokene. (Ubuset. 14:​17, 18) Kumbuka ukuti pakabalilo kamo uwandumi yumoywene balimpele imbombo iyakubaghogha Abaasiria 185,000. (2 Banyaf. 19:35) Abandumi bingi babaghile ukuti bapeliwe imbombo “ukufuma Mbunyafyale bwa [Yesu] ukuti basibunganie syosa imbefyo nabilandaghilo.” (Mat. 13:​39-41) Abangi “bisakubabunganiagha abasaliwa bake” kumwanya. (Mat. 24:31) Kangi abangi bikubuliwa ‘ukuti batulindilileghe mu njila syitu syosa.’—Sal. 91:11; Mat. 18:10; fwanikisya na Matai 4:11; Luka 22:43.

“Abandumi abasaliwa” aba bikuyobiwa pa 1 Timoti 5:21 sikuboneka ukuti bali bandumi aba bapeliwe imbombo yapadela iyakufwana na babombi ba Kyala. Munkhani iyi, Pauli abapele bakulumba ubulongosi bwa mahala ubwa muno babaghile ukufwanisyila ubudindo bwamo kangi namuno ikipanga kyalondiwagha ukubaghindikila abakulumba. Abakulumba bikulondiwa ukwiyipa ukufwanisya ubudindo bwabo “kisitakusitumulila ngani pamo kisitakubasalila abandu mbundu bwabo” kangi batikulondiwa ukubopela ukusala ifyakubomba pamo ukulonga inongwa. Ikifukwa ikinywamu iki abene bikubukongela ubulongosi bwa Pauli kyo kyakuti bikubomba isi “nkyeni mwa Kyala, na mwa Kristu Yesu, na mbandumi abasaliwa.” Polelo sikunangisya pabwelu ukuti abandumi bamo pikupeliwa imbombo isi sikukolelana nikipanga bo ukufighilila, ukuketesya imbombo yakufumusya nukumbula Yehova muno imbombo yikwendela.—Mat. 18:10; Ubuset. 14:6.