Ngimba mubelengilepo inkhani sya kyinja iki isi sikwaghiwa mu Ingasya ya Ndindilili? Keta linga mubaghile ukwamula amalalusyo agha:

Ngimba Yehova ikunangisya ikifwanikisyo kiliku pankhani ya muno ikubaketela abakikulu?

Ikubabombela ifindu kisita kusala, atikuketa ukuti abanyambala bo bakulondiwa ukukinda abakikulu. Kyala ikubapilikisya abakikulu, ikumanya muno bikwipilikila kangi nindamyo isi bikwaghana nasyo. Kangi ikusubila ukuti bikuya pakufwanisya ukubomba imbombo yake.—w24.01, peji 15-16.

Ngimba tubaghile ukukonga bulebule amasyu gha pa Baefesi 5:​7, agha ghikuti: “Mungayagha balilanisi nabo”?

Untumiwa Pauli atusokile ukuti tungangalagha na bandu aba babaghile ukututolesya ukukonga ifundo sya Kyala. Abandu aba babaghile ukuya bo aba tukwangala nabo masonamaso pamo pa intaneti.—w24.03, peji 22-23.

Ngimba nkhani siliku isyabutungulu isi tukulondiwa ukuya nasyo maso?

Tukulondiwa ukuya maso ninkhani isyabutungulu isi sikufuma ku bamanyani bitu, amaimelo agha ghikufuma ku bandu aba tukabamanya kangi agha ghikufuma ku bakususya aba bikwifisa nukunangisya ukuti bikulonda ukumanya ubwanaloli.—w24.04, peji 12.

Ngimba tusimenye isyafiki kangi tukasimanya isyafiki isyakufwana namuno Yehova isakundongela Umwalafyale Solomoni kangi na bandu aba bafwile mu Sodomu na Gomora napa Mwelesyo?

Tukaya nubuketi bosa ukuti Yehova isakubonanga kwa bwila na bwila. Loli tusimenye ukuti umwene yo asimenye syosa kangi wakisa ikikulumba.—w24.05, peji 3-4.

Pakuya “Lyalabwe” ngimba Kyala ikutusimikisyila isyafiki? (Kukumbu. 32:4)

Tubaghile ukubopela kwa Yehova. Umwene nsubiliwa, utubalilo tosa ikufwanisya isi afingile. Kangi atikuchenja, utuyilo twake na isi ikulonda ukubomba sitikuchenjamo.—w24.06, peji 26-28.

Isi sibaghile ukubatula ukuti mwisibile ku kipanga ikipya

Munsubileghe Yehova, uyu ikuya pakubatula bo muno abatulile ababombi bake ba kunyuma. Mungafwanikisyagha nikipanga iki mwabunganagha pakwanda. Mweghengepo ikighaba kukipanga ikipya kangi mughelegheleghe ukubagha abamanyani abapya.—w24.07, peji 26-28.

Ngimba fundo siliku isi sikwaghiwa mufifwanikisyo fitatu ifi fili mu chaputala 25 kya Matai?

Ikifwanikisyo kya ng’osi nimbene kikulingania kanunu ukulondiwa kwakuya basubiliwa. Ikifwanikisyo kya balindwana abamahala nabakonyofu kikutukasya ukwitendekesya nukuya maso. Kangi ikifwanikisyo kya matalenti kikunangisya ukulondiwa kwa kwiyipa.—w24.09, peji 20-24.

Ngimba akayumba aka kali patempile lya Solomoni kali katali bulebule?

Pa 2 Syambukulu 3:​4, imipukutu yimo iya iyolo yikuyoba ukuti kali ‘120 mbutali’ iyi yikupanga amamita 53 (amafiti 175) ukufyuka mmwanya. Loli iyingi yikuyoba ukuti kali ‘20 mbutali’ iyi yikupanga amamita 9 (amafiti 30) mbutali. Iyabumalilo iyi yikunangisya ukuti yikukolelana nukukula kwa mamato gha tempile.—w24.10, peji 31.

Ngimba ukuya ‘nnyambala wa nkikulu yumoywene’ sikusanusya isyafiki ku ntuli wakipanga? (1 Tim. 3:12)

Sikusanusya ukuti eghile unkikulu yumoywene itolo kangi atikulondiwa ukubomba ubulowe. Mwakongelelapo, umwene atikulondiwa ukubika ubutuli ubu bukaya bwakulondiwa ku bakikulu abangi.—w24.11, peji 19.

Nongwa yafiki tubaghile ukuyoba ukuti isi sili pa Yohani 6:53 sikayobagha isya Fyakulya fya Namayolo Ifya Mwalafyale?

Pa Yohani 6:53 pikuyoba isyakulondiwa kwakulya umbili wa Yesu nukunwa ilopa lyake. Yesu ayobile amasyu agha mu 32 C.E., ku Galilai, ukubabula Abayuda aba balondiwagha ukuya nulwitiko mwa Yesu. Kangi Ifyakulya fya Namayolo Ifya Mwalafyale fyalyandile bo ikyinja kimokyene kikindilepo ku Yerusalemu. Bo ali kula, Yesu ayobile nabandu aba ikwakulaghilagha nabo kumwanya.—w24.12, peji 10-11.