INGALABA inunu isyakupimba abandu bene, sikaliko m’masiku gha Pauli. Umundu ukuti akwele mu ngalaba, alondiwagha ukubalalusya abangi linga bayimenye ingalaba iyakupimba katundu iyi yabukagha kuno umwene ikubuka kangi linga bikwitikisya ukupimbamo abandu. (Imbo. 21:2, 3) Nalinga ukuti ingalaba yikabukagha ku malo agha umwene abukagha, loli linga ingalaba yimile pa malo ghamo, umwene alondagha ingalaba iyingi iyi yabukagha kuno umwene abukagha.—Imbo. 27:1-6.

Ubulendo bwa panyanja bwabombiwagha ntubalilo pakyinja panongwa yakuti ingalaba sikali nimbatiko. Kangi utubalilo tumo bakabilagha ukunyamuka panongwa ya ifi basubilagha, bo ukulila kwa njuni pamalo agha bapinyangapo ingoye mungalaba, pamo linga bayaghile ingalaba yimo yibwaghaywike pa sumbi. Abendesya ngalaba balwaghilangapo ulusako ukunyamuka linga imbepo yikuputa kuno bikubuka. Ukuti umundu akwele ingalaba iyakubuka kuno umwene ikubuka, alondiwagha ukubuka na katundu wake apa ingalaba yimagha nukughulila akabalilo kakunyamukila.

Lionel Casson uyu ikufufuza ifindu atile, “Abandu ba ku Roma bakatamiwagha ukukwela ingalaba, abene bali na malo aghakukwelelapo ingalaba agha ghali pabupipi nulusoko lwa Tiber. Pabupipi ni tawuni iya Ostia pali ikighaba ikinywamu iki kyasyungutiliwe na maofesi. Mingi mwa maofesi agha ghali gha bandu aba babombagha imbombo ku malo aghakwimikilako ingalaba isyakukindanakindana: ofesi ya ku Narbonne [France] bali ningalaba yimoyene, ofesi ya ku Carthage [Tunisia] bope bali nayo, . . . na malo aghangi. Aliwesa uyu ali pabulendo, alondiwagha ukuketa pa maofesi apa balembilepo amalo gha matawuni kuno ingalaba syabukagha.”

Ubulendo bwa kwenda pangalaba bwatulagha fiyo abandu ukuti bende mwanakalinga loli bwali nububibi bwake. Utubalilo twingi, Pauli alyaghenepo nindamyo iyakubwaghayuka kwa ngalaba pabulendo bwake ubwa bumishonale.—2 Kor. 11:25.