1-2. Nongwa yafiki Yesu atamiwagha naminong’ono?

PISIKU lyake lyabumalilo pa kisu, Yesu atamiwe fiyo naminong’ono. Umwene asimenye ukuti ikuya pakutamiwa nukufwa inifwa yakubaba m’maboko gha bamanya ndaghilo. Loli umwene akinong’onelagha syene isyakuti ikuya pakughoghiwa. Umwene alinganile fiyo Tata wake kangi alondagha ukunhobosya. Yesu asimenye ukuti linga ikuya pakunangisya ubusubiliwa pa ndamyo isi ayagha pakwaghana nasyo, ayagha pakupangisya ukuti ingamu ya Yehova yitufiweghe. Yesu abaghanile kangi abandu, kangi umwene asimenye ukuti tubaghile ukuya nulusubilo lwakwisa kwikala nubumi bwa bwila na bwila nkyeni linga umwene akindilile ukunangisya ubusubiliwa kwa Yehova mpaka ubufwe bwake.

² Nalinga ukuti Yesu atamiwagha fiyo aminong’ono, loli umwene ali nulutengano. Ababulile abafundiwa bake ukuti “Nikubapa ulutengano lwangu,” (Yoh. 14:27) Umwene ali “nulutengano lwa Kyala,” pamo ubololo ubu bukumpangisya umundu ukuya pabumanyani ubununu fiyo na Yehova. Ulutengano ulu lwalintulile Yesu ukuti angayagha naminong’ono.—Fil. 4:6, 7.

3. Ngimba findu fiki ifi tukuya pakuketa mu nkhani iyi?

³ Akayapo nayumo uyu abaghile ukwaghana nindamyo isyakufwana na isi Yesu alyaghene nasyo, loli bosa aba bikunkonga Yesu bikuya pakwaghana nindamyo. (Mat. 16:24, 25; Yoh. 15:20) Ukufwana itolo na Yesu, nanuswe utubalilo tumo tukuya pakutamiwa naminong’ono. Ngimba tubaghile ukubomba bulebule ukuti ukutamiwa aminong’ono kuleke ukutupangisya ukuya nulutengano ulwa mundumbula? Isagha tukete ifindu fitatu ifi Yesu abombile pisiku lya bumalilo bwa bumi bwake pa kisu kyapasi nukuketa muno tubaghile ukunkongela linga twaghene nindamyo.

4. Ukufwana na 1 Batesalonike 5:17, yoba ififwanikisyo fimo ifi fikunangisya ukuti Yesu aliputile mwakwandisania pisiku lya bumalilo bwa bumi bwake pa kisu?

⁴ Belenga 1 Batesalonike 5:17. Yesu aliputile mwakwandisania pisiku lya bumalilo bwa bumi bwake pa kisu. Pakabalilo aka andisyagha ikyakubombiwa ikyakukumbukila inifwa yake, umwene aliputile ikisyesye nikinwelo. (1 Kor. 11:23-25) Bo bakali ukusokako kuno babombelagha Ikyaka kya Pasa, umwene aliputile na bafundiwa bake. (Yoh. 17:1-26) Pakabalilo aka Yesu na bafundiwa bake bafikagha pa Kyamba kya Misyunguti ikilo kila, umwene aliputile mwakwandisania. (Mat. 26:36-39, 42, 44) Kangi amasyu ghabumalilo agha Yesu ayobile bo akali ukufya lwali lwiputo. (Luka 23:46) Ukwendela mulwiputo, Yesu alimbulile Yehova kilikyosa iki kyabombiwagha pisiku lya bumalilo bwa bumi bwake pa kisu kya pasi.

5. Nongwa yafiki abafundiwa batoliwe ukunangisya ubukifu?

⁵ Ikifukwa kimo iki kyalimpangisye Yesu ukuti ifimbilisye indamyo kyali kyakuti umwene ansubilagha fiyo Tata wake mwakwiputa ku myake. Loli abafundiwa, batoliwe ukukindilila ukukwiputa ikilo kila. Isi syapangisye ukuti batoliwe ukunangisya ubukifu pakabalilo aka bagheliwagha. (Mat. 26:40, 41, 43, 45, 56) Linga twaghene nindamyo, tukuya pakukindilila ukuya basubiliwa pene linga tukukonga ikifwanikisyo kya Yesu “nukukindilila ukwiputa.” Ngimba tukulondiwa ukusuma ifindu fiki mu lwiputo?

6. Ngimba ulwitiko lubaghile ukututula bulebule ukuti tukindilile ukuya balutengano?

⁶ Tubaghile ukwiputa kwa Yehova ukuti “atongelele ulwitiko.” (Luka 17:5; Yoh. 14:1) Tukulondiwa ukuya nulwitiko panongwa yakuti Setano ikuya pakubaghela bosa aba bikunkonga Yesu. (Luka 22:31) Ngimba ulwitiko lukuya pakututula  bulebule ukuti tukindilile ukuya balutengano nalinga ukuti tukuya pakwaghana nindamyo nyingi? Linga tubombile syosa isi tubaghile ukufwanisya ukuti tulimbane nindamyo, ulwitiko lukuya pakututula ukuti tuleke ukupasya loli tundekele syosa Yehova ukuti yo abombepo simo. Panongwa yakuti tukusubila ukuti asimenye kanunu isi abaghile ukubomba isi uswe tukabaghila ukufwanisya, tukuya nulutengano lwa m’minong’ono na mundumbula.—1 Pet. 5:6, 7.

7. Ngimba tukumanyilako isyafiki ukufuma ku isi Robert ayobile?

⁷ Ulwiputo lukututula ukukindilila ukuya nulutengano ulwa mundumbula nalinga ukuti tukwaghana nindamyo. Inong’onela ikifwanikisyo kya Robert, unkulumba unsubiliwa uyu lino ali nifyinja fya mma 80. Umwene atile: “Ubulongosi ubu buli pa Bafilipi 4:6, 7 bundulile ukuti m’malane nindamyo nyingi pa bumi bwangu. Nalimbanagha nindamyo iya ndalama. Kangi pakabalilo kamo ngakingilile ukuya nkulumba wa kipanga.” Ngimba findu fiki ifi fyalintulile Robert ukuti akindilile ukuya nulutengano ulwa mundumbula? Umwene atile “Naliputile bo nandile itolo ukutamiwa naminong’ono. “Ngusubila ukuti linga ngwiputa kabilikabili kangi mwakufumila pasi pandumbula, nguya nulutengano lwa mundumbula.”

8. Ukufwana nilemba lya Yohani 8:29, ngimba kifukwa kiliku ikingi iki kyalimpangisye Yesu ukuya nulutengano ulwa mundumbula?

⁸ Belenga Yohani 8:29. Nalinga ukuti banyozagha, Yesu ali nulutengano ulwa mundumbula panongwa yakuti umwene amenye ukuti anhobosyagha Tata wake. Umwene akindilile ukumpilikila, nalinga kwali kukafu ukubomba isi. Umwene alinganile fiyo Tata wake kangi iyipagha nindumbula yosa pakumbombela Yehova. Bo akali ukwisa  pa kisu kya pasi, umwene ali “fundi wa Kyala.” (Mbu. 8:30) Kangi bo ali pa kisu, umwene iyipagha fiyo ukubafumukisya abandu isyakufwana na Tata wake. (Mat. 6:9; Yoh. 5:17) Imbombo iyi yalimpangisye Yesu ukuya nulusekelo ulunywamu.—Yoh. 4:34-36.

9. Nongwa yafiki tukuya nulutengano ulwa mundumbula linga tukuya bize nimbombo iyakufumusya?

⁹ Tukunkonga Yesu linga tukumpilikila Yehova kangi linga ‘tukukindilila ukubomba imbombo ya Mwalafyale.’ (1 Kor. 15:58) Linga “tukwiyipa nindumbula yosa” pambombo iyakufumusya, sikututula ukuti tuyeghe naminong’ono amanunu linga twaghene nindamyo. (Imbo. 18:5) Mwakifwanikisyo, abandu aba tukwaghana nabo mubufumusi bikwaghana nindamyo ukukinda isi tukwaghana nasyo. Loli, linga bamanyile ukungana Yehova nukukonga ifundo syake, bikuya nubumi ubununu kangi bikuya balusekelo. Akabalilo kosa tukuketa isi sikubombiwa, tuli nulusubilo losa ukuti Yehova ikuya pakukindilila ukutupasikisya. Kangi ulusubilo ulu, lukututula ukukindilila ukuya nulutengano ulwa mundumbula. Umulumbu uyu atamiwe naminong’ono kwa kabalilo akatali, iketagha ukuti akali wakulondiwa, loli pabumalilo aketile isi ukuya syabwanaloli. Umwene atile “Linga ndi bize mubufumusi, ngwipilika kanunu fiyo kangi nguya nulusekelo. Nguketa ukuti linga ndi mubufumusi, ngwipilika ukuti ndi pabupipi fiyo na Yehova.”

10. Ngimba tukumanyilako isyafiki ukufuma ku mulumbu Brenda?

¹⁰ Inong’onela ikifwanikisyo kya mulumbu yumo uyu ingamu yake yo Brenda. Umwene numwanake undindwana bikubina fiyo. Brenda ikutoliwa ukwende, ikubombela akanjinga ka bandu abalemale. Utubalilo tumo ikufumusya ku nyumba ni nyumba loli utubalilo twingi ikufumusya mwakulemba abakalata. Umwene atile: “Bo ngetile ukuti ububine bwangu ngabaghila ukubumbuluka nkisu iki, syalimbangisye ukuti ngindilileghe ukufumusya. Ukufumusya amasyu gha Kyala, kukundula ukuti ningatamiwagha naminong’ono. Isi sikumbangisya ukuti niyipeghe fiyo ukubatula abandu aba nkighaba kitu. Kangi linga ngukindilila ukufumusya amasyu amanunu, ngwinong’onela isya lusubilo ulwa nkyeni.”

11-13. (a) Ngimba abafundiwa na bandu abangi banangisye bulebule ukuti bali bamanyani banunu ba Yesu? (b) Ngimba Yesu ipilikagha bulebule na bamanyani bake?

¹¹ Akabalilo kosa aka Yesu afumusyagha pa kisu, abafundiwa abasubiliwa banangisye ukuti bali bamanyani bake banunu. Abene bali bamanyani banunu ukufwana na masyu agha ghikuyobiwa pa isya mbupingamu ukuti: ‘Baliko abamanyani aba babakindile na bamyitu bubo.’ (Mbu. 18:24) Abamanyani bo aba bali bakulondiwa fiyo kwa Yesu. Pakabalilo ka bufumusi bwake, akalipo nayumo unkamu wake uwakumbili uyu ali nulwitiko myake. (Yoh. 7:3-5) Akabalilo kamo, abakamu bake binong’onagha ukuti asyutile untu. (Mar. 3:21) Kisita kukayika, Yesu ayobile ku bafundiwa bake abasubiliwa ikilo ikyakuti kilabo ikuya pakufwa ukuti: ‘Loli umwe yo umwe mwali nanine mungelo syangu syosa.’—Luka 22:28.

¹² Utubalilo twingi abafundiwa bankalalisyagha Yesu, loli umwene akinong’onelagha fiyo pa isi bonangile m’malo mwake umwene aketagha ukuti bali nulwitiko myake. (Mat. 26:40; Marko 10:13, 14; Yoh. 6:66-69) Ikilo ikyakuti kilabo ikuya pakufwa inifwa yakubaba bo ali nabafundiwa bake, Yesu atile: ‘Nikubayoba ukuya bamanyani bangu, buno syosa isi mbilike kwa Tata syo mbabulile umwe.’ (Yoh. 15:15) Kisita kukayika, Yesu ali na bamanyani abanunu fiyo aba bankasyagha. Ubutuli ubu bannangisyagha Yesu mubufumusi bwalimpangisye ukuti aye nulusekelo ulunywamu.—Luka 10:17, 21.

¹³ Mwakongelelapo pa bafundiwa bake, Yesu ali na bamanyani kangi abangi, abanyambala nabakikulu, aba bantulagha pambombo iyakufumusya munjila isingi isyakulondiwa. Bamo bankolelagha mu nyumba syabo ukuti bakalye nawe ifyakulya.  (Luka 10:38-42; Yoh. 12:1, 2) Abangi bendagha nawe kangi bampagha ifindu fyabo. (Luka 8:3) Yesu ali nabamanyani abanunu panongwa yakuti yope ali nnunu kumyabo. Umwene ababombelagha ifindu ifinunu kangi akaghulilagha ukuti babombeghe ifindu ifi bakabaghila ukufwanisya. Yesu ali ngolofu, loli andaghisyagha fiyo ubutuli ubu abamanyani bake abasitabugholofu bampagha. Kangi kisita kukayika, abene balintulile ukuti aye nulutengano ulwa mundumbula.

14-15. Ngimba tubaghile ukuya bulebule na bamanyani abanunu, kangi babaghile ukututula bulebule?

¹⁴ Abamanyani abanunu babaghile ukututula ukuti tukindilile ukuya basubiliwa kwa Yehova. Kangi injila inunu iyi yibaghile ukututula ukuti tuye na bamanyani abanunu ko kuya m’manyani nnunu. (Mat. 7:12) Mwakifwanikisyo, Ibaibolo likutukasya ukuti tubombeleghe akabalilo na maka ghitu ukuti tubatule abangi, fiyofiyo aba bikulonda “ubutuli.” (Ef. 4:28) Ngimba mukwinong’onela isya mundu yumo nkipanga kyinu uyu mubaghile ukuntula? Ngimba mubaghile ukuntula umundu yumo uyu akabaghila ukufwanisya ukubuka ku musika? Ngimba mubaghile ukuyitula imbumba yimo iyi yili nindamyo iya ndalama mwakuyipa ifyakulya? Linga mumenye ukubombesyela jw.org^® webusayiti na JW Library^® app, ngimba mubaghile ukubatula abangi nkipanga kyinu ukuti bope babombesyeleghe kanunu? Linga tukwiyipa fiyo mwakubatula abangi, tukukindilila ukuya balusekelo.—Imbo. 20:35.

¹⁵ Abamanyani aba tuli nabo bikuya pakututula linga twaghene nindamyo kangi bikuya bakututula ukuti tukindilile ukuya nulutengano ulwa mundumbula. Ukufwana itolo na Elihu uyu apilikisyagha bo Yobu ikuyoba isya ndamyo isi aghanagha nasyo, nanuswe abamanyani bitu bikututula mwakupilikisya mbololo linga tukuyoba  muno tukwipilikila. (Jobu 32:4) Tungaghulilagha ukuti abamanyani bitu batusalileghe ifyakubomba, loli tukuya bamahala linga tukukonga ubulongosi bwa mu Baibolo. (Mbu. 15:22) Kangi ukufwana itolo nu Mwalafyale Davide mwakwiyisya alyambilile ubutuli ubwakufuma ku bamanyani bake, nanuswe tukulondiwa ukuya bakwiyisya linga abamanyani bitu bikutupako ubutuli. (2 Sam. 17:27-29) Bwanaloli, abamanyani abanunu aba kyabupe kyakufuma kwa Yehova.—Yak. 1:17.

16. Ukufwana na Bafilipi 4:6, 7, ngimba njila yiliku iyi tubaghile ukuya nulutengano? Lingania.

¹⁶ Belenga Bafilipi 4:6, 7. Nongwa yafiki Yehova ikutubula ukuti tusakwambililagha ulutengano ulu ikutupa ukwendela mwene mwa “Kristu Yesu”? Panongwa yakuti tubaghile ukuya nulutengano ulwa mundumbula nulusita kumalika pene linga tukupilikisya nukuya nulwitiko mu findu ifi Yehova afingile ukwendela mwa Yesu. Mwakifwanikisyo, ukwendela mu ikemo lwa Yesu, imbibi situ syosa sikuhobokeliwa. (1 Yoh. 2:12) Tukukasiwa fiyo nifundo iyi! Ukuya Mwalafyale wa Bunyafyale bwa Kyala, Yesu ikwisa kusosyapo ifindu fyosa ifibibi ifi Setano nikisu kyake bikutubombela. (Yes. 65:17; 1 Yoh. 3:8; Ubuset. 21:3, 4) Isi sikutupa ulusubilo ulununu fiyo ulwa nkyeni! Kangi nalinga ukuti Yesu atupele imbombo iyakutamya, loli umwene ali nanuswe mpaka pabumalikilo bwa fyindu fya nkisu iki. (Mat. 28:19, 20) Isi sikutukasya fiyo! Ubutuli, ulwitiko nukukasiwa fibaghile ukuntula umundu ukuya nulutengano ulwa mundumbula.

17. (a) Ngimba Unkristu abaghile ukuya bulebule nulutengano ulwa mundumbula? (b) Ukufwana nulufingo ulu luli pa Yohani 16:33, ngimba tubaghile ukufwanisya ukubomba isyafiki?

¹⁷ Ngimba tubaghile ukuya bulebule nulutengano ulwa mundumbula linga twaghene nindamyo? Tubaghile ukubomba bo ulu linga tukukonga isi Yesu abombile. Ikyakwanda, tukindilile ukwiputa nalinga twaghane nindamyo. Ikyabubili, tumpilikileghe Yehova nukwiyipa nindumbula yosa pambombo iyakufumusya nalinga ukuti utubalilo tumo kukuya kukafu ukubomba bo ulu. Ikyabutatu, tubasumeghe abamanyani bitu ukuti batutule pandamyo isi tukwagha nasyo. Pabumalilo ulutengano lwa Kyala lukuya pakufighilila aminong’ono nindumbula yinu. Ukufwana na Yesu nanuswe tukuya pakusitola ingelo.—Belenga Yohani 16:33.