1. Ngimba ababombi ba Kyala bosa bikulondiwa ukubomba isyafiki? (Keta ikuthuzi ikya pakikope.)

YESU KRISTU abalaghile abafundiwa bake ukuti “amubukeghe lelo, . . . mukabapeleghe abafundiwa abandu ifikolo fyosa.” (Mat. 28:19) Bosa ababombi ba Kyala abasubiliwa bikulondiwa “ukufwanisya” ububombeli ubu bapeliwe ukubomba. (2 Tim. 4:5) Ukukinda pa fyosa, imbombo iyi yakulondiwa fiyo kangi yikulondiwa ukubombiwa mwanakalinga. Loli kubaghile ukuya kukafu ukuti tufumusyeghe akabalilo kosa bo muno tukulondela.

2. Ngimba ndamyo siliku isi tukwaghana nasyo pa bumi bwitu?

² Kangi silipo imbombo simo isi tubaghile ukubomba isi sikulondiwa akabalilo namaka. Tukubomba imbombo amaawala mingi ukuti tufyagheghe ifyakulondiwa pa bumi bwitu nukuti twituleghe twibene naba mumbumba yitu. Tukulimbana nubudindo ubwakupwelela imbumba, ububine, ukutamiwa aminong’ono pamo ifyakubaba ifi umundu akwaghana nafyo linga akangele. Ngimba tubaghile ukubomba bulebule ukuti tufwanisye imbombo yitu iyakufumusya nalinga tukwaghana nindamyo syosa isi?

3. Ngimba tubaghile ukubomba isyafiki ukufwana na masyu gha Yesu agha ayobile pa Matai 13:23?

³ Linga indamyo isi tukwaghana nasyo sikutupangisya ukuti tungamalilagha akabalilo katali pambombo yitu iyakufumusya, tutikulondiwa ukuwa amaka. Yesu asimenye ukuti akaya aliwesa uyu abaghile ukusosya iseke syakufwana pambombo ya Bunyafyale. (Belenga Matai 13:23.) Yehova ikundaghisya fiyo linga tukubombela ukufuma pasi pandumbula. (Hib. 6:10-12) Isagha tukete muno tubaghile ukubombela ukuti imbombo ya bufumusi yiyeghe pa malo ghakwanda, tungayagha nu bumi ubwakulonda ifindu fingi, kangi tughelegheleghe ukufumusya nu kumanyisya kanunu.  Ikyakwanda, ngimba ukufwanisya kanunu ububombeli bwitu sikusanusya isyafiki?

4. Ngimba ukufwanisya imbombo yitu iyakufumusya sikusanusya isyafiki?

⁴ Ukuti tufwanisye imbombo yitu iyakufumusya, tukulondiwa ukuya na kabalilo ka kufumusya nu kumanyisya kanunu. Loli pikulondiwa akabalilo ukuti tufwanisye isi. Ukwiyipa kwitu pambombo yakufumusya kwakulondiwa fiyo kwa Yehova. Panongwa yakuti tunganile Yehova na bandu, tukwiyipa fiyo pambombo iyakufumusya. * (Mark 12:30, 31; Kol. 3:23) Ukumbombela Kyala nindumbula yitu yosa kukusanusya ukwiyipa, mwakubombesyela amaka ghitu ghosa ukuti tufwanisye imbombo iyakufumusya. Linga tukundaghisya ulusako ulu tulinalo ulwakufumusya, fikututula ukuti tufumusyeghe amasyu amanunu ku bandu bingi.

5-6. Lingania muno umundu uyu akaya nakabalilo akakufwana abaghile ukubika imbombo iyakufumusya pamalo ghakwanda.

⁵ Inong’onela isya wakilumyana uyu ikuhoboka fiyo ukwimba igitala. Umwene ikuhoboka fiyo ukwimba inyimbo akabalilo kosa. Kubumalilo bwa sabata ikwimba igitala ku malo ghamo aghakulisyilako ifindu. Loli, indalama isi ikusyagha sitikumfwana ukuti sintule pa bumi bwake. Yonongwa yake andile ukubomba imbombo iyakulisya ifindu mugolosale ukwanda pamande mpaka pachihano. Nalinga ikumalila akabalilo akatali ukulisya mugulosale loli umwene ighanile fiyo ukwimba igitala. Umwene ikughelaghela ukuti akusye uluso lwake kangi ukuti asaye kalyoto wakwimba. Nalinga ukuti mo siyilile, umwene ikuhoboka fiyo ukwimba inyimbo linga ulusako lwaghiwe.

⁶ Mwakufwana itolo, mubaghile ukuya numpaka ukufwana nakabalilo kinu aka mubaghile ukufwanisya mubufumusi. Mukulondiwa ukwiyipa fiyo ukuti mubafikeghe abandu pandumbula linga mukufumusya amasyu amanunu. Ukufwana nakabalilo kinu, mubaghile ukubika pamalo gha kwanda imbombo yakufumusya.

7-8. Ngimba tubaghile ukukonga bulebule akayilo ka Yesu linga tuli mubufumusi?

⁷ Yesu anangisye ikifwanikisyo ikinunu fiyo pambombo yake iyakufumusya. Umwene  alighanile fiyo ukuyoba isya Bunyafyale bwa Kyala pa bumi bwake. (Yoh. 4:34, 35) Umwene endagha amabulendo mingi ukuti akabafumukisyile abandu bingi. Umwene ali nulusako ulwa kuyoba na bandu pabwelu na ntwaya twabo. Yesu abikagha imbombo yakufumusya pa malo ghakwanda pa bumi bwake.

⁸ Tubaghile ukunkonga Yesu mwakughelaghela ukusyagha injila isi sibaghile ukututula ukuti tuyobesanie na bandu. Tukwiyipa fiyo namaka ghitu ghosa ukuti tufumusyeghe amasyu amanunu. (Mar. 6:31-34; 1 Pet. 2:21) Bamo nkipanga bikufwanisya ububombeli bwa mpayiniya wapadela, mpayiniya wakabalilo kosa, pamo mpayiniya wakabalilo. Bamo bikumanyila injobelo iyingi pamo ukusamila ku malo kuno kukulondiwa abafumusi bingi. Imbombo yakufumusya yikubombiwa na bafumusi aba bikughelaghela ukubomba isi babaghile ukufwanisya. Kali tubaghile ukubomba nyingi pamo hayi, Yehova atikutufimbilisya ukuti tubombeghe isi tukabaghila ukufwanisya. Umwene ikulonda ukuti twesa tuhobokeghe nukwiyipa pambombo yakufumusya ‘ukufwana nubukulumba bwa masyu amanunu agha Kyala umwimikiwa.’—1 Tim. 1:11; Kuk. 30:11.

9. (a) Ngimba Pauli ayiketagha bulebule imbombo iyakufumusya ukuya yakulondiwa fiyo nalinga ukuti abombagha imbombo yakumbili? (b) Ngimba ilemba lya Imbombo Sya Batumiwa 28:16, 30, 31 likunangisya bulebule ukuti Pauli ayiketagha imbombo iyakufumusya ukuya yakulondiwa fiyo pa bumi bwake?

⁹ Untumiwa Pauli anangisye ikifwanikisyo ikinunu mwakuketa imbombo iyakufumusya ukuya yakulondiwa fiyo pa bumi bwake. Pakabalilo aka ali ku Korinti pabulendo bwake ubwabubili, ali nindalama nandi kangi alondiwagha ukubomba imbombo iyakupanga amatenti. Loli, Pauli akaketagha ukuti imbombo iyakupanga amatenti yo yali yakulondiwa fiyo pa bumi bwake. Umwene abombagha imbombo iyi ukuti afwanisye ukufumusya amasyu amanunu ku bandu ba ku Korinti ‘kisita fihombiwa’. (2 Kor. 11:7) Nalinga ukuti abombagha imbombo sya kumbili, umwene akindilile ukuyiketa imbombo iyakufumusya ukuya yakulondiwa fiyo, kangi afumusyagha pa Sabata aliwesa. Loli bo ifindu fyandile ukwenda kanunu, Pauli ‘alinkwikolania fiyo ukufumusya, alinkubasisimikisya Abayuda ukuti Yesu yo Kristi.’ (Imbo. 18:3-5; 2 Kor. 11:9) Ukufuma apo, bo apinyiwe munyumba yake ku Roma kwa fyinja fibili, Pauli abafumukisyagha abandu bosa aba bisagha pakunketa kangi abalembelagha abakalata. (Belenga Imbombo Sya Batumiwa 28:16, 30, 31.) Pauli akalitikisye ukuti ikindu kimo kintolesya pambombo iyakufumusya. Umwene alembile ukuti: ‘Popapo lelo apa tuli nububombeli bububu . . . , pope tutikuyeta.’ (2 Kor. 4:1) Ukufwana itolo na Pauli, nalinga ukuti nanuswe tubaghile ukubomba imbombo yakumbili, loli tubaghile ukukindilila ukuyiketa imbombo iyakufumusya ukuya yakulondiwa fiyo pa bumi bwitu.

10-11. Ngimba tubaghile ukufwanisya bulebule ukufumusya linga tuli nindamyo iyabubine?

¹⁰ Linga tukabaghila ukufwanisya ukubomba imbombo yitu iyakufumusya ku nyumba ni nyumba panongwa yabukangale pamo ububine, loli tubaghile ukuhoboka ninjila isingi isyakufumukisyila. Abafumusi ba nkabalilo kakunyuma bafumusyagha kulikosa kuno kwaghiwagha abandu. Abene balwaghilangamo ulusako ulwakufumusya amasyu amanunu ku nyumba ni nyumba, pabwelu kangi “nakosa kuno abandu baghiwagha.” (Imbo. 17:17; 20:20) Linga tukabaghila ukufwanisya ukwenda umutunda untali mubufumusi, tubaghile ukwikala pamalo apa abandu bingi bikwendapo fiyo. Pamo tubaghile ukufwanisya ukufumusya pakabalilo aka twighanile twibene, ukulemba abakalata, pamo ukufumusya pafoni. Abafumusi bingi aba bakabaghila ukufwanisya ukufumusya ku nyumba ni nyumba panongwa ya ndamyo, babaghile ukuhoboka fiyo ninjila isingi isyakufumikisyila.

¹¹ Nalinga mukwaghana nindamyo, mubaghile ukufwanisya ukufumusya. Inong’onela kangi ikifwanikisyo ikya ntumiwa Pauli. Umwene atile: “Mbaghile ukusibomba syosa, muli yuyo ikumba  amaka.” (Filip. 4:13) Pauli alondiwagha amaka pakabalilo aka abinile pabulendo bwake bumo ubwa bumishonale. Umwene alingenie ku Bakristu ba ku Galatia ukuti: ‘Loli mumenye ukuti, napapo nalinubonywa bwa mbili, nabafumukisye amasyu amanunu nu lutasi lula.’ (Gal. 4:13) Mwakufwana itolo, nalinga muli nindamyo iyabubine mubaghile ukuya nulusako ulwa kufumusya amasyu amanunu ku bangi bo, abadokotala naku bandu bosa aba bikutupwelelela pakabalilo aka tubinile. Bingi mwa bandu aba bikuya kumbombo pakabalilo aka abafumusi bikufumusya kunyumba syabo.

12. Ngimba “ukufiketa kanunu ifindu pa bumi bwitu” kukusanusya isyafiki?

¹² Yesu atile: ‘Amaso ghali bo yi nyale kumbili. Lelo linga amaso ghako manunu itolo, [pamo “ukusita kulonda ifindu fingi,” amasyu ghapasi.] po umbili wako ghosa itolo ghukuyagha lumuli.’ (Mat. 6:22 NWT) Ngimba umwene asanusyagha isyafiki? Umwene asanusyagha ukuti tutikulondiwa ukwikolania mwakulonda ifindu fingi pa bumi bwitu, pamo mwakwinong’onela fiyo isya kindu kimokyene pamo ukusofaniwa nifindu fimo. Yesu anangisye ikifwanikisyo ikinunu mwakubika imbombo iyakufumusya pamalo ghakwanda pa bumi bwake, kangi umwene abamanyisye abafundiwa bake ukuti biyipeghe fiyo mwakumbombela Yehova nukwinong’onela isya Bunyafyale bwake. Tukunkonga Yesu mwakuya nubumi ubusita kulonda ifindu fingi, ‘mwakubulonda tasi Ubunyafyale bwa Kyala nubugholofu bwake.’—Mat. 6:33.

13. Ngimba findu fiki ifi fibaghile ukututula ukuti tubikeghe imbombo iyakufumusya pamalo ghakwanda?

¹³ Injila yimo iyi tubaghile ukunangisyila ukuti  tukubika imbombo yitu iyakufumusya pamalo ghakwanda ko kusita kulonda ukuya nifindu fingi pabumi bwitu ukuti tuye nakabalilo akakubatula abandu ukuti bam’manye nukungana Yehova. * Mwakifwanikisyo, ngimba tubaghile ukuchepesyako akabalilo aka tukumalila pakubomba imbombo isya kumbili ukuti tuye na kabalilo akakufumusya kubumalilo bwa sabata? Ngimba tubaghile ukuchepesya akabalilo aka tukumalila pakuketelela ifyakusangalusya?

14. Ngimba imbumba yimo yachenjile ifindu fiki ukuti yiye nakabalilo nukwiyipa pakwingila mubufumusi?

¹⁴ Isi syo unkulumba yumo uyu ingamu yake yo Elias nu nkasi wake babombile. Umwene atile: “Tukalyandile ubupayiniya mwanakalinga pakabalilo kala, loli twabombagha ifindu fimo ukuti tuyeghe nakabalilo akakufumusya amasyu amanunu. Yonongwa yake twalyandile ukubombesyela injila simo ukuti tuye nakabalilo kingi akakufumusyila. Mwakifwanikisyo, twalyandile ukuchepesya ukula ifindu ifyantengo uwapamwanya, twalekile ukubomba ifyakusangalusya ifi fikali fyakulondiwa, kangi twabasumile ababwana bitu ukuti bachenje imbatiko yamuno twabombelegha imbombo ukuti tuyeghe nakabalilo akakwingila mubufumusi. Isi syapangisye ukuti tufwanisyeghe ukufumusya namayolo, tumanyileghe na bandu bingi Ibaibolo, kangi nukubuka mubufumusi nkati mwa sabata kabili umwesi ghulighosa. Isi syali syakuhobosya fiyo!”

15-16. Ukufwana nilemba lya 1 Timoti 4:13, 15, ngimba tubaghile ukubomba bulebule ukuti tongelele amaluso mubufumusi? (Keta kangi ibokosi ilyakuti “ Ifindu Ifi Fibaghile Ukundula Ukuti Mfwanisye Ububombeli Bwangu.”)

¹⁵ Injila iyingi iyi yibaghile ukututula ukuti tufwanisye ukufumusya, ko kongelela amaluso  ghitu. Abandu bamo aba bikubomba imbombo, bikulondiwa ukumanyisiwa kanunu ukuti bongelele amaluso ghabo. Isi sifwene itolo nabafumusi aba bikufumusya amasyu gha Bunyafyale. Tukulondiwa ukukindilila ukumanyila ukuti tuyeghe namaluso mubufumusi.—Mbu. 1:5; belenga 1 Timoti 4:13, 15.

¹⁶ Ngimba tubaghile ukubomba bulebule ukuti tukindilile ukuya namaluso mubufumusi? Mwakupilikisya kanunu ubulongosi ubu tukwambilila pangomano syitu isya nkati mwa sabata. Ingomano isi sikututula fiyo ukuti tukindilileghe ukuya namaluso mubufumusi. Mwakifwanisyo, linga cheyamani ikubapa ubulongosi bosa aba bapeliwe inkhani, tubaghile ukumanyilapo nyingi isi sibaghile ukututula ukuti tongelele amaluso mubufumusi. Tubaghile ukughelaghela ukukonga isi tumanyile ukuti nuswe tufumusyeghe kanunu linga tulimubufumusi. Tubaghile ukunsuma uyu ikuketesya akagulu kitu akabufumusi ukuti atutule pamo ukwenda nawe mubufumusi pamo ukwenda numfumusi uyu ali namaluso, umpayiniya, pamo nu wakwendela idela. Linga tukukindilila ukuya namaluso mwakubombesyela kanunu amabuku agha tukubombesyela pakumanyila nabandu ibaibolo, tukuya pakuhoboka fiyo nimbombo iyakufumusya nukumanyisya.

17. Ngimba mukuya pakusayiwa bulebule linga mukufwanisya kanunu imbombo iyakufumusya?

¹⁷ Tuli nulusako ulwapamwanya fiyo panongwa yakuti Yehova atwikisye ukuti tuye ‘babombanisi bake’! (1 Kor. 3:9) Linga “mukusala ifindu ifinunu” kangi mukwiyipa ukufumusya, mukuya “pakumbombela Yehova nubwikyele.” (Filip. 1:10; Sal. 100:2) Pakuya mbombi yumo wa Kyala, mubaghile ukuya nulusubilo ulwakuti ikuya pakubapa amaka ukuti mufwanisye ukufumusya nalinga ukuti mukwaghana nindamyo pamo ningelo isyakukindanakindana. (2 Kor. 4:1, 7; 6:4) Nalinga ukuti indamyo isi mukwaghana nasyo sikubapangisya ukuti mufumusyeghe panandi pamo fiyo, loli mubaghile ukuya “balusekelo” linga mukwiyipa nindumbula yosa pambombo iyakufumusya. (Gal. 6:4) Linga mukufwanisya kanunu imbombo iyakufumusya, mukunangisya ulughano lwinu kwa Yehova kangi naku bandu bosa. ‘Namanga linga kubomba bo bunobuno, po kwisakwipoka wimwene kangi kwisakubapokagha naba bikukupilika.’—1 Tim. 4:16.