1. Ngimba tubaghile ukukusya bulebule ubumanyani numundu yumo?

UTUBALILO twingi, linga tukulonda ukuya pabumanyani numundu yumo tukulondiwa ukuya nakabalilo akakwangala nawe. Linga tukuyobesania isi tukwinong’ona kangi muno tukwipilikila tukuya pabumanyani. Loli utubalilo tumo kukaya kupepe ukuya m’manyani wa Yesu panongwa ya ndamyo isi tukwaghana nasyo. Ngimba indamyo simo syo siliku?

2. Ngimba ndamyo yiliku iyakwanda iyi tuli nayo?

² Indamyo iyakwanda yo yakuti tukaghanamo na Yesu. Abakristu bingi aba nkabalilo kakunyuma bope bakalyaghenemo na Yesu. Nalinga mo siyilile, untumiwa Peteri atile: ‘Munganile napapo mukambonamo mmaso, uyu mumwitike napapo mutikumbona lilino.’ (1 Pet. 1:8) Yonongwa yake tubaghile ukufwanisya ukuya pabumanyani na Yesu nalinga ukuti tukaghanamo nawe lumo.

3. Ngimba ndamyo yiliku iyabubili iyi tuli nayo?

³ Indamyo iyabubili yo yakuti tutikufwanisya ukuyoba na Yesu. Linga tukwiputa, tukuyoba na Yehova. Syabwanaloli ukuti tukwiputa ukwendela mungamu ya Yesu, loli tutikuyoba nawe ndwiputo. Nalinga mo siyilile, Yesu atikulonda ukuti twiputeghe kumyake. Nongwa yafiki? Panongwa yakuti ulwiputo kighaba kya kumwiputa Kyala kangi tukulondiwa ukumwiputa Yehova mwene. (Mat. 4:10) Loli tubaghile ukukindilila ukunangisya ukuti tunganile Yesu.

4. Ngimba ndamyo yiliku iyabutatu, kangi tukuya pakuyobesania isyafiki?

 ⁴ Indamyo iyabutatu yo yakuti Yesu ikwikala kumwanya, yonongwa yake tukaya nakabalilo akakuya nawe pampene. Loli tubaghile ukukindilila ukumanya nyingi isyakufwana na Yesu nalinga ukuti tukaya nawe pabupipi. Tukuya pakuketa ifindu 4 ifi tubaghile ukubomba ukuti tukusye ubumanyani bwitu na Yesu. Ikyakwanda, isagha tukete inongwa iyi kwakulondiwa fiyo ukukusya ubumanyani bwitu na Kristu.

5. Ngimba fifukwa fimo filiku ifi fibaghile ukututula ukuya pabumanyani na Yesu? (Keta ibokosi ilyakuti “ Ukuya Pabumanyani na Yesu Kukututula Ukuya Pabumanyani na Yehova” nilyakuti “ Tunketeghe Yesu Munjila Inunu.”)

⁵ Tukulondiwa ukuya bamanyani ba Yesu linga tukulonda ukuya pabumanyani ubununu na Yehova. Nongwa yafiki? Inong’onela ififukwa fibili ifi. Ikyakwanda, Yesu ababulile abafundiwa bake ukuti: ‘Namanga umwene Tata abaghanile umwe, papo umwe munganile une.’ (Yoh. 16:27) Umwene ayobile kangi ukuti: ‘Nayumo atikwisako kwa Tata, pene papo linga ikwendela mmyangu.’ (Yoh. 14:6) Ukuya pabumanyani na Yehova kisita kuya pabumanyani ubununu na Yesu kufwene itolo nukwingila nnyumba kisita kwingilila pakifigho. Yesu abombile ikifwanikisyo ikyakufwana itolo bo ikulingania ukuti umwene yo ‘kifigho kya ng’osi.’ (Yoh. 10:7) Ikyabubili kyo kyakuti Yesu anangisyagha utuyilo utununu utwa Kyala. Umwene ababulile abafundiwa bake ukuti: ‘Uyu linga ambwene une, bo ambwene na Tata.’ (Yoh. 14:9) Yonongwa yake injila inunu iyi yibaghile ukututula ukuti tummanye kanunu Yehova ko kumanyila isya Yesu. Linga tukukindilila ukumanyila nyingi isyakufwana na Yesu tukuya pakukusya ulughano kumyake.  Kangi linga tukukindilila ukungana Yesu, tukuya pakukusya ulughano kwa Tata witu Yehova.

6. Ngimba kifukwa kiliku ikingi iki tukulondiwa ukuya pabumanyani na Yesu? Lingania.

⁶ Tukulondiwa ukuya pabumanyani na Yesu ukuti inyiputo syitu syamuliweghe. Isi sikusanusya ukuti tukulondiwa ukubomba nyingi ukukinda ukuyoba itolo amasyu aghakuti “mungamu ya Yesu” linga tukwiputa. Tukulondiwa ukumanya muno Yehova ikututulila ukuti inyiputo syitu syamuliweghe ukwendela mwa Yesu. Yesu ababulile abatumiwa bake ukuti: ‘Fyosa ifi mukusumila mungamu yangu, fyo nikubombagha.’ (Yoh. 14:13) Nalinga ukuti Yehova ikupilika nukwamula inyiputo syitu, umwene ampele Yesu amaka ukuti yo alongosyeghe ukufwana na isi ikulonda. (Mat. 28:18) Inong’onela isi sikubombiwa linga tukwiputa nukunsuma Yehova ukuti atuhobokele ubutulanongwa bwitu. Bo akali ukubomba isi, umwene ikuketa tasi linga tukukonga ubulongosi ubu Yesu atupele ubwakufwana nukubahobokela abangi. Yesu atile: ‘Namanga linga mukubaswa abandu ubusobi bwabo, po yope Uwisemwe uyu ali kumwanya isakubaswagha nanumwe; loli linga mutikubaswa abandu, po yope Uwisemwe atisakubaswagha ubusobi bwinu.’ (Mat. 6:14, 15) Syakulondiwa fiyo ukuti tubabombeleghe abangi bo muno Yehova na Yesu bikubombela!

7. Ngimba bo banani aba bikusayiwa nikitabulilo kya Yesu?

⁷ Bosa aba bali pabumanyani na Yesu bikusayiwa fiyo nikitabulilo kyake. Tukumanya bulebule? Yesu ayobile ukuti ikuya ‘pakutagha ubumi bwake panongwa ya bamanyani bake.’ (Yoh. 15:13) Abandu abasubiliwa aba bambombelagha Yehova bo Yesu akali ukwisa pa kisu kyapasi bisakumanyila isyakufwana numwene nukungana fiyo. Abanyambala na bakikulu aba bo Abrahamu na Sara, Mose, kangi Rahabu bisakusyuka, loli bope bisakulondiwa ukuya pabumanyani na Yesu ukuti basabwaghe ubumi ubwa bwila na bwila.​—Yoh. 17:3; Imbo. 24:15; Hib. 11:8-12, 24-26, 31.

8-9. Ukufwana na Yohani 15:4, 5, ngimba ubumanyani bwitu na Yesu bukutupangisya ukubomba isyafiki, kangi nongwa yafiki kwakulondiwa?

⁸ Tuli nulusekelo fiyo ukubombela pampene na Yesu pambombo iyakufumusya nukumanyisya amasyu amanunu agha Bunyafyale. Yesu bo ali pa kisu kyapasi, ali m’manyisi. Kangi bo abukile kumwanya, Yesu pakuya mutu wakipanga, ikukindilila ukulongosya pambombo iyakufumusya nukumanyisya amasyu gha Kyala. Umwene ikuketa nukundaghisya ukwiyipa kwitu panongwa yakubatula abandu ukuti bammanye umwene na Tata wake. Loli injila yene iyi tubaghile ukufwanisya imbombo iyi ko kusubila ubutuli bwa Yehova na Yesu.​—Belenga Yohani 15:4, 5.

⁹ Amasyu gha Kyala ghikutukasya ukuti tukusyeghe ulughano kwa Yesu ukuti tunhobosyeghe Yehova. Isagha tuyobesanie ifindu 4 ifi tubaghile ukubomba ukuti tuye pabumanyani na Yesu.

10. Ngimba kindu kiliku ikyakwanda iki tukulondiwa ukubomba ukuti tuye pabumanyani na Yesu?

¹⁰ (1) Tummanye kanunu Yesu. Tubaghile ukubomba isi mwakubelenga amabuku gha mu Baibolo bo Matai, Marko, Luka, na Yohani. Linga tukwinong’onelapo isi tukubelenga, tukuya pakungana nukungindika fiyo Yesu panongwa yakisa iki anangisyagha ku bandu. Mwakifwanikisyo, nalinga ukuti ali yo Mwalafyale wabo, umwene akababombelagha ifindu abafundiwa bake mwankhaza. M’malo mwake, Yesu ababulagha muno ipilikilagha kangi  na isi inong’onagha. (Yoh. 15:15) Linga abafundiwa bake bali nikitima Yesu yope ayagha nikitima. (Yoh. 11:32-36) Aba bansusyagha Yesu bope basyaghenie ukuti ali mmanyani wa bandu bosa aba bapilikilagha amasyu ghake. (Mat. 11:19) Linga tukunkonga Yesu muno abombelagha na bafundiwa bake, ubumanyani bwitu nabangi bukuya pakuya bwamaka kangi tukuya pakuya nulusekelo nukukindilila ukungindika.

11. Ngimba kindu kiliku ikyabubili iki tukulondiwa ukubomba ukuti tuye pabumanyani na Yesu, kangi nongwa yafiki?

¹¹ (2) Tunkongeghe Yesu muno abombelagha ifindu. Linga tukunkonga Yesu muno abombelagha ifindu, tukuya pakuya pabumanyani nawe. (1 Kor. 2:16) Ngimba tubaghile ukunkonga bulebule Yesu? Inong’onela ikifwanikisyo iki. Yesu inong’onelagha fiyo isyakubatula abangi ukukinda ukwihobosya mwene. (Mat. 20:28; Rom. 15:1-3) Panongwa yakuti ali naminong’ono amanunu, wakwiyipa kangi abahobokelagha abangi. Umwene akakalalagha na isi abandu bayobagha isyakufwana numwene. (Yoh. 1:46, 47) Kangi akitikisyagha ukuti umundu yumo onange akayilo kake akanunu. (1 Tim. 1:12-14) Yesu atile: ‘Linga mukughanana po bisakubamanyagha bosa abandu ukuti muli bafundiwa bangu.’ (Yoh. 13:35) Tubaghile ukwilalusya ukuti, “Ngimba ngukonga ikifwanikisyo kya Yesu mwakubomba kilikyosa ukuti ngindilileghe ukuya palutengano na bakamu na balumbu?”

12. Ngimba kindu kiliku ikyabutatu iki tubaghile ukubomba, kangi tubaghile ukubomba bulebule?

¹² (3) Tubatuleghe abakamu ba Yesu. Linga tukubatula abakamu abapakiwa, Yesu ikuketa ukuti tukumbombela umwene. (Mat. 25:34-40) Ikindu ikyakulondiwa fiyo iyi tubaghile ukubomba ukuti tubatule abapakiwa ko kufumusya amasyu gha Bunyafyale nukupela abafundiwa ukufwana na isi Yesu ababulile abamanyili bake ukuti babombeghe. (Mat. 28:19, 20; Imbo. 10:42) Nubutuli bwa ‘ng’osi isingi’ abamanyani ba Yesu babaghile ukufwanisya imbombo iyakufumusya iyi yikubombiwa pa kisu kyosa ikyapasi. (Yoh. 10:16) Linga tuli ba ng’osi isingi, akabalilo kosa aka tukufumusya amasyu gha Kyala, tukunangisya ulughano lwitu ulwakufumila pasi pandumbula komma ku bapakiwa bene loli na kwa Yesu.

13. Ngimba tubaghile ukukonga bulebule amasyu gha Yesu agha ghali pa Luka 16:9?

¹³ Tukuya pabumanyani na Yehova kangi na Yesu linga tukubika indalama ukuti situle pambombo iya Bunyafyale. (Belenga Luka 16:9.) Mwakifwanikisyo, tubaghile ukubika indalama ukuti situle pambombo iya pa kisu kyosa, isi sikutula kangi pambombo iyakufumusya kumalo agha kukulondiwa ubutuli, ukuyenga nukutendekesya inyumba sya Bunyafyale nukubatula aba baghene ningozi isya kipeliwa. Tubaghile ukubika kangi indalama ukuti situle pakipanga kyitu nukubatula bosa aba bikulondiwa ubutuli. (Mbu. 19:17) Isi syo njila isi tubaghile ukubombela ukuti tubatule abakamu ba Kristu.

14. Ukufwana na Baefesi 4:15, 16, ngimba kindu kiliku ikya nambala 4 iki tukulondiwa ukubomba ukuti tuye pabumanyani na Yesu?

¹⁴ (4) Tukolelaneghe nigulu lya Yehova. Tukukusya ubumanyani bwitu na Yesu uyu yo mutu wakipanga linga tukukolelana na bosa aba bikutulongosya. (Belenga Baefesi 4:15, 16.) Mwakifwanikisyo, tukughelaghela ukuyenga inyumba sya Bunyafyale inunu fiyo. Ukuti tufwanisye ukubomba isi, ifipanga fimo bafyongenie pampene kangi ifighaba fimo fichenjile. Isi sipangisye ukuti igulu lingonangagha indalama nyingi isi abakamu na balumbu bikubika ukuti situleghe pambombo iya Bunyafyale. Panongwa ya isi abafumusi bamo  ububombeli bwabo bukuchenja. Abafumusi aba babaghile ukuti bambombile Yehova kwa fyinja fingi ku kipanga kimo kangi babaghile ukuti bali pabumanyani ubununu fiyo na bakamu na balumbu. Loli abene bikubasuma ukuti bakambombeleghe Yehova ku fipanga ifyakukindanakindana. Yesu ikuhoboka fiyo linga ikuketa abafundiwa abasubiliwa aba bikukolelana nulubatiko ulu!

15. Ngimba ubumanyani bwitu na Yesu bwisakuya bulebule nkyeni?

¹⁵ Bosa aba bapakiwe na mbepo mwikemo bali nulusubilo ulwakwisa kwikala na Yesu kwa bwila na bwila, nukulaghila pampene nawe mu Bunyafyale bwa Kyala. Abene bisakuya na Kristu, bisakumbonagha nukuyoba nawe kangi nukuya nakabalilo akakwangala nawe. (Yoh. 14:2, 3) Bosa aba bali nulusubilo ulwakwisa kwikala pa kisu kyapasi, Yesu isakubanangisyagha ulughano. Nalinga ukuti batisakumbonagha Yesu loli bisakuya pabumanyani ubununu fiyo numwene, bo bikuhoboka nu bumi ubu Yehova na Yesu bisakubapa.—Yes. 9:6, 7.

16. Ngimba ubumanyani bwitu na Yesu bukututula bulebule?

¹⁶ Linga tukwitikisya amasyu gha Yesu aghakuti tuye bamanyani bake, tukusayiwa fiyo. Mwakifwanikisyo, tukusayiwa fiyo nulughano lwake kangi ubutuli ubu ikutupa amasiku agha. Tuli nulusako ulwakwisa kwikala nu bumi bwa bwila na bwila. Kangi ikindu kyakulondiwa fiyo kyo kyakuti ubumanyani bwitu na Yesu bukuya pakututula ukuti tusegheleleghe fiyo kwa Yehova. Ulu lusako lunywamu fiyo ukuya pabumanyani na Yesu!