1. Ngimba twesa tukulondiwa ukubomba isyafiki?

NGIMBA tubaghile ukubopa pampalano ughu tughumenye ukuti wakutamya, fiyofiyo linga tubinile pamo tukatele? Hayi. Untumiwa Pauli ayobile ukuti, Abakristu bosa aba bwanaloli bali pampalano uwakubopa. (Hib. 12:1) Kangi twesa tukulondiwa ukwifimbilisya mpaka tukafike kubumalilo linga tukulonda ukukaba ikyabupe iki Yehova ikuya pakutupa.​—Mat. 24:13.

2. Ukufwana na 2 Timoti 4:7, 8, nongwa yafiki Pauli ali nubwabuke ubwakuyoba?

² Pauli ali nubwabuke ubwakuyoba panongwa yakuti umwene afwanisye “ukubopa mufinganilo.” (Belenga 2 Timoti 4:7, 8.) Loli ngimba mpalano ghuliku ughu Pauli ayobagha?

3. Ngimba mpalano ghuliku ughu Pauli ayobagha?

³ Pauli utubalilo tumo alembagha isyakufwana nifindu ifi fyabombiwagha nkabalilo kakunyuma ukuti abamanyisye kanunu abandu. (1 Kor. 9:25-27; 2 Tim. 2:5) Mfyakubombiwa fingi, umwene afwanikisyagha ubumi bwa Nkristu numpalano uwakubopa. (1 Kor. 9:24; Gal. 2:2; Filip. 2:16) Umundu ikwanda “ukubopa” pampalano ughu linga iyipile kwa Yehova nukosiwa. (1 Pet. 3:21) Ikufika kubumalilo bwa mpalano ughu linga Yehova ampele ikyabupe ikya bumi bwa bwila na bwila.​—Mat. 25:31-34, 46; 2 Tim. 4:8.

4. Ngimba tukuya pakuyobesania isyafiki mu nkhani iyi?

⁴ Ngimba ukubopa pampalano kufwene bulebule nukubopa panjila iyakubuka ku bumi? Filipo ifindu fingi ifi fifwene. Isagha tuyobesanie fitatu. Ikyakwanda, tukulondiwa ukukonga injila inunu; ikyabubili, tukulondiwa ukukindilila ukubopa pampalano mpaka tukafike kubumalilo; kangi ikyabutatu, tukulondiwa ukwifimbilisya kundamyo isi tukwaghana nasyo.

5. Ngimba njila yiliku iyi tukulondiwa ukukonga, kangi nongwa yafiki?

⁵ Ukuti bakabe ikyabupe pampalano uwakubopa, aba bikubopa bikulondiwa ukukonga injila inunu iyi yibikiwe na aba bikupangisya umpalano. Mwakufwana itolo, linga tukulonda ukwambilila ikyabupe kya bumi bwa bwila na bwila, tukulondiwa ukukonga injila iyakubuka ku bumi. (Imbo. 20:24; 1 Pet. 2:21) Loli Setano na bosa aba bikunkonga bikulonda ukuti tungakongagha injila iyakubuka ku bumi; bikulonda ukuti ‘tubopeghe nabo pampene.’ (1 Pet. 4:4) Abene bikutunyoza panongwa ya njila inunu iyi tukukonga. Loli isi bikuyoba sikaya syabwanaloli.​—2 Pet. 2:19.

6. Ngimba tukumanyilako isyafiki kwa Brian?

⁶ Bosa aba bikubopa mwakukolelana nikisu iki bikuya batumwa ba Setano kangi bikukonga ifinyonywa fyabo. (Rom. 6:16) Inong’onela ikifwanikisyo kya Brian. Abapapi bake bankasyagha ukukonga injila iyakubuka ku bumi. Loli bo ndumyana, aketile linga injila iyi yayagha pakumpangisya ukuti aye nulusekelo. Brian asalale ukubopa pampene nabandu aba bikunkonga Setano. Umwene atile, “Naketile ukuti isi syalyandile ukumbangisya ukuya nutuyilo utubibi. Bo akabalilo kakindilepo, nalyandile ukunwa ubwalwa nimikota iyakusyutisya ubongo kangi nabombagha ubulowe. Bo ifyinja fikindilepo, nakindilile ukunwa imikota iyakusyutisya ubongo kangi nali ntumwa wa findu ifi. . . . Nalyandile ukulisya imikota ukuti nituleghe pabumi bwangu.” Pabumalilo, Brian alyandile ukukonga ifundo sya Yehova. Umwene achenjile pabumi bwake kangi alyosiwe mu 2001. Lino Brian ali nulusekelo panongwa yakuti ikukonga injila iyakubuka ku bumi. *

7. Ngimba njila sibili siliku isi siyobiwe pilemba lya Matai 7:13, 14?

⁷ Kwakulondiwa fiyo ukukonga injila inunu! Setano ikulonda ukuti twesa tuleke ukubopa munjila imfinye iyi ‘yikulabila ku bumi’ loli ikulonda ukuti twendeghe munjila inyelefu iyi abandu bingi bikwendamo. Injila iyi yifumwike fiyo. Loli “yikulabila kubupyutiwa.” (Belenga Matai 7:13, 14.) Ukuti tukindilile ukwenda munjila inunu nukuleka ukusyobiwa nabandu aba batikukonga ifundo sya Kyala, tukulondiwa ukunsubila Yehova nukumpilikila.

8. Linga uyu ikubopa awile, ngimba ikubomba isyafiki?

⁸ Abandu aba bikubopa pampalano bikukindilila ukubika aminong’ono ghabo pankyeni  ukuti bangasofanisiwagha. Loli abene babaghile ukusofanisiwa mwangozi numwinabo uyu bikubopa nawe pamo ukuwila mbwina. Linga bawile, bikusumuka mwanakalinga nukukindilila ukubopa. Abene bikukindilila ukuketa pankyeni, komma pa findu ifi fibaghile ukubasofania.

9. Linga tusofanisiwe, ngimba tukulondiwa ukubomba isyafiki?

⁹ Pampalano uwakubopa, utubalilo twingi tubaghile ukusofanisiwa, ukusoba pa ifi tukuyoba pamo isi tukubomba. Lumo Unkristu umwinitu abaghile ukutukalalisya. Tungaswighagha linga isi sibombiwe. Twesa tuli basitabugholofu kangi tukubopa panjila yimoyene iyakubuka ku bumi. Yonongwa yake utubalilo tumo tubaghile ukusoba linga tukuyoba nukubomba ifindu na bakamu na balumbu. Pauli ayobile ukuti utubalilo tumo tubaghile ‘ukumonangila umwinitu.’ (Kolos. 3:13) M’malo mwakuketa isi situpangisye ukuti tusofanisiwe, tukulondiwa ukwinong’onela pa kyabupe ikya nkyeni. Linga tusofanisiwe, tukulondiwa ukusumuka mwanakalinga nukukindilila ukubopa. Linga tukalele nukukana ukukindilila ukumbombela Yehova, tukuya pakutoliwa ukufika kubumalilo bwa mpalano uwakubuka ku bumi. Mwakongelelapo, tubaghile ukubasofania abangi aba bikughelaghela ukubopa panjila iyakubuka ku bumi.

10. Ngimba tubaghile ukubomba bulebule ukuti “tungabafulasyagha” abangi?

¹⁰ Injila iyingi iyi tubaghile ukuleka “ukubafulasya” abinitu ko kubitikisya ukuti babombeghe ifindu muno bikulondela komma muno uswe tukulondela. (Rom. 14:13, 19-21; 1 Kor. 8:9, 13) Ukubomba bo isi, tukabaghila ukufwana nabandu aba bali pampalano uwakubopa. Abene bikulimbana pampalano uwakubopa kangi umundu aliwesa ikulonda ukutola ukuti ambilile ikyabupe. Bosa aba bikubopa bikwinong’onela isi sibaghile ukubatula ukuti batole pampalano. Yonongwa yake babaghile ukubaghuta abinabo ukuti abene bo baye pankyeni. Mwakukindana na isi, uswe tutikulimbana ukuti yumo atole pampalano ughu. (Gal. 5:26; 6:4) Ubwighane bwitu bo bwakubatula abangi ukuti bafike kubumalilo nukukaba ikyabupe kya bumi bwa bwila na bwila. Yonongwa yake tukukonga ubulongosi  bwa Pauli ubwakuti ‘umundu wesa angatwinong’onagha tu twake twene loli na tu twa banine.’​—Filip. 2:4.

11. Ngimba aba bikubopa pampalano bikwinong’onela isyafiki, kangi nongwa fiki?

¹¹ Mwakongelelapo ukuketa mwanakalinga munkyeni panjila iyi bikubopa, aba bikubopa pampalano bikukindilila ukubopa mpaka bakafike kubumalilo. Nalinga ukuti bakabaghila ukughuketa umuzele, loli abene bikuketa pankyeni mwakwiyula ukubopa mpaka kubumalilo ukuti bambilile ikyabupe. Abene bikukindilila ukwinong’onela isya kwambilila ikyabupe.

12. Ngimba Yehova afingile isyafiki?

¹² Pampalano ughu tukubopa, Yehova afingile ukuti ikuya pakubapa ababombi bake ikyabupe kya bumi bwa bwila na bwila kumwanya pamo pa kisu kyapasi. Amalemba ghikulingania kanunu isyakufwana nikyabupe iki, yonongwa yake tukulondiwa ukwinong’onela muno ubumi bwitu bwisakuyila bununu fiyo. Linga tukukindilila ukwinong’onela isyakufwana nulufingo ulu Yehova afingile nkyeni, tukuya pakukindilila ukwifimbilisya kundamyo isi tukwaghana nasyo.

13. Ngimba tuli nulusako luliku ulu lukindene nabandu aba bikubopa pampalano?

¹³ Abandu aba babopagha pampalano nkabalilo kakunyuma balimbanagha nindamyo, bo ukukatala nukwipilika ifyakubaba mumbili. Loli abene basubilagha isi bamanyilagha linga bikwitendekesya kangi namaka ghabo. Tufwene itolo nabandu aba panongwa yakuti nanuswe tukumanyila muno tubaghile ukubopela pampalano ughu. Loli tuli nulusako ulwakuti tubaghile ukutola pampalano. Yehova abaghile ukutupa amaka kangi umwene abaghile ukukindilila ukututula akabalilo kosa. Linga tukunsubila Yehova, ikuya pakutumanyisya nukutupa amaka!​—1 Pet. 5:10.

14. Ngimba ilemba lya 2 Bakorinti 12:9, 10 likututula bulebule linga tukwaghana nindamyo?

¹⁴ Pauli alimbanagha nindamyo nyingi pabumi bwake. Mwakongelelapo ukunyoziwa nukufwimiwa nabangi, utubalilo tumo akatalagha fiyo yonongwa yake ayobile ukuti ali “numwifwa wa mumbili.” (2 Kor. 12:7) M’malo mwakwinong’onela indamyo isi aghanagha nasyo isi syayagha pakungwisya amaka, umwene aketile ukuti lwali lusako ukunsubila Yehova. (Belenga 2 Bakorinti 12:9, 10.) Panongwa yakuti Pauli abombagha isi, Yehova alintulile fiyo pakabalilo aka aghanagha nindamyo.

15. Linga tukunkonga Pauli, ngimba findu fiki fikuya pakubombiwa?

¹⁵ Nanuswe utubalilo tumo tubaghile ukunyoziwa nukufwimiwa panongwa ya lwitiko lwitu. Tubaghile ukutamiwa nububine pamo ukuwa amaka. Loli linga tukunkonga Pauli, Yehova ikuya pakututula pandamyo isi tukwaghana nasyo.

16. Ngimba mubaghile ukubomba isyafiki nalinga ukuti muli babine?

¹⁶ Ngimba mukubina pamo mukwendela akanjinga ka bandu abalemale? Ngimba mukaya namaka pamo muli nindamyo ya maso? Linga mo siyilile, ngimba mubaghile ukumbombela Yehova pampene na bakamu na balumbu? Ena mubaghile! Abakamu na balumbu bingi bikubopa panjila iyakubuka ku bumi. Abene bakabaghila ukubomba isi namaka ghabo. M’malo mwake, Yehova ikubapa amaka linga bikupilikisya ingomano sya Bukristu ukwendela pa foni ningomano isi sijambuliwe. Kangi abene bikufumusya amasyu gha Kyala ku ba dokotala na ku bakamu babo. Bamo bikufumusya mwakulemba abakalata pamo ukwimba ifoni.

17. Ngimba Yehova ikwipilika bulebule na bosa aba bikubina?

 ¹⁷ Tungitikisyagha ukuti indamyo situtolesye ukubopa pampalano uwakubuka ku bumi. Yehova abaghanile fiyo panongwa ya lwitiko lwinu kangi nukwifimbilisya kwinu. Mukulondiwa ubutuli akabalilo kosa kangi umwene atikuya pakubaleka. (Sal. 9:10) Yehova ikuya pakuya pabupipi nanumwe. Keta isi umulumbu yumo ayobile, umwene atile: “Bo ngubina, natoliwagha ukufumusya fiyo amasyu gha Kyala. Loli nsimenye ukuti nalinga ndikufumusya kwa kabalilo akatali loli nguya nulusekelo panongwa yakuti ngunhobosya Yehova.” Linga muwile amaka, mukumbukeghe ukuti mukaya mwibene. Inong’onela ikifwanikisyo kya Pauli kangi keta amasyu aghakukasya fiyo agha: “Nikwikyela mbonywa, . . . namanga apa nikuya monywa po nikuya namaka.”—2 Kor. 12:10.

18. Ngimba ndamyo yiliku iyi bamo bikwaghana nayo?

¹⁸ Bamo aba bikubopa panjila iyakubuka ku bumi bikwaghana nindamyo. Abene bikulimbana nindamyo isi abangi bakabaghila ukusimanya. Mwakifwanikisyo, bamo bikutamiwa nindamyo ya minong’ono. Nongwa yafiki ababombi ba Yehova aba bikwaghana nindamyo? Nongwa yakuti linga yumo afulele kangi ikwenda pakanjinga ka bandu abalemale, umundu aliwesa abaghile ukuketa indamyo iyi aghene nayo nukuntula. Loli bosa aba bikutamiwa nindamyo ya minong’ono tukabaghila ukuketa pamo ukumanya indamyo iyi bikwaghana nayo. Indamyo ya minong’ono iyi yifwene itolo nindamyo ya uyu afulele unsana, loli abene bakabaghila ukwambilila ubutuli bwakufwana itolo ukufuma ku bangi.

19. Ngimba tukumanyilako isyafiki ku kifwanikisyo kya Mefibosheti?

¹⁹ Linga mukubina kangi mukuketa ukuti kukafu ukumbombela Yehova, mubaghile ukukasiwa fiyo nikifwanikisyo ikya Mefibosheti. (2 Samu. 4:4) Umwene abinile kwa kabalilo akatali kangi alongiwe nu Mwalafyale Davidi munjila iyi yikali yabwanaloli. Loli bukali bwighane bwa Mefibosheti ukuti aghane nindamyo pabumi bwake. Loli akalitikisye aminong’ono amabibi; umwene akindilile ukuya naminong’ono amanunu. Mefibosheti alinndaghisye Davidi panongwa ya kisa iki alinnangisye pabwandilo. (2 Samu. 9:6-10) Yonongwa yake bo Davidi ikundonga munjila iyi yikali yabwanaloli, umwene asimenye kanunu indamyo syosa isi aghanagha nasyo pabumi bwake. Mefibosheti akakalele na isi Davidi alimbombile. Kangi akalinkalalile Yehova panongwa ya isi Davidi alimbombile. Mefibosheti akindilile ukubomba syosa isi abaghile ukufwanisya ukuti antule mwalafyale uyu asaliwe na Yehova. (2 Samu. 16:1-4; 19:24-30) Ikifwanikisyo  ikinunu ikya Mefibosheti kikututula fiyo amasiku agha.​—Rom. 15:4.

20. Ngimba bamo bikupalamasiwa bulebule nindamyo ya minong’ono, loli bikulondiwa ukusubila isyafiki?

²⁰ Panongwa ya ndamyo ya minong’ono, abakamu na balumbu bamo bikupasya fiyo pabumi bwabo. Kubaghile ukuya kukafu kumyabo ukuya pagulu lya bandu, loli bikukindilila ukwaghiwa pangomano sya kipanga, isya dela nisya kighaba. Kukuya kukafu kumyabo ukuyoba numundu wa kihesya loli bikufwanisya ukuyoba nabandu mubufumusi. Linga mukwaghana nindamyo bo isi, mukulondiwa ukumanya ukuti mukaya mwibene. Bingi bikwaghana nindamyo isyakufwana itolo na isi muli nasyo. Mukumbukeghe ukuti Yehova ikuhoboka fiyo panongwa yakwiyipa kwinu. Panongwa yakuti mutikuwa amaka sikunangisya ukuti Kyala ikubasaya nukubapa amaka agha mukulondiwa. * (Filip. 4:6, 7; 1 Pet. 5:7) Linga mukumbombela Yehova nalinga ukuti muli nindamyo ya minong’ono, mukulondiwa ukumanya ukuti mukunhobosya fiyo Yehova.

21. Nubutuli bwa Yehova, ngimba tukuya pakufwanisya ukubomba isyafiki?

²¹ Tukundaghisya fiyo panongwa yakuti pali ukukindana pakati pa umpalano uwakubopa nu mpalano ughu Pauli ayobile. Pampalano ughu abandu babombagha nkabalilo kakunyuma, umundu yumoywene yo atolagha nukwambilila ikyabupe. Mwakukindana na isi, uyu ikwifimbilisya pampalano uwakubuka ku bumi ikuya pakwambilila ikyabupe ikya bumi bwa bwila na bwila. (Yoh. 3:16) Kangi pampalano uwakubopa, bosa aba bikubopa balondiwagha ukuya namaka; linga bakaya namaka abene bakabaghile ukutola. Amasiku agha twebingi tukwaghana nindamyo, loli tukwifimbilisya. (2 Kor. 4:16) Nubutuli bwa Yehova, tukuya pakukindilila ukubopa pampalano mpaka tukafike kubumalilo!