1. Ngimba findu fiki fikutupangisya ukuya balusekelo?

 YEHOVA ikulonda ukuti tuyeghe balusekelo. Tusimenye isi panongwa yakuti ulusekelo lo luseke lumo ulwa mbepo mwikemo. (Gal. 5:22) Panongwa yakuti ukupa kukutwala ulusekelo ukukinda ukwambilila, tukuya balusekelo fiyo linga tukwiyipa mubufumusi nu kubatula abakamu na balumbu munjila isyakukindanakindana.​—Imbo. 20:35.

2-3. (a) Ukufwana na isi sili pa Bagalatia 6:4, ngimba njila sibili siliku isi sibaghile ukututula ukukindilila ukuya balusekelo pakumbombela Yehova? (b) Ngimba tukuya pakumanyila isyafiki mu nkhani iyi?

² Bo muno pikuyobela pa Bagalatia 6:4, untumiwa Pauli ayobile ifindu fibili ifi fibaghile ukututula ukukindilila ukuya balusekelo. (Belenga.) Ikyakwanda, tukulondiwa ukumpa Yehova ifindu fyitu ifinunu. Linga tukumpa ifindu fyitu ifinunu, tukuya pakuya balusekelo (Mat. 22:36-38) Ikyabubili, tutikulondiwa ukwifwanikisya na bangi. Kisita kwinong’onela isi tukufwanisya ukubomba panongwa ya muno ifindu fiyilile pa bumi bwitu, ifimanyilo pamo amaluso, tukulondiwa ukundaghisya Yehova. Fyosa ifi tuli nafyo twambilile ukufuma kumyake. Munjila iyingi, linga abangi bali namaluso mubufumusi tukulondiwa ukuhoboka panongwa yakuti abene bikubombela amaluso agha ukuti bampaleghe Yehova, komma ukuti bihobosyeghe bene. M’malo mwakulimbana nabo, tukulondiwa ukumanyila ukufuma kumyabo.

³ Mu nkhani iyi, tukuya pakuketa isi sibaghile ukututula linga tuwile amaka panongwa yakuti tukabaghila ukubomba nyingi pakumbombela Yehova. Tukuya pakumanyila kangi muno tubaghile ukubombela kanunu ikyabupe kilikyosa iki tuli nakyo na isi tubaghile ukumanyilako ku fifwanikisyo fya bangi.

4. Ngimba findu fiki fibaghile ukutuwisya amaka? Yoba ikifwanikisyo.

⁴ Twe bamo tukabaghila ukubomba syosa isi tukulonda pakumbombela Yehova panongwa yakuti tukangele pamo tukubina kangi isi sikutupangisya ukuti tuweghe amaka. Isi syo isi Carol alyaghene nasyo. Umwene afumusyagha kuno kwalondiwagha ubutuli. Pakabalilo aka, ali nabamanyili ba Baibolo abakufwana 35 kangi abatulile bingi ukwiyipa kwa Yehova nukosiwa. Carol iyipagha fiyo mubufumusi. Bo akabalilo kakindilepo, umwene abinile kangi alyandile ukwitughala itolo pakaya. Carol atile, “Nsimenye ukuti panongwa yakuti ndimbine ndikufwanisya ukubomba isi abangi bikubomba, loli nguketa ukuti ngaya nulwitiko ulwamaka bo abene. Ngabaghila ukubomba kilikyosa iki ngulonda, kangi isi sikumbangisya ukuwa amaka.” Carol ikulonda ukubomba syosa isi abaghile ukufwanisya pakumbombela Yehova. Ukuyoba ubwanaloli, isi syakukasya fiyo. Tuli nulusubilo losa ukuti Kyala witu wakisa ikunndaghisya Carol panongwa yakwiyipa kwake.

5. (a) Ngimba tukulondiwa ukukumbukila isyafiki linga tukutoliwa ukubomba nyingi? (b) Ukufwana nifithuzi, ngimba unkamu ikubomba bulebule syosa isi abaghile ukufwanisya pakumbombela Yehova?

⁵ Linga utubalilo tumo mukuwa amaka panongwa yakutoliwa ukubomba ifindu fimo, amwilalusye ukuti, ‘Ngimba Yehova ikulonda ifindu fiki kumyangu?’ Yehova ikulonda ukuti mubombeghe isi mubaghile ukufwanisya ukufwana na muno ifindu fiyilile kumyinu. Inong’onela isi: Umulumbu uwa mfyinja fya mma 80 ikuwa amaka panongwa yakuti akabaghila ukubomba nyingi mubufumusi bo muno abombelagha mfyinja fya mma 40. Umwene ikwinong’ona ukuti nalinga ukuti ikubomba nyingi loli ikuketa ukuti sitikunhobosya Yehova. Loli ngimba isi syabwanaloli? Inong’onela isi. Linga umulumbu uyu abombagha nyingi mfyinja fya mma 40 kangi ikukindilila ukubomba nyingi mfyinja fya mma 80 umwene akaleka ukubomba nyingi. Linga tukuketa ukuti tutikubomba nyingi pakumbombela Yehova tukulondiwa ukukumbukila ukuti Yehova yo ikusala isi tubaghile ukufwanisya ukubomba. Linga tukubomba syosa isi tubaghile ukufwanisya, Yehova ikuya pakuyoba ukuti: “Ubombile kanunu”​—Fwanikisya na Matai 25:20-23.

6. Ngimba tubaghile ukumanyilako isyafiki kwa Maria?

⁶ Tubaghile ukuya balusekelo linga tukwinong’onela isi tubaghile ukufwanisya mmalo mwa ifi tukabaghila ukufwanisya. Inong’onela isya mulumbu Maria uyu ikubina ububine ubu bukuntolesya ukuti angabombagha nyingi mubufumusi. Pakwanda umwene atamiwagha naminong’ono kangi iketagha ukuti akaya wakulondiwa. Loli alinong’onile isya mulumbu uwa nkipanga uyu yope abinagha kangi Maria aketile ukuti ikulonda ukuntula. Maria atile, “Napangile imbatiko iyakuti tufumusyeghe nawe pa foni nu kulemba abakalata. Linga utubalilo tosa tukubombela pampene, nahobokagha fiyo linga mfikile pakaya kangi naketagha ukuti nuntulile umulumbu wangu.” Nanuswe tubaghile ukukindilila ukuya balusekelo linga tukwinong’onela isi tubaghile ukubomba ukukinda isi tukabaghila ukufwanisya. Loli bule linga tubaghile ukubomba nyingi pamo tukubomba kanunu pakumbombela Yehova?

7. Ngimba bulongosi buliku ubwakutula ubu untumiwa Peteri abapele Abakristu?

⁷ Mwakalata wake uwakwanda untumiwa Peteri abakasisye abakamu ukuti babombeleghe ifyabupe namaluso agha bali nagho ukuti babatuleghe Abakristu abinabo. Peteri atile: “Ifikungilwa ifi mwambilile fiyeghe fya kubombelanila bo abalindilili abanunu, aba fikungilwa fya Kyala ifyakukindanakindana.” (1 Pet. 4:10) Tubombeghe syosa isi tubaghile ukufwanisya kisita kwilumbusya ukuti abangi babaghile ukuya  nubufi pamo ukuwa amaka. Linga tutikubomba syosa isi tubaghile ukufwanisya panongwa yakuti tukwilumbusya muno abangi bikuya pakwinong’onela, tukabaghila ukumpa Yehova ifindu ifinunu.

8. Ukufwana na 1 Bakorinti 4:6, 7, nongwa yafiki tutikulondiwa ukwibona panongwa ya fyabupe fyitu?

⁸ Tubombeleghe kanunu ifyabupe fyitu, loli tukulondiwa ukuya maso ukuti tuleke ukwibona. (Belenga 1 Bakorinti 4:6, 7.) Mwakifwanikisyo, mubaghile ukuya namaluso pakwandisya ukumanyila Ibaibolo nu mundu pakaya. Mubombelegha ikyabupe kyinu. Loli mukulondiwa ukukumbukila ukuti kukaya kununu ukwitufya. Tufwanikisye ukuti mwalululu mwaghenepo ni findu ifyakuhobosya fiyo mubufumusi kangi mwalyandile ukumanyila Ibaibolo nu mundu. Mukulonda ukubabula abakamu na balumbu ba ku kagulu kinu ka bubombeli isi mwalyaghene nasyo. Linga mwaghene na bakamu na balumbu ba ku kagulu kinu, umulumbu yumo ikubabula ukuti ayabile amagazini. Umwene ayabile amagazini; loli umwe mwalyandisye ukumanyila Ibaibolo. Ngimba mukuya pakubomba isyafiki? Musimenye ukuti abakamu na balumbu ba ku kagulu kinu bikuya pakukasiwa na isi mwalyaghene nasyo, loli mubaghile ukughulila tasi ukuti musalinganie akabalilo akangi isi mwalyaghene nasyo ukuti mungankalalisyagha umulumbu uyu ayabile amagazini. Ukubomba isi kubaghile ukuya kununu fiyo. Mulimosa muno sibaghile ukuyila, mungalekagha ukumanyila Ibaibolo na bandu. Muli nikyabupe iki mukulondiwa ukukibombela.

9. Ngimba tukulondiwa ukubombela bulebule ifyabupe fyitu?

⁹ Tukulondiwa ukukumbuka ukuti amaluso agha tuli nagho fyabupe fyakufuma kwa Kyala. Tukulondiwa ukubombela amaluso agha ukuti tubakasyeghe abakamu na balumbu nkipanga komma ukuti twihobosyeghe twibene. (Filip. 2:3) Linga tukubombela amaka na maluso ghitu ukubomba ubwighane bwa Kyala, tukuya pakuya balusekelo komma panongwa yakuti tukubomba nyingi ukukinda abangi loli panongwa yakuti tukubombela ifyabupe fyitu ukuti tunhobosyeghe Yehova.

10. Nongwa yafiki tutikulondiwa ukwifwanikisya nabangi?

¹⁰ Linga tukaya maso, tubaghile ukufwanikisya ifi tukubomba kanunu na ifi abangi bikutoliwa ukubomba. Mwakifwanikisyo, unkamu abaghile ukuya namaluso pakuyoba inkhani sya mu Baibolo. Agha maluso ghake. Loli umwene abaghile ukwinong’ona ukuti ikuyoba kanunu ukukinda unkamu uyungi uyu akaya namaluso pakuyoba inkhani. Loli lumo unkamu uyu ikwambilila abahesya, ikubamanyisya kanunu abanake pamo ikwiyipa fiyo mubufumusi. Tukundaghisya fiyo  panongwa yakuti tuli na bakamu na balumbu bingi abamaluso aba bikubombela kanunu ifyabupe fyabo pakumbombela Yehova nu kubatula abangi.

11. Nongwa yafiki tukulondiwa ukughelaghela ukunkonga Yesu?

¹¹ Nalinga ukuti tutikulondiwa ukwifwanikisya na bangi, loli tubaghile ukumanyila nyingi ukufuma ku babombi ba Yehova abangi. Ikifwanikisyo ikinunu iki tubaghile ukumanyilako kyo kya Yesu. Nalinga ukuti tukaya bagholofu bo Yesu loli tubaghile ukumanyila nyingi ukufuma ku tuyilo twake utununu ni findu ifinunu ifi abombile. (1 Pet. 2:21) Linga tukubomba syosa isi tubaghile ukufwanisya mwakunkonga Yesu, tubaghile ukuya babombi banunu ba Yehova nukuya bafumusi banunu.

12-13. Ngimba tubaghile ukumanyilako isyafiki ku Mwalafyale Davidi?

¹² Mu Baibolo, muli fifwanikisyo fya banyambala na bakikulu abasubiliwa aba tubaghile ukubakonga nalinga ukuti bali basitabugholofu. (Hib. 6:12) Inong’onela isya Mwalafyale Davidi, uyu Yehova alinjobile ukuti “umundu uyu indumbula yangu yikyelile nawe.” (Imbo. 13:22) Loli Davidi ali nsitabugholofu. Kangi abombile ubutulanongwa ubunywamu. Nalinga syali bo ulu umwene kifwanikisyo kinunu kumyitu. Nongwa yafiki? Panongwa yakuti bo bikumfunda, akali nififukwa ifyakwihobokela. M’malo mwake, apilikile ubulongosi ubwamaka ubu balimpele kangi ikisa kyalinkolile panongwa ya isi abombile. Ifyakukongapo fyake, Yehova alinhobokile.​—Sal. 51:3, 4, 10-12.

¹³ Tubaghile ukumanyilako kwa Davidi mwakwilalusya amalalusyo agha: ‘Ngimba linga bambele ubulongosi ngubomba bulebule? Ngimba ngumanya isi nsobile, pamo ngwihobokela? Ngimba ngubopela pakubalonga abangi? Ngimba ngughelaghela ukuti ningabombagha kangi isi nasobile?’ Mubaghile ukwilalusya amalalusyo aghakufwana itolo bo mukubelenga inkhani isya banyambala na bakikulu abasubiliwa aba mu Baibolo. Ngimba abene balimbanagha ni ndamyo isyakufwana itolo na isi mukwaghana nasyo? Ngimba tuyilo tununu tuliku utu banangisyagha? Pafifukwa ifi amwilalusye ukuti: ‘Ngimba mbaghile ukuya bulebule nsubiliwa bo umbombi wa Yehova uyu?’

14. Ngimba tubaghile ukukasiwa bulebule ukufuma ku isi Abakristu abinitu bikubomba?

¹⁴ Tubaghile ukukasiwa ukufuma ku isi Abakristu abinitu bikubomba, abakilumyana na bakusi. Mwakifwanikisyo, ngimba mubaghile ukwinong’onela isya mundu yumo nkipanga uyu ikwifimbilisya ku ndamyo—pamo abangali  ababibi, ikususiwa na ba mumbumba pamo ikubina? Ngimba mukuketa utuyilo utununu mu mundu uyu utu mubaghile ukukonga? Mwakukonga ikifwanikisyo kyake ikinunu, mubaghile ukukonga injila inunu isi sibaghile ukubatula ukwifimbilisya ku ndamyo isi mukwaghana nasyo. Tukundaghisya panongwa ya bakamu na balumbu aba bikutunangisya ikifwanikisyo ikinunu ikya kuya nulwitiko.​—Hib. 13:7; Yak. 1:2, 3.

15. Ngimba bulongosi buliku ubu untumiwa Pauli atupele ubu bubaghile ukututula ukuti tukindilileghe ukuhoboka ukumbombela Yehova?

¹⁵ Ukuti tukusye ulutengano nu bumobwene nkipanga, aliwesa ikulondiwa ukubomba inunu. Inong’onela isya Bakristu bakunyuma. Abene bali nifyabupe ifyakukindanakindana nu bubombeli. (1 Kor. 12:4, 7-11) Loli isi sikabapangisyagha ukuti balimbaneghe pamo batapukane. M’malo mwake, Pauli abakasisye ukuti “bayengeghe umbili wa Kristu.” Pauli abalembile Abakristu ba ku Efesi ukuti: “Ukufwana nububombeli ubu kapeghiwe akayabo kamo kamo ifi fikughupelela umbili ukukula nukwiyenga ndughano.” (Ef. 4:1-3, 11, 12, 16) Bosa aba babombile isi Pauli abombile, bakusisye ulutengano nu bumobwene—utuyilo utu abakamu na balumbu bikunangisya nkipanga amasiku agha.

16. Ngimba tukulondiwa ukukindilila ukubomba isyafiki? (Bahiburi 6:10)

¹⁶ Tutikulondiwa ukwifwanikisya na bangi. M’malo mwake, tumanyileghe ukufuma ku kifwanikisyo kya Yesu nukughelaghela ukukonga utuyilo twake. Tukasiweghe ni fifwanikisyo ifinunu ifya mu Baibolo kangi nifya Bakristu abasubiliwa aba masiku agha. Bo tukukindilila ukubomba fyosa ifi tubaghile ukufwanisya, tuyeghe nulusubilo losa ukuti Yehova “akaya nsitabugholofu ukuti ibweghe imbombo syinu.” (Belenga Bahiburi 6:10.) Tukindilileghe ukuya balusekelo pakumbombela Yehova, nukumanya ukuti umwene ikuhoboka linga ikuketa tukubomba syosa isi tubaghile ukufwanisya ukuti tunhobosyeghe.