1. Ngimba tukulondiwa ukuya nubwighane buliku bwa mwambepo?

 PANONGWA yakuti tuli Bakristu banaloli, tunganile fiyo Yehova. Tukulonda ukubomba kilikyosa iki tubaghile ukufwanisya ukuti tumbombeleghe Yehova. Loli ukuti tufwanisye ukubomba isi, tukulondiwa ukuya nubwighane bwa mwambepo, bo ukunangisya utuyilo utununu utwa Bukristu, ukumanyila amaluso nu kuketa muno tubaghile ukubatulila abangi. *

2. Nongwa yafiki tukulondiwa ukuya nubwighane bwa mwambepo nu kwiyipa ukuti tubufwanisye?

² Nongwa yafiki tukulondiwa ukukindilila ukukula mwambepo? Ikifukwa ikinywamu kyo kyakuti tukulonda ukunhobosya Tata witu wakumwanya. Yehova ikuhoboka fiyo linga ikuketa ukuti tukubombela amaluso ghitu pakumbombela. Mwakongelelapo, tukulondiwa ukukindilila ukukula mwambepo ukuti tubatuleghe abakamu na balumbu bitu. (1 Tes. 4:9, 10) Kisita kwinong’onela ifyinja ifi twikele mbwanaloli, twesa tukulondiwa ukukindilila ukukula mwambepo. Isagha tukete muno tubaghile ukubombela isi.

3. Ukufwana na 1 Timoti 4:12-16, ngimba untumiwa Pauli alinkasisye Timoti ukubomba isyafiki?

³ Pakabalilo aka untumiwa Pauli andembelagha kalata wakwanda Timoti, uwakilumyana uyu bo abikiwe kale ukuya nkulumba wakipanga. Loli Pauli alinkasisye ukuti akindilileghe ukuya mbombi nnunu wa Yehova. (Belenga 1 Timoti 4:12-16.) Bo mukwinong’onela amasyu gha Pauli, mukuya pakuketa ukuti  alondagha ukuti Timoti akindilile ukukula mwambepo munjila sibili: mwakunangisya utuyilo utununu utwa Bukristu, bo ulughano, ulwitiko nubununu kangi mwakukusya amaluso bo ukubelenga pakilundilo, ukubakasya abangi nu kubamanyisya. Tukuya pakuyobesania ikifwanikisyo kya Timoti ukuti tunangisye muno ukuya nubwighane bwa mwambepo kubaghile ukututulila ukuya babombi banunu ba Yehova. Tukuya pakuyobesania kangi injila simo isi tubaghile ukukonga ukuti tubombeghe nyingi mubufumusi.

4. Ukufwana na Bafilipi 2:19-22, ngimba findu fiki fyalimpangisye Timoti ukuya mbombi nnunu wa Yehova?

⁴ Ngimba findu fiki fyalimpangisye Timoti ukuya mbombi nnunu wa Yehova? Twali tuyilo twake utununu utwa Bukristu. (Belenga Bafilipi 2:19-22.) Ukufwana na isi Pauli alingenie isyakufwana na Timoti, tubaghile ukuketa ukuti ali wakwiyisya, nsubiliwa kangi wakwiyipa. Umwene anangisyagha ulughano kangi abapasikisyagha fiyo abakamu na balumbu. Yonongwa yake Pauli alinganile fiyo Timoti kangi akakabile ukumpa ububombeli ubwakutamya. (1 Kor. 4:17) Mwakufwana itolo, Yehova ikuya pakutunangisya ulughano kangi tukuya pakuya bakulondiwa nkipanga linga tukunangisya utuyilo utu ikuhoboka nato.—Sal. 25:9; 138:6.

5. (a) Ngimba mubaghile ukubomba bulebule ukuti mumanye utuyilo utwa Bukristu utu mukulonda ukukusya? (b) Bo muno pikunangisyila pakithuzi, ngimba umulumbu ikufwanisya bulebule ubwighane bwake ukuti abanangisyeghe ikisa abangi?

⁵ Muyeghe nubwighane ubu mubaghile ukubufwanisya. Mwiputeghe nu kwinong’onela ikighaba iki mukulonda ukufwanisya pa bumi bwinu. Amwinong’onele isya kayilo kamo aka mukulonda ukukusya. Mwakifwanikisyo, mubaghile ukusala ukuti munangisyeghe ikisa pamo ukwiyipa ukuti mubatuleghe abakamu na balumbu. Pamo mubaghile ukughela ukuti muyeghe palutengano na bangi nu kubahobokela. Mubaghile ukuketa ukuti kwakutula fiyo ukundalusya ummanyani winu ukuti ababule utuyilo utu mukulondiwa ukukusya.​—Mbu. 27:6.

6. Ngimba tubaghile ukwiyipa bulebule ukuti tufwanisye ubwighane ubwakuti tukusye akayilo kamo?

⁶ Mwiyipeghe ukuti mufwanisye ubwighane bwinu. Ngimba mubaghile ukubomba bulebule isi? Injila yimo ko kwinong’onela kanunu isya kayilo aka mukulonda ukukusya. Tufwanikisye ukuti mukulonda ukuti mubahobokeleghe abangi. Mubaghile ukwanda ukubelenga nu kwinong’onela ififwanikisyo fya  mu Baibolo ifya bandu aba babahobokile abangi na aba batoliwe ukubahobokela abangi. Inong’onela ikifwanikisyo kya Yesu. Umwene abahobokelagha abangi ukufuma pasi pandumbula. (Luka 7:47, 48) Kangi akinong’onelagha fiyo isi basobagha loli isi bafwanisyagha ukubomba. Loli Abafarisai ba nkabalilo ka Yesu “babasyokelagha abangi.” (Luka 18:9) Linga mwinong’onilepo pa fifwanikisyo ifi, mwilalusyeghe ukuti: ‘Ngimba nguketa isyafiki mu bangi? Ngimba tuyilo twabo tuliku utu ngulondiwa ukwinong’onela?’ Linga mukutamiwa ukunhobokela umundu yumo, amughele ukulemba utuyilo twingi utununu utwa mundu uyo. Ukufuma apo mwilalusye ukuti: ‘Ngimba Yesu ikunketa bulebule umundu uyu? Ngimba abaghile ukunhobokela?’ Linga tukubomba isi, sibaghile ukututula ukuchenja aminong’ono ghitu. Pakwanda, tukulondiwa ukwiyipa ukuti tunhobokele umundu yumo uyu atukalalisye. Loli linga tukukindilila ukwiyipa, tubaghile ukufwanisya ukunhobokela.

7. Ukufwana na Isya Mbupingamu 22:29, ngimba mo munjila siliku isi Yehova ikubombela ababombi aba bali namaluso amasiku agha?

⁷ Ubwighane ubungi ubu mukulondiwa ukuya nabo ko kumanyila amaluso aghakulondiwa. Inong’onela ubwingi bwa babombi aba bikulondiwa ukuti bayenge amalo gha pa Beteli, Amalo Aghakupangilapo Ingomano Inywamu ni Nyumba sya Bunyafyale. Ababombi bingi aba bikubombela amaluso ghabo mwakubomba pampene na bakamu na balumbu aba bayimenye kanunu imbombo iyakuyenga. Bo muno pikunangisyila pakithuzi, abakamu na balumbu bikumanyila muno babaghile ukuyila namaluso ukuti batule pambombo iyakutendekesya Amalo Aghakupangilapo Ingomano Inywamu ni Nyumba sya Bunyafyale. Ukubomba munjila bo isi, Yehova Kyala, “Umwalafyale uyu aliko bwila na bwila,” na Kristu Yesu, “Umwalafyale wa banyafyale . . . ,” bikubabombesyela ababombi bamaluso aba ukubomba imbombo iyakulondiwa fiyo. (1 Tim. 1:17; 6:15; belenga Isya Mbupingamu 22:29.) Tukulondiwa ukwiyipa fiyo nu kubombela amaluso ghitu ukuti tumpale Yehova komma twibene.​—Yoh. 8:54.

8. Ngimba mubaghile ukubomba isyafiki ukuti mumanyile amaluso ghamo?

⁸ Musaleghe amaluso agha mukulonda ukumanyila. Ngimba maluso ghaliku agha mukulonda ukumanyila? Mubalalusye abakulumba binu bakipanga pamo uwakwendela idela ukuti ababule amaluso agha bikwinong’ona ukuti mubaghile ukukusya. Mwakifwanikisyo linga bababulile ukuti mukulondiwa ukukusya amaluso aghakuyoba nu kumanyisya, mubasumeghe ukuti babatule muno mubaghile ukubombela. Ukufuma apo, mwiyipeghe ukuti mukusye amaluso agha. Ngimba mubaghile ukubomba bulebule isi?

9. Ngimba mubaghile ukwiyipa bulebule ukuti mufwanisye ubwighane bwinu ubwakumanyila amaluso?

⁹ Mwiyipeghe ukuti mufwanisye ubwighane bwinu. Tufwanikisye ukuti mukulonda ukukusya amaluso ghinu pakumanyisya. Mukulondiwa ukumanyila ibulosha ilyakuti Mwiyipeghe pa Kubelenga nu Kumanyisya. Linga babapele ikighaba kimo ukuti mukayobe pangomano isya nkati mwa sabata, mubaghile ukunsuma unkamu uyu ali namaluso ukuti apilikisye muno mukwakuyobela bo mukali ukwakuyoba pangomano nukubapa amasakisyo agha mukulondiwa ukukonga. Mwitendekesyeghe inkhani yinu bo akabalilo kakali ukuti abandu baketeghe ukuti mukwiyipa kangi babasubileghe.​—Mbu. 21:5; 2 Kor. 8:22.

10. Yoba ikifwanikisyo ikya muno tubaghile ukubombela linga tukulonda ukukindilila ukukusya amaluso.

¹⁰ Ngimba mubaghile ukubomba isyafiki linga ubwighane bwinu ubwakuti muye namaluso pa kindu kimo kukafu ukubufwanisya? Mungawagha amaka. Unkamu Garry atamiwagha fiyo ukubelenga. Umwene ikukumbuka muno isoni syalinkolile bo ikughela ukubelenga mwakukwesya amasyu pangomano. Loli akindilile ukwiyipa  ukuti abombeghe kanunu. Umwene ayobile ukuti panongwa ya isi amanyile ukufuma ku bakamu aba bali na maluso na m’mabuku ghitu, syalintulile ukuti ayobeghe kanunu inkhani sya mu Baibolo ku Nyumba sya Bunyafyale na pangomano isya kighaba nisya dela.

11. Mwakufwana itolo na Timoti, ngimba findu fiki fibaghile ukututula ukuti tubombeghe nyingi pakumbombela Yehova?

¹¹ Ngimba Timoti afumusyagha nu kumanyisya kanunu? Ibaibolo litikuyoba. Loli kisita kukayika Timoti abombagha kanunu ububombeli bwake panongwa yakuti akongagha ubulongosi bwa Pauli. (2 Tim. 3:10) Mwakufwana itolo, linga tukukusya amaluso ghitu, tukuya pakufwanisya ukubomba nyingi pakumbombela Yehova.

12. Ngimba musayiwe bulebule panongwa yabutuli bwa bangi?

¹² Twesa tukusayiwa nubutuli bwa bangi. Linga tuli nkipatala, tukundaghisya fiyo linga abakulumba bakipanga aba bali mu Komiti iyi Yikuyobesania na Bakipatala pamo aba bali mu Magulu agha Ghikubendela Ababine bisile pakutuketa. Linga twaghene ni ndamyo pa bumi bwitu, tukundaghisya fiyo linga abakulumba bikuya nakabalilo akakutupilikisya nukutukasya. Linga tukulonda ubutuli bwa muno tubaghile ukumanyilila Ibaibolo nu mundu, tukuhoboka fiyo linga umpayiniya uyu ali namaluso itike ukuti tubuke nawe ku mmanyili wa Baibolo nukuyobapo amasakisyo ghake. Abakamu na balumbu bosa bikuhoboka fiyo ukututula. Tubaghile ukuya balusekelo linga tukwiyipa ukuti tubatule abakamu na balumbu bitu. Yesu atile: “Nukupa nukwambilila kusayiwa ku kupa.” (Imbo. 20:35) Linga mukulonda ukubomba nyingi pakumbombela Yehova, mu njila isyakukindanakindana, ngimba findu fiki fibaghile ukubatula ukubomba bo ulu?

13. Linga tuli nubwighane bumo, ngimba tukulondiwa ukukumbukila isyafiki?

¹³ Muyeghe maso ukuti mungayagha nubwighane ubu bukaya bwakulondiwa. Mwakifwanikisyo mubaghile ukwinong’ona ukuti, ‘Ngulonda ukubomba nyingi nkipanga.’ Loli kubaghile ukuya kukafu ukumanya muno mubaghile ukufwanisyila ubwighane bwinu kangi mubaghile ukuketa ukuti sikabaghila ukubombiwa ukumanya linga mufwanisye. Yonongwa yake mukulondiwa ukuya nubwighane ubununu. Lumo mubaghile ukulemba ubwighane ubu mukulonda na muno mubaghile ukubufwanisyila.

14. Nongwa yafiki tukulondiwa ukuya naminong’ono amanunu linga tukusala ifyakubomba?

 ¹⁴ Kangi tukulondiwa ukuya naminong’ono amanunu linga tukusala ifyakubomba. Nongwa yafiki? Panongwa yakuti tukabaghila ukumanya isi tubaghile ukwaghana nasyo. Mwakifwanikisyo: Untumiwa Pauli atulilepo ukwandisya ikipanga ikipya mu tawuni ya Tesalonike. Kangi kisita kukayika umwene ali nubwighane ubwakwikala kula nu kukindilila ukubatula Abakristu abapya. Loli abakususya balondagha ukuti Pauli asokemo mu tawuni yila. (Imbo. 17:1-5, 10) Linga Pauli akindililagha ukwikala kula ayagha pakubika ubumi bwa bakamu na balumbu pangozi. Loli Pauli akalekile ukubatula. M’malo mwake, achenjile ukufwana na muno ifindu fyayilile. Bo akabalilo kakindilepo, alintumile Timoti ukuti akabatuleghe Abakristu abapya aba ku Tesalonike ukuti baye nulwitiko lwamaka. (1 Tes. 3:1-3) Abakristu ba ku Tesalonike bahobwike fiyo panongwa yakuti Timoti iyipagha ukubuka kulikosa kuno kwalondiwagha ubutuli.

15. Ngimba ubwighane bwitu bubaghile ukuchenja bulebule pa bumi bwitu? Yoba ikifwanikisyo.

¹⁵ Tubaghile ukumanyilako ukufuma ku isi Pauli alyaghene nasyo ku Tesalonike. Tubaghile ukuya nubwighane bumo, loli panongwa ya muno ifindu fiyilile pa bumi bwitu tubaghile ukutoliwa ukubufwanisya. (Ndumbi. 9:11) Linga mo muno siyilile, muyeghe nubwighane ubwakukindanakindana ubu mubaghile ukufwanisya. Syo isi imbumba ya Ted na Hiedi yabombile. Panongwa ya bubine abene balekile ububombeli bwa pa Beteli. Loli panongwa ya lughano lwabo kwa Yehova, syabakasisye ukuti basyaghe injila isi sibaghile ukubatula ukuti babombeghe nyingi mubufumusi. Ikyakwanda, abene balyandile ubupayiniya bwa kabalilo kosa. Ukufuma apo, balyandile ubupayiniya bwa padela kangi Ted antulagha uwakwendela idela. Kangi ifyinja ifi fikulondiwa ukuti umundu aye wakwendela idela fyachenjile. Ted na Hiedi basyaghenie ukuti bakangele kangi bakabaghile ukufwanisya ububombeli ubu. Nalinga ukuti bakahobwike, basyaghenie ukuti babaghile ukumbombela Yehova munjila isingi. Ted atile, “Twamanyile ukuti tubaghile ukumbombela Yehova munjila nyingi.”

16. Ngimba tubaghile ukumanyilapo isyafiki pa Bagalatia 6:4?

¹⁶ Tukabaghila ukukanisya kilikyosa iki kibaghile ukubombiwa pa bumi bwitu. Yonongwa yake tutikulondiwa ukwinong’ona ukuti tuli bakulondiwa kwa Yehova panongwa ya bubombeli nukuleka ukwifwanikisya na bangi. Hiedi atile, “Mutikuya pakuya balusekelo linga mukwifwanikisya na bangi.” (Belenga Bagalatia 6:4.) Kubaghile ukuya kwakulondiwa ukuketa injila isi tubaghile ukubatula abangi nukumbombela Yehova. *

17. Ngimba mubaghile ukubomba isyafiki ukuti muye nulusako lwa bubombeli?

 ¹⁷ Mukuya pakufwanisya ukubomba nyingi pakumbombela Yehova linga mukwikala ubumi ubusita kulonda ifindu fingi. Muyeghe nubwighane ubu mubaghile ukubufwanisya. Mwakifwanikisyo linga ubwighane bwinu bwakuya mpayiniya wa kabalilo kosa, ngimba lino mubaghile ukubomba ubupayiniya bwa kabalilo umwesi ghulighosa? Linga ubwighane bwinu bwakuya ntuli wakipanga, ngimba mubaghile ukwiyipa mubufumusi nu kubendela ababine na bakangale aba nkipanga kyinu? Isi mukubomba lino, sibaghile ukubatula ukuti muye nulusako ulwa bubombeli nkyeni. Mukindilileghe ukubomba syosa isi mubaghile ukufwanisya mububombeli bulibosa ubu mupeliwe.​—Rom. 12:11.

18. Ukufwana ni kithuzi, ngimba tukumanyilapo isyafiki ku kifwanikisyo kya Beverley?

¹⁸ Ubukangale bukabaghila ukututolesya ukufwanisya ifindu fya mwambepo. Inong’onela ikifwanikisyo kya mulumbu Beverley uyu ali ni fyinja 75. Umwene abinagha fiyo, isi syantolesyagha ukwenda. Loli alondagha ukubomba nyingi pakubakolela abandu pakukumbukila inifwa ya Yesu. Yonongwa yake ali nubwighane ubu abaghile ukufwanisya. Bo Beverley afwanisye ubwighane ubu ali nabo ubwakubakolela abandu, ali walusekelo fiyo. Ukwiyipa kwake kwabapangisye abangi ukuti bope biyipeghe fiyo mubufumusi. Yehova ikuketa imbombo isi abakamu na balumbu bitu abakangale bikubomba ukuya syakulondiwa fiyo, nalinga ukuti bikwaghana ni ndamyo.​—Sal. 71:17, 18.

19. Ngimba bwighane buliku bwa mwambepo ubu tubaghile ukuya nabo?

¹⁹ Muyeghe nubwighane ubu mubaghile ukufwanisya. Mukusyeghe utuyilo utu tukunhobosya Yehova. Mumanyileghe amaluso agha ghabaghile ukubatula ukuti mubombe nyingi mu gulu lya Yehova. Musyagheghe injila isi mubaghile ukubatulila abakamu na balumbu. * Mwakufwana na Timoti, nubutuli bwa Yehova “abandu bosa bakubone ukuti kukula.”​—1 Tim. 4:15.