AMINONG’ONO ghabaghile ukufwana itolo nubusito ubunywamu ubu buli mundumbula yitu. (Mbu. 12:25) Ngimba mutamiwepo naminong’ono pa bumi bwinu? Ngimba mwinong’onilepo ukuti mukabaghila ukwifimbilisya? Linga mo muno siyilile, mukaya mwibene. Twebingi ba uswe tukutamiwa naminong’ono munjila isyakukindanakindana. Mwakifwanikisyo, bamo bikumpwelelela uwa mu mbumba yabo uyu ikubina, bamo umundu uyu balinganile afwile kangi bamo bikutamiwa panongwa ya ngozi sya kipeliwa. Loli ngimba findu fiki fibaghile ukututula ukuti twifimbilisye linga tukutamiwa naminong’ono? *

Tubaghile ukumanyila nyingi isyakufwana nukwifimbilisya linga tukutamiwa naminong’ono mwakwinong’onela ikifwanikisyo kya Mwalafyale Davidi. Umwene alyaghene ni ndamyo nyingi fiyo pa bumi bwake, kangi utubalilo tumo ubumi bwake bwayagha pangozi. (1 Samu. 17:34, 35; 18:10, 11) Ngimba findu fiki fyalintulile Davidi ukuti ifimbilisye pakabalilo aka atamiwagha naminong’ono? Ngimba tubaghile ukukonga bulebule ikifwanikisyo kyake?

Davidi alyaghene ni ndamyo nyingi pakabalilo kamokene. Inong’onela isi syabombiwe pakabalilo aka ambopagha Umwalafyale Sauli uyu alondagha ukungogha. Pakabalilo aka Davidi na bandu bake baghomokelagha kumyabo nkaya ka Zikelagi, balyaghile ukuti abalughu beghile ikyuma kyabo, bakosisye utwaya twabo kangi basyeghile imbumba syabo nukubuka nasyo kubutumwa. Ngimba Davidi abombile bulebule? “Davidi palikimo na bandu aba ali nabo balinkukuta inguto ingulumba nukulila, babuyile ghabamalikile amaka ghakulilila.” Ukufuma apo, Davidi atamiwe fiyo naminong’ono panongwa yakuti abandu balondagha ‘pakuntunya na mabwe.’ (1 Samu. 30:1-6) Davidi alyaghene ni ndamyo sitatu inywamu pakabalilo kamokene. Imbumba yake yali pangozi, abandu balondagha ukungogha kangi Umwalafyale Sauli akindilile ukumfwima. Yonongwa yake umwene atamiwagha fiyo naminong’ono.

Ngimba Davidi abombile isyafiki bo isi sibombiwe? Mwanakalinga “alinkwikakisya mmaka gha Yehova Kyala wake.” Ngimba Davidi ayagha pakubomba bulebule isi? Tusimenye ukuti umwene iputagha kwa Yehova akabalilo kosa ukuti antule kangi inong’onelagha muno alintulile kunyuma. (1 Samu. 17:37; Sal. 18:2, 6) Davidi asimenye ukuti ikulondiwa ukunsuma Yehova ukuti antule. Bo Davidi ambilile ubulongosi ubwakufuma kwa Yehova, umwene abombilepo simo mwanakalinga. Ifyakukongapo fyake, umwene na banyambala bake basayiwe na Yehova kangi basipokile imbumba syabo nukwegha ikyuma kyabo. (1 Samu. 30:7-9, 18, 19) Ngimba muketile ifindu fitatu ifi Davidi abombagha? Umwene iputagha kwa Yehova ukuti antule, inong’onelagha muno Yehova alintulile kunyuma kangi apilikilagha ubulongosi bwa Yehova. Ngimba tubaghile ukunkonga bulebule Davidi? Inong’onela injila sitatu isi.

1. Twiputeghe. Akabalilo kalikosa aka tukutamiwa naminong’ono, tubaghile ukwiputa kwa Yehova ukusuma ubutuli namahala. Isi sibaghile ukututula ukuti twipilikeghe kanunu linga tukumbula syosa isi tukwiyaya nasyo. Pamo tubaghile ukuyoba mbupimba nukwiputa mundumbula ukufwana ni ndamyo isi twaghene nasyo pakabalilo ako. Linga akabalilo kosa tukunsuma Yehova ukuti atutule, tukunangisya ukuti tukunsubila ukufwana na muno Davidi abombelagha. Umwene atile “Yehova yo mbako yangu yo ilinga lyangu, kangi yo mpoki wangu. Kyala wangu,  uyu yo mbako yangu ya kwibililamo.” (Sal. 18:2) Ngimba ulwiputo lukutula naloli? Umulumbu yumo umpayiniya uyu ingamu yake yo Kahlia atile: “Linga niputile, nguya nulutengano. Ulwiputo lukundula ukwinong’onela nyingi isya Yehova nukunsubila fiyo umwene.” Ukuyoba ubwanaloli, ulwiputo kyabupe kyapamwanya fiyo ikyakufuma kwa Yehova iki kikututula ukuti twifimbilisyeghe linga tukutamiwa naminong’ono.

2. Twinong’oneleghe. Linga mukwinong’onela isi mwalyaghene nasyo kunyuma, ngimba mubaghile ukwinong’onela indamyo isi mwafwanisye ukwifimbilisya panongwa ya butuli bwa Yehova? Linga tukwinong’onela muno Yehova atutulile uswe na babombi bake abakunyuma, tukuya nulutengano lwa mundumbula kangi tukunsubila fiyo Yehova. (Sal. 18:17-19) Joshua uyu nkulumba wa kipanga atile: “Inyiputo syangu nyingi syalyamuliwe. Isi syalindulile ukukumbukila akabalilo aka nalinsumile Yehova ikindu kimo kangi umwene alimbele iki nalondagha.” Bwanaloli ukuti linga tukwinong’onela muno Yehova atutulile kunyuma, tukuya namaka agha tukulondiwa ukuti tukindilileghe ukwifimbilisya linga tukutamiwa naminong’ono.

3. Tubombengepo simo. Bo tukali ukusala ikyakubomba pa nkhani yimo, tukulondiwa ukufufuza M’masyu gha Kyala ukuti tubwaghe ubulongosi ubwakutula. (Sal. 19:7, 11) Bingi bikuketa ukuti linga bikufufuza ilemba limo, bikupilikisya kanunu muno ivesi ilya mu lemba ili likubatulila pa bumi bwabo. Unkulumba yumo wa kipanga uyu ingamu yake yo Jarrod atile: “Ukufufuza kundulile ukumanyila nyingi isi sili pivesi nukupilikisya kanunu isi Yehova ikumbula. Isi sikundula ukuti nsubileghe isi ngubelenga nukufwanisya ukukonga ubulongosi bwake.” Linga tukufufuza ubulongosi bwa Yehova mu Malemba nukubukonga, kukuya pakuya kupepe ukulwagha ulutengano nulusekelo linga tukutamiwa naminong’ono.

Davidi aketile ukuti linga ikulonda ukwifimbilisya ukuti angatamiwagha naminong’ono, alondiwagha ubutuli bwa Yehova. Umwene andaghisyagha fiyo ubutuli bwa Yehova yonongwa yake ayobile ukuti: “Mbutuli bwake Kyala wangu, mbaghile ukulunduka pilinga. Kyala uyu ikumfwika une amaka ukuti ngwamba.” (Sal. 18:29, 32) Lumo tubaghile ukwinong’ona ukuti indamyo isi tukwaghana nasyo nywamu fiyo kangi tukabaghila ukumalana nasyo pamo ukwifimbilisya. Loli nubutuli bwa Yehova, tubaghile ukwifimbilisya ku ndamyo yiliyosa inywamu. Bwanaloli ukuti linga tukwiputa kwa Yehova ukuti atutule, tukwinong’onela syosa isi atubombile, nukukonga ubulongosi bwake, tubaghile ukuya nulusubilo losa ukuti umwene ikuya pakutupa amaka namahala ukuti twifimbilisyeghe linga tukutamiwa naminong’ono.