Ukufinga ulufingo “nkhani nywamu fiyo, iyi umundu ikulondiwa ukuyoba ikindu kimo, utubalilo twingi lukunnjoba Kyala . . . ukuya nketi.” Lubaghile ukuyobiwa pakanwa pamo ukulemba.

Bamo babaghile ukwinong’ona ukuti kubibi ukufinga ulufingo panongwa yakuti Yesu atile: “Komma ukulapa . . . Ilisyu lyinu ilya ‘Ena’ ayeghe yo ena, ilya ‘Mma,’ ayeghe yo mma, aghakongelelapo pali agha ghikufuma ku mbibi.” (Mat. 5:33-37) Bwanaloli ukuti Yesu asimenye ukuti indaghilo isi Kyala abepele Abaisraeli ukwendela mwa Mose syayobagha isya kufinga ulufingo kangi ababombi ba Kyala balondiwagha ukufinga. (Bwa. 14:22, 23; Kuso. 22:10, 11) Kangi asimenye ukuti Yehova yope ikufinga ulufingo. (Hib. 6:13-17) Yonongwa yake Yesu akasanusyagha ukuti tutikulondiwa ukufinga ulufingo. M’malo mwake, abasokile abandu ukuti bangafingagha pa findu ifi fikaya nimbombo. Utubalilo tosa tukulondiwa ukubomba isi tufingile panongwa yakuti syo isi Yehova ikulonda.

Loli ngimba mukulondiwa ukubomba isyafiki linga babasumile ukuti mufinge ulufingo? Ikyakwanda, muketesyeghe ukuti mukubomba isi mufingile. Linga mukaya nu buketi, kubaghile ukuya kanunu ukuti mungafingagha. Amasyu gha Kyala ghikutusoka ukuti: “Kununupo ukusita kufinga ulufingo ukukinda ukuti we mundu ufinge ulufingo kangi usite nukulukonga.” (Ndumbi. 5:5) Ukufuma apo, mwinong’oneleghe ifundo sya M’malemba isi sikukolelana nu kufinga ulufingo nu kubomba ifindu mwakukolelana namabyebye ghinu agha ghamanyisiwe kanunu. Ngimba syo fundo simo siliku isya M’malemba?

Ulufingo lumo lukukolelana nubwighane bwa Kyala. Mwakifwanikisyo, Abaketi ba Yehova bikufinga ulufingo linga bikwingila mbweghi. Ulufingo ulu lwakulondiwa fiyo. Pamaso pa Kyala na baketi, unnyambala nu nkikulu bikufinga ukuti bikuya pakughanana, pakufighililana nu kughindikana kangi bikuya pakubomba isi, “pakabalilo aka bosa bali nu bumi.” (Loli abandu bamo aba bali pabweghi batikuyoba amasyu agha linga bikweghana loli bikufinga kwa Kyala.) Ukufuma apo, bikuya ndume nu nkasi wake kangi bikulondiwa ukukindilila ukuya pabweghi ubumi bwabo bosa. (Bwa. 2:24; 1 Kor. 7:39) Ulufingo lwa mbweghi lwakulondiwa fiyo kangi lukukolelana nubwighane bwa Kyala.

Ulufingo lumo lutikukolelana nubwighane bwa Kyala. Unkristu wanaloli atikulondiwa ukufinga ulufingo ulu lukukolelana nikisu pamo ukubomba ifindu ifi fibaghile ukumpangisya ukuti angayagha nulwitiko mwa Kyala. Ukubomba isi kukabaghila ukukolelana ni ndaghilo sya Kyala. Abakristu batikulondiwa ukuya “kulubafu lwa kisu,” yonongwa yake tutikulondiwa ukweghapo  ikighaba pa fyakubombiwa fya nkisu.—Yoh. 15:19; Yes. 2:4; Yak. 1:27.

Tukulondiwa ukufinga ulufingo ukufwana namabyebye ghitu. Utubalilo tumo, tukulondiwa ukwinong’onela kanunu isya bulongosi bwa Yesu ubwakuti “ifya Kaisari fyo mumpeghe Kaisari, ifya Kyala mumpeghe Kyala” bo tukali ukufinga ulufingo.—Luka 20:25.

Tufwanikisye ukuti Unkristu ikulonda ukuya mwenekaya nkisu kimo pamo ukuya na pasipoti kangi ikumanya ukuti ikulondiwa ukufinga ulufingo. Linga nkisu ikyo ukufinga ulufingo kutikukolelana ni ndaghilo sya Kyala, umwene abaghile ukuleka linga amabyebye ghake aghakumanyisiwa ni fundo sya mu Baibolo ghatikuya pakumwitikisya ukubomba isi. Loli lumo iboma libaghile ukumwitikisya ukufinga ulufingo ukufwana namabyebye ghake.

Ukufinga ulufingo kukulondiwa ukukolelana ni fundo iyi yikwaghiwa pa Baroma 13:1, iyi yikuti: “Umundu wesa ilambikeghe ku balaghili aba bali pamwanya pamyake.” Yonongwa yake kukaya kubibi ku Nkristu ukufinga linga ikulonda ukubomba ikindu kimo iki Kyala ikulonda ukuti umwene abombeghe.

Kwakulondiwa fiyo ukupilikila amabyebye ghinu aghakumanyisiwa ni Baibolo linga babasumile ukuti mubombe ikindu kimo mwakufinga ulufingo. Abandu ba ku Roma bafingagha ulufingo nu lubo lwabo kangi isi syasanusyagha kyala wabwite ukunangisya ukuti umundu nsubiliwa. Abagiriki binusyagha ikiboko mmwanya linga bikufinga ulufingo. Abene basimenye ukuti ghalipo amaka ghamo agha ghikumanya isi sikuyobiwa nu kubombiwa kangi ukuti abandu bakulondiwa.

Bwanaloli ukuti umbombi wa Yehova atikulondiwa ukufinga ulufingo pa findu ifi fikukolelana nukwiputa kwa butungulu. Loli ngimba mubaghile ukubomba isyafiki linga bababulile mu khoti ukuti mubike ikiboko pa Baibolo nu kufinga ukuti mukuya pakuyoba ubwanaloli? Linga mo siyilile, mubaghile ukusala ukubomba isi panongwa yakuti Amalemba ghikuyoba isya bandu abasubiliwa aba bope bafingagha ulufingo mwakubombela amajesika. (Bwa. 24:2, 3, 9; 47:29-31) Tukulondiwa ukukumbuka ukuti linga tufingile ulufingo ulu, tukufinga kwa Kyala ukuti tukuya pakuyoba ubwanaloli. Tukulondiwa ukwitendekesya ukuti tukuya pakwamula ilalusyo lililyosa mbwanaloli.

Panongwa yakuti tukuketa ukuti ubumanyani bwitu na Yehova bwakulondiwa fiyo, tukulondiwa ukwiputa nukwinong’onelapo kanunu isya lufingo lulilosa ulu tukufinga, nukuketa ukuti lutikuya pakonanga amabyebye ghitu pamo ifundo sya mu Baibolo. Linga musalile ukufinga ulufingo, mukulondiwa ukulufwanisya.​—1 Pet. 2:12.