1. Nongwa yafiki tukwamula pangomano?

 NONGWA yafiki tukubuka kungomano syakipanga? Ikindu ikyakulondiwa fiyo, ko kumpala Yehova. (Sal. 26:12; 111:1) Tukubuka kangi kungomano ukuti tukakasanie anabalilo akapalapala aka. (1 Tes. 5:11) Linga twinwisye ikiboko nukwamulapo, ko kuti tukubomba fyosa fibili.

2. Ngimba lusako luliku ulu tuli nalo linga tuli pangomano?

² Sabata aliwesa, tukuya nulusako ulwakwamulapo pangomano. Mwakifwanikisyo, kubumalilo bwa basabata, tubaghile ukweghapo ikighaba pakabalilo aka tukumanyila ikimanyilo kya Ingasya ya Ndindilili. Pangomano sya nkati mwasabata, tubaghile ukwamulapo pakighaba ikyakuti Ifi Tumanyile, Ukumanyila Ibaibolo kwa Pakipanga na pafighaba ifingi ifi tukuyobesania.

3. Ngimba findu fiki fibaghile ukutupangisya ukuti kuyeghe kukafu ukwamulapo pangomano, kangi ilemba lya Bahiburi 10:24, 25 libaghile ukututula bulebule?

³ Twesa tukulonda ukumpala Yehova nukubakasya Abakristu abinitu. Loli kubaghile ukuya kukafu ukwamulapo. Tubaghile ukutila ukuti twamulepo pamo tubaghile ukulonda ukuti twamulepo loli bakabaghila ukutusala bo muno tukulondela. Ngimba findu fiki fibaghile ukututula? Tukumwagha ansala ukufuma mwakalata uyu untumiwa Pauli abalembile Abakristu ba ku Hiburi. Bo bikuyobesania ukulondiwa kwa kubungana pampene, umwene ayobile ukuti twinong’oneleghe fiyo isya “kukasania.” (Belenga Bahiburi 10:24, 25.) Linga tusyaghenie ukuti abangi babaghile ukukasiwa namuno tukunangisyila  ulwitiko lwitu mwakwamulapo mbupimba, tutikuya pakutila ukwamulapo. Kangi linga batikutusala kabilikabili, tubaghile ukuya balusekelo ukuti abangi nkipanga bikuya pakuya nulusako ulwakwamulapo.—1 Pet. 3:8.

4. Ngimba fundo sitatu siliku isi tukuya pakuyobesania munkhani iyi?

⁴ Munkhani iyi, ikyakwanda tukuya pakuyobesania muno tubaghile ukubakasyila abangi nkipanga ikinandi iki aba bikwamulapo balimo banandi. Ukufuma apo, tukuya pakuyobesania muno tubaghile ukubakasyila abangi nkipanga ikinywamu muno bingi bikwinusya amaboko nukwamulapo. Pabumalilo, tukuya pakuyobesania isi tukulondiwa ukubomba ukuti ifundo isi tukwamula sibakasyeghe abangi.

5. Ngimba mubaghile ukukasania bulebule linga mukubungana banandi?

⁵ Mu kipanga ikinandi pamo akagulu, mutikwaghiwa abandu bingi abakwamulapo aba uyu ikulongosya abaghile ukubasala. Utubalilo twingi abaghile ukughulila panandi ukuti umundu yumo amule. Ingomano sibaghile ukuya syakukatasya kangi tukabaghila ukukasiwa. Ngimba mubaghile ukubomba isyafiki? Mwiyipeghe ukwinusya ikiboko mwakwandisania ukuti mwamulepo. Linga mukubomba isi, mubaghile ukubakasya abangi ukuti bope bamulengepo mwakwandisania.

6-7. Ngimba mubaghile ukubomba bulebule ukuti muleke ukutila linga mukulonda ukwamulapo?

⁶ Ngimba mukulondiwa ukubomba isyafiki linga mukutila ukwamulapo? Bingi bikwipilika bo ulu. Loli ukuti mubakasye abakamu na balumbu binu, mubaghile ukufufuza injila isi sibaghile ukubatula ukuti muleke ukutila. Ngimba mubaghile ukubomba bulebule isi?

⁷ Mubaghile ukuketa ukuti kwakutula fiyo ukufufuza amasakisyo ghamo agha ghali mu Ingasya ya Ndindilili iyi yasokile mwalululu. b Mwakifwanikisyo, mwitendekesyeghe kanunu. (Mbu. 21:5) Linga muyimenye kanunu inkhani iyi mukumanyila, kukuya pakuya kupepe fiyo ukuti mwamulepo. Kangi mwamuleghe mbupimba. (Mbu. 15:23; 17:27) Ukwamula mbupimba kubaghile ukubatula ukuti mungayagha nubogha. Ukwamula mbupimba kutikuya namasyu amatali kangi kubaghile ukuya kupepe ku bakamu na balumbu ukupilikisya kanunu isi mukwamula ukukinda ukwamula amasyu amatali agha ghali nifundo nyingi. Linga mukwamula mbupimba kangi mmasyu ghinu naghinu, mukuya pakunangisya ukuti mwitendekisye kanunu kangi muyipilikisye kanunu inkhani iyi mukumanyila.

8. Ngimba Yehova ikuketa bulebule ukwiyipa kwitu?

⁸ Loli bule linga mukughelaghela ukukonga amasakisyo agha loli mukundilila ukutila ukwamulapo? Muyeghe nulusubilo ukuti Yehova ikuya pakundaghisya ukwiyipa kwinu ukuti mubombe isi mubaghile ukufwanisya. (Luka 21:1-4) Yehova atikutubula ukuti tubombeghe nyingi isi tukabaghila ukufwanisya. (Filip. 4:5) Mughelegheleghe ukubomba isi mubaghile ukufwanisya, muyeghe nubwighane kangi muyeghe bololo. Pakwanda, ubwighane bwinu bubaghile ukuya bwakuti mwamulepo mbupimba.

9. Nongwa yafiki kubaghile ukuya kukafu ukwamulapo ku kipanga iki abafumusi bingi?

⁹ Linga ikipanga kyinu kili nabafumusi bingi, pabaghile ukuya kangi indamyo iyingi. Lumo abakamu na balumbu bingi bikwiyipa  ukwamulapo isi sikupangisya ukuti utubalilo twingi bangabasalagha linga mwinwisye ikiboko. Mwakifwanikisyo, Danielle utubalilo tosa ikuhoboka ukwamulapo pangomano. c Umwene ikuketa ukuti kighaba kyakwiputa, njila yakubakasyila abangi kangi ikukasya ulwitiko lwake nifundo sya mu Baibolo. Loli bo asamile ku kipanga ikinywamu, bakansalagha utubalilo twingi kangi bakansalagha nalinga kamokene mpaka pabumalilo bwa ngomano. Umwene atile, “Nasulumaniagha fiyo, naketagha ukuti ndikuya pakuya nulusako ulungi. Linga sikubombiwa mwakwandisania, ubaghile ukwanda ukwinong’ona ukuti ikubombela dala ukuti angakusalagha.”

10. Ngimba tubaghile ukubomba bulebule ukuti tuyeghe nulusako ulwakwamulapo?

¹⁰ Ngimba mwipilikemo bo muno Danielle ipilikilagha? Linga mo siyilile, lumo mubaghile ukuwa amaka nukwanda ukupilikisya itolo pangomano. Loli mungalekagha, mukulondiwa ukughelaghela ukuti mwamulengepo. Ngimba mukulondiwa ukubomba isyafiki? Mubaghile ukuketa ukuti kwakutula fiyo linga mwitendekisye ifundo nyingi isyakuti mukamulepo. Linga batikubasala kubwandilo bwa kimanyilo, mubaghile ukuya nulusako ulwakwamulapo kubumalilo. Bo mukwitendekesya Ingasya ya Ndindilili, mwinong’oneleghe muno ipalagilafu yiliyosa yikukolelana numutu wa nkhani. Linga mubombile isi, mukuya pakuya nifundo inunu isyakuti mwamulepo pakimanyilo kyosa. Mwakongelelapo, mubaghile ukwitendekesya ukuti mukamule ifundo inywamu isya mu Baibolo isi sikuya ngafu ukusilingania. (1 Kor. 2:10) Nongwa yafiki? Panongwa yakuti abandu abakwamulapo babaghile ukuya banandi pakighaba iki. Bule linga mukukonga amasakisyo agha loli mukuketa ukuti pangomano nyingi mutikuya nulusako ulwakwamulapo? Mubaghile ukuyobesania na uyu ikulongosya bo ingomano sikali ukwanda nukumbula ilalusyo ili mukulonda ukwamula.

11. Ngimba ilemba lya Bafilipi 2:4 likutukasya ukubomba isyafiki?

¹¹ Belenga Bafilipi 2:4. Ukwendela mu Baibolo, untumiwa Pauli abakasisye Abakristu ukuti binong’oneleghe ifyakulondiwa ifya bangi. Ngimba tubaghile ukukonga bulebule  ubulongosi ubu linga tuli pangomano? Mwakukumbuka ukuti abangi bope bikulonda ukweghapo ikighaba.

12. Ngimba njila yiliku inunu iyakubakasyila abangi pangomano? (Keta kangi ikithuzi.)

¹² Inong’onela isi. Linga mukuyobesania nabamanyani binu, ngimba mubaghile ukuyoba nyingi nukuleka ukubapa ulusako abininu? Hayi. Mubaghile ukulonda ukuti bope bayobengepo. Mwakufwana itolo, linga tuli pangomano, tukulondiwa ukubapa abangi ulusako ulwakwamulapo. Ukuyoba ubwanaloli, injila yimo inunu iyakubakasyila abakamu na balumbu bitu ko kubapa ulusako ulwakuti banangisye ulwitiko lwabo mwakwamulapo. (1 Kor. 10:24) Isagha tuyobesanie muno tubaghile ukubombela isi.

13. Ngimba tubaghile ukubomba bulebule ukuti bamo bamulengepo?

¹³ Ikifukwa kimo iki tukulondiwa ukwamula mbupimba kyo kyakuti abangi bope bamulengepo. Abakulumba bakipanga na bafumusi aba bamenye nyingi bikulondiwa ukunangisya ikifwanikisyo ikinunu pankhani iyi. Nalinga tukulonda ukwamula mbupimba, tukulondiwa ukwepuka ukuti tungayobagha ifundo nyingi. Linga mwamwile ifundo syosa mu palagilafu, sitikuya pakusyala nasimo isyakuti abangi bamulepo. Mwakifwanikisyo, mu palagilafu iyi, muli amasakisyo mabili agha ko kwamula mbupimba nukuleka ukuyoba ifundo nyingi. Linga yomwe batalile ukubasala ukuti mwamule, mwamuleghe ifundo yimoyene pa fundo isi silipo.

14. Ngimba findu fiki fibaghile ukututula ukusala akabalilo akakuti twimikeghe amaboko? (Keta kangi ikithuzi.)

¹⁴ Mubombeleghe amahala linga mukulonda ukwamulapo. Linga tukwimika amaboko utubalilo twingi, tubaghile ukumpangisya uyu ikulongosya ukuti atusaleghe twibene mwakwandisania nalinga ukuti abangi bakapeliwapo ulusako. Isi sibaghile ukubawisya abangi ukwimika amaboko.—Ndumbi. 3:7.

15. (a) Ngimba tukulondiwa ukubomba bulebule linga bakatusala ukuti twamulepo? (b) Ngimba aba bikulongosya babaghile ukunangisya bulebule ukuti bikubinong’onela bosa? (Keta ibokosi ilyakuti “ Linga Mukulongosya Pangomano.”)

 ¹⁵ Linga abafumusi bingi bikwimika amaboko pakabalilo ka kimanyilo kimo, lumo tukabaghila ukwamula fiyo bo muno twalondelagha. Utubalilo tumo uyu ikulongosya akabaghila ukutusala ukuti twamule. Loli tungawagha amaka linga bakatusalapo.—Ndumbi. 7:9.

16. Ngimba tubaghile ukubakasya bulebule aba bamwilepo?

¹⁶ Linga mukabaghila ukwamulapo, mupilikisyeghe fiyo linga abininu bikwamula kangi pabumalilo bwa ngomano mubandaghisyeghe panongwa yakwamulapo. Abakamu na balumbu binu bope babaghile ukwamula mwakukasya bo muno mwayagha pakwamulila. (Mbu. 10:21) Ukubandaghisya abangi yope njila yakubakasya.

17. (a) Ngimba abapapi babaghile ukubatula bulebule abanabo ukuti bitendekesyeghe kanunu ukwamulapo? (b) Ukufwana ni vidiyo, ngimba njila siliku 4 isyakwitendekesya? (Keta kangi amasyu ghapasi.)

¹⁷ Ngimba njila siliku isingi isyakukasania pangomano? Linga muli bapapi, mubatuleghe abaninu ukuti bamuleghe kanunu ukufwana ni sayizi yabo. (Mat. 21:16) Utubalilo tumo, inkhani simo bo indamyo sya mbweghi pamo utuyilo utununu, tukuyobesania pangomano.  Kangi sikunangisya ukuti ipalagilafu yimoyene pamo sibili abana babaghile ukwamulapo. Mubatuleghe abaninu ukupilikisya inongwa iyi bakabaghila ukubasala. Ukubalingania isi kubaghile ukubatula ukuti bangawagha amaka linga babasalile abangi ukuti bamulepo mmalo mwabo.—1 Tim. 6:18. d

18. Ngimba tubaghile ukwepuka bulebule ukuyoba fiyo isya uswe linga tukwamulapo? (Mbupi. 27:2)

¹⁸ Twesa tubaghile ukwitendekesya ifundo isyakukasya isyakuti tukamulepo isi sikumpala Yehova nukubakasya Abakristu abinitu. (Mbu. 25:11) Nalinga ukuti tubaghile ukulingania isi syatubonekile pabumi bwitu, loli tukulondiwa ukwepuka ukuyoba fiyo isya uswe. (Belenga Isya Mbupingamu 27:2; 2 Kor. 10:18) Mmalo mwake, twinong’oneleghe fiyo isya Yehova, Amasyu ghake na bandu bake. (Ubuset. 4:11) Loli linga ilalusyo ili lili mupalagilafu likulonda ukuti tulinganie isi syatubonekile, momuno tukulondiwa ukubombela. Ikifwanikisyo pankhani iyi syo isi sili mupalagilafu iyakukongapo.

19. (a) Ngimba findu fiki fibaghile ukubombiwa linga tukubinong’onela abangi pangomano? (Baroma 1:11, 12) (b) Ngimba mukundaghisya bulebule pankhani yakwamulapo pangomano?

¹⁹ Nalinga ukuti sikayapo indaghilo pankhani yakwamula, loli twesa tukukasiwa ukuti isi tukwamulapo siyeghe syakukasya. Isi sikusanusya ukuti utubalilo twingi twamuleghe panandi. Pamo sibaghile ukusanusya ukuti twikutisiweghe nulusako ulu tupeliwe ukuti twamulepo nukuhoboka linga abangi bikwamulapo. Linga tukubinong’onela abinitu pangomano syakipanga, twesa tubaghile ukukasiwa linga “tukusubisania.”—Belenga Baroma 1:11, 12.