1-2. Ngimba tukulondiwa ukubomba isyafiki bo tukughulila ikisu ikipya?

 TUKUNDAGHISYA fiyo ulufingo lwa Yehova ulwa kuyoba isya kisu ikipya. (2 Pet. 3:13) Nalinga ukuti tutikumanya akabalilo aka Kyala ikuya pakutwala ikisu ikipya, loli tuli nubuketi ubwakuti isi sikuya pakubombiwa mwalululu.—Mat. 24:32-34, 36; Imbo. 1:7.

² Kisita kwinong’onela akabalilo aka twikele mbwanaloli, lino twesa tukulondiwa ukukusya fiyo ulusubilo lwitu mu lufingo ulu. Nongwa yafiki? Panongwa yakuti utubalilo tumo ulusubilo lwitu lukabaghila ukuya lwamaka. Kangi untumiwa Pauli ayobile isya kusita kuya nulusubilo uku, ukuya “butulanongwa ubu bukutumilila.” (Hib. 12:1) Ukuti tukindilileghe ukuya nulusubilo lwamaka, tukulondiwa ukwinong’onela ifindu ifi fikunangisya ukuti ikisu ikipya kilipipi.—Hib. 11:1.

3. Ngimba tukuya pakuyobesania isyafiki munkhani iyi?

³ Munkhani iyi, tukuya pakuyobesania injila sitatu isi sibaghile ukututula ukukusya ulusubilo lwitu mu lufingo lwa Yehova ulwa kuyoba isya kisu ikipya: (1) mwakwinong’onela isya kitabulilo, (2) mwakwinong’onela isya maka gha Yehova, kangi (3) mwakubomba ifindu fya mwambepo. Ukufuma apo tukuya pakuyobesania muno amasyu agha Yehova ayobile kwa Habakuku ghabaghile ukukusyila ulusubilo lwitu. Ikyakwanda, isagha tuyobesanie ifyakubombiwa fimo ifi tukwaghana nafyo amasiku agha ifi tukulondiwa ukuya nulusubilo lwamaka pakuyoba isya kisu ikipya ikya nkyeni.

 IFYAKUBOMBIWA IFI TUKULONDIWA UKUYA NULUSUBILO LWAMAKA

4. Ngimba fyakusala filiku ifi tukulondiwa ulusubilo lwamaka?

⁴ Isiku lililyosa, tukusala ifyakubomba ifi tukulondiwa ukuya nulusubilo lwamaka. Mwakifwanikisyo, tukusala ifyakubomba pankhani ya aba babaghile ukuya bamanyani bitu, ifyakusangalusya, ifimanyilo, umundu uyu tukulonda ukweghana nawe, abana, nimbombo yakumbili. Tubaghile ukwilalusya ukuti, ‘Ngimba ifyakusala fyangu fikunangisya ukuti ikisu iki kikuya pakumalika mwalululu kangi Kyala ikuya pakutwala ikisu ikipya? Pamo ngimba ifyakusala fyangu fikukolelana nifya aba batikusubila ukuti bisakwikala kwa bwila na bwila?’ (Mat. 6:19, 20; Luka 12:16 21) Tukuya pakusala kanunu linga tukukusya ulusubilo lwitu mwakuketa ukuti ikisu ikipya kilipipi.

5-6. Nongwa yafiki tukulondiwa ukuya nulusubilo lwamaka linga twaghene nindamyo? Lingania.

⁵ Tukwaghana kangi nindamyo isi tukulondiwa ukuya nulusubilo lwamaka. Lumo tubaghile ukufwimiwa, ukubina fiyo pamo ukwaghana nifindu ifi fibaghile ukutuwisya amaka. Pabwandilo tubaghile ukwinong’ona ukuti tukufwanisya ukwifimbilisya kundamyo isi twaghene nasyo. Loli linga indamyo isi sikindilile, tukulondiwa ukuya nulusubilo lwamaka ukuti twifimbilisye nukukindilila ukumbombela Yehova mwalusekelo.—Rom. 12:12; 1 Pet. 1:6, 7.

⁶ Linga twaghene nindamyo, tubaghile ukwinong’ona ukuti ikisu ikipya iki Yehova afingile kitikuya pakwisa. Ngimba isi sikusanusya ukuti ulusubilo lwitu lukaya lwamaka? Hayi. Inong’onela ikifwanikisyo iki. Pakabalilo kakutalala fiyo, tubaghile ukwinong’ona ukuti akabalilo kakupya katikuya pakwisa. Mwakufwana itolo, linga tuwile amaka, tubaghile ukwinong’ona ukuti ikisu ikipya kitikuya pakwisa. Linga tuli nulusubilo lwamaka, tukumanya ukuti ulufingo lwa Yehova lukuya pakufwanisiwa. (Sal. 94:3, 14, 15; Hib. 6:17-19) Ukuya nulusubilo bo ulu, kukuya pakututula ukuti ukumwiputa Yehova kuyeghe pamalo aghakwanda pabumi bwitu.

7. Ngimba tutikulondiwa ukuya naminong’ono ghaliku?

⁷ Tukulondiwa kangi ukuya nulusubilo lwamaka pambombo yakufumusya. Abandu bingi aba tukubafumukisya bikwinong’ona ukuti “amasyu amanunu” aghakuyoba isya kisu ikipya ikya Yehova, ghakabaghila ukufwanisiwa. (Mat. 24:14; Eze. 33:32) Tukulondiwa ukuya maso fiyo, tungakayikilagha isi Yehova ikutumanyisya bo muno abene bikubombela. Ukuti twepuke kuminong’ono bo agha, tukulondiwa ukukusya fiyo ulusubilo lwitu. Isagha tuyobesanie injila sitatu isya muno tubaghile ukubombela.

UKWINONG’ONELA ISYA KITABULILO

8-9. Ngimba ukwinong’onela isya kitabulilo kubaghile ukukusya bulebule ulusubilo lwitu?

⁸ Injila yimo iyi tubaghile ukukusya ulusubilo lwitu ko kwinong’onela isya kitabulilo. Ikitabulilo kikututula ukumanya ukuti ulufingo lwa Kyala ulwakuyoba isya kisu ikipya lukuya pakufwanisiwa. Linga tukwinong’onela kanunu inongwa iyi twalyambilile ikitabulilo na isi sikongelelapo, ulusubilo lwitu ulwakuyoba isya lufingo lwa kisu ikipya lukuya lwamaka kangi tukumanya ukuti lukuya pakufwanisiwa. Nongwa yafiki tukuyoba bo ulu?

⁹ Ngimba ikitabulilo kikongelelapo isyafiki? Yehova alintumile umwanake unganiwa, ukufuma kumwanya ukuti asapapiwe pakisu ukuya mundu ngolofu. Bo ali pakisu, Yesu ifimbilisyagha kundamyo. Umwene atamiwe nukufwa inifwa yakubaba fiyo. Yehova atupele ikyabupe ikya pamwanya fiyo. Tata witu walughano Kyala akayagha pakumwitikisya  umwanake ukutamiwa nukufwa ukuti tuye nubumi ubununu ubupimba itolo. (Yoh. 3:16; 1 Pet. 1:18, 19) Panongwa yakuti Yehova atupele umwanake ukuti atutule, umwene ikuya pakututula ukuti tusikale nkisu ikipya kwa bwila na bwila.

UKWINONG’ONELA ISYA MAKA GHA YEHOVA

10. Ukufwana na Baefesi 3:20, ngimba Yehova ikufwanisya ukubomba isyafiki?

¹⁰ Injila yabubili iyi yibaghile ukututula ukukusya ulusubilo lwitu ko kwinong’onela amaka gha Yehova. Umwene ali namaka aghakufwanisya ikindu kilikyosa iki afingile. Abandu bingi amasiku agha bikwinong’ona ukuti ubumi bwa bwila na bwila nkisu ikipya butisakuyako. Loli Yehova akabalilo kosa ikufwanisya isi afingile. Umwene ikufwanisya ukubomba isi panongwa yakuti yo Kyala wamaka ghosa. (Jobu 42:2; Mar. 10:27) Yonongwa yake tutikuswigha linga umwene ikufinga kumyitu ifindu ifyakuhobosya.—Belenga Baefesi 3:20.

11. Yoba ikifwanikisyo kimo ukufwana na isi Kyala afingile. (Keta ibokosi ilyakuti “ Ulufingo Lumo ulu Lufwanisiwe.”)

¹¹ Inong’onela ifindu fimo ifi Yehova afingile ku babombi bake bakunyuma ifi fyabonekagha ukuti fikabaghile ukufwanisiwa. Umwene alinsimikisyile Abrahamu na Sara ukuti bayagha pakuya numwana unnyambala bo bakangele. (Bwa. 17:15-17) Kangi alimbulile Abrahamu ukuti abanduyungu lwake bisakwambililagha ikisu kya Kanani. Bo ifyinja fingi fikindilepo pakabalilo aka Abaisraeli bali kubutumwa ku Egiputi, syabonekagha ukuti ulufingo ulu lukayagha pakufwanisiwa. Loli lwafwanisiwe. Bo akabalilo kakindilepo, Yehova atile Elizabeti isakuya numwana nalinga ukuti akangele. Umwene alimbulile kangi Maria, uyu akalyaghenemo nu nnyambala, ukuti ayagha pakupapa umwana unnyambala, uyu ayagha pakufwanisya syosa isi afingile kwa fyinja fingi ifi fikindile ukufuma mungunda wa Edeni.—Bwa. 3:15

12. Ngimba ilemba lya Yoswa 23:14 na Yesaya 55:10, 11 ghikutusimikisyila isyakifi isyakufwana namaka gha Yehova?

¹² Linga tukwinong’onela isya lufingo losa ulu Yehova afingile namuno afwanisisyile, tukumanya ukuti umwene alinamaka fiyo. Kangi isi sikututula ukuti ulusubilo lwitu luyeghe lwamaka. (Belenga Yoswa 23:14; Yesaya 55:10, 11.) Sikututula kangi ukwitendekesya ukubatula abangi ukuti bamanye ukuti isi Kyala afingile sikuya pakufwanisiwa naloli. Yehova ikuyoba isyakufwana nikisu ikipya nikyakumwanya ukuti: “Amasyu agha gho masubiliwa kangi gha naloli.”—Ubuset. 21:1, 5.

TUBOMBEGHE IFINDU FYA MWAMBEPO

13. Ngimba ingomano sya pakipanga sibaghile ukukusya bulebule ulusubilo lwitu? Lingania.

¹³ Injila yabutatu iyi yibaghile ukututula ukukusya ulusubilo lwitu kokubomba ifindu fya mwambepo. Mwakifwanikisyo, inong’onela muno tukusayiwa ningomano sya pakipanga. Anna, b uyu ambombile Yehova kwa fyinja fingi atile: “Ingomano sikundula fiyo ukuti ulusubilo lwangu luyeghe lwamaka. Nalinga ukuti uwakuyoba inkhani atikuyoba kanunu loli ngupilikisya fiyo nukubelenga mu Baibolo ifundo simo kangi isi sikundula ukuya nulusubilo lwamaka.” Ulusubilo lwitu lukuya kangi lwamaka linga tukupilikisya isi abakamu na balumbu bikwamula pangomano.—Rom. 1:11, 12; 10:17.

14. Ngimba tukukasiwa bulebule linga tukwingila mubufumusi?

¹⁴ Tubaghile ukukusya kangi ulusubilo lwitu linga tukwingila mubufumusi. (Hib. 10:23) Barbara, uyu ambombile Yehova kwa fyinja ifyakukinda 70, atile: “Ngwingila mubufumusi  akabalilo kosa ukuti ngusye ulusubilo lwangu. Linga ngubabula abandu isyakufwana nulufingo ulununu lwa Yehova, ulusubilo lwangu lukuya lwamaka fiyo.”

15. Ngimba ukumanyila Ibaibolo kwa patwibene kubaghile ukukusya bulebule ulusubilo lwitu? (Keta kangi ikithuzi.)

¹⁵ Kilipo ikindu ikingi iki kibaghile ukukusya ulusubilo lwitu: ukumanyila Ibaibolo kwa patwibene. Susan atile sikuntula fiyo linga ikukonga imbatiko yakumanyila amasyu gha Kyala. Kangi atile: “Pasabata, ngwitendekesya Ingasya ya Ndindilili iyi tukwisakumanyila sabata wakukongapo. Pamande na Pakibili, ngwitendekesya ingomano sya nkati mwasabata. Amasiku agha ghasyele ngubomba imbombo syangu isyakumbili.” Panongwa yakuti akabalilo kosa ikukonga imbatiko yake, Susan ikukindilila ukukusya ulusubilo lwake. Irene uyu ambombile Yehova kwa fyinja fingi ku ofesi yitu inywamu, ikuketa ukuti ikukasiwa fiyo linga ikubelenga isyakufwana nubusololi bwa mu Baibolo. Umwene atile, “Nguhoboka fiyo linga nguketa ubusololi bwa Yehova bukufwanisiwa.”

“LUKUYA PAKUFWANISIWA NALOLI”

16. Nongwa yafiki amasyu gha Yehova agha ayobile kwa Habakuku ghabaghile ukututula amasiku agha? (Hib. 10:36, 37)

¹⁶ Ababombi ba Yehova bamo baghulile kwakabalilo akatali ukumalika kwafindu ifi bibi nkisu iki. Abandu bamo bikwinong’ona ukuti ubumalikilo bwa kisu iki bukukabila ukwisa. Loli Yehova asimenye kanunu muno ababombi bake bikwipilikila. Kangi alinsimikisyile unsololi Habakuku ukuti: “Usimbe isya kisetuka kikiki, namanga akabalilo kakali ukwisa apa sisakubombiwagha sisisi. Loli akabalilo kali pipi, kangi isi nikukunangisya uwe sisakubombiwagha naloli. Sibaghile ukuboneka ukuti sikabile muye myee itolo, naloli sikuya pakwisa, sitisakukabila mma.” (Haba. 2:3) Ngimba isi Kyala ayobile syayagha pakuntula Habakuku mwene? Pamo ngimba amasyu ghake ghabaghile ukututula nanuswe amasiku agha? Yehova alimbulile untumiwa Pauli ukuti abakasye namasyu  agha Abakristu bosa aba bikukindilila ukughulila ikisu ikipya. (Belenga Bahiburi 10:36, 37.) Yonongwa yake tuli nulusubilo ukuti nalinga ulufingo lwa Yehova ulwakutupoka lukuboneka ukuti lukukabila ukufwanisiwa, “lukuya pakufwanisiwa naloli. Lutikuya pakukabila.”

17. Ngimba umulumbu yumo akongile bulebule ubulongosi ubu Yehova alimpele Habakuku?

¹⁷ Ababombi bingi ba Yehova bikukonga ubulongosi bwake ubwakuti “muye myee itolo,” nalinga ukuti bamo baghulile kwa fyinja fingi. Mwakifwanikisyo, Louise alyandile ukumbombela Yehova mu 1939. Umwene atile: “Pakabalilo kala, ninong’onagha ukuti Armagedoni yayagha pakwisa bo ngali ukumalisya isukulu. Loli isi sikabombiwe. Ifyinja fingi ifi fikindilepo, ukubelenga inkhani sya mu Baibolo isya bandu aba baghulilagha ukuti Yehova afwanisye isi afingile, kundulile ukuti ngindilileghe ukughulila isi Yehova afingile ukuti afwanisye. Ngubelenga inkhani sya Nowa, Abrahamu, Yosefu, na bosa aba baghulile kwakabalilo akatali bo bakali ukwambilila ifyabupe ifyakufuma kwa Yehova. Ukukindilila ukughulila kundulile une na bangi ukuya nulusubilo ulwakuti ikisu ikipya kili pipi.” Kangi abandu bingi aba bambombile Yehova kwakabalilo akatali bope bikukolelana na isi.

18. Ngimba ukwinong’onela isyakipeliwa kubaghile ukukusya bulebule ulusubilo lwitu ulwakuyoba isya kisu ikipya?

¹⁸ Bwanaloli ukuti ikisu ikipya kikali ukwisa. Inong’onela ifindu fimo ifi filipo bo indondwa, imipiki, ifinyamana nabandu. Nayumo uyu abaghile ukukayikila ukuti ifindu ifi fyabwanaloli, nalinga ukuti kalipo akabalilo bo fikali ukupeliwa. Lino filipo panongwa yakuti Yehova yo afipelile. (Bwa. 1:1, 26, 27) Kyala witu afingile ukuti ikuya pakupela kangi ikisu ikipya. Umwene ikuya pakufwanisya isi afingile. Nkisu ikipya abandu bisakuhobokagha nubumi ubununu kwa bwila na bwila. Tuli nulusubilo losa ukuti ikisu ikipya kikuya pakwisa pakabalilo aka Yehova ikulonda. Yes. 65:17; Ubuset. 21:3, 4.

19. Ngimba tubaghile ukukusya bulebule ulusubilo lwitu?

¹⁹ Pakabalilo aka, tukulondiwa ukubomba syosa isi tubaghile ukufwanisya ukuti tukusyeghe ulusubilo lwitu. Akabalilo kosa tundaghisyeghe ikitabulilo. Twinong’oneleghe isya maka gha Yehova. Kangi tubombeghe ifindu fya mwambepo. Mwakubomba isi, tubaghile ukuya yumo mwa “aba bikwingilapo palufingo ndwitiko na mbufisalyoyo.”—Hib. 6:11, 12; Rom. 5:5.