1. Ngimba bamo bikwipilika bulebule pankhani yakuyobesania nabandu mubufumusi? (Keta kangi ikithuzi.)

 PAKUYA babombi ba Yehova, tukufumusya kubandu panongwa yakuti tunganile Tata witu wakumwanya kangi tukulonda ukubatula abandu ukuti bammanye. Abafumusi bingi bikuhoboka fiyo nimbombo iyakufumusya. Loli bamo bikuketa ukuti kukafu fiyo ukuti bahobokeghe nubufumusi. Nongwa yafiki? Bamo babaghile ukuya nisoni nukuketa ukuti bakaya bamanyisi banunu. Bamo batikuya babuke ukubuka kunyumba sya bandu kisitakukoleliwa. Bamo batikulonda ukuti abandu babasusyeghe. Nalinga ukuti banganile fiyo Yehova, abakamu na balumbu aba, bikuketa ukuti kukafu ukuyobesania amasyu amanunu nabandu aba bakabamanya. Loli bikumanya ukulondiwa kwa mbombo iyi yonongwa yake utubalilo tosa bikughelaghela ukufumusya. Yehova ikuhoboka fiyo na isi bikubomba.

2. Linga utubalilo tumo mutikuhoboka mubufumusi, nongwa yafiki mutikulondiwa ukuwa amaka?

² Ngimba utubalilo tumo kukuya kukafu ukuya balusekelo mubufumusi pafifukwa ifi? Linga mo siyilile, komma ukuwa amaka. Ukwikayikila kwinu kukunangisya ukuti mutikulonda ukwiketa ukuya bakulondiwa fiyo kangi mutikulonda ukuti mulimbaneghe nabandu. Kangi akayapo uyu ikulonda ukuti abakalalisyeghe abangi, fiyofiyo linga ikughelaghela ukubabombela inunu. Tata winu wakumwanya ikumanya muno mukwipilikila kangi ikulonda ukubatula. (Yes. 41:13) Munkhani iyi, tukuya pakuyobesania injila 5 isi sibaghile ukubatula ukumalana naminong’ono bo agha nukukindilila ukuya balusekelo mubufumusi.

 TUKASIWEGHE NA MASYU GHA KYALA

3. Ngimba findu fiki fyalintulile unsololi Yeremiya ukuti afumusyeghe ku bangi?

³ Nkabalilo kakunyuma, amasyu gha Kyala ghabakasyagha ababombi bake linga bikulonda ukubomba imbombo iyakutamya. Inong’onela ikifwanikisyo kya nsololi Yeremiya. Umwene atamiwe fiyo naminong’ono bo Yehova ampele imbombo iyakufumusya. Yeremiya atile: “Ngamanya ukuyoba, namanga ndi nkeke itolo.” (Yere. 1:6) Ngimba findu fiki fyalintulile ukuya nkifu ukuti afumusyeghe? Akasiwe na masyu gha Kyala. Umwene atile: “Ghukufwana moto ghukokya nkati mfifupa fyangu, ngughela fiyo ukuti ndikanikisye mumo.” (Yere. 20:​8, 9) Nalinga ukuti ikighaba iki Yeremiya afumusyagha kyali kyakutamya fiyo, loli amasyu agha abuliwe ukuti afumusyeghe ghalimpele amaka.

4. Ngimba findu fiki fikubombiwa linga tukubelenga Amasyu gha Kyala nukwinong’onelapo? (Bakolosi 1:​9, 10)

⁴ Abakristu bikukasiwa na masyu gha Kyala agha ghikwaghiwa mu Baibolo. Bo ikubalembela Abakristu ba kukipanga kya Kolosi, untumiwa Pauli ayobile ukuti ukumanyila ifundo sya Yehova kwabatulagha abakamu bake “ukuti ulwendo lwabo lumbaghileghe Yehova” bo bikukindilila “ukupa iseke mumbombo syosa inunu.” (Belenga Bakolosi 1:​9, 10.) Imbombo inunu iyi yikongelelapo ukufumusya amasyu amanunu. Yonongwa yake linga tukubelenga Amasyu gha Kyala nukwinong’onelapo, tukukasya ulwitiko lwitu mwa Yehova nukuketa ukulondiwa kwakufumusya amasyu gha Bunyafyale.

5. Ngimba tubaghile ukusayiwa bulebule linga tukubelenga nukumanyila Ibaibolo?

⁵ Ukuti tukasiweghe fiyo na Masyu gha Kyala, tutikulondiwa ukubopela linga tukubelenga, tukumanyila nukwinong’onelapo. Tuyeghe nakabalilo akakufwana. Linga mukubelenga ilemba ili mutikulipilikisya kanunu, komma ukulileka. Mmalo mwake, mubombeleghe Watch Tower Publications Index pamo Buku Lakupenjera Nkhani la Ŵakaboni ŵa Yehova ukuti mupilikisye kanunu isi ivesi likusanusya. Linga mutikubopela pakumanyila, mukuya pakuya nulusubilo losa ukuti isi Ibaibolo likuyoba syabwanaloli. (1 Tes. 5:21) Linga muli nulusubilo, mwisakuhoboka fiyo ukubabulako abangi isi mumanyile.

TWITENDEKESYEGHE KANUNU MUBUFUMUSI

6. Nongwa yafiki tukulondiwa ukwitendekesya kanunu mubufumusi?

⁶ Linga twitendekisye kanunu mubufumusi, tutikuya pakutamiwa ukuyobesania nabandu.  Yesu abatulagha abafundiwa bake ukwitendekesya bo akali ukubatuma ukwakufumusya. (Luka 10:​1-11) Panongwa yakuti bakongagha isi Yesu abamanyisye, bafwanisye ukubomba ifindu fingi kangi isi syabapangisye ukuya balusekelo.—Luka 10:17.

7. Ngimba tubaghile ukwitendekesya bulebule mubufumusi? (Keta kangi ikithuzi.)

⁷ Ngimba mubaghile ukwitendekesya bulebule mubufumusi? Tukulondiwa ukwinong’onela muno tukuyobela ifundo sya bwanaloli ukuti tubafike abandu pandumbula kangi mmasyu ghitu na ghitu. Kangi kwakutula fiyo ukwinong’onela muno abandu bankighaba kyitu bikubombela ifindu nukuketa muno tubaghile ukubatulila pankhani yiliyosa. Ukufuma apo, linga tukuyobesania nabandu tuyeghe babuke, tumwemweteleghe kangi tuyeghe babumanyani.

8. Ngimba mo munjila yiliku iyi Abakristu bafwene nindeko sya mfu isi Pauli asiyobile nkifwanikisyo kyake?

⁸ Untumiwa Pauli ababulile abakamu na balumbu ukuti: “Tuli nakyo ikyuma kya mwambepo iki mu ndeko sya mfu.” (2 Kor. 4:7) Ngimba ikyuma iki findu fiki? Yo mbombo yakupoka ubumi bwa bandu iyakufumusya amasyu gha Bunyafyale. (2 Kor. 4:1) Ngimba indeko sya mfu findu fiki? Sikwimila ababombi ba Kyala aba bikubabula abangi amasyu amanunu. Nkabalilo ka Pauli, aba babombagha ibizinesi babombesyelagha indeko sya mfu ukupimbila ifindu ifyakulondiwa fiyo bo ifyakulya, ubwalwa nindalama. Mwakufwana itolo, Yehova atupele ikindu ikyakulondiwa fiyo agha gho masyu amanunu. Nubutuli bwa Yehova, tubaghile ukukaba amaka agha tukulondiwa ukuti tukindilile ukufumusya amasyu ghake mbusubiliwa.

TUNSUMEGHE YEHOVA UKUTI TUYE BAKIFU

9. Ngimba tubaghile ukubomba isyafiki ukuti tuleke ukubatila abandu pamo aba bikukana ukubafumukisya? (Keta kangi ikithuzi.)

⁹ Utubalilo tumo tubaghile ukutila ukuti abandu batikuya pakupilikisya isi tukubafumukisya. Ngimba tubaghile ukumalana bulebule nindamyo iyi? Inong’onela ulwiputo lwa batumiwa bo babakanisye ukuti bangafumusyagha. Mmalo mwakutila, abene balinsumile Yehova ukuti abatule “ukuliyoba ilisyu [lyake] nubukifu.” Mwanakalinga Yehova alyamwile ulwiputo lwabo. (Imbo. 4:​18,  29, 31) Linga utubalilo tumo ukutila abandu kukutupangisya ukuti tutoliweghe ukufumusya, nanuswe tukulondiwa ukusuma ubutuli kwa Yehova. Munsumeghe Yehova ukuti abatule ukulimbana nubogha ukuti munangisye ulughano kubandu mwakubafumukisya.

10. Ngimba Yehova ikututula bulebule ukuti tuye Baketi bake? (Yesaya 43:​10-12)

¹⁰ Yehova atusalile ukuti tuye Baketi bake, kangi afingile ukuti ikuya pakututula ukuti tuye bakifu. (Belenga Yesaya 43:​10-12.) Inong’onela injila 4 itolo isi ikubombela. Iyakwanda, Yesu ali nanuswe kulikosa kuno tukufumusya amasyu amanunu. (Mat. 28:​18-20) Iyabubili, Yehova asalile abandumi ukuti batutuleghe. (Ubuset. 14:6) Iyabutatu, Yehova atupele mbepo wake mwikemo ukuti ghututuleghe ukukumbukila isi tumanyile. (Yoh. 14:​25, 26) Iya nambala 4, Yehova atupele abakamu na balumbu ukuti tubombeghe nabo pampene. Nubutuli bwa Yehova nubwakufuma ku bakamu na balumbu bitu pakisu kyosa, tuli nakyo kilikyosa iki tukulondiwa ukuti tuye bakifu nukukindilila ukufumusya.

TUBATULEGHE ABANDU KANGI TUYEGHE NAMINONG’ONO AMANUNU

11. Linga muli mubufumusi, ngimba mubaghile ukubagha bulebule abandu bingi? (Keta kangi ikithuzi.)

¹¹ Ngimba mukuwa amaka linga mukabagha abandu bingi pakaya? Mukulondiwa ukwilalusya ukuti: ‘Ngimba abandu ba nkighaba kyitu bali kughu pakabalilo aka?’ (Imbo. 16:13) ‘Ngimba bali kumbombo pamo babukile ukwakula ifindu?’ Linga momuno siyilile, ngimba mukabaghila ukufumusya munsebo ukuti mubagheghe abandu bingi? Unkamu Joshua atile, “Nguya nulusako ulwakufumusya linga ngwenda ku malo agha bikulisyilako ifindu na agha bikwimikapo amagalimoto.” Umwene nunkasi wake, Bridget, bikubagha kangi abandu bingi pakaya linga babukile ukwakufumusya nulubunju na Pasabata pamusi.—Ef. 5:​15, 16.

12. Ngimba tubaghile ukumanya bulebule isi abandu bikusubila pamo isi bikwaghana nasyo?

¹² Linga abandu batikuhoboka na masyu agha mukubafumukisyila, mughelegheleghe ukumanya isi bikusubila na isi bikwaghana nasyo. Joshua na Bridget bikubombela ilalusyo ili lili kubwandilo bwa katilakiti kamo ukuti  bande ukuyobesania nabandu. Mwakifwanikisyo, linga bikubombela akatilakiti akakuti Ngimba Mukulisubila Ibaibolo? abene bikuti: “Abandu bamo bikuliketa Ibaibolo ukuya buku lyakufuma kwa Kyala loli bamo mukaya momuno bikuliketela. Umwe aminong’ono ghinu ghoghakuti fiki?” Utubalilo twingi ilalusyo ili likubatula ukuti bande ukuyobesania nabandu.

13. Nongwa yafiki tukuya balusekelo linga tukufumusya nalinga ukuti abandu batikupilikisya? (Isya Mbupingamu 27:11)

¹³ Nalinga ukuti abandu batikupilikisya linga tukubafumukisya, loli tukukindilila ukufwanisya ubwighane bwitu. Nongwa yafiki? Panongwa yakuti tukubomba isi Yehova nu Mwanake bikulonda kangi tukusimikisyila ubuketi. (Imbo. 10:42) Nalinga ukuti tukayobesaniapo numundu aliwesa mubufumusi pamo bakanile isi tukubafumukisyila, tubaghile ukuya balusekelo panongwa yakumanya ukuti tukunhobosya Tata witu wakumwanya.—Belenga Isya Mbupingamu 27:11.

14. Nongwa yafiki tukulondiwa ukuya balusekelo linga umfumusi amwaghile umundu uyu ikulonda ukumanya nyingi nkighaba kyitu?

¹⁴ Tubaghile kangi ukuya balusekelo linga umfumusi yumo amwaghile umundu uyu ikulonda ukumanya nyingi nkighaba kyitu. Utubalilo twingi, Ingasya ya Ndindilili yikufwanikisya imbombo yitu iyakufumusya nukundonda umwana uyu ayongile. Bingi bikweghapo ikighaba pakundonda umwana mfighaba ifyakukindanakindana. Linga umwana aghiwe, aliwesa ikuhoboka komma mwene uyu amwaghile. Mwakufwana itolo, aliwesa nkipanga ikutulapo ukupela abandu ukuya bafundiwa abapya ba Yesu. Aliwesa ikulondiwa ukutulapo pakufumusya nkighaba kyitu, kangi bosa bikuhoboka linga umundu umpya andile ukwaghiwapo pangomano.

TWINONG’ONELEGHE ISYA LUGHANO LWITU KWA YEHOVA NA KUBANDU

15. Ngimba ukukonga ifundo ya pa Matai 22:​37-39 kukututula bulebule ukukindilila ukuya balusekelo? (Keta kangi kyapakikope.)

¹⁵ Tubaghile ukukindilila ukubomba nyingi pambombo iyakufumusya mwakwinong’onela isya lughano lwitu kwa Yehova na kubandu. (Belenga Matai 22:​37-39.) Inong’onela ulusekelo ulu Yehova ikuya nalo linga ikutuketa tukubomba imbombo iyi namuno abandu babaghile ukuhobokela linga bandile ukumanyila Ibaibolo. Kumbuka kangi ukuti aba bikupilikisya isi tukubafumukisyila nukubombapo  simo, bisakubwagha ubumi bwa bwila na bwila.—Yoh. 6:40; 1 Tim. 4:16.

16. Ngimba tubaghile ukulwagha bulebule ulusekelo linga tukwikala pakaya kitu? Yoba ififwanikisyo.

¹⁶ Ngimba mukwikala itolo pakaya pafifukwa fimo? Linga mo siyilile, amwinong’onele isi mubaghile ukubomba ukuti munangisyeghe ulughano kwa Yehova na kubandu. Nkabalilo kambungo ya COVID-19, Samuel na Dania bikalagha itolo pakaya kabo. Pakabalilo akapalapala aka, utubalilo tosa bafumusyagha pafoni, balembagha abakalata kangi bamanyilagha nabandu Ibaibolo ukwendela pa Zoom. Samuel abafumukisyile pafoni abandu aba alyaghene nabo kukipatala kuno ambililagha ubutuli bwa nkota wa kansa. Umwene atile: “Linga tukwaghana nindamyo, tubaghile ukutamiwa naminong’ono kangi ulwitiko lwitu lukabaghila ukuya lwamaka. Loli tubaghile ukulwagha ulusekelo linga tukumbombela Yehova.” Pakabalilo aka, Dania afulele bo awile kangi ali nkipatala kwa myesi mitatu. Ukufuma apo, endagha mwakubombela injinga yabalemale kwa myesi 6. Dania atile: “Naghelaghelagha ukubomba syosa isi nabaghile ukufwanisya. Nafwanisye ukumfumukisya dokotala uyu andulagha kangi nafumusyagha kubandu aba bisagha nifindu pakaya. Kangi nalimfumukisye unkikulu yumo pafoni uyu abombagha ku kampani ya fyamikota.” Nalinga ukuti Samuel na Dania bakabombagha nyingi bo muno babombelagha pakwanda, loli babombile isi bafwanisye kangi pabumalilo bali balusekelo.

17. Ngimba mubaghile ukusayiwa bulebule mwakukonga injila isi tuyobesenie munkhani iyi?

¹⁷ Amughelegheleghe ukukonga injila 5 isi tuyobesenie munkhani iyi. Injila yililyosa yifwene itolo nifilungo ifi tukulunga mwiseke. Linga ifilungo fyosa bongenie mwiseke, ifyakulya fikuya finyafu fiyo. Linga tukukonga injila yiliyosa, tukuya pakufwanisya ukulimbana naminong’ono amabibi nukukindilila ukuya balusekelo mubufumusi.