Ngimba Musimenye?
Nongwa yafiki abahesya babombagha mugulu lya balwabwite ba Mwalafyale Davidi?
MUGULU lya balwabwite ba Mwalafyale Davidi, balimo abanyambala aba bakali Baisraeli, bo Zeleki uwa nkikolo kya Amoni, Uriya uwa nkikolo kya Bahiti na Itima uwa nkikolo kya Moabu. a (1 Syambu. 11:39, 41, 46) Abalwabwite ba Davidi bongelelangapo kangi “Abakereti, Abapeleti na Bagiti.” (2 Samu. 15:18) Sikuboneka ukuti Abakereti na Bapeleti bali pabukamu na Bafilisiti. (Eze. 25:16) Abagiti bafumile nkaya ka Bafilisiti iya ku Gati.—Yos. 13:2, 3; 1 Samu. 6:17, 18.
Nongwa yafiki Davidi abasalile abanyambala aba ukuti baye mugulu lya balwabwite bake? Umwene ali nulusubilo losa ukuti bali bakwiyisya kumyake, kangi ukukinda fyosa biyisyagha fiyo kwa Yehova. Mwakifwanikisyo, pakuyoba isya Bakereti na Bapeleti, The New Interpreter’s Dictionary of the Bible likuti: “Abene bakindilile ukuya basubiliwa kwa Davidi pakabalilo akapalapala bo Davidi ikulaghila.” Bulebule? Bo “abandu bosa Mbanyaisraeli,” bandekile Umwalafyale Davidi nukwanda ukunkonga “undemafu uyu ingamu yake ali yo Sheba,” Abakereti na Bapeleti bakindilile ukuya basubiliwa kwa Davidi kangi batulile ukumasya ubulaghili bwa Sheba. (2 Samu. 20:1, 2, 7) Pakabalilo akangi, Adoniya umwana wa Mwalafyale Davidi, alondagha ukwingila pabunyafyale mmalo mwa Solomoni. Loli Abakereti na Bapeleti bakindilile ukuya basubiliwa kwa Davidi kangi batulile ukuti Solomoni yo aye mwalafyale panongwa yakuti yo uyu Yehova alinsalile.—1 Banyaf. 1:24-27, 38, 39.
Umundu uyungi uyu akindilile ukuya nsubiliwa kwa Davidi ali yo Itayi uwa nkikolo kya Bagiti. Itayi nabalwabwite bake 600 balintulile Davidi bo umwana wa Davidi Abisalomu ansambukile nukubapangisya abandu ba mu Israeli ukuti bansambukile umwalafyale. Davidi alimbulile Itayi ukuti panongwa yakuti ali nhesya, akalondiwagha ukundwila ubwite. Loli Itayi atile: “Nikuyigha fiyo nkyeni mwa Yehova kangi na kumyako nikuti, kosa kuno kubukagha nalinga mo mbufwe pamo mbumi nanine ne mbombi wako nisakuyagha kuko.”—2 Samu. 15:6, 18-21.
Itayi ali nsubiliwa kwa Davidi, umwalafyale umpakiwa uwa Yehova
Nalinga ukuti Abakereti, Abapeleti na Bagiti bali bahesya, loli basimenye ukuti Yehova yo Kyala wanaloli kangi ukuti Davidi alimpakiwa wa Yehova. Davidi abaghile ukuti andaghisyagha fiyo panongwa yakuti abanyambala abasubiliwa aba, bali kulubafu lwake.
a Ululaghilo lwa Kyala ulu luli pa Ukukumbusya Indaghilo 23:3-6 lukitikisyagha Abaamoni na Bamoabu ukwingila nkipanga kya Baisraeli. Loli sikuboneka ukuti ululaghilo ulu lwayobagha isya bulaghili bosa ubwa kikolo iki kangi lukabakanisyagha abahesya aba ukubungana pamo ukuya pampene nabandu ba Kyala. Keta Insight on the Scriptures, Volume 1, peji 95.
