1. Ngimba ababombi ba Yehova babombagha bulebule ifindu ndubatiko nkabalilo kakunyuma?

 LINGA Yehova abapele ababombi bake imbombo iyakubomba, ikughulila ukuti bikuya pakuyibomba ndubatiko. (1 Kor. 14:33) Mwakifwanikisyo, bwighane bwa Kyala ukuti amasyu amanunu ghafumusiweghe pakisu kyosa kyapasi. (Mat. 24:14) Yehova ampele Yesu ubudindo ubwakuti alongosyeghe pambombo iyi. Kangi Yesu ikuketesya ukuti imbombo iyi yikubombiwa ndubatiko. Nkabalilo kakunyuma, mfipanga ifipya, abakulumba basaliwagha ukuti balongosyeghe nukubapa abandu ubulongosi. (Imbo. 14:23) Mu Yerusalemu, kalimo akabughatila akabakulumba aka balimo abatumiwa nabanyambala abakusi, aba babikagha ubulongosi ubu ifipanga fyosa fyalondiwagha ukubukonga. (Imbo. 15:2; 16:4) Panongwa yakuti abakamu na balumbu bapilikilagha ubulongosi ubu bambililagha, “ifipanga filinkukaka ndwitiko, filinkongelelapo ukubala amasiku ghosa.”—Imbo. 16:5.

2. Ukufuma mu 1919, ngimba Yehova abalongosyagha bulebule ababombi bake nukubapa ifyakulya fyamwambepo?

² Yehova ikukindilila ukubalongosya ababombi bake amasiku agha. Ukufuma mu 1919, Yesu ikubombesyela akagulu akanandi aka banyambala abapakiwa ukuti kalongosyeghe pambombo iyakufumusya nukubapa abakamu na balumbu ifyakulya fyamwambepo. a (Luka 12:42) Kisita kukayika, Yehova ikubasaya fiyo pambombo iyi bikubomba.—Yes. 60:22; 65:​13, 14.

3-4. (a) Yoba ikifwanikisyo iki kikunangisya ulusayo ulu tukulwagha linga tukubomba ifindu ndubatiko. (b) Ngimba tukuya pakuyobesania isyafiki munkhani iyi?

³ Linga tutikubomba ifindu ndubatiko, tukabaghila ukufwanisya ukubomba imbombo iyi Yesu atupele. (Mat. 28:​19, 20)  Mwakifwanikisyo, linga abakamu bakabika ulubatiko ulwa muno tubaghile ukufumusyila nkighaba kyitu, aliwesa abaghile ukufumusya kuno ikulonda. Isi sibaghile ukupangisya ukuti ifighaba fimo fifumusiweghe mwakwandisania nabafumusi abakukindanakindana loli ifighaba fimo fingafumusiwagha. Ngimba mubaghile ukwinong’onela injila isingi isi sikutupangisya ukuti tusayiweghe linga tukubomba ifindu ndubatiko?

⁴ Isi Yesu abombile bo ali pakisu kyapasi, syanangisye ikifwanikisyo ikinunu ikya muno ikubombela ifindu ndubatiko amasiku agha. Munkhani iyi, tukuya pakuyobesania isi Yesu abombile namuno igulu litu likukongela ikifwanikisyo kyake. Tukuya pakuyobesania kangi muno tubaghile ukunangisyila ukuti tukulisubila igulu lya Yehova.

IGULU LITU LIKUKONGA IKIFWANIKISYO KYA YESU

5. Ngimba njila yimo yiliku iyi tukunangisya ukuti tukukonga ikifwanikisyo kya Yesu? (Yohani 8:28)

⁵ Yesu amanyile kwa Tata wake uwakumwanya pa isi abombagha na isi ayobagha. Igulu lya Yehova likukonga ikifwanikisyo kya Yesu mwakubombela Amasyu gha Kyala ukuti ghatutule ukumanya inunu nimbibi nukutupa ubulongosi pabumi bwitu. (Belenga Yohani 8:28; 2 Tim. 3:​16, 17) Utubalilo tosa tukukumbusiwa ukuti tubelengeghe Amasyu gha Kyala nukukonga ubulongosi bwake. Ngimba tukusayiwa bulebule panongwa yakukonga ubulongosi ubu?

6. Ngimba tukusayiwa bulebule linga tukumanyila Ibaibolo?

⁶ Tukusayiwa fiyo linga tukumanyila Ibaibolo mwakubombela amabuku ghitu. Mwakifwanikisyo, sikututula ukuketa ukukolelana kwa fundo sya mu Baibolo nubulongosi ubu tukwambilila ukufuma ku gulu litu. Linga tukuketa ukuti ubulongosi ubu tukwambilila bukufuma Mmalemba, tukwanda ukulisubila fiyo igulu lya Yehova.—Rom. 12:2.

7. Ngimba masyu ghaliku agha Yesu afumusyagha, kangi igulu lya Yehova likukonga bulebule ikifwanikisyo kyake?

⁷ Yesu afumusyagha “amasyu amanunu agha Bunyafyale bwa Kyala.” (Luka 4:​43, 44) Kangi Yesu ababulile abafundiwa bake ukuti bafumusyeghe isyakufwana nu Bunyafyale. (Luka 9:​1, 2; 10:​8, 9) Amasiku agha, ababombi ba Yehova bosa bikufumusya amasyu gha Bunyafyale kisita kwinong’onela kuno bikwikala nubudindo ubu bali nabo mugulu lya Yehova.

8. Ngimba tuli nulusako luliku?

⁸ Tuli nulusako ulunywamu fiyo ukubabulako abangi isya Bunyafyale bwa Kyala. Ulusako ulu, lukapeliwa ku mundu aliwesa itolo. Mwakifwanikisyo, bo Yesu ali pakisu, akalitikisye imbepo inyali ukuti sifumusyeghe isyakufwana numwene. (Luka 4:41) Amasiku agha, bo umundu akali ukwanda ukufumusya na Baketi ba Yehova, ikulondiwa ukuya nutuyilo utu tukunhobosya Yehova. Tukunangisya ukuti tukundaghisya ulusako ulwakufumusya amasyu gha Bunyafyale kulikosa kuno tubaghile ukufwanisya. Mwakufwana itolo na Yesu, nanuswe tukughelaghela ukubafumukisya abangi nukubamanyisya ubwanaloli.—Mat. 13:​3, 23; 1 Kor. 3:6.

9. Ngimba igulu lya Yehova likubafumukisya bulebule abandu isya ngamu ya Kyala?

⁹ Yesu abafumukisye abandu ingamu ya Kyala. Bo ikwiputa kwa Tata wake uwakumwanya, Yesu atile: “Une mbafumukisye ingamu yako.” (Yoh. 17:26) Igulu lya Yehova likukonga ikifwanikisyo kya Yesu mwakubomba kilikyosa ukuti libatule abandu ukuyimanya ingamu ya Kyala. Ibaibolo lya Mang’anamuliro gha Charu Chiphya, litulile fiyo pankhani iyi mwakughomokesyapo ingamu ya Kyala mmalo aghakulondiwa. Ibaibolo ili, lino lisanusiwe lyosa pamo ikighaba kimo munjobelo  isyakukinda 270. Pa Vyakusazgirapo A4 na A5 mu Baibolo ili, mukuya pakumanyila nyingi isyakufwana nukughomokesyapo kwa ngamu ya Kyala. Pakighaba kya Vyakusazgirapo C, iki kikwaghiwa mu Study Bible, pikuyoba ubuketi bwingi ubwakuti ingamu ya Kyala yikulondiwa ukwaghiwa Mmalemba gha Kigiriki agha Bukristu mmalo aghakufwana 237.

10. Ngimba mukumanyilako isyafiki ku isi ayobile unkikulu yumo uwa ku Myanmar?

¹⁰ Mwakufwana itolo na Yesu, tukulonda ukubatula abandu bingi ukuti bayimanye ingamu ya Kyala. Bo unkikulu yumo uwa ku Myanmar uyu ali nifyinja 67 amanyile isyakuti Kyala ali ningamu, alyandile ukulila kangi atile: “Aka kakwanda pabumi bwangu ukupilika ukuti Kyala ingamu yake yo Yehova. . . . Mummanyisye ikindu ikyakulondiwa fiyo iki ngayagha pakumanyila.” Bo muno tuketile mu kyakubombiwa iki, linga abandu basyaghenie ukuti Kyala ali ningamu, babaghile ukuchenja pabumi bwabo.

TUKINDILILEGHE UKUNANGISYA UKUTI TUKULISUBILA IGULU LITU

11. Ngimba abakulumba babaghile ukunangisya bulebule ukuti bikulisubila igulu lya Yehova? (Keta kangi ikithuzi.)

¹¹ Ngimba yo njila yimo yiliku iyi abakulumba bakipanga babaghile ukunangisya ukuti bikulisubila igulu lya Yehova? Linga bambilile ubulongosi, abakulumba bikulondiwa ukubupilikisya kanunu nukubomba syosa isi babaghile ukufwanisya ukuti babukongeghe. Mwakifwanikisyo, bikwambilila ubulongosi ubwa muno babaghile ukulongosyela pangomano, muno babaghile ukubikila inyiputo pangomano namuno babaghile ukusipasikisyila ing’osi sya Kristu. Linga abakulumba bikukonga ubulongosi ubwakufuma ku gulu, bikubatula abakamu na balumbu ukwipilika ukuti Yehova abaghanile kangi ikubapasikisya.

12. (a) Nongwa yafiki tukulondiwa ukukolelana na aba bikulongosya? (Bahiburi 13:​7, 17) (b) Nongwa yafiki tukulondiwa ukwinong’onela isya tuyilo utununu utwa aba bikulongosya?

¹² Linga twambilile ubulongosi ubwakufuma ku bakulumba, tukulondiwa ukubukonga mwakwiyisya. Linga tukubomba isi, kukuya pakuya kupepe ku aba bikutulongosya ukufwanisya ukubomba imbombo yabo. Ibaibolo likutukasya ukuti tubapilikileghe kangi twiyisyeghe ku aba bikutulongosya. (Belenga Bahiburi 13:​7, 17.) Loli utubalilo tumo, ukubomba isi kubaghile ukuya kukafu. Nongwa yafiki? Panongwa yakuti abanyambala aba basitabugholofu. Kangi linga tukwinong’onela itolo isi bikusoba mmalo mwakwinong’onela isi bikubomba kanunu, tubaghile ukubatula abalughu bitu. Munjila yiliku? Tubaghile ukwanda ukulikayikila igulu lya Yehova, panongwa yakuti syo isi abakususya bikubomba. Ngimba tukulondiwa ukubomba isyafiki ukuti tumanye nukukana ubutungulu ubwakufuma ku balughu bitu?

TUNGITIKISYAGHA UKUTI ABANGI BATUTOLESYE UKULISUBILA IGULU LITU

13. Ngimba abalughu ba Kyala bikughelaghela bulebule ukulinyoza igulu lya Yehova?

¹³ Abalughu ba Kyala bikughelaghela ukuyoba ifindu ifibibi ifyakufwana nigulu lya Yehova. Mwakifwanikisyo, tumanyile ukufuma Mmalemba ukuti Yehova ikulonda ukuti ababombi bake bayeghe belu mwakumbili namwambepo. Umwene ikuyoba ukuti aliwesa uyu ikubomba ifindu ifibibi kangi atikulapa, ikulondiwa ukwepusiwa nkipanga. (1 Kor. 5:​11-13; 6:​9, 10) Tukupilikila ululaghilo lwa Mmalemba ulu. Loli abakususya bikubombela ifundo iyi nukwanda ukutuyoba ukuti tuli nindaghilo ingafu, tukubalonga abandu kangi tukaya nulughano.

14. Ngimba yonani uyu ikwandisya inkhani isyabutungulu isyakufwana nigulu lya Yehova?

 ¹⁴ Tummanyeghe uyu ikulisambukila igulu litu. Setano Umohesi yo uyu ikwandisya inkhani isyabutungulu. Umwene “yo wise wabutungulu.” (Yoh. 8:44; Bwa. 3:​1-5) Yonongwa yake tukuya pakuketa ukuti Setano ikuya pakubombela abandu bake ukuti bayobeghe inkhani isyabutungulu isyakufwana nigulu lya Yehova. Isi syo isi syabombiwe kwa Yesu na ku Bakristu bakwanda.

15. Ngimba abalongosi bamatchalichi babombile isyafiki kwa Yesu na ku bamanyili bake?

¹⁵ Nalinga ukuti Umwana wa Kyala, Yesu, ali ngolofu kangi abombile ifika ifyakuswighisya, loli Setano abakasisye abandu bamo ukuti banjobele inkhani isyabutungulu. Mwakifwanikisyo, abalongosi bamatchalichi bababulagha abandu ukuti “unkulu wambepo inyali,” yo uyu alimpele Yesu amaka aghakusosyela imbepo inyali. (Mar. 3:22) Pakabalilo aka Yesu alongiwagha, abalongosi bamatchalichi balimpele inongwa iyakuti annyozagha Kyala kangi babakasisye abandu ukuti bangoghe. (Mat. 27:20) Panyuma pake, bo abamanyili ba Kristu bandile ukufumusya amasyu amanunu, aba babasusyagha “balinkusyonanga inyinong’ono sya bandu” ukuti babanyozeghe. (Imbo. 14:​2, 19) Ukufwana nilemba lya Imbombo sya Batumiwa 14:​2, Ingasya ya Ndindilili iya Chichewa Disembala 1, 1998, yalingenie ukuti: “Aba bakolelanagha na Setano bakanagha ukupilikisya ku masyu agha Abakristu bafumusyagha kangi bayobagha ifindu ifibibi ifyakufwana na Bakristu aba ukuti abandu bangapilikisyagha kangi bababengeghe fiyo.”

16. Ngimba tukulondiwa ukukumbuka isyafiki linga tupilike inkhani isyabutungulu?

¹⁶ Setano akindilile ukuyoba inkhani isyabutungulu nkabalilo ka Bakristu bakwanda. Umwene “ikukisyoba ikisu kyosa” kangi  ikukindilila mpaka lino. (Ubuset. 12:9) Linga mupilike inkhani isyabutungulu isyakufwana nigulu litu pamo abakamu aba bikutulongosya, mukumbukeghe muno abalughu ba Kyala bannyozelagha Yesu na Bakristu bakwanda. Amasiku agha, ababombi ba Yehova bikufwimiwa kangi syo isi Ibaibolo lyayobile ngani. (Mat. 5:​11, 12) Tutikuya pakusubila inkhani isyabutungulu linga tumenye kuno sikufuma nukubombapo simo mwanakalinga ukuti twifighilile. Ngimba tubaghile ukwifighilila bulebule?

17. Ngimba tubaghile ukwepuka bulebule kundamyo isi sikwisa panongwa ya nkhani isyabutungulu? (2 Timoti 1:13) (Keta kangi ibokosi ilyakuti “ Muno Tubaghile Ukubombela Ninkhani Isyabutungulu.”)

¹⁷ Mungapilikisyagha inkhani isyabutungulu. Untumiwa Pauli, atupele ubulongosi ubununu ubwa muno tubaghile ukubombela linga tupilike inkhani isyabutungulu. Umwene alimbulile Timoti ukuti, “ubakanisyeghe abandu bamo . . . bangabikangako umoyo patupango” kangi “bepukeghe kutupango.” (1 Tim. 1:​3, 4; 4:7) Inong’onela isi: Umwana abaghile ukusala ikindu ikibibi pasi nukubika nkanwa loli umundu unkusi ikumanya ububibi bwakubomba isi. Mwakufwana itolo, tutikupilikisya inkhani isyabutungulu panongwa yakuti tumenye kuno sikufuma. Mmalo mwake, tukupilikisya ku “masyu amumi” aghabwanaloli.—Belenga 2 Timoti 1:13.

18. Ngimba tubaghile ukunangisya bulebule ukuti tukulisubila igulu lya Yehova?

¹⁸ Tuyobesenie injila sitatu itolo isya muno igulu lya Yehova likukongela ikifwanikisyo kya Yesu. Bo mukumanyila Ibaibolo, mughelegheleghe ukusyagha injila isingi isya muno igulu lya Yehova likukongela ikifwanikisyo kya Yesu. Mubatuleghe abangi nkipanga ukuti balisubileghe fiyo igulu lya Yehova. Kangi mukindilileghe ukundaghisya mwakumbombela Yehova mbusubiliwa nukukindilila ukukolelana nigulu ili ikulibombela ukuti afwanisye ubwighane bwake. (Sal. 37:28) Isagha twesa tukindilileghe ukundaghisya ulusako ulu tuli nalo ulwakuya kukighaba kya Yehova nababombi abasubiliwa.