1. Ngimba paladaiso wamwambepo findu fiki, kangi tukulondiwa ukusala ukubomba isyafiki?

 LINO pakisu alipo paladaiso wamwambepo uyu iswile na bandu aba bikubomba ifindu ifinunu. Balipo abandu amamiliyoni mingi aba bali palutengano. Bosa aba bali mwa paladaiso wamwambepo basalile ukukindilila ukuya mwa paladaiso uyu. Abene bikulonda ukuti abandu bingi bope baye mugulu lya padela ili. Ngimba igulu ili findu fiki? Yo paladaiso wamwambepo. a

2. Ngimba findu fiki fikubahobosya pakuyoba isya paladaiso wamwambepo?

² Syakuhobosya fiyo ukumanya ukuti Yehova ikubatula abandu bake ukuti bahobokeghe nukukolelana nkisu kya Setano iki kiswile ni findu i fibibi kangi iki abandu bikubengana fiyo. (1 Yoh. 5:19; Ubuset. 12:12) Kyala witu walughano, ikuketa ifindu ifibibi ifi abandu bikwaghana nafyo. Yonongwa yake ikubafighilila abandu bake ukuti bakindilileghe ukumbombela. Amasyu ghake, ghikulingania ukuti paladaiso wamwambepo buyo “bwakubopelamo” kangi ali “bo ghu ngunda ughu amisi ghikubundasya kosakosa.” (Yes. 4:6; 58:11) Nulusayo lwa Yehova, bosa aba bali mwa paladaiso uyu, bali nulusekelo kangi bikufighililiwa ntubalilo utupalapala utu.—Yes. 54:14; 2 Tim. 3:1.

3. Ngimba ubusololi bwa mu chaputala 65 kya buku lya Yesaya, bwafwanisile bulebule ku Baisraeli?

³ Ukwendela mu nsololi Yesaya, Yehova ayobile muno ifindu  fisakuyila na bandu aba bali mwa paladaiso wamwambepo uyu. Mubaghile ukughagha amasyu agha mu chaputala 65 mu buku lya Yesaya, agha ghafwanisiwe mu 537 B.C.E. Pakabalilo kala, Abayuda aba balapile aba bali kubutumwa ku Babeloni, baghomokile kumyabo. Yehova abasayile abandu bake nukubatula ukuyenga kangi Yerusalemu ni tempile lyakumwiputilamo ku Israeli.—Yes. 51:11; Zeka. 8:3.

4. Ngimba ubusololi bwa mu chaputala 65 kya buku lya Yesaya, bukufwanisiwa bulebule amasiku agha?

⁴ Ukufwanisiwa kwabubili kwa busololi bwa Yesaya kwalyandile mu 1919 C.E. apa ababombi ba Yehova mmasiku agha, basokilemo mwa Babeloni Unkulumba. Ukufuma apo, paladaiso wamwambepo alyandile ukukula pakisu kyosa ikyapasi. Abafumusi ba Bunyafyale abakwiyipa bingi balyandisye ifipanga kangi fyakulagha mwambepo. Abanyambala na bakikulu aba babombagha ifindu ifibibi balyandile ukumfwala “umundu umpya uyu apeleliwe nkifwani kya Kyala.” (Ef. 4:24) Loli ulusayo ulu Yesaya ayobile lukuya pakufwanisiwa nkisu ikipya ikya nkyeni. Kangi lino tusayiwe munjila nyingi fiyo. Tukuya pakuyobesania muno paladaiso wamwambepo abaghile ukututulila kangi ninongwa iyi tubaghile ukukindilila ukuya mwa paladaiso uyu.

MUNO ABA BALI MWA PALADAISO WAMWAMBEPO BIKWIPILIKILA

5. Ukufwana na isi sili pa Yesaya 65:​13, ngimba tukuhoboka nifindu filiku mwa paladaiso wamwambepo?

⁵ Ubumi ubununu nu butusyo. Ubusololi bwa Yesaya, bukuyoba isyakukindana uku kulipo pakati pa bandu aba bali mwa paladaiso wamwambepo na aba bali panja. (Belenga Yesaya 65:13.) Yehova ikubapa abandu bake ubutuli bwamwambepo na isi bikulondiwa. Tuli nambepo mwikemo, Amasyu ghake, kangi ni fyakulya fya mwambepo ifi ikutupa ukuti tulyeghe, . . . ukunwa, . . . [kangi] nukuya balusekelo.” (Fwanikisya na Ubusetuli 22:17.) Abandu aba bakayamo mwa paladaiso wamwambepo uyu, “bikuya ni njala . . . , bikumilwa . . . , [kangi] nukutamiwa.” Abandu aba batikummanya Yehova.—Amosi 8:11.

6. Ngimba pa Yoeli 2:​21-24 pikulingania isyafiki pankhani yafyabupe ifi Yehova ikutupa, kangi fikututula bulebule?

⁶ Mu busololi bwake, Yoeli abombesyile ifindu bo imbeyu, ubwalwa, na mafuta gha nsyunguti ukusanusya ukuti Yehova ikubapa abandu bake ifi bikulondiwa ukongelelapo ifyakulya fya mwambepo. (Yoeli 2:​21-24) Mwakifwanikisyo, umwene ikutupa Amasyu ghake ukwendela mu Baibolo na mabuku ghitu agha ghikulingania isya Ibaibolo, iwebusayiti yitu, ingomano syakipanga, isya dela nisya kighaba. Tukukasiwa fiyo panongwa yakuya nifindu ifyamwambepo ifi isiku lililyosa. Yonongwa yake tukuya nu bumi ubununu kangi nubutusyo.

7. Ngimba findu fiki fikututula ukuya “nindumbula yimoyene”? (Yesaya 65:14)

⁷ Balusekelo kangi bakwikutisiwa. Abandu ba Kyala, “bisakwimbagha nubwikyele” panongwa yakuti bikunndaghisya Kyala. (Belenga Yesaya 65:14.) Ubwanaloli ubwakukasya na isi Kyala afingile Mmasyu ghake nulusubilo ulu tuli nalo mwikemo lya Yesu, fikutukasya ukuya “ni ndumbula yimoyene.” Linga tukuyobesania nabakamu na balumbu bitu isyakufwana na isi tukuya balusekelo fiyo.—Sal. 34:8; 133:​1-3.

8. Ngimba aba bali mwa paladaiso wamwambepo bikwipilika bulebule?

⁸ Ulughano nukukolelana kwa babombi ba Yehova kukunangisya kuti bali mwa paladaiso wamwambepo. “Ingwamba ya bupelelesye” iyi, yikututula ukwinong’onela muno  ubumi bwisakuyila nkisu ikipya muno abandu ba Yehova bisakuya nulughano lwamaka nukukolelana fiyo ukukinda muno bikubombela lino. (Kolos. 3:14) Umulumbu yumo alingenie isi ababombi ba Yehova babombile bo aghene nabo akakwanda. Umwene atile: “Ngamanyagha muno nabaghile ukuyila walusekelo pabumi bwangu na mumbumba yangu. Akabalilo akakwanda apa naketile abandu bikunangisania ulughano, po apa nalyaghene na Baketi ba Yehova.” Aliwesa uyu ikulonda ukuya walusekelo nukwikutisiwa, ikulondiwa ukwisa mwa paladaiso witu uwamwambepo. Kisita kwinong’onela isi abandu bikuyoba isya babombi ba Yehova, abene bikumanyiwa ningamu yalughindiko kangi bosa bikumwiputa umwene.—Yes. 65:15.

9. Ngimba ilemba lya Yesaya 65:​16, 17, likuyoba isyafiki pankhani yandamyo isi tukwaghana nasyo?

⁹ Babuke kangi bololo. Ilemba lya Yesaya 65:14 likuyoba ukuti aba basalile ukuleka ukuya kukighaba kya paladaiso wamwambepo ‘bisakukutagha inguto bo indumbula syabo silikiliwe.’ Loli ngimba bule pakuyoba isya findu ifibibi ifi ababombi ba Kyala bikwaghana nafyo lino? Mwalululu, fyosa ifi “abandu bisakwibwa itolo.” (Belenga Yesaya 65:​16, 17.) Yehova ikuya pakusosyapo indamyo syitu, kangi tukuya pakwibwa syosa.

10. Nongwa yafiki mukuketa ukuti lusayo lunywamu ukuya mugulu lya bakamu na balumbu? (Keta kangi ikithuzi.)

¹⁰ Tukuya balusekelo linga tuli pangomano syakipanga, kuno tukubwagha ubutusyo kangi tukwibwa indamyo syitu syosa isi tukwaghana nasyo nkisu ikibibi iki. Tukubatula abakamu na balumbu bitu ukuti bipilikeghe kanunu linga tukubanangisya ulughano, ulusekelo, ulutengano, ubufisalyoyo, nubutengamoyo, isi syo seke sya mbepo. (Gal. 5:​22, 23) Tuli balusekelo fiyo ukuya mugulu lya Yehova. Aba bikukindilila ukuya mwa paladaiso wamwambepo, bikuya pakuketa muno Kyala ikuya pakufwanisyila ubwighane bwake ubwa “kupela ikisu ikipya na kumwanya ukupya.”

11. Ukufwana na Yesaya 65:​18, 19, ngimba paladaiso wamwambepo uyu Yehova apelile, ikutupalamasya bulebule?

¹¹ Bikundaghisya kangi balusekelo. Yesaya akindilile ukulingania inongwa iyi tukulondiwa “ukwikyela nukusekela” mwa paladaiso wamwambepo. Paladaiso wamwambepo uwakufwanikisya uyu, apeliwe na Yehova. (Belenga Yesaya 65:​18, 19.) Umwene ikubombesyela ababombi bake ukuti babatule abangi  ukusoka nkisu ikibibi nukwingila mwa paladaiso wamwambepo. Tuli balusekelo fiyo panongwa ya lusayo ulu tulinalo pakuya mbwanaloli, kangi tukuya pakubabulako abangi isyabwanaloli ubu.—Yere. 31:12.

12. Ngimba ulufingo ulu luli pa Yesaya 65:​20-24, lukutupalamasya bulebule, kangi nongwa yafiki?

¹² Tuli balusekelo fiyo panongwa yalusubilo ulu tuli nalo ulwakuya mwa paladaiso wamwambepo. Twinong’oneleghe isi twisakubomba nukusiketa nkisu ikipya ikya Kyala. Ibaibolo likuti: “Abana abafyele batisakufwamo, abandu bisakughonagha ukufikapo pafyinja fya bumi bwabo.” “Abandu bisakuyengagha inyumba nukwitughala mumo, bisakubyalagha amafilu kangi nukwikyela nubwalwa bwa seke syake.” Kangi “kosa aka linga bikubomba kisakuyagha kanunu itolo” panongwa yakuti ‘bisakusayiwa na Yehova.’ Umwene afingile ukuti isakutufighililagha nukutupa ubumi ubununu. “Napa linga bikwiputa” kumyake, umwene isakumanyagha kilikyosa iki abandu bikulondiwa kangi ‘isakwamulagha bo bakali ukumalisya.’—Yes. 65:​20-24; Sal. 145:16.

13. Ngimba pa Yesaya 65:​25, pikuyoba isyafiki isyakufwana nukuchenja uku abandu bikubomba pabumi bwabo linga bandile ukumbombela Yehova?

¹³ Ulutengano nukufighililiwa. Nubutuli bwa mbepo wa Kyala, bingi aba bali nutuyilo utubibi lino bachenjile. (Belenga Yesaya 65:25.) Abene babombilepo simo nukuleka utuyilo twabo utubibi. (Rom. 12:2; Ef. 4:​22-24) Bwanaloli ukuti abandu ba Kyala bope basitabugholofu, yonongwa yake bope bikusoba utubalilo tumo. Loli Yehova ababungenie “abandu bosa” aba banganile umwene kangi bikunangisania ulughano nulutengano. (Titi 2:11) Yo Kyala umwenemaka ghosa mwene uyu abaghile ukufwanisya ukubomba isi.

14. Ngimba ilemba la Yesaya 65:​25, lyafwanisiwe bulebule ku nkamu yumo?

¹⁴ Ngimba abandu babaghile ukuchenja naloli utuyilo twabo? Inong’onela ikyakubombiwa iki. Unnyambala yumo uyu utubalilo twingi abikiwagha mujele bo ali nifyinja 20, abombanga ifindu ifibibi fiyo pabumi bwake. Umwene abikiwagha panongwa yakuhiya amagalimoto ninongwa isingi. Kangi umwene utubalilo twingi alwagha nabinake. Bo apilike akakwanda ubwanaloli ubwakufuma mu Baibolo nukwanda ukubungana na Baketi ba Yehova, umwene aketile ukuti ikulondiwa ukumwiputa Yehova mwa paladaiso wamwambepo. Bo osiwe, aketile muno ilemba lya Yesaya 65:25 lyalintulile. Umwene achenjile utuyilo twake utubibi kangi alyandile ukuya nutuyilo utununu.

15. Nongwa yafiki tukulondiwa ukubakolela abangi ukuti bise mwa paladaiso wamwambepo, kangi tubaghile ukubomba bulebule isi?

¹⁵ Ilemba lya Yesaya 65:13 NWT, likwanda namasyu aghakuti: “Lelo isi syo isi Mwalafyale Nkulumba Yehova ikuyoba.” Vesi 25 likumalisya ukuti “bo ikuya Yehova.” Utubalilo tosa, amasyu ghake ghikufwanisiwa naloli. (Yes. 55:​10, 11) Paladaiso wamwambepo aliko naloli lino. Yehova ali ni gulu lyake ilya padela fiyo. Panongwa yakuti tuli mugulu lyake, tuli balusekelo kangi bakufighililiwa. (Sal. 72:7) Tukulonda ukubatula abandu bingi ukuti bise mugulu lya Yehova. Tubaghile ukubomba isi mwakukindilila ukupela abafundiwa.—Mat. 28:​19, 20.

MUNO TUBAGHILE UKUBAKOLELA ABANGI UKUTI BISE MWA PALADAISO WAMWAMBEPO

16. Ngimba findu fiki fibaghile ukubakwaba abandu ukuti bise mwa paladaiso wamwambepo?

¹⁶ Aliwesa wa uswe, abaghile ukubombapo simo ukuti abakoleleghe abangi ukuti  bise mwa paladaiso wamwambepo. Ukuti tufwanisye ukubomba isi, tukulondiwa ukunkonga Yehova. Umwene ikulonda kuti aliwesa iseghe mwene mugulu lyake kisita kufimbilisiwa. (Yoh. 6:44; Yere. 31:3) Utuyilo utununu utwa Yehova utu bikumanyila, tukubatula ukuti basegheleleghe kumyake. Ngimba utuyilo twinu na isi mukubomba sibaghile ukubatula abandu ukuti bise mwa paladaiso wamwambepo?

17. Ngimba tubaghile ukubakolela bulebule abangi ukuti bise mwa paladaiso wamwambepo?

¹⁷ Ikyakwanda iki tubaghile ukubomba ukuti tubakolele abandu ukuti bise mwa paladaiso wamwambepo uyu, ko kunangisania ulughano na Bakristu abinitu. Linga umundu isile kungomano syitu, tukulonda ukuti ipilikeghe bo muno syayilile na bandu aba babukagha kungomano nkipanga kya Bakorinti. Abene babaghile ukuyoba ukuti: “Naloli Kyala ali mmyinu.” (1 Kor. 14:​24, 25; Zeka. 8:23) Tukulondiwa ukukindilila ukupilikila ubulongosi ubwakuti “amuyeghe ndutengano uyu kunnine uyu kunnine.”—1 Tes. 5:13.

18. Ngimba findu fiki fibaghile ukubakwaba abandu ukuti bise mugulu lya Yehova?

¹⁸ Tukulondiwa ukukindilila ukubaketa abakamu na balumbu bo muno Yehova ikubaketela. Tukubomba isi mwakukindilila ukuketa utuyilo twabo utununu komma isi bikusoba papo sikuya pakumalika mwalululu. Tubaghile ukughomolelapo ulutengano mwalughano linga akabalilo kosa tukunangisya ‘ubololo uyu kunnine uyu kunnine, tuli nikibabilisi, nukuhobokelana.’ (Ef. 4:32) Aba bikunangisania ulughano bo aba bisakuya mwa paladaiso wamwambepo. b

 TUKINDILILEGHE UKUYA MWA PALADAISO WAMWAMBEPO

19. (a) Ukufwana nibokosi ilyakuti “ Basokile Nukwisa Kangi,” ngimba bamo bayobile isyafiki bo baghomokile mwa paladaiso wamwambepo? (b) Ngimba tukulondiwa ukusala ukubomba isyafiki? (Keta kangi ikithuzi.)

¹⁹ Tukundaghisya fiyo panongwa yakuya mwa paladaiso wamwambepo. Paladaiso uyu ikuboneka kanunu fiyo, kangi iswile na bandu aba bikumwiputa Yehova. Tukulondiwa ukukindilila ukundaghisya panongwa yakuya mwa paladaiso wamwambepo uyu Yehova atupele. Aliwesa uyu ikulonda ubutusyo, ukwikutisiwa, ubololo, nukufighililiwa, ikulondiwa ukwisa mwa paladaiso wamwambepo nukukindilila ukuya mumo. Loli mukulondiwa ukusimanya ukuti Setano ikulonda ukubomba kilikyosa ukuti abapaghule kwa Yehova. (1 Pet. 5:8; Ubuset. 12:9) Tutikulondiwa ukumpa ulusako ukuti abombe isi ikulonda. Isagha tukindilileghe ukumfighilila paladaiso uyu ukuti abonekeghe kanunu kangi walutengano.