1. Ngimba Yehova ikulonda ifindu fiki kumyitu?

 IKINDU ikyakwanda iki kikumpa ulusekelo unnyambala nunkasi wake, ko kabalilo aka bapapile umwana. Nalinga ukuti abapapi bikuhoboka loli batikulonda ukuti umwanabo akindilile ukuya yo bonda. Ukuyoba ubwanaloli, babaghile ukwanda ukutamiwa naminong’ono linga umwanabo atikukula. Mwakufwana itolo, Yehova ikuhoboka fiyo linga umundu andileko ukubombapo simo ukuti ankongeghe Yesu, kangi ikuhoboka fiyo linga tukukula mwambepo. (1 Kor. 3:1) Yonongwa yake ikutubula ukuti “mwipeleghe bakusi” pakuya Bakristu.—1 Kor. 14:20.

2. Ngimba tukuya pakuyobesania isyafiki munkhani iyi?

² Ngimba Unkristu unkusi mwambepo ikwinong’ona nukubomba bulebule ifindu? Ngimba tukulondiwa ukubomba isyafiki ukuti tuye Bakristu bakusi mwambepo? Ngimba ifyakulya ifikafu ifya mwambepo fikututula bulebule ukukusya ubumanyani bwitu na Yehova? Nongwa yafiki tutikulondiwa ukwinong’ona ukuti tukulile kale mwambepo? Munkhani iyi tukuya pakuyobesania amalalusyo agha.

NGIMBA UNKRISTU UNKUSI MWAMBEPO IKWINONG’ONA NUKUBOMBA BULEBULE IFINDU?

3. Ngimba ukuya Nkristu unkusi mwambepo kukusanusya isyafiki?

³ Mu Baibolo, ilisyu lya Nkigriki ili lisanusiwe ukuti “ukukula,” libaghile ukusanusya “ubukusi,” pamo abandu “aba bafikilepo ukusyaghania.” a (1 Kor. 2:6.) Bo muno sikuyila numwana uyu ikukindilila ukukula mpaka ukuya nkusi, nanuswe tukulondiwa ukukindilila ukukusya ubumanyani bwitu na Yehova. Ngimba tubaghile ukubomba bulebule? Nalinga tukulile mwambepo,  pope tukulondiwa ukukindilila ukukusya ubumanyani bwitu na Yehova. (1 Tim. 4:15) Twesa tukulondiwa ukuya bakusi mwambepo kali tuli bana pamo bakusi. Loli ngimba findu fiki fibaghile ukunangisya ukuti Unkristu akulile mwambepo?

4. Ngimba Unkristu unkusi mwambepo ikuya bulebule?

⁴ Unkristu unkusi mwambepo yo uyu ikubomba syosa isi Kyala ikulonda. Kangi Unkristu uyu atikusala ukubomba syene isi umwene ikulonda. Nalinga ukuti nsitabugholofu, loli pope ikulondiwa ukunangisya ukuti isi ikwinong’ona nukubomba pabumi bwake, sikukolelana nubwighane bwa Kyala. Panongwa yakuti afwele ubundu ubupya, ikulondiwa ukwiyipa fiyo ukuti afiketeghe ifindu bo muno Kyala ikufiketela. (Ef. 4:​22-24) Kangi panongwa yakuti amanyisiwe muno abaghile ukusalila kanunu ifindu ukufwana nindaghilo nifundo sya Yehova, atikulondiwa ukupeliwa indaghilo nyingi isyakuti sindongosyeghe. Linga asalile ububibi ifindu, ikulondiwa ukwiyula fiyo ukuti atendekesye.—1 Kor. 9:​26, 27.

5. Ngimba Unkristu unkeke mwambepo ikwaghana nindamyo siliku? (Baefesi 4:​14, 15)

⁵ Utubalilo tumo, Unkristu unkeke mwambepo, abaghile ukusyobiwa mwanakalinga panongwa ya “buyanja nubusyobi bwa kutusofya” kangi abaghile ukusyobiwa nabandu aba bikufumusya inkhani syabutungulu pa intaneti nabandu aba babulekile ubwanaloli. b (Belenga Baefesi 4:​14, 15.) Abaghile ukuya nubufi, ukwandisya imiywegho, ukukalala pamo ukubomba ifindu ifibibi linga ikugheliwa.—1 Kor. 3:3.

6. Nongwa yafiki tubaghile ukumfwanikisya Unkristu uyu ikukula mwambepo numwana unkeke? (Keta kangi ikithuzi.)

⁶ Bo muno tuketile pakwanda, Amalemba ghikufwanikisya ukukula mwambepo nukukula kwa mwana unkeke ukuti aye nkusi. Filipo ifindu fingi ifi umwana atikufimanya, yonongwa yake ikulondiwa ukuya numundu yumo unkusi ukuti andongosyeghe nukumfighilila. Mwakifwanikisyo, mama abaghile ukunkola umwanake unkeke ikiboko bo bikuloboka pansebo. Loli linga umwana uyu ikukula, mama abaghile ukundeka ukuti alobokeghe mwene. Loli pope ikuya pakukindilila ukunkumbusya ukuti aketeghe tasi imbali syosa linga amagalimoto ghakayako bo akali ukuloboka. Linga umwana uyu akulile, ikwepukagha  mwene kungozi bo isi. Bo muno sikuyila nabana abakeke aba bikulondiwa ubutuli bwa bandu abakusi ukuti bepuke kungozi, utubalilo twingi Unkristu unkeke mwambepo ikulondiwa ubutuli bwa Bakristu abakusi mwambepo ukuti epuke kukindu kilikyosa iki kibaghile ukonanga ubumanyani bwake na Yehova nukusala mwamahala ifindu. Loli linga Abakristu abakusi mwambepo bikusala pabene ifyakubomba, bikwinong’onela ifundo sya mu Baibolo nukusikonga.

7. Ngimba Abakristu abakusi mwambepo bope bikulondiwa ubutuli ubwakufuma kubangi?

⁷ Ngimba isi sikusanusya ukuti Unkristu unkusi mwambepo atikulondiwa ubutuli bwa mundu aliwesa? Hayi. Abakusi bope bikulondiwa ubutuli utubalilo tumo. Loli umundu unkeke mwambepo, abaghile ukulonda ukuti abangi bambule isyakubomba pamo ukuti asale ifyakubomba pamwene. Loli Unkristu unkusi mwambepo, ikubombela amahala na isi amanyile kubinake bo ikukumbuka ukuti Yehova ikulonda ukuti aliwesa apimbeghe “ki kitwalo kyake.”—Gal. 6:5.

8. Ngimba Abakristu abakusi mwambepo bikukindana munjila siliku?

⁸ Abandu abakusi batikuboneka mwakufwana itolo. Abakristu abakusi mwambepo bope bakindene pankhani yakunangisya utuyilo. Mwakifwanikisyo, bamo bamahala, bamo bakifu, bamo bakupa kangi bamo bakisa. Mwakongelelapo, linga Abakristu babili abakusi mwambepo baghene nindamyo iyakufwana itolo, babaghile ukusala ifindu mwakukindana loli ifi basalile fibaghile ukukolelana nifundo sya mu Baibolo. Isi sibaghile ukubombiwa, fiyofiyo linga ifi bikusala fikwendela amabyebye gha mundu. Yonongwa yake bakabaghila ukulongana panongwa yakuti bakindene amabyebye. Mmalo mwake, bikukindilila ukuya bakukolelana.—Rom. 14:10; 1 Kor. 1:10.

NGIMBA TUKULONDIWA UKUBOMBA ISYAFIKI UKUTI TUYE BAKRISTU BAKUSI MWAMBEPO?

9. Ngimba fikubombiwa fyene itolo ukuti umundu akuleghe mwambepo? Lingania.

⁹ Linga akabalilo kakindilepo, umwana ikukula. Loli ukuti umundu akule mwambepo, ikulondiwa ukubombapo simo. Mwakifwanikisyo, abakamu na balumbu bitu ku Korinti baghambilile amasyu amanunu, balyosiwe, balyambilile mbepo mwikemo, kangi bamanyile nyingi bo Pauli ikubamanyisya. (Imbo. 18:​8-11) Loli bo ifyinja fikindilepo, bamo bakakulagha mwambepo. (1 Kor. 3:2) Ngimba tubaghile ukubomba isyafiki ukuti isi sileke ukubombiwa kumyitu?

10. Ngimba tukulondiwa ukubomba isyafiki ukuti tukuleghe mwambepo? (Yuda 20)

¹⁰ Ukuti tuye bakusi mwambepo, ikyakwanda tukulondiwa ukuya nubwighane bwakuti tuye bakusi mwambepo. Bosa “abasitakumanya,” bikuketa ukuti kununu itolo ukukindilila ukuya bakeke mwambepo. Kangi bikuketa ukuti bakabaghila ukukula mwambepo. (Mbu. 1:22) Tutikulonda ukufwana numundu unkusi uyu ikulonda ukuti abapapi bake bansalileghe ifyakubomba pabumi bwake. Mmalo mwake, tukulonda ukusala ifyakubomba nukuketesya ukuti ubumanyani bwitu na Yehova bukukindilila ukukula. (Belenga Yuda 20.) Linga mukukindilila ukwiyipa ukuti mukule mwambepo, munsumeghe Yehova ukuti abatuleghe ukufwanisya “isi mukulonda na isi mukubomba.”—Filip. 2:13.

11. Ngimba Yehova atupele ifindu fiki ukuti fitutuleghe ukukula mwambepo? (Baefesi 4:​11-13)

¹¹ Yehova atikulonda ukuti tukuleghe mwambepo patwibene. Bosa aba bikubomba imbombo yabutimi niyakumanyisya nkipanga babaghile ukuntula umundu aliwesa ukuti ayeghe “nkusi” mwambepo, “ukufika pakighelelo kya bukusi ubupelelesye bwa Kristu.” (Belenga  Baefesi 4:​11-13.) Yehova ikututula kangi nambepo wake mwikemo ukuti tuyeghe “ninyinong’ono sya Kristu.” (1 Kor. 2:​14-16) Mwakongelelapo, Kyala atupele Amasyu amanunu ukuti atunangisye muno Yesu amanyisyilagha, ayobelagha namuno abombelagha ifindu pakabalilo aka abombagha ububombeli bwake pakisu kyapasi. Linga mukunkonga Yesu muno inong’onelagha nukubomba ifindu, mubaghile ukufwanisya ubwighane ubwakuya bakusi mwambepo.

NGIMBA IFYAKULYA IFIKAFU IFYAMWAMBEPO FIKUTUTULA BULEBULE UKUKUSYA UBUMANYANI BWITU NA YEHOVA?

12. Ngimba ‘ifimanyisyo isya Kristu isya bwandilo’ findu fiki?

¹² Ukuti tukule mwambepo, tukulondiwa ukumanyila nyingi isyakufwana na Kristu ukukinda isi twamanyile pakwanda. Fimo mwa findu ifi twamanyile pakwanda, fikongelelapo ukuchenja utuyilo twitu, ulwitiko, ulosyo nukusyuka kwa bafwe. (Hib. 6:​1, 2) Ifimanyisyo ifi fyo ifi Abakristu bosa bikusubila. Yonongwa yake untumiwa Peteri afiyobile ifimanyisyo ifi pakabalilo aka afumusyagha kukilundilo pa Pentekosti. (Imbo. 2:​32-35, 38) Tukulondiwa ukumanyila ifimanyisyo ifi ukuti tunkongeghe Kristu. Mwakifwanikisyo, Pauli ayobile ukuti linga tutikusubila ukuti ukusyuka kwisakuyako, ko kuti tukaya Bakristu banaloli. (1 Kor. 15:​12-14) Ukuti tukule mwambepo, tukulondiwa ukumanya nyingi pankhani iyi ukukinda isi tumanyile.

13. Ngimba tukulondiwa ukubomba isyafiki ukuti tusayiweghe nifyakulya ifikafu ifya mwambepo ifi fikuyobiwa pa Bahiburi 5:14? (Keta kangi ikithuzi.)

¹³ Mwakukindana nifimanyisyo fyapakwanda, ifyakulya ifikafu fikongelelapo ukusimanya indaghilo sya Yehova nifundo syake, isi sikututula ukumanya aminong’ono ghake. Ukuti ifyakulya ifi fitutule, tukulondiwa ukumanyila, ukwinong’onelapo, nukukonga isi tukumanyila Mmasyu gha Kyala. Linga tukubomba isi, ko kuti tukwimanyisya ukuti tusaleghe ifindu ifi fikunhobosya Yehova. c—Belenga Bahiburi 5:14.

14. Ngimba Pauli abatulile bulebule Abakorinti ukuti bakuleghe mwambepo?

¹⁴ Abakristu abakeke mwambepo bikutamiwa ukusala ifindu ifi Ibaibolo litikuyobapo  nasimo. Pankhani isi Ibaibolo litikuyobapo nasimo, bamo bikuketa ukuti babaghile ukubomba kilikyosa iki bikulonda. Bamo babaghile ukulalusya linga silipo indaghilo simo. Mwakifwanikisyo, sikunangisya ukuti Abakristu bamo ku Korinti bandalusyagha Pauli linga silipo indaghilo pankhani yakulya ifyakulya ifi fibikiwe ukuya ikemo kufifwani. Mmalo mwakubabula isyakubomba, Pauli ayobile ukuti aliwesa ali “nubwabuke” ubwakusala, ukufwana na mabyebye ghake. Abombile Amalemba ukuti abatule ukusala ifyakubomba ifi pabumalilo bakabaghile ukwanda ukwiyipa inongwa pamo ukulongiwa nabangi. (1 Kor. 8:​4, 7-9) Pauli abatulagha Abakorinti ukuti bakule mwambepo ukuti bamanyeghe bene ifyakubomba mmalo mwakuti umundu yumo yo abasalileghe ifyakubomba pamo ukwendela itolo indaghilo.

15. Ngimba Pauli abatulile bulebule Abakristu Abahiburi ukuti bakuleghe mwambepo?

¹⁵ Tukumanyilapo kangi ifundo iyingi iyakulondiwa fiyo mwakalata uyu Pauli abalembile Abakristu Abahiburi. Bamo balekile ukukula mwambepo; abene bali “ba kulonda ulukama, balekile ukulonda ifyakulya [ifya mwambepo] ifikafu.” (Hib. 5:12) Abene bakanile ukumanyila ifundo imbya isi Yehova abamanyisyagha ukwendela nkipanga. (Mbu. 4:18) Mwakifwanikisyo, bingi aba bali mutchalichi lya Kiyuda bakindililagha ukukonga indaghilo sya Mose nalinga ukuti pakindile ifyinja 30 ukufuma apa ilikemo lya Yesu lyamasisye indaghilo isi. (Rom. 10:4; Titi 1:10) Ifyinja 30 ifi, kali kabalilo kanunu akakuti Abayuda aba balingile Ubukristu bachenje aminong’ono ghabo. Yonongwa yake Pauli abatulile ukuti babupilikisye ubwanaloli ubukafu ubu abamanyisyagha. Kalata uyu, abatulile ukumanya ukuti injila imbya iyakumwiputila Yehova iyi Kristu alyandisye yo yili kanunu fiyo. Kangi kalata uyu abatulile ukuti baye bakifu ukufumusya nalinga ukuti Abayuda babasusyagha.—Hib. 10:​19-23.

NONGWA YAFIKI TUTIKULONDIWA UKWINONG’ONA UKUTI TUKULILE KALE MWAMBEPO?

16. Ukongelela pakukula mwambepo, ngimba tukulondiwa ukubomba kangi isyafiki?

¹⁶ Tukulondiwa ukwiyipa ukuti tukuleghe mwambepo nukukindilila ukuya bakusi mwambepo. Yonongwa yake tutikulondiwa ukwinong’ona ukuti tukulile kale mwambepo. (1 Kor. 10:12) Tukulondiwa ukuti ‘twigheleghe’  twibene ukuti tusimikisyeghe linga tukukindilila ukukula mwambepo.—2 Kor. 13:5.

17. Ngimba kalata uyu Pauli abalembile Abakolosi ikunangisya bulebule ukulondiwa kwa kukindilila ukuya bakusi mwambepo?

¹⁷ Mwakalata wake uyu abalembile Abakolosi, Pauli alingenie kangi ukulondiwa kwakukindilila ukuya bakusi mwambepo. Nalinga ukuti Abakristu ba ku Kolosi aba bali bakusi mwambepo, Pauli ababulile ukuti bayeghe maso ukuti bangasyobiwagha namahala gha nkisu. (Kolos. 4:12) Kangi Epafra, uyu fikunangisya ukuti abamenye kanunu aba bali nkipanga kya Kolosi, abiputilagha akabalilo kosa ukuti “bayeghe bapelelesye,” pamo bakusi mwambepo. (Kolos. 4:12) Ngimba tukumanyilako isyafiki? Pauli na Epafra basimenye ukuti umundu abaghile ukuya nkusi mwambepo linga ikwiyipa nukunsuma Kyala ukuti antule. Abene balondagha ukuti Abakolosi bakindilileghe ukuya bakusi mwambepo nalinga ukuti baghanagha nindamyo.

18. Ngimba findu fiki ifi fibaghile ukumbonekela Unkristu unkusi mwambepo? (Keta kangi ikithuzi.)

¹⁸ Pauli ababulile Abahiburi ukuti Unkristu unkusi mwambepo, abaghile ukonanga ubumanyani bwake na Kyala linga akaya maso. Linga Unkristu ikukana ukumpilikila Kyala, akabaghila ukuya nawe pabumanyani kangi akabaghila ukusileka imbibi syake pamo ukuhobokeliwa. Syakukasya fiyo ukuketa ukuti Abahiburi bapilikile. (Hib. 6:​4-9) Bule pakuyoba isya bakamu na balumbu aba bali bonywa pakwanda pamo balyepusiwe loli lino balapile? Ukulapa kwabo ukufuma pasi pandumbula, kukunangisya ukuti bakindene na aba Pauli abayobile mwakalata wake. Loli pope linga baghomokile kwa Yehova, bikulondiwa ukwambilila ubutuli ubu ikubapa. (Eze. 34:​15, 16) Abakulumba bakipanga babaghile ukunsuma unkamu pamo umulumbu unkusi mwambepo ukuti abatule ukukusya ubumanyani bwabo na Yehova.

19. Ngimba tukulondiwa ukusala ukubomba isyafiki?

¹⁹ Linga mukwiyipa fiyo ukuti mukuleghe mwambepo, mubaghile ukufwanisya. Mukindilileghe ukumanyila ifundo ingafu isya mwambepo, kangi utubalilo tosa mwinong’oneghe bo muno Yehova ikwinong’onela. Linga muli bakusi mwambepo, amukindilileghe ukubuka pankyeni nukukindilila mpaka mufikepo.