Napapiwe mu 1955, kangi ndiwabumalilo kubanyambala batatu. Nakulile kwitongo kwa kisu kya Finland, ku kighaba iki lino kikukoleliwa ukuti kaya ka Vantaa.

Mama wangu alyosiwe nukuya yumo wa Baketi ba Yehova bo ifyinja finandi fikindilepo bo une ngali ukupapiwa. Loli tata wangu asusyagha ubwanaloli kangi akamwitikisyagha mama ukuti atumanyisyeghe pamo ukubuka nanuswe kungomano. Yonongwa yake mama atumanyisyagha ifundo syakwanda isya mu Baibolo linga tata asokilepo.

Bo ndimwana, nalinganile Yehova. Mwakifwanikisyo, bo ndinifyinja 7, isiku limo ummanyisi wangu wakusukulu, akalele fiyo panongwa yakuti nakanile ukulya verilättyjä (Ifikondamoyo ifya ku Finland ifi babikangako ilopa). Umwene alingolile nikiboko kyake nukumfyenya mmasaya ukuti nighule kukanwa ukuti ingisye ikikondamoyo nkanwa. Nafwanisye ukuwisya pasi ikikondamoyo iki akolile.

Bo ndinifyinja 12, tata wangu afwile. Ukufuma apo, nalyandile ukubuka kungomano syakipanga. Abakamu na balumbu nkipanga balinangisye ulughano kangi isi syalindulile ukuti ngule mwambepo. Nalyandile ukubelenga Ibaibolo isiku lililyosa nukwiyipa ukumanyila amabuku ghitu. Panongwa yakwiyipa ukumanyila, nalyosiwe bo ndinifyinja 14, pa Ogasiti 8, 1969.

 Bo mmalile itolo isukulu, nalyandile ubupayiniya bwa kabalilo kosa. Kwa basabata banandi itolo, nabukile ukwakutula kuno kwalondiwagha ubutuli bwa bafumusi bingi ku Pielavesi kubupipi na ku Finland.

Ku Pielavesi, nalyaghene nundindwana uyu alisile kuya nkasi wangu, Sirkka. Nalikyelile nawe panongwa yakuti ali wakwiyisya kangi alinganile fiyo Yehova. Umwene akalondagha ukufumuka pamo ukufighana ifindu fyakumbili. Twesa twalondagha ukubomba nyingi pakumbombela Yehova kangi twalitendekisye ukubomba kilikyosa iki batusumile. Twalyeghene pa Malichi 23, 1974. Mmalo mwakubuka ku malo ghamo ukuti tukasangaluke, twabukile ukwakubomba ububombeli ku Karttula, kuno kwalondiwagha ubutuli bwa bafumusi bingi ba Bunyafyale.

Ukufuma itolo apa twalyeghene, Yehova anangisye ukuti ikuya pakutupwelelela mwakumbili linga tukubika ifindu fya Bunyafyale pamalo aghakwanda. (Mat. 6:33) Mwakifwanikisyo, bo tuli ku Karttula, tukalinayo igalimoto. Pakwanda, twendagha panjinga. Kangi utubalilo tumo kwatalalagha fiyo. Ukuti tufwanisye ukufumusya kufighaba ifyakubutali twalondiwagha igalimoto. Loli tukali nasyo indalama isyakuti tulile igalimoto.

Pakabalilo kamo, unkulu wangu alisile pakutuketa. Umwene atunangisye ikisa mwakutupa igalimoto yake. Unsonkho alipile kale. Twalondiwagha ukula ghene gha mafuta. Isi syapangisye ukuti tuye nigalimoto iyi twalondagha.

Yehova atunangisye ukuti ali nubudindo ubwakutupwelelela mwakumbili. Imbombo yitu yali yakubika ifindu fya Bunyafyale pamalo aghakwanda.

Mu 1978, bo tuli ku Sukulu ya Bapayiniya, Raimo Kuokkanen, a uyu ali yumo mwabamanyisi bitu, atukasisye ukuti tulembe ifomu ya ku Sukulu ya Gilead. Yonongwa yake twalyandile ukumanyila Ikizungu ukuti tusafwanisye ukwingila isukulu iyi. Loli mu 1980, bo tukali ukulemba ifomu, batukolile ukuti tukabombeghe ububombeli ku ofesi ya ku Finland. Pakabalilo kala, aba babombelagha pa Beteli, bakalondiwagha ukulemba ifomu ya ku Gilead. Loli twalondagha ukubombela kuno Yehova alondagha komma kuno uswe twalondagha.  Yonongwa yake twalitike bo batukolile. Nalinga syali bo ulu, twakindilile ukumanyila Ikizungu ukuti linga twisakupeliwa ulusako, tusalembe ifomu iya ku Sukulu ya Gilead.

Bo ifyanja finandi fikindilepo, Akabughatila Kakulongosya, kabapele ulusako aba bikubombela pa Beteli ukuti babaghile ukulemba ifomu iya ku Gilead. Mwanakalinga twalembile amafomu nalinga ukuti twahobokagha nububombeli bwa pa Beteli. Loli twalondagha itolo ukwakubomba kuno kwalondiwagha abafumusi bingi linga batwitikisye. Batukolile ku Sukulu ya Gilead kangi twamalile ifimanyilo fya kilasi lya nambala 79 mu Seputembala 1985. Batutumile ukuti tukabombeghe ububombeli ku Colombia.

Bo tuli ku Colombia, pakwanda batutumile ku ofesi. Naghelaghelagha ukufwanisya ububombeli bwangu, loli bo ikyinja kikindilepo, naketagha ukuti tukulondiwa ukuchenja. Kali kakwanda pabumi bwangu ukusuma ukuti bambepo ububombeli ubungi. Ukufuma apo, batutumile ukuti tukabombeghe ubumishonale ku tawuni ya Neiva, nkighaba kya Huila.

Utubalilo tosa nahobokagha nubufumusi. Bo ndi ku Finland, pakuya mpayiniya uyu akaya pabweghi, utubalilo tumo nafumusyagha ukwanda nulubunju ukufika namayolo. Pakuya mbumba iyi yeghene mwalululu, une na Sirkka twafumusyagha amasiku ghosa. Linga tukufumusya ku fighaba ifyakubutali, utubalilo tumo twaghonagha mugalimoto yitu. Isi syatutulagha ukuti tungendagha utubalilo twingi nukwitendekesya kanunu isiku ilyakukongapo.

Pakuya bamishonale, twahobokagha nububombeli bo muno twahobokelagha pakwanda. Ikipanga kyitu kyakulile, kangi abakamu na balumbu ba ku Colombia bali balughindiko, balughano kangi bandaghisyagha.

Kubupipi na ku Neiva kuno twabombagha ububombeli, ghaliko amatawuni ghamo kuno Abaketi bakaliko. Ninong’onelagha fiyo muno amasyu amanunu ghayagha pakufikila kufighaba ifi. Kangi panongwa yakuti kwali ifigabenga, kwali kwakutamya ukufika kufighaba ifi fiyofiyo ku bandu abahesya. Yonongwa yake niputagha ukuti aghiweko umundu yumo ukuti aye Nketi ku matawuni agha. Ninong’onagha ukuti umundu uyu ikulondiwa ukuya wa ku Neiva kangi amanyile ubwanaloli. Niputagha kangi ukuti linga osiwe aye nkamu nkusi mwambepo nukughomokela kumyabo ukuti akafumusyeghe. Loli Yehova yo ali ninjila inunu fiyo kukinda iyi ninong’onagha.

Bo akabalilo kakindilepo, nalyandile ukumanyila Ibaibolo nundumyana yumo uyu ingamu yake yo Fernando González. Umwene ikalagha ku Algeciras, yimo mwa matawuni agha Abaketi bakaliko. Fernando endagha amakilomita aghakukinda 50 ukubuka ku Neiva ukwakumanyila. Umwene itendekesyagha kanunu ikimanyilo kilikyosa kangi mwanakalinga alyandile ukufika pangomano syosa. Bo amanyile sabata uwakwanda, Fernando abakolile abandu ba mutawuni yakumyabo nukwanda ukubamanyisya isi amanyile mu Baibolo.

Fernando alyosiwe mu Januwale 1990, bo imyesi 6 yikindilepo ukufuma apa alyandile ukumanyila Ibaibolo. Ukufuma apo, alyandile ubupayiniya bwakabalilo kosa. Bo kwaghiwe Unketi yumoywene  ku Algeciras, iofesi yaketile ukuti kwakulondiwa ukuti yibatume abapayiniya abapadela kukighaba iki. Mu Febuluwale 1992, ikipanga kyalyandile mutawuni iyi.

Ngimba Fernando afumusyagha itolo ku tawuni yakumyabo? Hayi. Bo eghile itolo, umwene nunkasi wake babatumile ku San Vicente del Caguán, itawuni iyingi iyi Abaketi bakaliko. Bo bali kula batulile ukuti kwande ikipanga. Mu 2002, Fernando asaliwe ukuya wakwendela idela, kangi umwene nunkasi wake, Olga, bikukindilila ukubomba ububombeli ubwakwendela idela ukufika lino.

Ukufuma pakyakubombiwa iki, namanyile ukuti kwakulondiwa fiyo ukunsuma Yehova ndwiputo pankhani yimo iyakufwana nububombeli bwitu. Yehova ikubomba isi uswe tukabaghila ukufwanisya. Kangi yo mwenentondolo, ghukaya witu.—Mat. 9:38.

Mu 1990, batubulile ukuti twande ukwendela idela. Ikighaba kitu ikyakwanda ukwendela, kwali ko ku tawuni inywamu iya Bogotá. Twapasyagha fiyo ukuti tutikuya pakufwanisya ububombeli ubu. Une nunkasi wangu tukali namaluso. Kangi tukalisibile ukwikala mutawuni ya bandu bingi. Loli Yehova afwanisye isi afingile pa Bafilipi 2:13: apa pikuti, “Namanga Kyala yo uyu ikubomba mmyinu, isi mukulonda na isi mukubomba, ukufwana nubwighane bwake ubununu.”

Ukufuma apo, batutumile ukuti tukendeleghe idela ku kighaba kya Medellín, itawuni iyi njiyobile pakwanda. Abandu ba kula balisibile ukubomba ifyamiywegho mmisebo kangi bakapasyagha linga fikubombiwa. Mwakifwanikisyo, akabalilo kamo bo ngumanyila numundu yumo Ibaibolo, abandu balyandile ukulasana nindusu. Nalondagha ukuwa pasi, loli uyu namanyilagha nawe Ibaibolo akindilile ukubelenga pa palagilafu kisita kupasya. Bo amalile ukubelenga, anyamwike nukusoka panja. Kwakabalilo akanandi itolo, alingile nabana babili nukuyoba mbololo ukuti, “Pepani fiyo, nabukile pakubegha abanangu.”

Akabalilo akangi ubumi bwitu bwali pangozi. Bo tukufumusya kunyumba ni nyumba, unkasi wangu abopile ukwisa kumyangu, apasyagha fiyo. Umwene atile umundu yumo alimwimikile indusu. Isi syalinswighisye fiyo. Loli panyuma pake, twasyaghenie ukuti ikigabenga iki, kikalondagha ukundasa Sirkka loli kyalondagha ukundasa umundu yumo uyu ali pabupipi na Sirkka.

Bo akabalilo kakindilepo, twalekile ukutila ifyamiywegho. Twakasiwagha fiyo na Baketi abakukighaba iki aba baghanagha nindamyo inywamu bo isi. Twaketile ukuti linga Yehova abatulagha, ikuya pakututula nanuswe. Utubalilo tosa, twapilikilagha ubulongosi bwa bakulumba bakipanga bakukighaba iki, twayagha maso kangi ukukinda fyosa twansubilagha fiyo Yehova.

Bwanaloli ukuti ifyakubombiwa fimo, fikayagha fyakutilisya bo muno twinong’onelagha. Isiku limo nafwanagha ngupilika abakikulu babili bikulimbana panja panyumba iyi nalondagha ukubukapo. Ngalondagha ukuketa bo bikulimbana loli umwenenyumba alinsumile ukuti mbuke panyumba ya ku mbenu yake. Mwakukindana namuno ninong’onelagha, “ukulimbana uku”  fiyofiyo syali njuni sibili isi syeghelelagha ukulila kwa njuni isingi.

Mu 1997, balinsalile ukuti mmanyisyeghe mu Sukulu Yakumanyisya Ubunyafyale. b Utubalilo tosa nandaghisyagha panongwa yakumanyila amasukulu gha gulu. Loli ngalinong’onilepo ukuti mbaghile ukupeliwa ulusako ulwakuti mmanyisyeghe.

Ukufuma apo, nalyandile ububombeli ubwakuketesya ikighaba. Bo ububombeli ubu balekisye, naghomokile kububombeli ubwakwendela idela. Kwa fyinja ifyakukinda 30, nahobokagha fiyo ukuya mmanyisi kangi wakwendela idela. Nsayiwe fiyo panongwa yakubomba ububombeli bosa ubu. Loli kukali kupepe ukubomba isi. Isagha ndinganie.

Ndiwamaka kangi ndinulusubilo. Isi sindulile fiyo ukulimbana nindamyo. Loli utubalilo tumo, niyipagha fiyo ukutulapo ukuti ndendekesye ifindu nkipanga. Akabalilo kamo, nabakasisye bamo ukuti banangisanieghe ulughano nukwiyisya. Loli syakuswighisya ukuti pakabalilo kala, une ngali nutuyilo bo utu.—Rom. 7:​21-23.

Panongwa ya isi natoliwagha ukubomba, utubalilo tumo nawagha amaka. (Rom. 7:24) Akabalilo kamo, nalimbulile Yehova ndwiputo ukuti sibaghile ukuya kanunu kuti ndeke ububombeli bwa bumishonale nukughomokela ku Finland. Isiku ili kunamayolo nabukile kungomano syakipanga. Isi napilike pangomano, syalingasisye ukuti ngulondiwa ukukindilila nububombeli bwangu nukughelaghela ukuchenja isi ngutoliwa ukubomba. Pisiku ili, nakasiwe fiyo namuno Yehova alyamulile ulwiputo lwangu. Mwakongelelapo, ngunndaghisya fiyo Yehova muno alindulile ukulimbana na isi nasobagha.

Une na Sirkka tukundaghisya fiyo kwa Yehova panongwa yakutupa ulusako ulwakubombako ububombeli bwa kabalilo kosa pabumi bwitu. Kangi ngunndaghisya fiyo Yehova panongwa yakumba unkikulu walughano nunsubiliwa uyu kwa fyinja fyosa ifi.

Mwalululu nguya pakufwanisya ifyinja 70 kangi nisakuleka ububombeli bwa bumanyisi nubwakwendela idela. Loli isi sitikumbangisya ukuti nsulumanieghe. Nongwa yafiki? Panongwa yakuti ngusubila ukuti Yehova ikughindikiwa fiyo linga tukumbombela mwakwiyisya kangi tukumpala nindumbula yitu yosa nukunndaghisya. (Mika 6:8; Mar. 12:​32-34) Ukuti tunangisye ukuti tukungindika Yehova, tutikulondiwa ukuya bafumuke.

Linga ngukumbukila isya bubombeli bosa ubu mbombile kunyuma, ngumanya ukuti ngapeliwe panongwa yakuti ndiwakulondiwa fiyo ukubakinda abangi pamo ukuti napeliwe ulusako ulu panongwa yakuya namaluso. Mmalo mwake, Yehova alimbele ububombeli ubu panongwa yakisa kyake ikikulumba. Alimbele ulusako lwa bubombeli ubu nalinga ukuti nasobagha. Nsimenye ukuti nafwanisyagha ukubomba ububombeli bosa ubu pene panongwa yabutuli bwa Yehova. Munjila bo iyi, ubonywa bwangu bunangisye ukuti Kyala wamaka.—2 Kor. 12:9.