1-2. Nongwa yafiki Yehova atupangisye ukuti tuye mugulu lyake?

YEHOVA atukwabile twesa ukuti tuye mugulu lyake. Isi syakuhobosya fiyo! Abandu aba bali mumbumba iyi biyipile kwa Kyala kangi bikunangisya ulwitiko ukwendela mu ikemo lya Mwanake. Twesa tuli mumbumba yimoyene iya lusekelo. Tuli balusekelo fiyo lino, kangi tuli nulusako ulwa kwisakwikala nu bumi bwa bwila na bwila kali kumwanya pamo mu Paladaiso pa kisu kyapasi.

² Panongwa ya lughano lwake ulunywamu, Yehova atupele ulusako ulwakuti tuye mugulu lyake. (Yoh. 3:16) Uswe ‘twalyuliwe pantengo.’ (1 Kor. 6:20) Ukwendela nkitabulilo, Yehova atupangisye ukuti tuye pabumanyani ubununu fiyo numwene. Tukungindika fiyo Tata witu wakumwanya uyu apelile ifindu fyosa. Kangi ukufwana na isi twamanyile mu nkhani iyi yakindagha, Yehova yo Tata witu unnunu fiyo.

3. Ngimba malalusyo ghaliku agha tubaghile ukwilalusya? (Keta ibokosi ilyakuti “Ngimba Yehova Ammenye Kanunu Une?”)

³ Mwakufwana itolo nu ndembi yumo uwa Baibolo, nanuswe tubaghile ukwilalusya ukuti: ‘Ngimba ngungomolelagha ifiki Yehova kuli fyosa ifi ambele une?’ (Sal. 116:12) Ansala yo wakuti tukabaghila ukungomolela Tata witu wakumwanya. Loli ulughano lwake kumyitu lukutupangisya ukuti nanuswe tunganeghe. Untumiwa Yohani alembile ukuti: “Uswe tukunangisya ulughano, papo umwene atalile ukutughana.” (1 Yoh. 4:19) Ngimba mo munjila siliku isi tubaghile ukunangisya ukuti tunganile Tata witu wakumwanya?

4. Ukufwana na Yakobu 4:8, nongwa yafiki tukulondiwa ukuseghelela fiyo kwa Yehova?

⁴ Yehova ikulonda ukuti tusegheleleghe kumyake kangi tuyobesanieghe nawe. (Belenga Yakobu 4:8.) Umwene ikutukasya ukuti “tumilisyeghe itolo ndwiputo,” kangi ikupilika inyiputo syitu akabalilo kosa. (Rom. 12:12) Umwene atikwikolania pamo ukukatala ukutupilikisya. Kangi tukupilikisya kumyake mwakubelenga Ibaibolo na mabuku agha ghikulingania isya mu Baibolo, agha ghikututula ukuti tupilikisyeghe kanunu amasyu ghake. Tukupilikisya kangi kumyake mwakubikako amahala linga tuli pangomano. Mwakufwana itolo, namuno ukuyobesania kanunu kukubapangisya abana ukuti bayeghe pabupipi na bapapi babo, ukuyobesania na Yehova akabalilo kosa kukuya pakututula nanuswe ukuseghelela kumyake.

5. Ngimba tubaghile ukubomba isyafiki ukuti Yehova itikisyeghe inyiputo syitu?

⁵ Inong’onela muno inyiputo syitu kwa Yehova siyilile. Yehova ikulonda ukuti tumbuleghe syosa isi sili mundumbula yitu. (Sal. 62:8) Tukulondiwa ukwilalusya ukuti: ‘Ngimba inyiputo syangu sikufumila naloli pasi pandumbula pamo ngulemba pa malo ghamo?’ Kisita kukayika tunganile Yehova ukufumila pasi pandumbula kangi tukulonda ukuya nawe pabumanyani ubwamaka. Ukuti tubombe isi, tukulondiwa ukuyobesania nawe akabalilo kosa. Tumbuleghe muno tukwipilikila. Tumbuleghe isi sikutupangisya ukuti tuhobokeghe na isi sikutupangisya ukuti tungahobokagha. Tuyeghe nulusubilo ukuti tubaghile ukubwagha ubutuli kumyake.

6. Ngimba tukulondiwa ukubomba isyafiki ukuti tuseghelele kwa Yehova?

⁶ Ukuti tuseghelele fiyo kwa Tata witu wakumwanya, tukulondiwa ukukindilila ukuya nakayilo akakundaghisya. Tubaghile ukukolelana nuwamasalimo uyu alembile ukuti: “We Yehova Kyala wangu bo bwingi buki imbombo syako isya kuswighisya syope na si nyinong’ono syako kumyitu, akayapo yumo uyu afwene nanuwe; linga natighi nsifumusye nukusipanga ngabaghile nukufikapo ukusibala!” (Sal. 40:5) Tukubomba nyingi ukukinda ukundaghisya itolo kwa Yehova; tukunangisya ukuti tukundaghisya ukwendela m’masyu na mfyakubomba. Isi sikunangisya ukuti tukindene nabandu bingi amasiku agha. Tukwikala nkisu iki abandu bingi batikundaghisya pafindu fyosa ifi Kyala ikubabombela. Ikindu kimo iki kikunangisya ukuti tuli m’masiku “ghakubumalikisyo” kyo kyakuti abandu basita kuwa ulupi. (2 Tim. 3:1, 2) Tukukasiwa fiyo ukuti tungabombagha bo isi!

7. Ngimba Yehova ikulonda ukuti tubombeghe isyafiki, kangi nongwa yafiki?

⁷ Abapapi batikulonda ukuti abanabo balweghe ubwite loli bikulonda ukuti bayeghe balughano. Mwakufwana itolo, Yehova ikulonda ukuti ababombi bake bosa baghananeghe fiyo. Ulughano ulu tukunangisania, lukunangisya ukuti tuli Bakristu ba bwanaloli. (Yoh. 13:35) Tukukolelana nuwamasalimo uyu atile: “Keta, bo bununu buki, kangi bo bwikyele buki linga abanyamundu bali ndumbula yimoyene!” (Sal. 133:1) Linga tubaghanile abakamu nabalumbu bitu, tukunangisya ukuti tunganile fiyo Yehova. (1 Yoh. 4:20) Syakuhobosya fiyo ukuya mumbumba iya bakamu na balumbu aba “bololo kangi bali nikibabilisi”!—Ef. 4:32.

8. Ukufwana na 1 Yohani 5:3, nongwa yafiki tukumpilikila Yehova?

⁸ Yehova ikulonda ukuti abana babapilikileghe abapapi babo, kangi ikulonda ukuti nanuswe tumpilikileghe umwene. (Ef. 6:1) Umwene ikuhoboka fiyo linga tukumpilikila panongwa yakuti yo Mpeli witu, ikufighilila ubumi bwitu, kangi ali na mahala ukukinda umundu aliwesa. Loli ikifukwa ikyakulondiwa fiyo iki kikutupangisya ukuti tumpilikileghe Yehova kyo kyakuti, tunganile fiyo. (Belenga 1 Yohani 5:3.) Nalinga ukuti  tuli nififukwa fingi ifi tukulondiwa ukumpilikila Yehova, loli umwene atikutufimbilisya ukuti tumpilikileghe. Yehova ikutupa ubwabuke ubwakusala, yonongwa yake ikuhoboka fiyo linga tusalile ukumpilikila panongwa yakuti tunganile.

9-10. Nongwa yafiki kwakulondiwa ukukonga ifundo sya Kyala?

⁹ Abapapi bikulonda ukuti abanabo bafighililiweghe. Yonongwa yake abene bikubika indaghilo isi sikubafighilila abanabo. Linga abanabo bikukonga indaghilo syosa isi, bikunangisya ukuti bikubasubila fiyo abapapi babo kangi abene bikubaghindika. Syakulondiwa fiyo ukuti tunangisyeghe pabumi bwitu ukuti tusimenye kangi tukupilikila indaghilo syosa isya Tata witu wakumwanya. Linga tukubomba isi, tukunangisya ukuti tunganile Yehova kangi tukungindika, isi sikuya pakututula ukuti tusayiwe fiyo. (Yes. 48:17, 18) Loli, bosa aba bikunkana Yehova nifundo syake bikwifulasya bene.—Gal. 6:7, 8.

¹⁰ Linga tukubomba ifindu munjila iyi yikunhobosya Yehova, tukwifighilila ku findu ifi fibaghile ukutufulasya pamo fibaghile ukonanga ubumanyani bwitu na Kyala. Yehova amenye ifi tukulondiwa pabumi bwitu. Aurora, uyu ikwikala ku United States, atile, “Nsimenye ukuti linga tukumpilikila Yehova akabalilo kosa tukuya nubumi ubununu.” Isi syabwanaloli. Ngimba musayiwe bulebule panongwa yakupilikila ubulongosi bwa Yehova?

11. Ngimba ulwiputo lukututula bulebule?

¹¹ Ulwiputo lukututula ukuti tuyeghe bakupilikila nalinga ukuti ukubomba isi kukafu. Utubalilo tumo, tubaghile ukutamiwa ukuti tumpilikile  Yehova panongwa yakuti tuli batulanongwa loli utubalilo tosa tukulondiwa ukughelaghela ukuti tumpilikileghe. Uwamasalimo alinsumile Kyala ukuti: ‘Umbeghe indumbula ya kwininga ukuti yo yingasyeghe une.’ (Sal. 51:12) Denise, uyu mpayiniya wa kabalilo kosa, atile, “Linga ngetile ukuti kukafu ukupilikila ululaghilo lumo lwa Yehova, ngwiputa kumyake ukuti andule ukubomba inunu.” Nanuswe tuli nulusubilo ukuti Yehova ikuya pakwamula inyiputo syitu.—Luka 11:9-13.

12. Ukufwana na Baefesi 5:1, ngimba tukulondiwa ukubomba isyafiki?

¹² Belenga Baefesi 5:1. Panongwa yakuti tuli “bana baghaniwa,” ba Yehova, tukughelaghela ukunkonga. Tukunkonga umwene linga tukunangisya ulughano nikisa kangi linga tukubahobokela abangi. Linga bosa aba bakammanya Kyala bikuketa akayilo kitu akanunu, sibaghile ukubapangisya ukuti balonde ukumanya nyingi isyakufwana numwene. (1 Pet. 2:12) Abapapi bikulondiwa ukughelaghela ukubabombela abanabo bo muno Yehova ikubombela nanuswe. Linga abapapi bikunkonga Yehova, sibaghile ukubatula abanabo ukuti bope baye pabumanyani ubununu na Kyala.

13. Ngimba tukulondiwa ukubomba isyafiki ukuti tuye bakifu?

¹³ Utubalilo twingi abana bikwipilika kanunu nubutuli ubwakufuma ku batata babo kangi bikuya nulusekelo fiyo linga bikuyoba nabo. Mwakufwana itolo, tukuhoboka fiyo na Tata witu wakumwanya, Yehova, kangi tukulonda ukuti  abangi bammanye umwene. Twesa tukwipilika kanunu mundumbula yitu bo muno ipilikilagha Mwalafyale Davidi uyu alembile ukuti: ‘Indumbula yangu yikwitukifya mwa Yehova.’ (Sal. 34:2) Loli utubalilo tumo tubaghile ukuya nisoni ukuyoba isyakufwana na Yehova? Ngimba tubaghile ukunangisya bulebule ubukifu? Tukunangisya ubukifu mwakwinong’onela muno Yehova ikuyila nulusekelo linga tukufumusya isyakufwana numwene, kangi namuno abangi babaghile ukulwaghila ulusayo. Yehova ikuya pakututula ukuti tukindilile ukuya bakifu. Umwene abatulile Abakristu ba nkabalilo kakunyuma ukuti baye bakifu, kangi ikuya pakututula nanuswe.—1 Tes. 2:2.

14. Nongwa yafiki ukupela abafundiwa kwakulondiwa fiyo?

¹⁴ Yehova atikusala, kangi umwene ikuhoboka fiyo linga tukubanangisya abangi ulughano, kisita kwinong’onela kuno bakulile. (Imbo. 10:34, 35) Injila yimo inunu iyi tubaghile ukubanangisya ulughano abangi ko kubafumukisya amasyu gha Kyala. (Mat. 28:19, 20) Ngimba ifyakukongapo fyake fibaghile ukuya fyo filiku? Bosa aba bikupilika linga tukubafumukisya amasyu gha Kyala babaghile ukuchenja pabumi bwabo nukubwagha ubumi bwa bwila na bwila nkyeni.—1 Tim. 4:16.

15-16. Nongwa yafiki tukulondiwa ukuya balusekelo?

¹⁵ Yehova yo Tata walughano, yonongwa yake ikulonda ukuti imbumba yake yiyeghe yalusekelo. (Yes. 65:14) Filipo ififukwa fingi ifi tukulondiwa ukuya balusekelo amasiku agha, nalinga ukuti tukwaghana nindamyo nyingi. Mwakifwanikisyo, tuli nulusubilo losa ukuti Tata witu wakumwanya atughanile fiyo. Tuli nubumanyi bwa m’masyu gha Kyala. (Yere. 15:16) Tuli mumbumba iyi yinganile Yehova, tukukonga indaghilo syake kangi tukunangisania ulughano.—Sal. 106:4, 5.

¹⁶ Tubaghile ukukindilila ukuya balusekelo panongwa yakuti tuli nulusubilo ukuti ubumi bwisakuya bununu fiyo nkyeni. Tusimenye ukuti mwalululu Yehova ikuya pakubonanga abandu bosa ababibi kangi pasi pa Bunyafyale bwake ikisu kyosa ikyapasi kikwisakuya Paladaiso. Kangi tuli nulusubilo ukuti bosa aba bafwile bisakusyuka nukuya pampene nabaghaniwa babo. (Yoh. 5:28, 29) Sikwisakuya syalusekelo fiyo! Kangi ikindu ikyakulondiwa fiyo kyo kyakuti, tuli nulusubilo ukuti mwalululu aba bisakwikalagha kumwanya pamo pa kisu kyapasi bisakungindikagha Tata witu walughano, bisakumpalagha nukumwiputa munjila iyi ikuhoboka nayo.