1. Ngimba kayilo kaliku akanunu aka ababombi ba Yehova balinako?

KUNYUMA, Ibaibolo lyayobile ngani ukuti ababombi ba Kyala ‘bisakwiyipagha nindumbula yosa’ pakumbombela Yehova mwakukonga ululaghilo lwa Yesu. (Sal. 110:3) Ubusololi ubu bukufwanisiwa fiyo amasiku agha. Ikyinja kilikyosa, ababombi ba Yehova abakwiyipa bikumalila amaawala amamiliyoni mingi pambombo iyakufumusya. Abene batikwambilila indalama pa mbombo iyi loli bikubomba panongwa yakuti syo basalile ukubomba. Kangi bikwiyipa ukubatula abakamu na balumbu mwambepo na kumbili. Abakulumba na batuli ba kipanga bikwiyipa fiyo ukwitendekesya ingomano nu kuya namabulendo gha butimi ukuti babakasyeghe abakamu na balumbu. Nongwa yafiki ababombi ba Yehova bikubomba imbombo syosa isi? Panongwa yakuti banganile fiyo Yehova na bandu.​—Mat. 22:37-39.

2. Bo muno pikuyobela pa Baroma 15:1-3, ngimba kifwanikisyo kiliku iki Yesu anangisye?

² Yesu anangisyagha ikifwanikisyo ikinunu mwakubika ifyakulonda fya bangi pa malo aghakwanda ukukinda ifyake. Nanuswe tukughelaghela ukunkonga. (Belenga Baroma 15:1-3.) Bosa aba bikughelaghela ukunkonga, bikusayiwa fiyo. Yesu atile: “Nukupa nukwambilila kusayiwa ku kupa.”​—Imbo. 20:35.

3. Ngimba tukuya pakuyobesania isyafiki mu nkhani iyi?

³ Mu nkhani iyi, tukuya pakuyobesania ifindu fimo ifi Yesu abombile ukuti abatule abangi kangi tukuya pakuketa muno tubaghile ukunkongela. Tukuya pakuyobesania kangi muno  tubaghile ukubombela ukuti twiyipeghe ukubatula abangi.

4. Nongwa yafiki Yesu abikagha ifyakulonda fya bangi pa malo aghakwanda ukukinda ifyake?

⁴Yesu abatulagha abangi nalinga akuti akatalagha. Inong’onela isi Yesu abombile bo abandu bingi babukile ukuti bakaghane nawe mu mbali nkyamba, kubupipi na Kapernaumu. Yesu aliputile ikilo kyosa. Abaghile ukuti akatele fiyo, loli bo akibwene ikilundilo kya bandu, ikisa kilinkumwagha bo ikubaketa abalondo nababine. Umwene akababumbulwisye itolo loli ababulile inkhani iyakukasya fiyo, iyi yikumanyiwa ukuti, Ubufumusi bwa Pakyamba.​—Luka 6:12-20.

5. Ngimba imitu ya mbumba yikukonga bulebule ikifwanikisyo kya Yesu ikyakunangisya ulughano linga bakatele?

⁵Muno imitu ya mbumba yikunkongela Yesu. Inong’onela ikyakubombiwa iki: Bo afikile pakaya ukufuma ku mbombo, tata akatele fiyo. Panongwa yakuti akatele lumo ikwinong’ona isyakuti bangabombagha ukumanyila kwa pa mbumba namayolo, loli umwene ikunsuma Yehova ukuti ankasye ukuti alongosye ukumanyila kwa pa mbumba. Yehova amwile ulwiputo lwake, kangi bamanyile bo muno bikubombela sabata aliwesa. Abana bamanyile ikimanyilo ikyakulondiwa fiyo pisiku ili ikyakuti abapapi babo bikuketa ukuti ukumwiputa Yehova kyo kindu ikyakulondiwa fiyo pa bumi bwabo.

6. Yoba ikifwanikisyo ikya muno Yesu anangisyile ukwiyipa mwakubombela akabalilo kake ukuti abatule abangi.

⁶Yesu ayagha nakabalilo akakubatula abangi nalinga ukuti yope alondiwagha ukutusya pamwene. Ngimba mubaghile ukwinong’onela muno Yesu alipilikile bo apilike ukuti ummanyani wake Yohani Umosi bambolile untu? Yesu abaghile ukuti apalamasiwe fiyo. Ibaibolo likuti: “Umwene Yesu bo asipilike [isya Yohani], alinkwipaka mwiboti alinkusokapo alinkwakwiyekela pabusitabandu.” (Mat. 14:10-13) Tubaghile ukupilikisya inongwa iyi alondagha ukakuya mwene. Abandu bamo bikusala ukuti balile ku malo agha baliko bene. Loli Yesu akafwanisye ukuti aye ku malo gha pamwene. Ikilundilo kya bandu kilinkufika ku malo agha bo umwene akali ukufika. Ngimba  Yesu abombile bulebule? Umwene alinong’onile ifyakulondiwa fya bandu aba, kangi “ikisa kilinkumwagha” panongwa yabo. Yesu aketile ukuti abene balondiwagha ubutuli nukukasiwa na Kyala, yonongwa yake mwanakalinga alyandile ukubatula. Kangi, “alinkwanda ukubamanyisya si nyingi.”​—Mar. 6:31-34; Luka 9:10, 11.

7-8. Yoba ikifwanikisyo iki kikunangisya muno abakulumba balughano bikunkongela Yesu linga yumo ikulonda ubutuli nkipanga.

⁷Muno abakulumba bikunkongela Yesu. Tukundaghisya fiyo panongwa ya mbombo iyi abakulumba bikwiyipa ukubomba ukuti batutule. Abakamu na balumbu bingi nkipanga batikumanya imbombo syosa isi abakulumba bikubomba. Mwakifwanikisyo, linga pikulondiwa ubutuli bwa kukipatala, abakamu aba bali mu Komiti Iyakuyobesania na Bakipatala, mwanakalinga bikubatula abakamu na balumbu. Kangi utubalilo twingi ubutuli ubu bukulondiwa pakilo. Loli panongwa ya kisa ku bakamu na balumbu, abakulumba aba pampene ni mbumba syabo, bikubika ifyakulonda fya Bakristu abinabo pa malo aghakwanda ukukinda ifyabo.

⁸ Kangi abakulumba bikutulapo pambombo isyakuyenga Inyumba sya Bunyafyale ni findu ifingi ukongelelapo ukutula pa ngozi isyakipeliwa. Kangi abene bikwiyipa fiyo ukutumanyisya nu kutukasya. Abakamu bosa aba ni mbumba syabo tukulondiwa ukubandaghisya fiyo. Yehova abasaye panongwa ya ndumbula yabo iyakwiyipa iyi bikunangisya. Bwanaloli ukuti, mwakufwana itolo na aliwesa, abakulumba bikulondiwa ukubomba ifindu ifingi. Abene batikulondiwa ukumalila itolo akabalilo pa findu ifya Bunyafyale nukutoliwa ukuya nakabalilo akakusipwelelela imbumba syabo.

9. Ukufwana na Bafilipi 2:4, 5, ngimba kayilo kaliku aka Unkristu aliwesa ikulondiwa ukukusya?

⁹ Belenga Bafilipi 2:4, 5. Twe bamo tukaya bakulumba bakipanga, loli twesa tukulondiwa ukunkonga Yesu pa nkhani yakwiyipa. Ibaibolo likuti ‘muyeghe bo mbombi.’ (Filip. 2:7) Inong’onela isi tubaghile ukumanyilako ku vesi ili. Untumwa pamo umbombi unnunu, aghelaghelagha ukunhobosya umwalafyale wake. Panongwa yakuti tuli babombi ba Yehova kangi tukubatula abakamu na balumbu bitu, tukulonda ukuti tuye bakulondiwa fiyo kwa Yehova na kubakamu na balumbu bitu. Tubaghile ukubomba isi mwakwinong’onela amasakisyo aghakukongapo agha.

10. Ngimba malalusyo ghaliku agha tukulondiwa ukwilalusya?

¹⁰Mwinong’oneleghe fiyo isya kayilo kinu. Amwilalusye amalalusyo agha: ‘Ngimba ngunangisya bulebule ukwiyipa ukuti mbatule abangi? Mwakifwanikisyo, ngimba ngubomba bulebule linga bansumile ukuti numwendele unkamu unkangale pamo ngamweghe umulumbu unkangale ku nyumba yake nukubuka nawe kungomano? Ngimba ngwiyipa mwanakalinga ukutulapo ukutendekesya amalo agha tukupangilapo ingomano inywamu pamo ukutendekesya Inyumba ya Bunyafyale?’ Yehova ikuhoboka fiyo linga tukwiyipa ukubombela akabalilo, amaka ni findu fyosa ifi tuli nafyo ukuti tubatule abangi. Linga tukuketa ukuti tukulondiwa ukuchenja ifindu fimo, ngimba tubaghile ukubomba isyafiki?

11. Ngimba ulwiputo lubaghile ukututula bulebule ukuti twiyipeghe ukubatula abangi?

¹¹Mwiputeghe kwa Yehova ukufuma pasi pandumbula. Lumo mukuketa ukuti mukulonda ukuti mwiyipeghe fiyo ukubatula abangi loli mukutoliwa. Linga mo siyilile, mwiputeghe kwa Yehova ukufuma pasi pandumbula. Muyobeghe ubwanaloli. Mumbuleghe Yehova muno mukwipilikila nu kunsuma ukuti abape ‘ubwighane na maka ukuti mufwanisye syosa isi ikulonda.’​—Filip. 2:13.

12. Ngimba abakamu abakilumyana aba bosiwe babaghile ukufitula bulebule ifipanga fyabo?

¹² Linga muli bakilumyana kangi mosiwe, munsumeghe Yehova ukuti abatule ukubomba nyingi ukuti mubatuleghe abakamu na balumbu nkipanga kyinu. Mfisu fimo, abakulumba bingi ukukinda abatuli ba kipanga kangi bingi mwa batuli aba bakilumyana. Bo igulu likukindilila ukukula, tukulondiwa abakamu bingi abakilumyana ukuti babatuleghe abakulumba ukubapwelelela abakamu na balumbu nkipanga. Linga mukwiyipa ukuti mutulepo apa pikulondiwa ubutuli, mukuya pakuya balusekelo. Nongwa yafiki? Panongwa yakuti mukuya pakunhobosya Yehova, abakamu na balumbu bikuya pakuketa ukuti mukwiyipa ukubatula abangi kangi mukuya pakwikutisiwa panongwa yakubatula abangi.

13-14. Ngimba tukulondiwa ukubomba isyafiki ukuti tubatule abakamu na balumbu bitu? (Keta ikithuzi kya pakikope.)

¹³Muketeghe linga abangi bikulonda ubutuli. Untumiwa Pauli ababulile Abakristu aba ku Yudai ukuti: “Mungibwagha ukubomba imbombo inunu nisya bulilanisi, namanga amakemo bo ghaghagha gho ghikunkyela Kyala.” (Hib. 13:16) Ubu bwali bulongosi ubununu fiyo. Bo bambilile itolo kalata iyi, Abakristu ba ku Yudai balondiwagha ukutuleka utwaya twabo, amabizinesi ghabo na bakamu babo aba bakali Bakristu “nukwanda ukubopela mfyamba.” (Mat. 24:16) Pakabalilo kala, kwalikwakulondiwa fiyo ukuti abene batulaneghe. Linga pakwanda bakongagha ubulongosi bwa Pauli ubu mwakuyabana ifindu, kwabaghile ukuti kwali kupepe ukuti bisibile nakaya akakihesya.

 ¹⁴ Abakamu na balumbu bitu, utubalilo tumo batikutubula linga bikulonda ikindu kimo. Mwakifwanikisyo, lumo umulumbu afwile kangi andekile undume wake ali nikitima. Ngimba unkamu witu ikulondiwa ubutuli bwa fyakulya, indalama isyakwendela pamo ukuntula imbombo sya pakaya? Umwene abaghile ukuti atikulonda ukusuma ubutuli panongwa yakuti atikulonda ukututamya. Loli abaghile ukundaghisya fiyo linga tuntulile bo akali ukutusuma. Tunginong’onagha ukuti umundu yumo ikuya pakuntula pamo ukuti utubalilo tosa ikuya pakutubula ifi ikulonda. Amwilalusye ukuti, ‘Linga nali mundamyo bo iyi, ngimba butuli buliku ubu nayagha pakulonda?’

15. Ngimba tukulondiwa ukubomba isyafiki linga tukulonda ukuti tubatuleghe abangi?

¹⁵Muyeghe babumanyani. Kisita kukayika mubamenye abakamu na balumbu nkipanga kyinu aba utubalilo tosa bikubatula abangi. Abene batikutupangisya ukuti twinong’oneghe ukuti tukubatamya. Tusimenye ukuti utubalilo tosa bikwiyipa ukuti batutule kangi tubaghile ukuhoboka fiyo ukubomba bo muno abene bikubombela. Alan unkulumba uyu ali ni fyinja fya mma 40 ikulonda ukuya wabumanyani. Mwakwinong’onela ikifwanikisyo kya Yesu, Alan atile: “Yesu ikolaniagha fiyo, loli abandu aba fyinja ifyakukindanakindana bisagha kumyake kangi bakatilagha ukusuma ubutuli kumyake. Abene basimenye ukuti abapasikisyagha fiyo. Ngulonda ukukonga ikifwanikisyo kya Yesu ukuti abandu baketeghe ukuti ndi wabumanyani kangi ngubapasikisya abangi.”

16. Ngimba ukukonga ifundo iyi yili pa Salimo 119:59, 60 kubaghile ukututula bulebule ukufwanisya ukunkonga Yesu?

¹⁶ Tutikulondiwa ukuwa amaka linga tukutoliwa  ukunkonga Yesu. (Yak. 3:2) Ummanyili akabaghila ukumanya nyingi ukukinda ummanyisi wake. Loli linga ikumanyila pa isi ikusoba nu kughelaghela ukunkonga ummanyisi wake, umwene ikuya pakufwanisya ukubomba kanunu. Mwakufwana itolo, linga tukukonga isi tukumanyila mu Baibolo pakumanyila kwa pa twibene, nu kughelaghela ukuchenja isi tukusoba, tukuya pakufwanisya ukunkonga Yesu.​—Belenga Salimo 119:59, 60.

17-18. Linga tukukonga akayilo ka Yesu akakwiyipa, ngimba tukuya pakusayiwa bulebule?

¹⁷ Linga tukwiyipa ukubatula abangi, abene bikuya pakukasiwa ukubomba mwakufwana itolo. Unkulumba yumo uyu ingamu yake yo Tim atile: “Abakamu bamo abakilumyana bimikiwe ukuya batuli nkipanga. Ikifukwa kimo kyo kyakuti bikuketa muno abangi bikunangisyila ukwiyipa ukuti babatule abangi kangi bope bikulonda ukubomba mwakufwana itolo. Abakamu bakilumyana aba, bikutula nkipanga kyitu kangi bikubatula abakulumba.”

¹⁸ Amasiku agha abandu bingi bali nakayilo akakwibona. Loli ababombi ba Yehova bakindene fiyo nabo. Tumanyile muno Yesu anangisyilagha ukwiyipa, kangi tukukasiwa ukuti tukongeghe ikifwanikisyo kyake. Tusimenye ukuti tukabaghila ukufwanisya ukubomba ifindu bo muno Yesu abombelagha loli tubaghile ‘ukukonga mmakato ghake.’ (1 Pet. 2:21) Linga tukughelaghela ukukonga akayilo ka Yesu akakwiyipa, nanuswe tukuya pakuya balusekelo panongwa yakuti tukunhobosya Yehova.