PASI pandaghilo isi Yehova abapele Abaisreli ukwendela mwa Mose, ingunda ni ngungubiya sitikisiwagha ukubikiwa ukuya ikemo kwa Yehova. Injuni ibili syosa isi syayobiwagha mu ndaghilo isya makemo kangi injuni yimo yabikiwagha mmalo mwanine. (Levi. 1:14; 12:8; 14:30) Nongwa yafiki ukubomba isi kwali kwakutula? Ikifukwa kimo kyali kyakuti ingunda sikaghiwagha utubalilo twingi. Nongwa yafiki?

Ingunda sikwaghiwa fiyo ku Israeli akabalilo ka myesi imipyano. Umwesi ghulighosa uwa Okutobala linga ku Israeli kwandile ukuthalala, sikusama ukubuka ku fisu ifipyano ifya kululu, kangi sikughomokela ku Israeli linga kwandile kangi ukupya. (Lwimbo. 2:11, 12; Yere. 8:7) Isi sikusanusya ukuti nkabalilo ka kunyuma, kwayagha kukafu ku Baisraeli ukubika ingunda ukuya ikemo nkabalilo akatalalano.

Ingungubiya, utubalilo twingi sitikusama ukubuka ku malo aghangi yonongwa yake syaghiwagha ku Israeli ikyinja kilikyosa. Kangi, utubalilo twingi abandu bafughagha ingungubiya. (Fwanikisya na Yoh. 2:14, 16.) Ukufwana ni buku ilyakuti Bible Plants and Animals, “ntwaya na matawuni ghosa gha ku Palestine mwaghiwagha ingungubiya isyakufugha. Umundu aliwesa pakaya kake ayagha nikibagha ikyakusungilamo injuni.”​—Fwanikisya na Yesaya 60:8.

Yehova anangisye ukuti walughano kangi wakisa mwakwitikisya injuni ukuya makemo isi utubalilo twingi syaghiwagha ku Israeli ikyinja kilikyosa.